1. Wetin Pita bin du we Jizɔs bin pafɔm mirekul ɛn mek dɛn kech fish?

 PITA bin dɔn de fishin ol nɛt, bɔt i nɔ kech natin. I bin sɔprayz we Jizɔs tɛl am se: “Lɛ wi go na say we dip, ɛn una ib una nɛt fɔ kech fish.” (Lyuk 5:4) Pita bin de dawt if i go kech fish, bɔt i bin du wetin Jizɔs tɛl am. Pita ɛn di wan dɛn we bin de wit am bin kech bɔku fish te di nɛt bigin fɔ chɛr. We dɛn kam fɔ si se dis tin we apin na mirekul, Pita ɛn di wan dɛn we de wok wit am bin “rili sɔprayz.” Pita tɔk se: “Masta, kɔmɔt nia mi bikɔs mi na man we de sin.” (Lyuk 5:​6-9) I go bi se Pita bin fil se i nɔ fit fɔ de nia Jizɔs.

2. Wetin mek i fayn fɔ mek wi tɔk bɔt Pita in ɛgzampul?

² Na tru Pita bin tɔk, in na bin “man we de sin.” Di Baybul sho se sɔntɛnde i bin de tɔk ɛn du tin dɛn we i bin de rigrɛt leta. Yu kin fil dis sem we lɛk Pita? Yu gɛt kwaliti we yu de tray tranga wan fɔ gɛt ɔ say we yu wik we yu dɔn de fɛt wit fɔ lɔng tɛm? If na so bi, yu go gɛt kɔrej we yu stɔdi bɔt Pita in ɛgzampul. Aw? Tink bɔt dis: Jiova bin fɔ dɔn mek dɛn nɔ rayt bɔt Pita in mistek dɛn na di Baybul. Bɔt i mek dɛn rayt dɛn fɔ wi so dat wi go ebul lan sɔntin frɔm dɛn. (2 Tim. 3:​16, 17) We wi lan bɔt dis man we bin de mek mistek ɛn we gɛt filin lɛk wi, dat go ɛp wi fɔ si se Jiova nɔ de ɛkspɛkt wi fɔ bi pipul dɛn we pafɛkt. I nɔ want wi fɔ giv-ɔp, i want lɛ wi kɔntinyu fɔ de tray pan ɔl we wi de mek mistek dɛn.

3. Wetin mek wi nɔ fɔ giv-ɔp?

 ³ Wetin mek i impɔtant fɔ lɛ wi nɔ giv-ɔp? Na bikɔs we wi kɔntinyu fɔ de du sɔntin smɔl smɔl, wi go sabi du am fayn fayn wan. Fɔ ɛgzampul: We pɔsin want fɔ lan fɔ ple gita, i go tek lɔng tɛm fɔ mek i sabi ple am fayn fayn wan. Da tɛm de we i de lan, i go mek bɔku mistek dɛn, bɔt if i kɔntinyu fɔ praktis, i go sabi ple am fayn fayn wan. Ivin we i go dɔn sabi ple am fayn fayn wan, i go de mek mistek wan wantɛm. Bɔt stil, i nɔ de giv-ɔp. I go kɔntinyu fɔ lan fɔ de ple am fayn fayn wan. Semweso, ivin afta wi fil se wi dɔn ebul lɛf fɔ mek wan patikyula mistek, i pɔsibul fɔ lɛ wi mek da sem mistek de bak. Bɔt wi stil de kɔntinyu fɔ tray fɔ rich wi gol. Wi ɔl kin se ɔ du tin we wi kin rigrɛt leta; bɔt if wi nɔ giv-ɔp, Jiova go ɛp wi fɔ kɔntinyu fɔ go bifo. (1 Pit. 5:10) Lɛ wi tɔk bɔt Pita in ɛgzampul, we na pɔsin we nɔ bin giv-ɔp. Di sɔri-at we Jizɔs bin sho am pan ɔl we i bin de mek mistek dɛn go muv wi fɔ kɔntinyu fɔ sav Jiova.

4. Akɔdin to Lyuk 5:​5-10, wetin Pita bin se bɔt insɛf? Aw Jizɔs bin ɛnkɔrej am?

⁴ Di Baybul nɔ tɔk bɔt wetin mek Pita bin tɔk se in na “man we de sin” ɔ us sin dɛn i bin de tink bɔt. (Rid Lyuk 5:​5-10.) Bɔt sɔntɛm, i bin dɔn mek siriɔs mistek dɛn. Jizɔs bin no se Pita de fred, sɔntɛm na bikɔs Pita bin fil se i nɔ fit fɔ de nia Jizɔs. Bɔt Jizɔs bin no bak se Pita go ebul fɔ kɔntinyu fɔ fetful. So Jizɔs bin tɔk to Pita fayn ɛn tɛl am mek i “lɛf fɔ fred.” Di kɔnfidɛns we Jizɔs bin gɛt pan Pita bin chenj Pita in layf. Pita ɛn in brɔda Andru bin leta lɛf dɛn fishin wok ɛn jɔyn Jizɔs fɔ du di prichin wok. Dɔn Jiova bin blɛs dɛn bɔku we dɛn.—Mak 1:​16-18.

5. Us blɛsin dɛn Pita bin gɛt we i lɛf fɔ fred ɛn gri fɔ fala Jizɔs?

⁵ Pita bin gɛt bɔku wɔndaful ɛkspiriɛns dɛn we i bin de fala Krays. I bin si we Jizɔs de mɛn pipul dɛn we sik, pul dimɔn dɛn, ɛn ivin gi layf bak to di wan dɛn we bin dɔn day. b (Mat. 8:​14-17; Mak 5:​37, 41, 42) Pita bin si bak wan vishɔn we sho aw Jizɔs go bi Kiŋ na Gɔd in Kiŋdɔm. Pita nɔ bin ɛva fɔgɛt da vishɔn de. (Mak 9:​1-8; 2 Pit. 1:​16-18) Fɔ tru, Pita  bin si tin dɛn we i nɔ bin de ɛva ɛkspɛkt. I go bi se Pita bin rili gladi bikɔs i nɔ alaw di bad we aw i bin de fil bɔt insɛf fɔ mek i nɔ gɛt dɛn blɛsin dɛn de!

6. Fɔ se na wantɛm wantɛm Pita bin lɛf fɔ de mek mistek dɛn? Ɛksplen.

⁶ Pan ɔl di tin dɛn we Pita bin si ɛn yɛri, i bin stil de mek mistek dɛn. Tink bɔt sɔm ɛgzampul dɛn. We Jizɔs bin de ɛksplen bɔt aw i go sɔfa ɛn day fɔ mek wetin di Baybul tɔk kam tru, Pita bin tɛl Jizɔs se dat nɔ go apin to am. (Mak 8:​31-33) Bɔku tɛm, Pita ɛn di ɔda apɔsul dɛn bin de agyu bɔt udat impɔtant pas dɛn ɔl. (Mak 9:​33, 34) Di nɛt bifo Jizɔs day, Pita bin atak wan man ɛn kɔt in yes. (Jɔn 18:10) Da sem nɛt de, Pita bin fred ɛn tri tɛm i dinay se i nɔ sabi in padi Jizɔs. (Mak 14:​66-72) Dat bin mek Pita kray bita bita wan.—Mat. 26:75.

7. Afta Jizɔs gɛt layf bak, us chans i bin gi Pita?

⁷ Jizɔs nɔ bin giv-ɔp pan in apɔsul we bin gɛt pwɛlat. Afta Jizɔs gɛt layf bak, i bin gi Pita di chans fɔ mek Pita sho se i stil lɛk am. Jizɔs bin tɛl Pita fɔ mɛn in ship dɛn. (Jɔn 21:​15-17) Pita bin rɛdi fɔ du wetin Jizɔs tɛl am fɔ du. I bin de na Jerusɛlɛm di de fɔ Pɛntikɔst, ɛn in na wan pan di fɔs pipul dɛn we Gɔd bin anɔynt wit oli spirit.

8. Us siriɔs mistek Pita bin mek na Antiɔk?

⁸ Ivin afta we Gɔd bin dɔn anɔynt Pita wit oli spirit, i bin stil de mek mistek dɛn. Insay di ia 36 afta Krays, Pita bin de we Gɔd bin anɔynt Kɔnilyɔs we nɔto bin Ju wit oli spirit. Dis na bin klia pruf fɔ sho se “Gɔd nɔ de tek wan pɔsin bɛtɛ pas ɔda pɔsin” ɛn pipul dɛn we nɔto Ju kin bi pat pan di Kristian kɔngrigeshɔn. (Akt 10:​34, 44, 45) Afta dat, Pita bin fil fri fɔ it wit ɔda pipul dɛn we nɔto Ju, ɛn dis na sɔntin we i nɔ bin fɔ dɔn ɛva du bifo dis tɛm. (Gal. 2:12) Bɔt, sɔm Ju Kristian dɛn bin fil se di wan dɛn we na Ju ɛn di wan dɛn we nɔto Ju nɔ fɔ it togɛda. We sɔm pipul dɛn we bin de tink da sem we de kam na Antiɔk, Pita bin stɔp fɔ it wit in brɔda dɛn we nɔto Ju, sɔntɛm i bin de fred se di Kristian dɛn we na Ju go vɛks. Apɔsul Pɔl bin si wetin Pita bin du, ɛn i kɔrɛkt am bifo ɔda pipul dɛn. (Gal. 2:​13, 14) Pan ɔl we Pita bin mek dis mistek, i nɔ bin giv-ɔp. Wetin bin ɛp am?

9. Aw Jɔn 6:​68, 69 sho se Pita na pɔsin we nɔ de kɔmɔt biɛn ɔda pɔsin?

⁹ Pita na bin pɔsin we nɔ de kɔmɔt biɛn ɔda pɔsin, i nɔ bin alaw ɛnitin fɔ stɔp am fɔ mek i nɔ kɔntinyu fɔ de biɛn Jizɔs. Wantɛm, i bin sho se in na pɔsin we nɔ de kɔmɔt biɛn ɔda pɔsin we Jizɔs tɔk sɔntin we in disaypul dɛn nɔ bin ɔndastand. (Rid Jɔn 6:​68, 69.) Bikɔs bɔku pipul dɛn nɔ wet fɔ mek Jizɔs ɛksplen wetin i min, dɛn bin stɔp fɔ fala am. Bɔt Pita nɔ bin du dat. I bin sho se in na pɔsin we nɔ de kɔmɔt biɛn ɔda pɔsin ɛn tɔk se na Jizɔs nɔmɔ de tɔk tin dɛn we “go mek pɔsin gɛt layf we go de sote go.”

10. Aw Jizɔs bin sho se i biliv Pita? (Luk bak di pikchɔ.)

¹⁰ Jizɔs nɔ bin lɛf Pita. Di las nɛt we Jizɔs bin de na dis wɔl, i bin no se Pita ɛn di ɔda apɔsul dɛn go lɛf am. Bɔt pan ɔl dat, Jizɔs bin sho se i biliv se Pita go kam bak ɛn kɔntinyu fɔ bi pɔsin we fetful. (Lyuk 22:​31, 32) Jizɔs bin  ɔndastand se “di spirit kin rili want fɔ du sɔntin, bɔt di bɔdi wik.” (Mak 14:38) So, Jizɔs nɔ bin giv-ɔp pan in apɔsul ivin afta Pita dinay se i nɔ sabi am. We Jizɔs bin gɛt layf bak, i bin apia to Pita, ɛn i go mɔs bi se na Pita in wan bin de da tɛm de. (Mak 16:7; Lyuk 24:34; 1 Kɔr. 15:5) Dat go dɔn rili ɛnkɔrej Pita we in at bin pwɛl bikɔs ɔf wetin i dɔn du!

11. Aw Jizɔs bin mek Pita biliv se Jiova go sɔpɔt am?

¹¹ Jizɔs bin mek Pita biliv se Jiova go sɔpɔt am. We Jizɔs bin gɛt layf bak, i bin pafɔm wan ɔda mirekul bay we i mek Pita ɛn in kɔmpin apɔsul dɛn kech bɔku fish. (Jɔn 21:​4-6) Wan dawt nɔ de se dis mirekul bin mek Pita biliv se Jiova go ebul gi am di tin dɛn we i nid. Sɔntɛm, di apɔsul go dɔn mɛmba di wɔd dɛn we Jizɔs bin tɔk we i se Jiova go gi di wan dɛn we de ‘put di Kiŋdɔm fɔs’ di tin dɛn we dɛn nid. (Mat. 6:33) Ɔl dis bin ɛp Pita fɔ mek i lɛf in fishin wok ɛn put di prichin wok fɔs na in layf. I bin gɛt maynd fɔ prich di de fɔ Pɛntikɔst 33 afta Krays ɛn ɛp bɔku pipul dɛn fɔ lisin to di gud nyuz. (Akt 2:​14, 37-41) Afta dat, i bin ɛp di Samɛritan dɛn ɛn di pipul dɛn we nɔto Ju fɔ lan bɔt Krays ɛn fala am. (Akt 8:​14-17; 10:​44-48) Fɔ tru, Jiova bin rili yuz Pita fɔ mek ɔlkayn pipul dɛn kam na di kɔngrigeshɔn.

12. Aw Pita in ɛgzampul go ɛp wi if wi de tray tranga wan fɔ lɛf fɔ mek wan patikyula mistek?

¹² Jiova kin ɛp wi bak fɔ mek wi nɔ giv-ɔp. Sɔntɛm i nɔ go izi fɔ mek wi du dat, mɔ if wi dɔn de mek di sem mistek fɔ lɔng tɛm. Sɔntɛnde, i kin tan lɛk se di mistek dɛn we wi kin mek pas di wan we Pita bin de mek. Bɔt Jiova go ɛp wi fɔ mek wi nɔ giv-ɔp. (Sam 94:​17-19) Fɔ ɛgzampul, wan brɔda bin de pan omo layf fɔ lɔng tɛm bifo i lan di trut. I bin gɛt fɔ chenj in layf ɛn aplay di tin dɛn we i de lan na di Baybul. Bɔt stil, sɔntɛnde i kin fil fɔ du di rɔng tin. Wetin bin ɛp am fɔ mek i nɔ giv-ɔp? I tɔk se: “Na Jiova de ɛp mi.” I tɔk bak se: “Wit Jiova in spirit . . . , a dɔn lan se i pɔsibul fɔ mek a [kɔntinyu] fɔ liv mi layf di we aw Jiova want . . . Jiova dɔn ebul fɔ yuz mi pan ɔl we a nɔ pafɛkt, ɛn i de ɛp mi ɔltɛm.”

13. Aw wi go falamakata Pita in ɛgzampul we de na Akt 4:​13, 29, 31? (Luk bak di pikchɔ.)

 ¹³ As wi bin dɔn lan, nɔto wan tɛm nɔmɔ Pita bin mek siriɔs mistek dɛn bikɔs i bin de fred mɔtalman. Bɔt we i bin pre fɔ mek i gɛt maynd, i bin ebul gɛt maynd fɔ du tin dɛn. (Rid Akt 4:​13, 29, 31.) Wisɛf go ebul fɔ lɛf fɔ fred. Lɛ wi tɔk bɔt wetin bin apin to wan yɔŋ brɔda we nem Ɔst, we bin de na Jamani insay Wɔl Wɔ II. Da tɛm de, pipul dɛn bin gɛt wan spɛshal we fɔ grit, we na “El Itla,” we min se “Itla go sev wi.” Pan ɔl we Ɔst bin no se i rɔng fɔ grit da we de, sɔntɛnde i bin de tɔk am bikɔs i bin de fred in ticha ɛn klasmet dɛn. Bifo Ɔst in mama ɛn papa vɛks pan am, dɛn bin pre wit am ɛn aks Jiova fɔ gi am maynd. Bikɔs Ɔst in mama ɛn papa bin ɛp am ɛn i bin abop pan Jiova, as tɛm de go i bin ebul fɔ tinap tranga wan. Leta i tɔk se: “Jiova nɔ ɛva lɛf mi.” c

14. Aw ɛlda dɛn go ɛnkɔrej di wan dɛn we dɛn at rili pwɛl?

¹⁴ Jiova ɛn Jizɔs nɔ go giv-ɔp pan wi. Afta Pita bin dinay Jizɔs, i bin gɛt impɔtant tin fɔ disayd. Fɔ se i go lɛf fɔ bi Krays in disaypul ɔ i nɔ go giv-ɔp? Jizɔs bin dɔn beg Jiova fɔ mek Pita nɔ lɛf fɔ gɛt fet. Jizɔs bin tɛl Pita bɔt da prea de ɛn i bin sho am se i biliv se Pita go ebul fɔ ɛnkɔrej in brɔda dɛn leta. (Lyuk 22:​31, 32) Pita go mɔs dɔn gɛt kɔrej we i mɛmba wetin Jizɔs bin tɔk. We wi gɛt impɔtant tin dɛn fɔ disayd, Jiova kin yuz shɛpad dɛn we de kia fɔ wi fɔ gi wi di kɔnfidɛns we wi nid fɔ kɔntinyu fɔ  bi pɔsin we fetful. (Ɛfi. 4:​8, 11) Pɔl we dɔn sav as ɛlda fɔ lɔng tɛm dɔn tray fɔ du dis. I kin aks di wan dɛn we kin want fɔ giv-ɔp fɔ tink fɔs bɔt aw Jiova bin mek dɛn kam na di trut. Dɔn i kin mek dɛn biliv se di lɔv we Jiova gɛt we nɔ de ɛva chenj nɔ go alaw Am fɔ giv-ɔp pan dɛn. I dɔn fɔ tɔk se, “A dɔn si aw Jiova dɔn ɛp bɔku pipul dɛn fɔ mek dɛn nɔ giv-ɔp we dɛn at rili pwɛl.”

15. Aw Pita ɛn Ɔst dɛn ɛgzampul sho se wetin de na Matyu 6:33 na tru?

¹⁵ Jɔs lɛk aw Jiova bin gi Pita ɛn di ɔda apɔsul dɛn di tin dɛn we dɛn nid, na so I go kia fɔ wi we wi put di prichin wok fɔs na wi layf. (Mat. 6:33) Afta Wɔl Wɔ II, Ɔst, we wi bin dɔn tɔk bɔt, bin de tink bɔt fɔ payɔnia. Bɔt i bin rili po, ɛn dat mek i bin de dawt if i go ebul sɔpɔt insɛf ɛn kɔntinyu fɔ yuz ɔl in tɛm fɔ sav Jiova. Wetin i bin du? I bin disayd fɔ tɛst Jiova, ɛn i bin spɛn di wan ol wik fɔ prich di tɛm we dɛn bin gɛt sakit visit. We di wik dɔn, i bin sɔprayz we di sakit ovasia gi am wan ɛnvilop we gɛt mɔni, bɔt di sakit ovasia nɔ bin tɛl Ɔst udat gi am di mɔni. Di ɛnvilop bin gɛt bɔku mɔni we go sɔpɔt am fɔ payɔnia fɔ sɔm mɔnt. Dis gift bin mek Ɔst biliv se Jiova go sɔpɔt am. Ɛn i bin put di Kiŋdɔm fɔs na in layf te i day.—Mal. 3:10.

16. Wetin mek i fayn fɔ lan mɔ bɔt Pita ɛn di tin dɛn we i rayt insay in lɛta dɛn?

¹⁶ Wan tɛm, Pita bin aks Jizɔs fɔ mek i nɔ lɛf am; i go mɔs dɔn gladi we Jizɔs nɔ bin ɛva lɛf am! Krays bin kɔntinyu fɔ tren Pita fɔ bi fetful apɔsul ɛn fɔ bi fayn ɛgzampul fɔ Kristian dɛn. Di tin dɛn we dɛn rayt bɔt da trenin de gɛt bɔku impɔtant lɛsin dɛn we go bɛnifit wi ɔl. Pita bin tɔk bɔt sɔm pan dɛn lɛsin dɛn de ɛn ɔda tin dɛn insay in tu lɛta dɛn we i bin rayt to di fɔstɛm Kristian dɛn, ɛn dɛn de pat pan di Baybul. Di nɛks atikul go tɔk bɔt tin dɛn we wi go lan frɔm dɛn lɛta dɛn de ɛn aw wi go aplay dɛn tide.