1. Akɔdin to Malakay 3:16, us buk Jiova dɔn de rayt? Wetin de insay de?

 FƆ LƆNG lɔng tɛm, Jiova dɔn de rayt wan spɛshal buk. Dis buk gɛt nem dɛn we bigin wit di fɔs fetful witnɛs we na Ebɛl. * (Lyuk 11:​50, 51) Frɔm da tɛm de, Jiova dɔn ad nem dɛn to di buk, ɛn tide i gɛt bɔku bɔku nem dɛn. Insay di Baybul, dɛn de kɔl da buk de, “di buk fɔ mɛmba,” “di buk we de sho se pɔsin go gɛt layf,” ɛn “ di skrol we de sho se pɔsin go gɛt layf.” Insay dis atikul, wi go yuz di nem “di buk we de sho se pɔsin go gɛt layf.”—Rid Malakay 3:16; Rɛv. 3:​5; 17:​8.

2. Udat dɛn nem dɛn de na di buk we de sho se pɔsin go gɛt layf? Wetin wi go du fɔ mek wi nem de insay da buk de?

² Dis spɛshal buk gɛt di nem dɛn fɔ ɔl di pipul dɛn we de wɔship Jiova wit dip rɛspɛkt ɛn we rili valyu in nem. Dɛn go gɛt di chans fɔ gɛt layf we go de sote go. Tide, wi go ebul mek wi nem de na da buk de if wi tray fɔ gɛt tayt padi biznɛs wit Jiova bay we wi biliv di day we in Bɔypikin Jizɔs Krays bin day. (Jɔn 3:​16, 36) Wi ɔl want mek wi nem de na da buk de, ilɛk wi op na fɔ go de na ɛvin ɔ fɔ de na dis wɔl.

3-4. (a) Fɔ se wi go gɛt layf we go de sote go if wi nem de naw na di buk we de sho se pɔsin go gɛt layf? Ɛksplen. (b) Wetin wi go tɔk bɔt insay dis atikul ɛn di nɛks wan?

³ Fɔ se dis min se ɔl di wan dɛn we dɛn nem rayt na dis buk go gɛt layf we go de sote go? Wi si di ansa to da kwɛstyɔn de insay di wɔd dɛn we Jiova bin tɛl Mozis, we de na  Ɛksodɔs 32:33. Jiova bin se: “Udat sin agens [mi] nain nem [a] de pul kɔmɔt na [mi] buk.” So, i pɔsibul fɔ mek dɛn wep ɔ ires di nem dɛn we rayt na da buk de naw, bikɔs i tan lɛk se Jiova rayt dɛn nem dɛn de fɔs wit pɛnsil. (Rɛv. 3:​5, futnot) Wi fɔ mek shɔ se wi nem kɔntinyu fɔ de na da buk de te i rayt de sote go, lɛk se na pen dɛn rayt am wit.

⁴ Sɔntɛm dis go mek wi aks sɔm kwɛstyɔn dɛn lɛk: Wetin di Baybul se bɔt di wan dɛn we dɛn nem rayt na di buk we de sho se pɔsin go gɛt layf ɛn di wan dɛn we dɛn nem nɔ rayt de? Ustɛm di wan dɛn we dɛn nem kɔntinyu fɔ de na da buk de go gɛt layf we go de sote go? Wetin go apin to di wan dɛn we dɔn day we nɔ bin ɛva gɛt di chans fɔ lan bɔt Jiova? Fɔ se i pɔsibul fɔ mek dɛn rayt dɛn nem dɛn na da buk de? Wi go ansa dɛn kwɛstyɔn dɛn ya insay dis atikul ɛn di nɛks wan.

UDAT DƐN NEM DƐN DE NA DI BUK?

5-6. (a) Akɔdin to Filipians 4:​3, udat na sɔm pipul dɛn we dɛn nem rayt na di buk we de sho se pɔsin go gɛt layf? (b) Ustɛm dɛn go rayt dɛn nem dɛn sote go na di buk we de sho se pɔsin go gɛt layf?

⁵ Udat dɛn nem dɛn de na dis buk we de sho se pɔsin go gɛt layf? Fɔ ansa da kwɛstyɔn de, lɛ wi tɔk bɔt fayv difrɛn grup dɛn. Insay dɛn grup dɛn ya, sɔm dɛn de we dɛn nem rayt insay di buk we de sho se pɔsin go gɛt layf, bɔt ɔda wan dɛn nem nɔ rayt de.

⁶ Di fɔs grup na di wan dɛn we Gɔd dɔn pik fɔ rul wit Jizɔs na ɛvin. Fɔ se dɛn nem dɛn de naw na di buk we de sho se pɔsin go gɛt layf? Yɛs. Akɔdin to wetin apɔsul Pɔl bin se to in “kɔmpin wokman dɛn” na Filipay, di anɔyntɛd Kristian dɛn we Gɔd dɔn pik fɔ go rul wit Jizɔs, dɛn nem dɛn de naw na di buk we de sho se pɔsin go gɛt layf. (Rid Filipians 4:​3.) Bɔt fɔ mek dɛn  nem dɛn kɔntinyu fɔ de na da buk de, dɛn fɔ kɔntinyu fɔ fetful to Jiova. Dɔn we dɛn go gɛt dɛn las stamp, ilɛk na bifo dɛn day ɔ bifo da big big trɔbul, dɛn nem dɛn go de na da buk de sote go.—Rɛv. 7:​3.

7. Wetin wi ɔndastand frɔm Rɛvɛleshɔn 7:​16, 17, bɔt di tɛm we di bɔku bɔku pipul dɛn we de pat ɔf di ɔda ship dɛn nem dɛn go de na di buk we de sho se pɔsin go gɛt layf?

⁷ Di sɛkɔn grup na di bɔku bɔku pipul dɛn we de pat ɔf di ɔda ship dɛn. Fɔ se dɛn nem dɛn de naw na di buk we de sho se pɔsin go gɛt layf? Yɛs. Fɔ se dɛn nem dɛn go kɔntinyu fɔ de na dis buk afta dɛn sev di tɛm fɔ Amagɛdɔn? Yɛs. (Rɛv. 7:​14) Jizɔs bin tɔk se dɛn pipul dɛn ya we tan lɛk ship “go gɛt layf we go de sote go.” (Mat. 25:​46) Bɔt dɛn pipul dɛn de we go sev di tɛm fɔ Amagɛdɔn nɔ go gɛt layf we go de sote go wantɛm wantɛm. Dɛn nem dɛn go kɔntinyu fɔ de na di buk we de sho se pɔsin go gɛt layf, lɛk se na pɛnsil dɛn rayt am wit. Insay di Wan Tawzin Ia, Jizɔs “go bi dɛn shɛpad ɛn gayd dɛn to spriŋ wata dɛn we de gi layf.” Di wan dɛn we go fala Jizɔs ɛn we dɛn go jɔj as fetful pipul dɛn to Jiova, dɛn nem dɛn go de sote go na di buk we de sho se pɔsin go gɛt layf.—Rid Rɛvɛleshɔn 7:​16, 17.

8. Udat dɛn nem dɛn nɔ de na di buk we de sho se pɔsin go gɛt layf? Wetin go apin to dɛn?

⁸ Di tɔd grup na di got dɛn we dɛn go dɔnawe wit insay Amagɛdɔn. Dɛn nem dɛn nɔ de na di buk we de sho se pɔsin go gɛt layf. Jizɔs tɔk se dɛn wan ya “go day ɛn dɛn nɔ go ɛva gɛt layf igen.” (Mat. 25:​46) Jiova in spirit bin ɛp Pɔl fɔ tɛl wi se “di Masta go jɔj dɛn sem wan ya. I go pɔnish dɛn bay we i go dɔnawe wit dɛn kpatakpata.” (2 Tɛs. 1:​9; 2 Pit. 2:​9) Na di sem tin go apin to di wan dɛn we dɔn de sin agens di oli spirit bay wilful wan. Dɛn go dɔnawe wit dɛn kpatakpata, dɛn nɔ go gɛt layf we go de sote go. So, dɛn nɔ go gɛt layf bak. (Mat. 12:​32; Mak 3:​28, 29; Ibru. 6:​4-6) Lɛ wi tɔk naw bɔt tu grup dɛn we go gɛt layf bak na di wɔl.

DI WAN DƐN WE GO GƐT LAYF BAK

9. Akɔdin to wetin de na Akt 24:​15, us tu grup dɛn go gɛt layf bak na di wɔl? Wetin na di difrɛns bitwin dɛn tu grup dɛn ya?

⁹ Di Baybul tɔk bɔt tu grup dɛn we go gɛt layf bak ɛn gɛt di chans fɔ de sote go na di wɔl. Dɛn grup dɛn de na, “di wan dɛn we du wetin rayt” ɛn “di wan dɛn we nɔ du wetin rayt.” (Rid Akt 24:​15.) “Di wan dɛn we du wetin rayt” na di wan dɛn we bin sav Jiova fetful wan we dɛn bin de alayv. Bɔt “di wan dɛn we nɔ du wetin rayt” na di wan dɛn we nɔ bin de sav Jiova. Infakt, bɔku pan dɛn nɔ bin de du wetin rayt na Jiova in yay. Bikɔs dɛn tu grup dɛn de go gɛt layf bak, fɔ se dat min se dɛn nem dɛn rayt na di buk we de sho se pɔsin go gɛt layf? Fɔ ansa da kwɛstyɔn de, lɛ wi tɔk bɔt dɛn tu grup dɛn ya wan bay wan.

10. Wetin mek “di wan dɛn we du wetin rayt go gɛt layf bak”? Us ɔnɔ sɔm pan dɛn go gɛt? (Rid bak di atikul na dis Wachtawa we nem “Kwɛstyɔn dɛn we Pipul dɛn Kin Aks,” we tɔk bɔt di wan dɛn we go gɛt layf bak na di wɔl.)

¹⁰ “Di wan dɛn we du wetin rayt” na di nɔmba 4 grup. Bifo dɛn day, dɛn nem dɛn bin dɔn rayt na di buk we de sho se pɔsin go gɛt layf. Bɔt fɔ se dɛn pul dɛn nem dɛn na da buk de we dɛn day? Nɔ-o. Dɛn nɔ pul dɛn nem dɛn na da buk de bikɔs dɛn stil de “alayv” na Jiova in maynd. Jiova “nɔto Gɔd fɔ dayman dɛn, bɔt in na Gɔd fɔ di wan dɛn we gɛt layf, bikɔs to am dɛn ɔl de alayv.” (Lyuk 20:​38) Dis min se  we di wan dɛn we du wetin rayt go gɛt layf bak na di wɔl, dɛn nem dɛn go rayt na di buk we de sho se pɔsin go gɛt layf, pan ɔl we fɔs i go tan lɛk “na pɛnsil” dɛn rayt am wit. (Lyuk 14:​14) Wan dawt nɔ de se sɔm pan dɛn pipul dɛn ya we go gɛt layf bak go gɛt di ɔnɔ fɔ wok as “prins dɛn na di wan ol wɔl.”—Sam 45:16, NWT.

11. Wetin “di wan dɛn we nɔ du wetin rayt” go nid fɔ lan bifo dɛn rayt dɛn nem dɛn na di buk we de sho se pɔsin go gɛt layf?

¹¹ Faynali, lɛ wi tɔk bɔt di nɔmba fayv grup, we na “di wan dɛn we nɔ du wetin rayt.” Sɔntɛm bikɔs dɛn nɔ bin no bɔt Jiova in lɔ dɛn, dat bin mek dɛn nɔ bin de du wetin rayt bifo dɛn day. So dɛn nem dɛn nɔ de na di buk we de sho se pɔsin go gɛt layf. Bɔt we Gɔd go gi dɛn layf bak, i go gi dɛn chans fɔ mek dɛn nem dɛn go de na da buk de. Dɛn wan dɛn ya “we nɔ du wetin rayt” go rili nid ɛp. Bifo dɛn day, sɔm pan dɛn bin de du wikɛd tin dɛn. So dɛn go nid fɔ lan aw fɔ liv akɔdin to Jiova in lɔ dɛn. Fɔ mek dɛn go lan bɔt dat, Gɔd in Kiŋdɔm go dayrɛkt di tichin wok we pas ɔl di ɔda tichin wok dɛn we dɔn ɛva apin na di wɔl.

12. (a) Udat dɛn go tich di wan dɛn we nɔ du wetin rayt? (b) Wetin go apin to di wan dɛn we nɔ gri fɔ du di tin dɛn we dɛn lan?

¹² Udat go tich di wan dɛn we nɔ du wetin rayt? Na di bɔku bɔku pipul dɛn ɛn di wan dɛn we du wetin rayt we go gɛt layf bak. Fɔ mek di wan dɛn we nɔ du wetin rayt dɛn nem dɛn go de na di buk we de sho se pɔsin go gɛt layf, dɛn go nid fɔ gɛt padi biznɛs wit Jiova ɛn gi dɛn layf to am. Jizɔs Krays ɛn di anɔyntɛd Kristian dɛn go tek tɛm wach frɔm ɛvin fɔ si if dɛn wan dɛn ya we nɔ du wetin rayt go du di tin dɛn we dɛn de tich dɛn. (Rɛv. 20:​4) Dɛn nɔ go alaw ɛni wan pan dɛn we nɔ gri fɔ fala di tin dɛn we dɛn de lan fɔ kɔntinyu fɔ de alayv, ilɛksɛf na 100 ia dɛn ol. (Ayz. 65:20) Jiova ɛn Jizɔs de rid mɔtalman at ɛn dɛn go mek shɔ se  dɛn nɔ alaw ɛnibɔdi fɔ pwɛl di nyu wɔl.—Ayz. 11:9; 60:18; 65:25; Jɔn 2:25.

DI WAN DƐN WE GO GƐT LAYF BAK FƆ LIV ƐN DI WAN DƐN WE GO GƐT LAYF BAK FƆ MEK DƐN JƆJ DƐN

13-14. (a) Aw wi bin ɔndastand Jizɔs in wɔd dɛn we de na Jɔn 5:​29 trade? (b) Wetin wi nid fɔ mɛmba bɔt dɛn wɔd dɛn de?

¹³ Jizɔs bin tɔk bak bɔt di wan dɛn we go gɛt layf bak na dis wɔl. Fɔ ɛgzampul, i bin tɔk se: “Di tɛm de kam we ɔl di wan dɛn we de na di grev dɛn we Gɔd de mɛmba go yɛri di Pikin in vɔys ɛn kɔmɔt na do; di wan dɛn we bin du gud tin dɛn go gɛt layf bak fɔ liv, ɛn di wan dɛn we bin de du wikɛd tin dɛn go gɛt layf bak fɔ mek dɛn jɔj dɛn.” (Jɔn 5:​28, 29) Wetin Jizɔs bin min?

¹⁴ Trade, wi bin ɔndastand Jizɔs in wɔd dɛn fɔ min di tin dɛn we di wan dɛn we go gɛt layf bak go du afta dɛn gɛt layf bak; dat na, sɔm go gɛt layf ɛn du gud tin dɛn ɛn ɔda wan dɛn go gɛt layf ɛn du wikɛd tin dɛn. Bɔt, notis se Jizɔs nɔ tɔk se di wan dɛn we jɔs kɔmɔt na di grev dɛn go du gud tin dɛn ɔ go du wikɛd tin dɛn. I yuz wɔd dɛn fɔ tɔk bɔt tin dɛn we dɔn pas. I tɔk bɔt di wan dɛn we “bin du gud tin dɛn” ɛn di wan dɛn we “bin de du wikɛd tin dɛn.” Dis sho se dɛn du dɛn tin dɛn ya bifo dɛn day. Dat mek sɛns, nɔto so? Bikɔs dɛn nɔ go alaw ɛnibɔdi fɔ du wikɛd tin dɛn na di nyu wɔl. Di wan dɛn we nɔ du wetin rayt go mɔs dɔn du dɛn wikɛd tin dɛn ya bifo dɛn day. So, wetin Jizɔs min we i tɔk bɔt di wan dɛn we “go gɛt layf bak fɔ liv” ɛn di wan dɛn we “go gɛt layf bak fɔ mek dɛn jɔj dɛn”?

15. Udat dɛn “go gɛt layf bak fɔ liv”? Wetin mek?

¹⁵ Di wan dɛn we bin du wetin rayt bifo dɛn day, go “gɛt layf bak fɔ liv” bikɔs dɛn nem dɛn go ɔlrɛdi de na di buk we de sho se pɔsin go gɛt layf. Dis min se di layf we “di wan dɛn we bin du gud tin dɛn” go gɛt akɔdin to Jɔn 5:​29 na di sem wit di layf we “di wan dɛn we bin du wetin rayt” go gɛt akɔdin to Akt 24:​15. Dis we aw wi ɔndastand gri wit wetin de na Romans 6:​7, we se: “We pɔsin day, i dɔn fri frɔm in sin.” We pipul dɛn we de du wetin rayt day, Jiova de fɔgiv dɛn fɔ di sin dɛn we dɛn bin dɔn kɔmit, bɔt i go mɛmba ɔl di fetful tin dɛn we dɛn bin de du we dɛn bin de alayv. (Ibru. 6:​10) Bɔt as wi no, dɛn wan dɛn ya we bin de du wetin rayt we go gɛt layf bak go nid fɔ kɔntinyu fɔ fetful to Jiova so dat dɛn nem dɛn go kɔntinyu fɔ de na di buk we de sho se pɔsin go gɛt layf.

16. Wetin i min fɔ mek pipul dɛn “gɛt layf bak fɔ mek dɛn jɔj dɛn”?

¹⁶ Wetin go apin to di wan dɛn we bin de du wikɛd tin dɛn bifo dɛn day? Pan ɔl we Jiova dɔn fɔgiv dɛn fɔ dɛn sin we dɛn day, dɛn nɔ bin de sav Jiova we dɛn bin de alayv. Dɛn nem dɛn nɔ de na di buk we de sho se pɔsin go gɛt layf. So, di layf we di wan dɛn we “bin de du wikɛd tin dɛn” go gɛt bak na di sem lɛk di layf we di wan dɛn we “nɔ du wetin rayt” go gɛt bak akɔdin to Akt 24:​15. Dɛn go “gɛt layf bak fɔ mek dɛn jɔj dɛn.” * Dat min se Jizɔs go de tek tɛm wach di wan dɛn we nɔ du wetin rayt. (Lyuk 22:​30) Afta sɔm tɛm go dɔn pas, Jizɔs go no if dɛn fit fɔ mek dɛn nem de na di buk we de sho se pɔsin go gɛt layf. Di wangren tin we go mek Jiova rayt dɛn  nem na di buk we de sho se pɔsin go gɛt layf na we dɛn lɛf di wikɛd tin dɛn we dɛn bin de du ɛn gi dɛn layf to Jiova.

17-18. Wetin ɔl di wan dɛn we go gɛt layf bak fɔ liv na di wɔl go nid fɔ du? Wetin na di tin dɛn we dɛn “du” we Rɛvɛleshɔn 20:​12, 13 tɔk bɔt?

¹⁷ Ilɛk di wan dɛn we go gɛt layf bak bin du wetin rayt ɔ dɛn nɔ bin du wetin rayt, dɛn go nid fɔ obe di lɔ dɛn we go de na di nyu skrol we dɛn go opin insay di 1,000 ia. Apɔsul Jɔn bin tɔk wetin i si na wan vishɔn. I se: “A si di wan dɛn we dɔn day, di kɔmɔn wan dɛn ɛn di wan dɛn we gɛt ay pozishɔn, tinap bifo di tron, ɛn Gɔd opin skrol dɛn. Bɔt i opin ɔda skrol; na di skrol we de sho se pɔsin go gɛt layf. Dɛn yuz di tin dɛn we rayt na di skrol fɔ jɔj di wan dɛn we dɔn day akɔdin to wetin dɛn du.”—Rɛv. 20:​12, 13.

¹⁸ Wetin na di tin dɛn we dɛn wan dɛn ya we go gɛt layf bak go “du” we dɛn go yuz fɔ jɔj dɛn? Fɔ se na di tin dɛn we dɛn bin de du bifo dɛn day? Nɔ! Mɛmba se dɛn bin dɔn fri frɔm dɛn sin dɛn de we dɛn bin day. So, di tin dɛn we “dɛn du” nɔ go bi di tin dɛn we dɛn bin de du we dɛn bin de alayv. Bɔt, i go mɔs bi se na di tin dɛn we dɛn go du afta dɛn dɔn gɛt trenin na di nyu wɔl. Ivin fetful man dɛn lɛk Noa, Samiɛl, Devid, ɛn Daniɛl go gɛt fɔ lan bɔt Jizɔs Krays ɛn sho se dɛn gɛt fet pan in sakrifays. If dɛn man dɛn ya go nid fɔ lan ɔl dɛn tin dɛn ya, dat min se di wan dɛn we nɔ du wetin rayt go nid fɔ lan mɔ tin dɛn.

19. Wetin go apin to di wan dɛn we nɔ ol dis big big chans we dɛn gɛt wit tu an?

¹⁹ Wetin go apin to di wan dɛn we nɔ ol dis big big chans wit tu an? Rɛvɛleshɔn 20:​15 tɛl wi se: “Dɛn ib ɛnibɔdi we in nem nɔ rayt na di buk we de sho se pɔsin go gɛt layf, na di lek we gɛt faya.” Fɔ tru, dɛn go dɔnawe wit dɛn kpatakpata. So i rili impɔtant fɔ lɛ wi mek shɔ se wi nem de na di buk we de sho se pɔsin go gɛt layf ɛn kɔntinyu fɔ de de!

20. Us wɔndaful wok wi gɛt fɔ du insay di Wan Tawzin Ia we Krays Go De Rul? (Luk di pikchɔ na di frɔnt pej.)

²⁰ Di Wan Tawzin Ia we Krays Go De Rul go rili bi wɔndaful tɛm! Wi go gɛt fɔ du di tichin wok we pas ɔl di tichin wok dɛn we Gɔd in pipul dɛn dɔn ɛva du na di wɔl. Bɔt i go bi tɛm bak we dɛn go tek tɛm wach di wan dɛn we du wetin rayt ɛn di wan dɛn we nɔ du wetin rayt. (Ayz. 26:9; Akt 17:​31) Aw wi go du dis wok fɔ tich pipul dɛn? Wi nɛks atikul go ɛp wi fɔ ɔndastand ɛn valyu dis wɔndaful wok.