1. Wetin nɔ bin izi fɔ Jɛoash, Uzaya, ɛn Josaya?

 IMAJIN se dɛn mek yu kiŋ fɔ Gɔd in pipul dɛn we yu rili yɔŋ! Aw yu go yuz yu pawa? Di Baybul tɛl wi bɔt bɔku yɔŋ wan dɛn we na bin kiŋ dɛn na Juda. Fɔ ɛgzampul, Jɛoash bin jɔs ol 7 ia, Uzaya bin ol 16 ia, ɛn Josaya bin ol 8 ia. I go bi se dis nɔ bin rili izi fɔ dɛn! Bɔt pan ɔl we i nɔ bin izi fɔ dɛn, Jiova ɛn ɔda pipul dɛn bin ɛp dɛn fɔ du bɔku gud tin dɛn.

2. Wetin mek i fayn fɔ lɛ wi tɔk bɔt Jɛoash, Uzaya, ɛn Josaya dɛn ɛgzampul?

² Wi nɔto kiŋ ɔ kwin dɛn, bɔt wi go ebul fɔ lan impɔtant lɛsin dɛn frɔm Jɛoash, Uzaya, ɛn Josaya. Wi kin lan frɔm di gud tin dɛn we dɛn bin disayd fɔ du ɛn frɔm di bad tin dɛn we dɛn bin disayd fɔ du. Frɔm dɛn ɛgzampul, wi go ebul si wetin mek wi nid fɔ pik gud padi dɛn, kɔntinyu fɔ put wisɛf dɔŋ, ɛn kɔntinyu fɔ luk fɔ Jiova.

3. Wetin Kiŋ Jɛoash bin du we Ay Prist Jɛoayda bin de advays am?

³ Falamakata di rayt tin dɛn we Jɛoash bin disayd fɔ du. We Jɛoash bin yɔŋ, in papa bin day ɛn Ay Prist Jɛoayda bin mɛn am ɛn tich am bɔt Jiova. Jɛoash bin gɛt sɛns bikɔs i bin de lisin to di advays we Jɛoayda bin de gi am. Bikɔs ɔf Jɛoayda in ɛgzampul, Jɛoash bin disayd fɔ sav Jiova ɛn ɛp di pipul dɛn fɔ sav Am bak. Jɛoash bin ivin arenj fɔ mek dɛn go mek di say dɛn we pwɛl na Jiova in tɛmpul.—2 Kro. 24:​1, 2, 4, 13, 14.

4. Aw wi de bɛnifit we wi valyu Jiova in lɔ dɛn? (Prɔvabs 2:​1, 10-12)

⁴ If yu mama ɔ papa ɔ ɔda pɔsin de tich yu fɔ lɛk Jiova ɛn fala in lɔ dɛn, dɛn dɔn gi yu gift we rili valyu. (Rid Prɔvabs 2:​1, 10-12.) Yu mama ɛn papa dɛn de tren yu bɔku we dɛn. Tink bɔt aw wan sista we nem Katya in  papa bin ɛp am fɔ disayd fɔ du di rayt tin dɛn. We in papa bin de go lɛf am na skul ɛvride, dɛn bin de tɔk bɔt di deli tɛks. Katya tɔk se: “Dɛn tin dɛn de we wi bin de tɔk bin ɛp mi fɔ du di rayt tin we a gɛt prɔblɛm da de de.” Bɔt wetin yu go du if yu fil se di advays we yu mama ɛn papa dɛn de gi yu we kɔmɔt na di Baybul nɔ de alaw yu fɔ du di tin dɛn we yu want fɔ du? Wetin go ɛp yu fɔ gri fɔ fala dɛn advays? Wan sista we nem Anasteshia mɛmba se in mama ɛn papa bin de tek tɛm ɛksplen wetin mek dɛn de mek sɔm lɔ dɛn. I tɔk se: “Dat bin ɛp mi fɔ ɔndastand se dɛn nɔ de mek dɛn lɔ dɛn de fɔ kɔntrol mi, bɔt na fɔ protɛkt mi bikɔs dɛn lɛk mi.”

5. Aw di tin dɛn we yu de du go afɛkt yu mama ɛn papa dɛn ɛn Jiova? (Prɔvabs 22:6; 23:​15, 24, 25)

⁵ Yu mama ɛn papa dɛn go gladi we yu lisin to di advays we dɛn de gi yu frɔm di Baybul. Wetin impɔtant mɔ na dat yu go mek Gɔd gladi ɛn una padi biznɛs go tayt mɔ ɛn mɔ. (Rid Prɔvabs 22:6; 23:​15, 24, 25.) Dis na gud rizin we mek yu fɔ falamakata Jɛoash in ɛgzampul we i bin yɔŋ.

6. Udat dɛn advays Jɛoash bin bigin fɔ lisin to? Wetin bin apin? (2 Kronikul 24:​17, 18)

⁶ Lan frɔm di bad tin dɛn we Jɛoash bin disayd fɔ du. Afta Jɛoayda day, Jɛoash bin pik bad padi dɛn. (Rid 2 Kronikul 24:​17, 18.) I bin disayd fɔ lisin to di prins dɛn na Juda we nɔ bin lɛk Jiova. Yu go mɔs gri se Jɛoash bin fɔ dɔn avɔyd dɛn bikɔs dɛn bin de du bad tin dɛn. (Prɔv. 1:10) Bifo dat, i bin lisin to dɛn advays. Infakt, we Jɛoash in kɔzin Zɛkaraya bin tray fɔ kɔrɛkt am, Jɛoash bin mek dɛn kil am. (2 Kro. 24:​20, 21; Mat. 23:35) Dis tin we Jɛoash du bin rili bad ɛn i nɔ mek sɛns atɔl! I bin bigin in layf fayn, bɔt i sɔri fɔ no se i bin tɔn apɔstet ɛn kil. Faynali, in yon savant dɛn bin kil am. (2 Kro. 24:​22-25) Dis nɔ bin fɔ dɔn apin to am if i bin kɔntinyu fɔ lisin to Jiova ɛn di wan dɛn we lɛk Jiova. Us lɛsin yu lan frɔm da ɛgzampul de?

7. Udat dɛn yu fɔ pik as padi? (Luk bak di pikchɔ.)

⁷ Wan lɛsin we wi lan frɔm di bad tin dɛn we Jɛoash bin disayd fɔ du na dat wi nid fɔ pik padi dɛn we lɛk Jiova ɛn we want fɔ mek i gladi. Dɛn padi dɛn ya go ɛp wi fɔ du gud tin dɛn. Wi kin bi padi to di wan dɛn we big pas wi ɔ di wan dɛn we  wi big pas. Mɛmba se Jɛoash in padi Jɛoayda bin big pas am fa fawe. We i kam to di padi dɛn we yu de pik, aks yusɛf: ‘Dɛn mi padi dɛn ya de ɛp mi fɔ gɛt fet pan Jiova mɔ ɛn mɔ? Dɛn de du dɛn bɛst fɔ obe am? Dɛn de ɛnkɔrej mi fɔ du di sem tin? Dɛn de tɔk bɔt Jiova ɛn di tin dɛn we dɛn de lan frɔm di Baybul? Dɛn de gi mi advays di tɛm we a rili nid am ɔ na jɔs wetin a want fɔ yɛri dɛn de tɛl mi?’ (Prɔv. 27:​5, 6, 17) Fɔ tɔk tru, if yu padi dɛn nɔ lɛk Jiova, yu nɔ nid dɛn. Bɔt if yu gɛt padi dɛn we lɛk Jiova, dɛn go ɛp yu ɔltɛm!—Prɔv. 13:20.

8. If wi de yuz soshal midia, wetin wi nid fɔ tink bɔt?

⁸ Soshal midia kin bi fayn we fɔ tɔk to wi fambul ɛn padi dɛn. Bɔt bɔku pipul dɛn de yuz am fɔ blɔf ɔda pipul dɛn wit di tin dɛn we dɛn gɛt bay we dɛn de post pikchɔ ɔ vidio dɛn bɔt wetin dɛn dɔn bay ɔ du. If yu de yuz soshal midia, aks yusɛf: ‘A de post tin dɛn fɔ mek ɔda pipul dɛn kɔle mi? A want fɔ sho sɔntin we gud to ɔda pipul dɛn, ɔ a want mek dɛn prez mi? A de alaw di we aw ɔda pipul dɛn de tink fɔ afɛkt di we aw a de tink, tɔk, ɛn du tin di rɔng we?’ Brɔda Netan Nɔ, we na bin mɛmba na di Gɔvnin Bɔdi bin gi dis advays. I se: “Nɔ tray fɔ mek mɔtalman gladi fɔ yu. If yu du dat, yu nɔ go ebul mek ɛnibɔdi gladi fɔ yu. Mek Jiova gladi fɔ yu, ɛn ɔl di wan dɛn we lɛk am go gladi fɔ yu.”

9. Wetin Jiova bin ɛp Uzaya fɔ du? (2 Kronikul 26:​1-5)

⁹ Falamakata di rayt tin dɛn we Uzaya bin disayd fɔ du. We Kiŋ Uzaya bin yɔŋ, i bin ɔmbul. I bin lan ‘fɔ fred PAPA GƆD.’ I bin liv fɔ 68 ia, ɛn Jiova bin blɛs am fɔ ɔl di tɛm dɛn we i bin fetful to am. (Rid 2 Kronikul 26:​1-5.) Uzaya bin win bɔku pan dɛn ɛnimi dɛn, ɛn i bin mek shɔ se dɛn protɛkt Jerusɛlɛm gud gud wan. (2 Kro. 26:​6-15) Wan dawt nɔ de se Uzaya bin gladi fɔ wetin Gɔd bin ɛp am fɔ du.—Ɛkli. 3:​12, 13.

10. Wetin bin apin to Uzaya?

¹⁰ Lan frɔm di bad tin dɛn we Uzaya bin disayd fɔ du. Kiŋ Uzaya bin dɔn yus fɔ tɛl ɔda pipul dɛn wetin fɔ du. Sɔntɛm na dat bin mek i fil se i kin du ɛnitin we i want. Wan de, Uzaya bin go insay Jiova in tɛmpul, ɛn i nɔ bin sho wan rɛspɛkt bay we i tray fɔ bɔn insɛns na di ɔlta we na sɔntin we kiŋ dɛn nɔ fɔ du. (2 Kro. 26:​16-18) Ay Prist Azaraya bin tray fɔ kɔrɛkt am, bɔt Uzaya bin vɛks pan am bad bad wan. I sɔri fɔ no se Uzaya nɔ bin kɔntinyu fɔ fetful ɛn Jiova bin pɔnish am bay we i mek i gɛt lɛprɔsi. (2 Kro. 26:​19-21) In layf fɔ dɔn bɛtɛ pas dat fa fawe if i bin kɔntinyu fɔ put insɛf dɔŋ!

11. Wetin go ɛp wi fɔ kɔntinyu fɔ put wisɛf dɔŋ? (Luk bak di pikchɔ.)

¹¹ We Uzaya bin dɔn pawaful, i bin fɔgɛt se na Jiova de gi am trɛnk ɛn ɛp am fɔ du ɔl di tin dɛn we i bin ebul fɔ du. Wetin na di lɛsin? I go fayn fɔ mek wi mɛmba se na Jiova de gi wi ɔl di gud tin dɛn we wi de ɛnjɔy na wi layf ɛn in savis. Bifo wi bost bɔt di tin dɛn we wi ebul fɔ du, i go fayn fɔ mek wi prez Jiova fɔ wetin wi ebul fɔ du. b (1 Kɔr. 4:7) Wi fɔ put wisɛf dɔŋ ɛn mɛmba se wi nɔ pafɛkt ɛn  wi nid pɔsin fɔ kɔrɛkt wi. Wan brɔda we de arawnd 60 ia rayt se: “A dɔn lan se a nɔ fɔ de vɛks ɔ fil bad we ɔda pɔsin notis mi mistek dɛn. We dɛn kɔrɛkt mi fɔ di mistek dɛn we a kin mek sɔntɛnde, a kin tray fɔ ajɔst ɛn kɔntinyu fɔ gi Jiova mi bɛst.” Di tru na dat we wi fred Jiova ɛn kɔntinyu fɔ tink di rayt we bɔt wisɛf, wi go gɛt tru tru gladi-at.—Prɔv. 22:4.

12. We Josaya bin yɔŋ, aw i bin luk fɔ Jiova? (2 Kronikul 34:​1-3)

¹² Falamakata di rayt tin dɛn we Josaya bin disayd fɔ du. Josaya na bin tineja we i bigin fɔ luk fɔ Jiova. I bin want fɔ lan bɔt Jiova ɛn du wetin I want. Bɔt tin nɔ bin izi fɔ dis yɔŋ kiŋ. Di tɛm we i bin de rul, bɔku pan di pipul dɛn bin de wɔship lay lay gɔd dɛn. So Josaya bin nid fɔ gɛt maynd fɔ mek i go stɔp dɛn fɔ wɔship lay lay gɔd dɛn. Ɛn i bin rili gɛt maynd! Bifo i rich 20 ia, i bigin fɔ pul lay lay wɔship na di neshɔn.—Rid 2 Kronikul 34:​1-3.

13. We yu gi yu layf to Jiova, aw dat go afɛkt yu?

¹³ Ilɛksɛf yu rili yɔŋ, yu kin disayd fɔ falamakata Josaya bay we yu lan mɔ bɔt Jiova ɛn in wɔndaful kwaliti dɛn. We yu du dat, yu go want fɔ gi yu layf to am. Aw dis go afɛkt yu layf? Lyuk, we baptayz di tɛm we i bin ol 14 ia tɔk se: “Frɔm naw, a go put Jiova fɔs na mi layf ɛn a go tray fɔ mek i gladi.” (Mak 12:30) If yu disayd fɔ du di sem tin, yu go gɛt bɔku blɛsin!

14. Gi ɛgzampul dɛn bɔt aw sɔm yɔŋ wan dɛn de falamakata Kiŋ Josaya.

¹⁴ Us prɔblɛm dɛn go mit yu we yu de sav Jiova as yɔŋ pɔsin? Joan, we bin baptayz we i ol 12 ia, tɔk bɔt aw in klasmet dɛn de prɛzhɔ am fɔ smok ilɛktronik sigrɛt we dɛn de kɔl vep. Fɔ mek Joan nɔ du dat, i kin mɛmba insɛf se fɔ smok ilɛktronik sigrɛt go ambɔg in wɛlbɔdi ɛn in padi biznɛs wit Jiova. Rechɛl, we bin baptayz we i ol 14 ia, tɔk bɔt wetin kin ɛp am fɔ bia we i de gɛt prɔblɛm dɛn na skul. I tɔk se: “A kin tray fɔ luk fɔ  tin dɛn we go mɛmba mi bɔt di Baybul ɛn Jiova. Fɔ ɛgzampul, we dɛn kin tich bɔt istri na klas, i kin mek a mɛmba Baybul akawnt ɔ prɔfɛsi. Ɔ we a kin tɔk wit mi skulmet dɛn, i kin mek a tink bɔt skripchɔ we a go yuz fɔ prich to dɛn.” Sɔntɛm di prɔblɛm we de mit yu difrɛn frɔm di wan dɛn we Kiŋ Josaya bin gɛt, bɔt yu go ebul sho se yu gɛt sɛns ɛn kɔntinyu fɔ de biɛn Jiova jɔs lɛk Josaya. We yu ebul fɔ bia prɔblɛm dɛn we yu yɔŋ, dat go ɛp yu fɔ ebul bia ɔda prɔblɛm dɛn we go mit yu tumara bambay.

15. Wetin bin ɛp Josaya fɔ sav Jiova fetful wan? (2 Kronikul 34:​14, 18-21)

¹⁵ We Kiŋ Josaya bin ol 26 ia, i bin mek dɛn bigin mek di say dɛn we pwɛl na Jiova in tɛmpul. We dɛn bin de du da wok de, dɛn bin fɛn “PAPA GƆD [“Jiova,” NWT] in lɔ buk we I bin gi Mozis.” We di kiŋ yɛri wetin de na di buk, i nɔ westɛm fɔ mek chenj dɛn fɔ obe wetin rayt na di buk. (Rid 2 Kronikul 34:​14, 18-21.) Yu go lɛk fɔ rid di Baybul ɛvride? If yu de tray fɔ du dat, yu de ɛnjɔy fɔ du am? Yu de notis vas dɛn we go ɛp yu? Lyuk, we wi bin dɔn tɔk bɔt, kin rayt fayn pɔynt dɛn we i kin fɛn we i de du in Baybul ridin. We yu de du da kayn tin de, i go ɛp yu fɔ mɛmba Baybul vas dɛn ɔ lɛsin dɛn we yu lan frɔm dɛn. Di mɔ yu no ɛn lɛk di Baybul, na di mɔ yu go want fɔ sav Jiova. Ɛn jɔs lɛk aw Gɔd in Wɔd bin ɛp Josaya fɔ du wetin rayt, na so i go ɛp yu bak.

16. Wetin mek Josaya bin mek siriɔs mistek? Wetin na di lɛsin fɔ wi?

¹⁶ Lan frɔm di bad tin dɛn we Josaya bin disayd fɔ du. We Josaya bin de arawnd 39 ia, i bin mek mistek we bin mek i lɔs in layf. Bifo i beg Jiova fɔ mek i gayd am, i bin abop pan insɛf.  (2 Kro. 35:​20-25) Wi kin lan lɛsin frɔm dat. Ilɛk ɔmɔs ia wi ol ɔ aw lɔng wi dɔn de stɔdi di Baybul, wi fɔ kɔntinyu fɔ luk fɔ Jiova. Dat min se wi fɔ de pre to am ɔltɛm fɔ mek i gayd wi. Wi fɔ de stɔdi in Wɔd ɛn lisin to di advays dɛn we machɔ Kristian dɛn de gi wi. Dat go mek wi nɔ mek siriɔs mistek dɛn, ɛn wetin impɔtant mɔ na dat wi go gɛt gladi-at.—Jems 1:25.

17. Wetin wi lan frɔm di akawnt dɛn bɔt di tri kiŋ dɛn na Juda?

¹⁷ Bɔku tin dɛn de we yu go ebul du we yu yɔŋ. Di akawnt bɔt Jɛoash, Uzaya, ɛn Josaya na ɛgzampul dɛn we de sho se yɔŋ wan dɛn go ebul fɔ disayd fɔ du di rayt tin dɛn ɛn mek Jiova gladi bay di we aw dɛn de liv dɛn layf. Fɔ tru, dɛn yɔŋ wan dɛn ya bin mek mistek dɛn we bin mek bad tin apin to dɛn. Bɔt if yu falamakata di gud tin dɛn we dɛn bin du ɛn avɔyd fɔ mek di mistek dɛn we dɛn bin mek, yu go gɛt gladi-at na layf.

18. Us ɛgzampul dɛn na di Baybul we sho se yu go ebul gɛt gladi-at na layf? (Luk bak di pikchɔ.)

¹⁸ Di Baybul gɛt akawnt bɔt ɔda yɔŋ wan dɛn we bin gɛt tayt padi biznɛs wit Jiova, we i bin gladi fɔ, ɛn we bin liv satisfay layf. Devid na bin wan pan dɛn. We i bin yɔŋ, i bin disayd fɔ wɔship Gɔd, ɛn leta i bi kiŋ we kɔntinyu fɔ de biɛn Jiova. Na tru se wan wantɛm Devid bin de mek mistek dɛn, bɔt Gɔd bin si am as fetful savant. (1 Kiŋ 3:6; 9:​4, 5; 14:8) We yu stɔdi bɔt Devid in ɛgzampul, dat go ɛnkɔrej yu fɔ sav Jiova fetful wan. Yu kin lan mɔ bɔt Mak ɔ Timoti. Dɛn bin bigin fɔ sav Jiova we dɛn smɔl, ɛn dɛn kɔntinyu fɔ sav am fetful wan. Di disayd we dɛn disayd fɔ sav Jiova bin mek i gladi ɛn dɛnsɛf bin gladi.

19. Uskayn layf yu go ebul gɛt?

¹⁹ Di we aw yu de liv yu layf rayt naw go afɛkt aw yu layf go tan lɛk tumara bambay. If yu abop pan Jiova ɛn nɔ abop pan yu yon sɛns, I go ɛp yu fɔ disayd fɔ du di rayt tin dɛn. (Prɔv. 20:24) Yu go ebul gɛt gladi-at ɛn liv satisfay layf. Mɛmba se Jiova valyu wetin yu de du fɔ am. No bɛtɛ we nɔ de we yu go yuz yu layf pas fɔ sav Jiova we na wi Papa we de na ɛvin.