1-2. Wetin mek i fayn fɔ stɔdi di akawnt bɔt Samsin?

 WETIN de kam na yu maynd we yu yɛri Samsin in nem? Sɔntɛm yu go tink bɔt wan man we bin rili gɛt trɛnk. Dat na tru. Bɔt Samsin bin mek mistek, ɛn dat bin mek bad tin dɛn apin to am. Pan ɔl dat, Jiova bin pe atɛnshɔn pan ɔl di tin dɛn we Samsin bin du fɔ sav am. Ɛn Gɔd bin mek dɛn rayt na di Baybul bɔt aw Samsin bin fetful fɔ mek wi bɛnifit.

² Jiova bin yuz Samsin fɔ du wɔndaful tin dɛn fɔ ɛp In pipul dɛn we na di Izrɛlayt dɛn. Lɔng tɛm afta Samsin day, Jiova bin mek apɔsul Pɔl rayt Samsin in nem na wan list we de tɔk bɔt man dɛn we bin rili gɛt fet. (Ibru. 11:​32-34) Samsin in ɛgzampul kin ɛnkɔrej wi. I bin abop pan Jiova ivin we tin nɔ bin rili izi fɔ am. Insay dis atikul, wi go tɔk bɔt wetin wi go lan frɔm Samsin ɛn aw in ɛgzampul go ɛnkɔrej wi.

3. Us wok Samsin bin gɛt?

³ Di tɛm we dɛn bin bɔn Samsin, di Filistin dɛn bin de rul di Izrɛlayt dɛn, ɛn dɛn bin de mek dɛn sɔfa. (Jɔj 13:1) Di Izrɛlayt dɛn bin de rili sɔfa bikɔs di Filistin dɛn bin rili bad. Jiova bin pik Samsin fɔ “de bifo fɔ sev di Izrɛlayt dɛn na di Filistin dɛn an.” (Jɔj. 13:​5, NWT) Bɔt dat nɔto bin izi wok! Fɔ du dis wok we nɔ rili izi, Samsin go nid fɔ abop pan Jiova.

4. Aw Jiova bin ɛp Samsin fɔ fri insɛf na di Filistin dɛn an? (Jɔjis 15:​14-16)

 ⁴ Lɛ wi tɔk bɔt wan ɛgzampul we sho se Samsin bin abop pan Jiova, ɛn i bin de luk to am fɔ sɔpɔt. Wantɛm, sɔm Filistin sojaman dɛn bin kam fɔ kech Samsin na Liay, we sɔntɛm bin de insay Juda. Di man dɛn na Juda bin de fred, so dɛn bin disayd se dɛn go an ova Samsin to di ɛnimi dɛn. Samsin in yon pipul dɛn bin kech am ɛn tay am tayt wan wit tu nyu rop dɛn ɛn kɛr am go to di Filistin dɛn. (Jɔj 15:​9-13) Bɔt, “Jiova in spirit gi [Samsin] pawa” ɛn i bin ebul fɔ fri insɛf. Dɔn we, “i si wan man dɔnki we jɔs day in jabon,” i tek am ɛn yuz am fɔ kil 1,000 Filistin man dɛn!—Rid Jɔjis 15:​14-16, NWT.

5. Aw Samsin bin sho se i abop pan Jiova?

⁵ Di dɔnki in jabon nɔto wɛpɔn we dɛn kin yuz fɔ fɛt. Bɔt wetin mek Samsin bin yuz am? Wan dawt nɔ de se Samsin bin no se Jiova go ɛp am fɔ win di Filistin dɛn wit ɛni wɛpɔn we i gɛt. Fɔ tru, dis fetful man ya bin yuz wetin i bin gɛt fɔ du wetin Jiova want. Wi dɔn si klia wan se Samsin bin ebul win ɔl dɛn man dɛn de bikɔs i bin abop pan Jiova!

6. Wetin na wan lɛsin we wi lan frɔm di akawnt bɔt Samsin?

⁶ Jiova go gi wi bak di trɛnk we wi nid fɔ du ɛnitin we i want wi fɔ du, ivin if i tan lɛk se di wok at fɔ du. Ɛn Gɔd go ɛp wi di kayn we we wi go sɔprayz. Biliv se Jiova we gi Samsin pawa go ɛp yu fɔ du wetin I want wans yu abop pan Am fɔ mek i ɛp yu.—Prɔv. 16:3.

7. Us ɛgzampul de sho se i impɔtant fɔ mek wi aks Jiova fɔ dayrɛkt wi?

⁷ Bɔku brɔda ɛn sista dɛn we de ɛp fɔ bil wi ples dɛn fɔ wɔship dɔn sho se dɛn abop pan Jiova. Trade, di brɔda dɛn bin de dizayn ɛn bil bɔku pan di nyu Kiŋdɔm Ɔl dɛn ɛn ɔda bildin dɛn. Bɔt bikɔs mɔ pipul dɛn de baptayz, di ɔganayzeshɔn bin nid fɔ mek chenj dɛn. Di brɔda dɛn  we bin de bifo bin pre fɔ mek Jiova dayrɛkt dɛn, ɛn dɛn bin tray nyu we dɛn, lɛk fɔ bay bildin dɛn ɛn mek di say dɛn we dɔn pwɛl pan di bildin dɛn. Wan brɔda we nem Rɔbɔt, we dɔn wok dɛn biɛn tɛm ya pan bɔku pan wi bildin projɛkt dɛn ɔlsay na di wɔl, tɔk se: “Fɔs, i nɔ bin izi fɔ sɔm pipul dɛn fɔ du tin dɛn dis nyu we.” I kɔntinyu fɔ tɔk se: “I bin rili difrɛn frɔm wetin wi bin dɔn de du fɔ lɔng tɛm. Bɔt di brɔda dɛn bin rɛdi fɔ ajɔst, ɛn wi dɔn si klia wan se Jiova dɔn de blɛs dɛn chenj dɛn ya.” Dis na jɔs wan ɛgzampul we de sho aw Jiova de gayd in pipul dɛn fɔ du wetin i want. Frɔm tɛm to tɛm, i go fayn fɔ mek wi ɔl de aks wisɛf dis kwɛstyɔn, ‘A de luk fɔ di we aw Jiova de dayrɛkt mi ɛn rɛdi fɔ mek chenj dɛn fɔ sav am di bɛst we aw a ebul?’

8. Wan tɛm we Samsin bin rili tɔsti, wetin i du?

⁸ Sɔntɛm yu go mɛmba ɔda wɔndaful tin dɛn we Samsin bin du. In wangren bin kil wan layɔn, ɛn leta i bin kil 30 Filistin dɛn na Ashkɛlɔn. (Jɔj 14:​5, 6, 19) Samsin bin no se i nɔ go ɛva ebul du dɛn kayn tin dɛn ya if Jiova nɔ ɛp am. I bin si dat klia wan di tɛm we i bin rili tɔsti afta i dɔn kil 1,000 Filistin dɛn. Wetin i bin du? Bifo i abop pan insɛf fɔ fɛn wata fɔ drink, i bin beg Jiova fɔ ɛp am.—Jɔj 15:18.

9. Aw Jiova bin ansa Samsin in prea fɔ ɛp? (Jɔjis 15:19)

⁹ Jiova bin ansa Samsin in prea bay we i pafɔm mirekul ɛn mek say usay wata de kɔmɔt fɔ mek Samsin drink. We Samsin drink di wata, “i fil fayn ɛn i gɛt trɛnk bak.” (Rid Jɔjis 15:​19, NWT.) I go mɔs bi se dis nyu say usay wata kɔmɔt bin kɔntinyu fɔ de te to di tɛm we Jiova mek prɔfɛt Samiɛl rayt di Baybul buk we nem Jɔjis. Sɔntɛm di Izrɛlayt dɛn we bin si da wata de go dɔn mɛmba se if dɛn abop pan Jiova, i go ɛp in fetful savant dɛn di tɛm we dɛn nid am.

10. Wetin wi nid fɔ du fɔ mek Jiova ɛp wi? (Luk bak di pikchɔ.)

¹⁰ Wisɛf nid fɔ abop pan Jiova fɔ ɛp wi ilɛk wetin wi sabi fɔ du ɔ wetin wi dɔn du na in savis. Wi nid fɔ put wisɛf dɔŋ ɛn gri se wi go ebul du wetin Jiova want wi fɔ du if nɔmɔ wi abop pan am. Samsin bin gɛt di trɛnk we i bin nid we i drink di wata we Jiova gi am. Jɔs lɛk Samsin, wi nid fɔ gri fɔ mek Jiova ɛp wi fɔ kɔntinyu fɔ fetful to am.—Mat. 11:28.

11. Aw wi go sho se wi abop pan Jiova fɔ ɛp wi? Gi wan ɛgzampul?

¹¹ Lɛ wi tɔk bɔt Alɛksi, we na wan pan wi Rɔshian brɔda dɛn we pipul dɛn de mek i de sɔfa siriɔs wan. Wetin dɔn ɛp am fɔ bia we dɛn de mek i sɔfa? In ɛn in wɛf de stɔdi di Baybul ɛn pre to Jiova ɔltɛm. I tɔk se: “A de tray fɔ du mi pasɔnal stɔdi ɛn rid di Baybul ɛvride. Ɛvri mɔnin, mi ɛn mi wɛf de tɔk bɔt di deli tɛks ɛn pre to Jiova togɛda”. Wetin dis de tich wi? Bifo wi abop pan wisɛf, wi fɔ abop pan Jiova. Aw? Na bay we wi de du tin dɛn ɔltɛm we go ɛp wi fɔ gɛt mɔ fet, lɛk fɔ stɔdi di Baybul, fɔ de pre, fɔ de atɛnd di mitin dɛn, ɛn fɔ du di prichin wok. Dɔn, Jiova go blɛs wi ɛn gi wi di ɛp we wi nid so dat wi go kɔntinyu fɔ sav am. Gɔd bin gi Samsin trɛnk, ɛn wan dawt nɔ de se I go gi wi trɛnk bak.

12. Us bad tin Samsin bin disayd fɔ du? Aw in rileshɔnship wit Dilayla bin difrɛn frɔm di ɔda wan dɛn?

¹² Samsin nɔ bin pafɛkt jɔs lɛk wi, so sɔntɛnde i bin de disayd fɔ du di rɔng tin. Wan patikyula tin we Samsin bin disayd fɔ du bin mek i sɔfa bad bad wan. Afta i dɔn bi jɔj fɔ sɔm tɛm, i “kam lɛk wan uman we nem Dilayla we bin de na di Vali na Sorɛk.” (Jɔj. 16:​4, NWT) Bifo dis tɛm, Samsin bin ɛngej wan Filistin uman. Na Jiova bin mek i du dat bikɔs i bin de “fɛn we fɔ fɛt di Filistin dɛn.” Leta, Samsin bin de na wan raregal in os na di Filistin dɛn siti na Gaza. Dat bin gi Samsin di chans bak fɔ fɛt agens di Filistin dɛn na da siti de wit Jiova in ɛp. (Jɔj 14:​1-4; 16:​1-3) Bɔt i go bi se Dilayla na bin Izrɛlayt, so Samsin in rileshɔnship wit am nɔto fɔ gɛt chans fɔ fɛt agens di Filistin dɛn.

13. Aw Dilayla bin mek Samsin disayd fɔ du di rɔng tin?

¹³ Dilayla bin gri fɔ mek di Filistin dɛn pe am bɔku mɔni fɔ lɛ i go kɔmɔt biɛn Samsin. Sɔntɛm na bikɔs Samsin bin lɛk Dilayla tumɔs, na dat mek i nɔ ebul fɔ no wetin Dilayla bin want fɔ du. Ilɛk wetin na di rizin, Dilayla bin kɔntinyu fɔ mɔna Samsin fɔ mek i tɛl am wetin mek i rili gɛt trɛnk, ɛn faynali Samsin bin tɛl am. I sɔri fɔ no se Samsin in mistek bin mek i lɔs in trɛnk, ɛn Jiova nɔ bin gladi fɔ am fɔ sɔm tɛm.—Jɔj 16:​16-20.

14. Us bad tin dɛn bin apin to Samsin bikɔs i bin abop pan Dilayla?

¹⁴ Bad tin dɛn bin apin to Samsin bikɔs  i bin abop pan Dilayla ɛn nɔ abop pan Jiova. Di Filistin dɛn bin kech Samsin ɛn bɔs in yay dɛn. Dɛn bin put am na prizin insay Gaza usay i bin dɔn pwɛl pwɛl di get dɛn na di siti. Di pipul dɛn mek i bi slev fɔ de gren wit. (Wit na tin we pipul dɛn de it). Dɔn di Filistin dɛn bin kam wit Samsin na wan pan dɛn sɛlibreshɔn dɛn. Dɛn bin mek big big sakrifays to dɛn lay lay gɔd we nem Degɔn, bikɔs dɛn bin biliv se na in dɔn ɛp dɛn fɔ kech Samsin. Dɛn bin pul Samsin na prizin ɛn briŋ am kam na di pati so dat i go “mek fɔn fɔ lɛ [dɛn] laf.”—Jɔj. 16:​21-25 NWT.

15. Aw Samsin bin sho bak se i abop pan Jiova? (Jɔjis 16:​28-30, NWT) (Luk di pikchɔ na di frɔnt pej.)

¹⁵ Samsin bin dɔn mek siriɔs mistek, bɔt i nɔ bin giv-ɔp. I luk fɔ chans fɔ fɛt di Filistin dɛn, we na sɔntin we Jiova bin want am fɔ du. (Rid Jɔjis 16:​28-30, NWT.) Samsin bin beg Jiova se: “Mek a tɔn-am-gi di Filistin dɛn.” Di tru Gɔd bin ansa Samsin in prea, ɛn i bin gi am spɛshal trɛnk bak. Dis tɛm, Samsin bin kil bɔku Filistin dɛn pas ɔl di ɔda tɛm dɛn.

16. Wetin wi lan frɔm Samsin in mistek?

¹⁶ Pan ɔl we bad tin dɛn bin apin to Samsin bikɔs ɔf in mistek, i nɔ bin stɔp fɔ tray fɔ du wetin Jiova want. Ivin if wi mek mistek we go mek dɛn kɔrɛkt wi ɔ mek wi lɛf fɔ du di wok we wi bin de du na di kɔngrigeshɔn, wi nɔ fɔ giv-ɔp. Mɛmba se Jiova nɔ de giv-ɔp pan wi. (Sam 103:​8-10) Pan ɔl we wi kin mek mistek dɛn, Jiova go stil yuz wi, jɔs lɛk Samsin.

17-18. Aw Maykɛl in ɛgzampul ɛnkɔrej yu? (Luk bak di pikchɔ.)

¹⁷ Tink bɔt wan yɔŋ brɔda we nem Maykɛl in ɛgzampul. I bin bizi na Jiova in savis; in na bin ministerial savant ɛn rɛgyula payɔnia. Bɔt i bin mek mistek, ɛn dat bin mek i stɔp fɔ du di wok dɛn we i bin de du na di kɔngrigeshɔn. I tɔk se: “Bifo da tɛm de, a bin rili bizi na Jiova in savis. Dɔn wantɛm wantɛm, a bin fil se a nɔ go ebul du natin na Jiova in savis. A nɔ bin ɛva tink se Jiova go lɛf mi, bɔt a bin de wɔnda if mi padi biznɛs wit  am go ɛva tan lɛk aw i bin de ɔ if a go ɛva ebul fɔ sav am na di kɔngrigeshɔn lɛk aw a bin de du.”

¹⁸ Di gud tin na dat Maykɛl nɔ bin giv-ɔp. I kɔntinyu fɔ tɔk se: “A bin tray tranga wan fɔ mek a go ebul gɛt tayt padi biznɛs wit Jiova bak bay we a bin de pre to am ɔltɛm, stɔdi, ɛn tink gud gud wan.” As tɛm de go, Maykɛl bigin du bak di wok dɛn we i bin de du na di kɔngrigeshɔn. Naw in na ɛlda ɛn rɛgyula payɔnia. I tɔk se: “Di we aw di ɛlda dɛn mɔ bin de sɔpɔt ɛn ɛnkɔrej mi bin ɛp mi fɔ no se Jiova stil lɛk mi. A ebul wok bak na di kɔngrigeshɔn wit klin kɔnshɛns. Dis tin we bin apin to mi bin tich mi se Jiova go fɔgiv ɛnibɔdi we ripɛnt wit ɔl in at.” Wi gɛt kɔnfidɛns se Jiova go yuz wi ɛn blɛs wi bak ivin if wi bin dɔn mek mistek dɛn, wans wi du ɔl wetin wi ebul fɔ kɔrɛkt wi mistek dɛn ɛn kɔntinyu fɔ abop pan am.—Sam 86:5; Prɔv. 28:13.

19. Aw Samsin in ɛgzampul dɔn ɛnkɔrej yu?

¹⁹ Insay dis atikul, wi dɔn tɔk bɔt sɔm pan di tin dɛn we bin apin to Samsin. I nɔ bin pafɛkt; bɔt i nɔ bin stɔp fɔ tray fɔ sav Jiova, ivin afta i dɔn mek mistek wit Dilayla. Ɛn Jiova bin kɔntinyu fɔ yuz Samsin. Gɔd bin yuz Samsin bak wan wɔndaful we. Jiova bin stil si am as man we bin rili gɛt fet, ɛn i bin mek dɛn rayt in nem na di list usay dɛn rayt fetful pipul dɛn nem dɛn, we de na Ibruz chapta 11. I de rili ɛnkɔrej wi fɔ no se wi gɛt Papa we de na ɛvin we lɛk wi ɛn we rɛdi fɔ ɛp wi, mɔ di tɛm dɛn we wi kin gɛt prɔblɛm dɛn ɛn nid in ɛp! So jɔs lɛk Samsin, lɛ wi beg Jiova: “Mɛmba mi, duya, ɛn gi mi trɛnk.”—Jɔj. 16:​28, NWT.