1. Jɔs bifo apɔsul Pita day, wetin Gɔd in spirit bin mek i du?

 APƆSUL Pita bin no se i nɔ go te igen i go day. I bin sav Jiova fetful wan fɔ lɔng tɛm. I bin de wit Jizɔs di tɛm we i bin de prich, i stat fɔ prich to pipul dɛn we nɔto Ju, ɛn leta i bi pat pan di gɔvnin bɔdi. We di tɛm bin de kam nia fɔ lɛ i day, i bin no se i go day jisnɔ, bɔt Jiova bin gi am mɔ wok fɔ du. Arawnd di ia 62 to 64 afta Krays, Jiova bin yuz am fɔ rayt tu lɛta dɛn we na di Baybul buk dɛn we nem 1 ɛn 2 Pita. Pita tɔk se i op se dɛn lɛta dɛn ya go ɛp Kristian dɛn afta i day.—2 Pit. 1:​12-15.

2. Wetin mek wi go se Pita bin rayt in lɛta dɛn di rayt tɛm?

² Pita bin rayt in lɛta dɛn di tɛm we in brɔda ɛn sista dɛn bin de gɛt ‘difrɛn tin dɛn we bin de tɛst dɛn ɛn mek dɛn sɔfa.’ (1 Pit. 1:6) Sɔm wikɛd man dɛn bin de tray fɔ kam wit lay lay tichin dɛn ɛn dɔti abit dɛn insay di kɔngrigeshɔn. (2 Pit. 2:​1, 2, 14) Di tɛm nɔ bin de fa fɔ lɛ di Kristian dɛn we bin de na Jerusɛlɛm si “di tɛm we ɔltin [go] dɔn,” dat na di tɛm we di Roman sojaman dɛn go dɔnawe wit da siti de ɛn in tɛmpul. (1 Pit. 4:7) I go mɔs bi se di lɛta dɛn we Pita bin rayt bin ɛp Kristian dɛn fɔ si wetin dɛn go du fɔ bia wit di prɔblɛm dɛn we dɛn bin gɛt ɛn rɛdi fɔ di prɔblɛm dɛn we go mit dɛn leta. b

3. Wetin mek wi fɔ tek tɛm stɔdi di lɛta dɛn we Gɔd bin mek Pita rayt?

³ Pan ɔl we na to di fɔstɛm Kristian dɛn Pita bin rayt in lɛta dɛn, Jiova bin mek dɛn lɛta dɛn ya de na In Wɔd. So  wisɛf go ebul bɛnifit frɔm dɛn lɛta dɛn de. (Rom. 15:4) Wi de liv na wɔl we pipul dɛn de biev di kayn we we nɔ klin, ɛn wi de gɛt prɔblɛm dɛn bak we kin mek i nɔ izi fɔ lɛ wi sav Jiova. Dɔn bak, i nɔ go te igen wi go gɛt wan big big trɔbul we go pas di wan we bin apin to di Ju pipul dɛn di tɛm we dɛn bin dɔnawe wit Jerusɛlɛm ɛn in tɛmpul. Wi go fɛn sɔm impɔtant tin dɛn insay Pita in tu lɛta dɛn. Dɛn tin dɛn ya go ɛp wi fɔ kɔntinyu fɔ de wet fɔ Jiova in de, fɔ lɛf fɔ fred mɔtalman, ɛn fɔ rili lɛk wisɛf. Dɛn tin dɛn ya go ɛp ɛlda dɛn bak fɔ si aw dɛn go ebul ɛp dɛn brɔda ɛn sista dɛn na di kɔngrigeshɔn fɔ tinap tranga wan.

4. Akɔdin to wetin de na 2 Pita 3:​3, 4, wetin go ambɔg wi fet?

⁴ Wi de wit pipul dɛn we nɔ biliv wetin di Baybul se go apin tumara bambay. Di wan dɛn we de agens wi kin provok wi bikɔs fɔ lɔng tɛm, wi dɔn de prich se di ɛnd de kam. Sɔm pipul dɛn de tɔk se di ɛnd nɔ go ɛva kam. (Rid 2 Pita 3:​3, 4.) If wi yɛri da kayn tɔk de frɔm pɔsin we wi de prich to, wi wokmet, ɔ wan pan wi fambul dɛn, sɔntɛm dat go ambɔg wi fet. Pita bin tɔk bɔt wetin go ɛp wi.

5. Wetin go ɛp wi fɔ peshɛnt wet fɔ di ɛnd? (2 Pita 3:​8, 9)

⁵ To sɔm pipul dɛn, i tan lɛk se Jiova slo fɔ dɔnawe wit dis wikɛd wɔl. Pita in wɔd dɛn go ɛp wi bikɔs dɛn de mɛmba wi se di we aw Jiova de si tɛm difrɛn fa fawe frɔm aw mɔtalman de si tɛm. (Rid 2 Pita 3:​8, 9.) To Jiova, wan tawzin ia jɔs tan lɛk wan de. Jiova de peshɛnt, i nɔ want fɔ dɔnawe wit ɛnibɔdi. Bɔt we in de kam, dis wɔl go dɔn. Na big big ɔnɔ wi gɛt fɔ yuz di tɛm we dɔn lɛf fɔ prich to pipul dɛn na ɔl di neshɔn dɛn.

6. Aw wi go “tink ɔltɛm” bɔt Jiova in de? (2 Pita 3:​11, 12)

⁶ Pita de ɛnkɔrej wi fɔ “tink ɔltɛm” bɔt Jiova in de. (Rid 2 Pita 3:​11, 12.) Aw? I go fayn fɔ mek wi de tink ɛvride bɔt di blɛsin dɛn we wi go ɛnjɔy insay di nyu wɔl. Imajin se fayn briz de blo yu, yu de it fud we gud fɔ di bɔdi, yu de wɛlkɔm di wan dɛn we yu lɛk we dɔn gɛt layf bak, ɛn yu de tich pipul dɛn we bin dɔn de frɔm trade trade bɔt aw Baybul prɔfɛsi dɛn dɔn kam tru. We yu de imajin dɛn tin dɛn ya, i go ɛp yu fɔ peshɛnt wet fɔ da tɛm de ɛn fɔ gɛt kɔnfidɛns se i nɔ go te igen di ɛnd go kam. Bikɔs wi “dɔn no [bɔt tumara bambay] bifo tɛm,” pipul dɛn we de tich lay lay tin dɛn “nɔ go ful [wi] fɔ go di rɔng we.”—2 Pit. 3:17.

7. We wi de fred mɔtalman, aw dat de afɛkt wi?

⁷ Bikɔs wi no se Jiova in de de kam jisnɔ, wi fɔ du ɔl wetin wi ebul fɔ prich di gud nyuz to ɔda pipul dɛn. Bɔt stil, sɔntɛnde wi kin fred fɔ prich. Wetin mek? Na bikɔs sɔntɛm wi de fred wetin ɔda pipul dɛn go tink bɔt wi ɔ du to wi. Dat bin apin to Pita. Di nɛt we dɛn bin kech Jizɔs ɛn we dɛn bin de kwɛstyɔn am, Pita nɔ bin ebul sho insɛf as wan pan Jizɔs in disaypul dɛn, ɛn tri tɛm i dinay se i nɔ sabi Jizɔs. (Mat. 26:​69-75) Bɔt Pita bin lɛf fɔ fred, ɛn leta i bin rayt se: “Una nɔ fred wetin dɛn de fred, ɛn una nɔ wɔri.” (1 Pit. 3:14) Pita in wɔd dɛn  ɛp wi fɔ no se wi go ebul lɛf fɔ fred mɔtalman.

8. Wetin go ɛp wi fɔ lɛf fɔ fred mɔtalman? (1 Pita 3:15)

⁸ Wetin go ɛp wi fɔ lɛf fɔ fred mɔtalman? Pita tɛl wi se: “Una tek di Krays as Masta ɛn as pɔsin we oli na una at.” (Rid 1 Pita 3:15.) Dis min se wi fɔ de tink gud gud wan bɔt di pozishɔn ɛn di pawa we wi Masta ɛn Kiŋ gɛt, we na Jizɔs Krays. If yu de fred fɔ prich we yu gɛt di chans fɔ prich to ɔda pipul dɛn, mɛmba wi Kiŋ. Imajin am we i de rul na ɛvin ɛn bɔku bɔku enjɛl dɛn de rawnd am. Mɛmba se “Gɔd dɔn put [am] oba ɔltin na ɛvin ɛn na dis wɔl” ɛn i go de “wit [yu] ɔltɛm te di tɛm want fɔ dɔn.” (Mat. 28:​18-20) Pita bin ɛnkɔrej wi fɔ “rɛdi ɔltɛm” fɔ ansa ɛnibɔdi we aks wi bɔt wetin wi biliv. Yu go lɛk fɔ prich to sɔmbɔdi na yu wokples, skul, ɔ ɔdasay? Tink bifo tɛm bɔt ustɛm yu go ebul fɔ du dat, dɔn pripia wetin yu go se. Pre to Jiova fɔ mek i gi yu maynd ɛn biliv se i go ɛp yu fɔ mek yu lɛf fɔ fred mɔtalman.—Akt 4:29.

9. Wetin bin apin wantɛm we mek Pita nɔ bin ebul fɔ sho lɔv? (Luk bak di pikchɔ.)

⁹ Pita bin lan aw fɔ sho lɔv. I bin de di  tɛm we Jizɔs tɔk se: “A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una.” (Jɔn 13:34) Pan ɔl dat, Pita bin leta fred di Ju Kristian dɛn, ɛn i nɔ bin gri fɔ it wit in brɔda ɛn sista dɛn we nɔto Ju. Apɔsul Pɔl bin kɔl wetin Pita bin du as “ipokrit.” (Gal. 2:​11-14) Pita bin gri fɔ tek di kɔrɛkshɔn we Pɔl bin gi am ɛn i bin lan frɔm am. Insay ɔl tu in lɛta dɛn, i bin rayt se wi nɔ fɔ jɔs fil se wi lɛk wi brɔda ɛn sista dɛn bɔt wi fɔ sho se wi lɛk dɛn.

10. Wetin go ɛp wi fɔ “lɛk [wisɛf] lɛk aw brɔda dɛn kin lɛk dɛnsɛf, ɛn . . . nɔ gɛt wan ipokrit”? (1 Pita 1:22)

¹⁰ Pita tɔk se wi fɔ ‘lɛk wisɛf lɛk aw brɔda dɛn kin lɛk dɛnsɛf, ɛn wi nɔ fɔ gɛt wan ipokrit.’ (Rid 1 Pita 1:22.) Wi go gɛt da kayn lɔv de we wi “de obe di tru tin dɛn.” Wan pan dɛn tru tin dɛn ya na di tichin fɔ se “Gɔd nɔ de tek wan pɔsin bɛtɛ pas ɔda pɔsin.” (Akt 10:​34, 35) Wi nɔ go ebul obe Jizɔs in kɔmand bɔt lɔv if wi de sho se wi lɛk sɔm brɔda ɛn sista dɛn na di kɔngrigeshɔn, bɔt wi nɔ de sho se wi lɛk ɔda brɔda ɛn sista dɛn. Fɔ tru, sɔntɛm wi go gɛt sɔm brɔda ɛn sista dɛn we wi lɛk mɔ, jɔs lɛk Jizɔs. (Jɔn 13:23; 20:2) Bɔt Pita de mɛmba wi se wi fɔ tray tranga wan fɔ ‘lɛk wisɛf lɛk aw brɔda dɛn kin lɛk dɛnsɛf’ bikɔs wi ɔl de na wan famili.—1 Pit. 2:17.

11. Wetin i min fɔ ‘rili lɛk wi kɔmpin dɛn wit ɔl wi at’?

¹¹ Pita bin ɛnkɔrej wi fɔ “rili lɛk [wi] kɔmpin dɛn wit ɔl [wi] at.” Fɔ “rili lɛk” min se wi fɔ lɛk sɔmbɔdi ilɛksɛf i nɔ izi fɔ sho se wi lɛk am. Fɔ ɛgzampul, wetin wi go du if wan brɔda ɔfɛn wi ɔ du sɔntin we mek wi fil bad? Fɔs, bifo wi sho se wi lɛk am, sɔntɛm wi go want fɔ trit am di sem we aw i trit wi. Bɔt, Pita bin lan frɔm Jizɔs fɔ se Gɔd nɔ kin gladi we pɔsin de tɔn-am-gi. (Jɔn 18:​10, 11) Pita bin rayt se: “Una nɔ du bad to pɔsin we du una bad; if pɔsin tɛl una bad wɔd, una nɔ tɛl am bad wɔd bak. Bifo dat, una blɛs am.” (1 Pit. 3:9) We yu rili lɛk yu brɔda ɛn sista dɛn, yu go du gud to dɛn ɛn ivin peshɛnt wit di wan dɛn we go dɔn du tin we mek yu fil bad.

12. (a) We wi rili lɛk wi brɔda ɛn sista dɛn, wetin bak dat go ɛp wi fɔ du? (b) Akɔdin to di vidio we gɛt di taytul Protɛkt di Wanwɔd we wi gɛt we tan lɛk Gift, wetin yu fɔ tray tranga wan fɔ du?

¹² Insay Pita in fɔs lɛta, i bin yuz di sem wɔd dɛn “rili lɛk.” Da kayn lɔv de nɔ jɔs de kɔba smɔl sin dɛn, bɔt i de “kɔba bɔku bɔku sin dɛn.” (1 Pit. 4:8) Sɔntɛm Pita bin mɛmba di lɛsin bɔt fɔgivnɛs we Jizɔs bin tich am bifo dis tɛm. Da tɛm de, i go bi se Pita bin biliv se in na pɔsin we rili gud we i bin tɔk se i go fɔgiv in brɔda “sɛvin tɛm.” Bɔt Jizɔs bin tich am ɛn wi bak tide fɔ fɔgiv “77 tɛm,” we min se wi nɔ fɔ stɔp fɔ fɔgiv ɔda pipul dɛn. (Mat. 18:​21, 22) If i nɔ izi fɔ yu fɔ fala dis advays, nɔ pwɛlat! Sɔntɛnde, i nɔ kin izi fɔ ɔl Jiova in savant dɛn we nɔ pafɛkt fɔ fɔgiv. Di tin we impɔtant naw na fɔ du ɔl wetin yu ebul fɔ fɔgiv yu brɔda ɔ sista ɛn mek pis wit am. c

13. Wetin go mek i nɔ izi fɔ lɛ ɛlda dɛn fɛn tɛm fɔ ɛnkɔrej di brɔda ɛn sista dɛn?

¹³ Wan dawt nɔ de se Pita nɔ bin ɛva fɔgɛt wetin Jizɔs bin tɛl am afta i gɛt  layf bak we i se: “Mɛn mi smɔl ship dɛn.” (Jɔn 21:16) If yu na ɛlda, na fɔ no se dɛn wɔd dɛn ya aplay to yu bak. Bɔt sɔntɛnde, i nɔ kin izi fɔ lɛ ɛlda fɛn tɛm fɔ du dis impɔtant wok. Di fɔs tin we ɛlda dɛn fɔ du na fɔ mek shɔ se dɛn famili gɛt ɔl di tin dɛn we dɛn nid fɔ liv, ɔlman na di famili lɛk dɛnsɛf, ɛn dɛn fɔ ɛp dɛn famili fɔ gɛt tayt padi biznɛs wit Jiova. Dɔn bak, na dɛn fɔ de bifo fɔ du di prichin wok ɛn dɛn fɔ pripia ɛn du pat dɛn na di mitin dɛn, asɛmbli ɛn kɔnvɛnshɔn dɛn. Sɔm ɛlda dɛn de wok bak as mɛmba dɛn na di Hospital Liaison Committees ɔ wit di Local Design/Construction Department. Fɔ tru, ɛlda dɛn rili bizi!

14. Wetin go muv ɛlda dɛn fɔ mɛn Gɔd in ship dɛn? (1 Pita 5:​1-4)

¹⁴ Pita bin ɛnkɔrej in kɔmpin ɛlda dɛn fɔ “mɛn Gɔd in ship dɛn.” (Rid 1 Pita 5:​1-4.) If yu na ɛlda, wi no se yu lɛk yu brɔda ɛn sista dɛn ɛn yu want fɔ kia fɔ dɛn. Bɔt sɔntɛnde, yu go fil se yu rili bizi ɔ yu rili taya ɛn yu nɔ go ebul fɔ du da wok de. Wetin yu go du? Pre to Jiova ɛn tɛl am aw yu de fil. Pita bin rayt se: “If ɛnibɔdi de wok, lɛ i du am lɛk se i abop pan di trɛnk we Gɔd de gi.” (1 Pit. 4:11) Sɔntɛm yu brɔda ɛn sista dɛn gɛt prɔblɛm dɛn we nɔ go sɔlv insay dis wikɛd wɔl. Bɔt mɛmba se “di chif shɛpad,” we na Jizɔs Krays, go ebul ɛp dɛn pas ɛnibɔdi. I go ebul du dat naw ɛn insay di nyu wɔl. Wetin Jiova want di ɛlda dɛn fɔ du na fɔ lɛk dɛn brɔda ɛn sista dɛn, fɔ kia fɔ dɛn, ɛn “bi ɛgzampul to di ship dɛn.”

15. Aw wan ɛlda de mɛn Gɔd in ship dɛn? (Luk bak di pikchɔ.)

¹⁵ Wan brɔda we nem Wiliam we dɔn bi ɛlda fɔ lɔng tɛm, ɔndastand aw i impɔtant fɔ kia fɔ di brɔda ɛn sista dɛn. We di COVID-19 pandɛmik bin bigin, in ɛn in kɔmpin ɛlda dɛn bin de mek shɔ se dɛn kɔl ɔl di wan dɛn we de na dɛn fil savis grup ɛni wik. I ɛksplen wetin mek. I se: “Bɔku pan di brɔda ɛn sista dɛn nɔ gɛt pɔsin we de wit dɛn na os, ɛn i izi fɔ mek dɛn bigin tink di rɔng we.” We wan brɔda ɔ sista gɛt prɔblɛm, Wiliam de tek  tɛm lisin fɔ no wetin di brɔda ɔ sista nid ɔ di tin dɛn we de mek i wɔri. Dɔn i kin tray fɔ fɛn sɔm pɔblikeshɔn ɛn vidio dɛn na wi wɛbsayt we i go yuz fɔ ɛnkɔrej da brɔda ɔ sista de. I tɔk se: “Na naw wi fɔ kia fɔ wi brɔda ɛn sista dɛn pas ɛni ɔda tɛm. Wi de wok tranga wan fɔ ɛp pipul dɛn we nɔto wi brɔda ɛn sista dɛn fɔ lan bɔt Jiova; na da sem we de wi fɔ wok tranga wan fɔ ɛp Jiova in ship dɛn fɔ kɔntinyu fɔ de na di trut.”

16. Us we dɛn wi go want fɔ aplay di lɛsin dɛn we wi dɔn lan frɔm Pita in lɛta dɛn?

¹⁶ Wi dɔn tɔk bɔt sɔm lɛsin dɛn frɔm Pita in tu lɛta dɛn we Gɔd in spirit bin ɛp am fɔ rayt. Sɔntɛm yu ebul si eria we yu want fɔ du mɔ. Fɔ ɛgzampul, yu go lɛk fɔ de tink mɔ bɔt di blɛsin dɛn we wi go ɛnjɔy insay di nyu wɔl? Yu dɔn sɛt gol fɔ de prich na wokples, skul, ɔ ɔdasay dɛn? Yu dɔn si we dɛn aw yu go sho se yu rili lɛk yu brɔda ɛn sista dɛn mɔ ɛn mɔ? Ɛlda dɛn, una dɔn mekɔp una maynd fɔ mɛn Jiova in ship dɛn ɛn fɔ du so wit ɔl una at? Na fɔ ɔnɛs wit yusɛf ɛn si usay yu nid fɔ du mɔ, bɔt nɔ pwɛlat. “Di Masta gud,” ɛn i go ɛp yu fɔ du mɔ. (1 Pit. 2:3) Pita ɛnkɔrej wi se: “Gɔd . . . insɛf sɛf go dɔn fɔ tren una. I go mek una tinap tranga wan, i go mek una strɔng, i go gi una strɔng fawndeshɔn.”—1 Pit. 5:10.

17. If wi nɔ giv-ɔp ɛn alaw Jiova fɔ tren wi, wetin go apin?

¹⁷ Fɔs, Pita bin fil se i nɔ fit fɔ de nia Gɔd in Pikin. (Lyuk 5:8) Bɔt di sɔpɔt we Jiova ɛn Jizɔs bin sɔpɔt Pita fɔ sho se dɛn lɛk am, bin ɛp Pita fɔ kɔntinyu fɔ fala Krays. So dat bin mek Jiova alaw Pita fɔ “ɛnta wit glori insay wi Masta ɛn Seviɔ Jizɔs Krays in Kiŋdɔm we go de sote go.” (2 Pit. 1:11) Dis na big big blɛsin! If yu nɔ giv-ɔp jɔs lɛk Pita ɛn alaw Jiova fɔ tren yu, yusɛf go gɛt di pe, we na layf we go de sote go. Yu ‘fet go mek yu sev.’—1 Pit. 1:9.