A bɔn insay 1934. Mi mama ɛn papa kɔmɔt na Swizaland ɛn kam de na Timins we na wan tɔŋ na Ɔntario, insay Kanada usay dɛn de du maynin. Arawnd 1939, mi mama bin bigin fɔ rid di Wachtawa magazin ɛn fɔ go Jiova Witnɛs dɛn mitin dɛn. I bin de go wit mi ɛn mi siks brɔda ɛn sista dɛn. I nɔ te, i bi wan pan Jiova Witnɛs dɛn.

Mi papa nɔ bin gladi we mama disayd fɔ bi Jiova Witnɛs, bɔt mi mama bin lɛk di trut ɛn i bin dɔn mek-ɔp in maynd fɔ kɔntinyu fɔ sav Jiova. I bin ivin kɔntinyu fɔ sav Jiova insay dɛn 1940 we dɛn bin ban Jiova Witnɛs dɛn wok insay Kanada. Pan ɔl we mi papa bin de tɔk to am ash wan, mama bin kɔntinyu fɔ de rɛspɛkt am ɛn trit am fayn. In fayn ɛgzampul bin ɛp mi ɛn mi brɔda ɛn sista dɛn fɔ tek di trut. Wi bin gladi bikɔs as tɛm de go, Papa bin chenj di we aw i bin de trit wi ɛn stat fɔ trit wi fayn.

Insay Ɔgɔst 1950, a atɛnd di Theocracy’s Increase Assembly na Nyu Yɔk Siti. A bin rili want fɔ du mɔ fɔ Jiova afta a si difrɛn brɔda ɛn sista dɛn we kɔmɔt ɔlsay na di wɔl ɛn lisin to fayn intavyu dɛn frɔm Giliad studɛnt dɛn. Dat bin mek a mek-ɔp mi maynd mɔ fɔ sav Jiova ful-taym. As a go bak usay a bin de, a aplay fɔ bi rɛgyula payɔnia. Bɔt di branch na Kanada bin se a fɔ baptayz fɔs. So a bin baptayz insay Ɔktoba 1, 1950. Afta wan mɔnt, a bigin fɔ rɛgyula payɔnia ɛn mi fɔs asaynmɛnt na bin fɔ go na Kapuskesin. Dis tɔŋ bin rili fa frɔm usay a bin de da tɛm de.

Insay 1951, di branch ɔfis bin aks Witnɛs dɛn we ebul tɔk Frɛnch fɔ si if dɛn go ebul fɔ  go na di prɔvins usay dɛn de tɔk Frɛnch na Kyubɛk. Dɛn bin rili nid bɔku pɔblisha dɛn de fɔ prich. A bin de tɔk Frɛnch ɛn Inglish frɔm we a smɔl. So a disayd fɔ go ɛn dɛn bin sɛn mi na Ruɛn. A nɔ bin sabi ɛnibɔdi de. Jɔs lɛk aw a bin dɔn tɔk, na adrɛs nɔmɔ a bin gɛt. Bɔt ɔltin bin go fayn. Mi ɛn Masɛl bin kam fɔ bi tayt padi dɛn ɛn a bin sav na Kyubɛk fɔ 4 ia, ɛn as tɛm de go a bi spɛshal payɔnia.

We a bin de na Kyubɛk, a bin gladi we a gɛt inviteshɔn fɔ atɛnd di 26 klas na Giliad Skul na Sawt Lansin, insay Nyu Yɔk. A bin gradyuet insay Fɛbwari 12, 1956, ɛn dɛn bin sɛn mi na di kɔntri we dɛn de kɔl naw Gana, b we de na Wɛst Afrika. Bɔt bifo a go, a bin nid fɔ go bak na Kanada fɔ “shɔt tɛm” fɔ arenj mi dɔkyumɛnt dɛn fɔ travul.

A bin ɛnd-ɔp fɔ wet fɔ sɛvin mɔnt na Toronto fɔ dɛn dɔkyumɛnt dɛn de. Insay da tɛm de, na di Krips famili bin lɔj mi ɛn na da tɛm de a sabi dɛn galpikin Shila. Wi bin lɛk wisɛf. Mi visa kam di tɛm we a bin want fɔ tɛl am se a want am fɔ mared. Mi ɛn Shila bin pre bɔt am ɛn wi disayd se a fɔ go usay dɛn sɛn mi. Bɔt wi go de rayt lɛta to wisɛf ɛn si if wi go mared leta. Dat nɔto bin izi tin fɔ disayd, bɔt leta wi bin kam fɔ no se na di rayt tin wi bin disayd fɔ du.

Afta a yuz tren, ship we de go wit lod, ɛn plen fɔ travul fɔ wan mɔnt, a bin rich na Akra, insay Gana. We a bin de de, dɛn bin mek a sav as distrikt ovasia. Dat min se a bin nid fɔ travul ɔlsay na Gana, Ayvri Kost (we dɛn de kɔl naw Côte d’Ivoire) ɛn Togoland (we dɛn de kɔl naw Togo). Bɔku tɛm, na mi wangren bin de travul insay di motoka we di branch bin gi. A bin rili gladi fɔ travul fɔ go fɛn di brɔda ɛn sista dɛn.

A bin de du di asaynmɛnt dɛn we dɛn bin de gi mi na di sakit asɛmbli we wikɛnd rich.  Wi nɔ bin gɛt Asɛmbli Ɔl dɛn. So di brɔda dɛn bin de yuz bambu tik dɛn ɛn kɔba dɛn wit pam tik branch dɛn fɔ mek wi gɛt shed. Bikɔs frij nɔ de usay dɛn bin de mek it, dɛn bin de kam wit di animal dɛn layv wan ɛn kil di wan dɛn we dɛn nid fɔ mek it fɔ di wan dɛn we atɛnd di asɛmbli.

Sɔm fɔni tin dɛn bin de apin na dɛn asɛmbli dɛn de. Wan tɛm, we Ab Jɛnins c we na mi kɔmpin mishɔnari bin de gi tɔk, wan kaw kɔmɔt usay dɛn de mek it ɛn bigin rɔn-rɔn bitwin di platfɔm ɛn di pipul dɛn. Ab bin stɔp fɔ tɔk ɛn di kaw bin luk kɔnfyuz. Bɔt 4 strɔng brɔda dɛn bin ebul fɔ ol am ɛn go wit am bak usay dɛn de mek it ɛn di pipul dɛn bin klap fɔ dɛn.

Insay di wik, a kin sho di fim we gɛt di taytul The New World Society in Action na vilɛj dɛn we nɔ de fa. Fɔ mek a go ebul sho di fim, a kin yuz projɛktɔ ɛn wayt klos bitwin tu pol ɔ tu tik dɛn. Di vilej pipul dɛn bin lɛk dat! Fɔ bɔku pan dɛn, dis na di fɔs fim we dɛn dɔn ɛva wach. Dɛn bin de klap lawd lawd wan we dɛn si usay pipul dɛn de baptayz. Da fim bin rili ɛp di wan dɛn we wach am fɔ no se Jiova Witnɛs dɛn gɛt wanwɔd ɛn wi de ɔlsay na di wɔl.

Afta a dɔn de na Afrika fɔ lɛk tu ia, a bin gladi fɔ atɛnd di 1958 intanashɔnal kɔnvɛnshɔn insay Nyu Yɔk Siti. A bin rili gladi fɔ si Shila, we bin kɔmɔt na Kyubɛk usay i bin de sav as spɛshal payɔnia. Wi bin dɔn de rayt lɛta to wisɛf, bɔt naw we wi dɔn si bak a bin aks am if i go mared mi, ɛn i bin gri. A bin rayt lɛta to Brɔda Nɔ d ɛn aks am if Shila kin atɛnd Giliad ɛn kam jɔyn mi na Afrika. I bin gri. Leta Shila bin kam mit mi na Gana. Wi bin mared na Akra insay Ɔktoba 3, 1959. Wi bin si se Jiova dɔn rili blɛs wi bikɔs wi put am fɔs na wi layf.

Insay 1961, dɛn bin sɛn wi na Kamɛrun. A bin rili bizi bikɔs dɛn bin tɛl mi fɔ ɛp opin nyu branch ɔfis na di kɔntri. As nyu branch savant, a bin gɛt bɔku tin dɛn fɔ lan. Dɔn insay 1965 wi kam fɔ no se Shila dɔn gɛt bɛlɛ. Fɔ tru, i bin tek sɔm tɛm bifo wi gri se  wi go kam bi mama ɛn papa. Bɔt we wi bigin fɔ gladi fɔ dis nyu wok we wi dɔn gɛt ɛn de mek arenjmɛnt fɔ go bak na Kanada, wan bad bad tin bin apin.

Di pikin bin day na Shila in bɛlɛ. Di dɔktɔ tɛl wi se na bin bɔypikin. I dɔn pas 50 ia we dis dɔn apin, bɔt wi nɔ ɛva fɔgɛt bɔt am. Pan ɔl we wi at bin rili pwɛl bikɔs ɔf wetin apin, wi bin kɔntinyu fɔ de na wi asaynmɛnt we na sɔntin we wi rili lɛk.

Bɔku tɛm, dɛn bin de mek wi brɔda ɛn sista dɛn sɔfa na Kamɛrun bikɔs dɛn nɔ bin de put am pan pɔlitiks. Tin bin de bad-ɔf mɔ di tɛm we dɛn kin mek ilɛkshɔn fɔ vot fɔ prɛsidɛnt. Di tin we wi bin de fred se go apin, bin apin insay Me 13, 1970, we dɛn ban Jiova Witnɛs dɛn wok. Di gɔvmɛnt bin tek di fayn nyu branch ɔfis we wi bin jɔs dɔn yuz fɔ fayv mɔnt. Insay wan wik, dɛn tɛl ɔl di mishɔnari dɛn fɔ kɔmɔt na di kɔntri. Mi ɛn Shila sɛf nɔ bin lɛf de. Wi bin fil am we wi lɛf wi brɔda ɛn sista dɛn de bikɔs wi bin rili bisin bɔt dɛn ɛn wi bin de wɔri bɔt wetin go apin to dɛn.

Afta dat, wi bin go de na di branch ɔfis na Frans fɔ siks mɔnt. We wi bin de de, a bin kɔntinyu fɔ du ɔl wetin a ebul fɔ kia fɔ wi brɔda ɛn sista dɛn na Kamɛrun. Insay Disɛmba da sem ia de, dɛn bin sɛn wi na di branch na Nayjiria we bin bigin fɔ kia fɔ di wok na Kamɛrun. Di brɔda ɛn sista dɛn na Nayjiria bin wɛlkɔm wi fayn ɛn wi bin ɛnjɔy fɔ de de fɔ lɔng tɛm.

Insay 1973, wi bin disayd fɔ du sɔntin we nɔ bin rili izi. Shila bin gɛt siriɔs sik dɛn we bin de rili mɔna am. We wi bin de na Nyu Yɔk fɔ wan kɔnvɛnshɔn, i bigin fɔ kray ɛn tɛl mi se: “A nɔ ebul fɔ kɔntinyu fɔ du wetin a de du! Bɔku tɛm a kin taya ɛn mi bɔdi kin mɔna mi.” I dɔn pas 14 ia we mi ɛn in dɔn de sav na Wɛst Afrika ful-taym. A bin rili gladi fɔ we i de sav Jiova fetful wan, bɔt wi bin nid fɔ mek sɔm chenj dɛn. Afta wi dɔn tɔk bɔt wetin de apin to wi ɛn pre siriɔs wan bɔt am, wi bin disayd fɔ go bak na Kanada usay i go gɛt bɛtɛ tritmɛnt. Fɔ lɛf wi mishɔnari asaynmɛnt ɛn ful-taym savis na di tin we bin rili at fɔ disayd pas ɔl di ɔda tin dɛn we wi dɔn ɛva disayd fɔ du ɛn i bin rili mek wi at pwɛl.

Afta wi go bak na Kanada, wan mi padi we a bin dɔn sabi fɔ lɔng tɛm bin gi mi wok na wan say usay dɛn de sɛl motoka na di nɔt pat na Toronto. Wi bin rɛnt wan apatmɛnt, bay fɔnichɔ dɛn we dɛn dɔn yuz, ɛn dat bin mek wi ebul fɔ stat wi layf bak ɛn nɔ gɛt dɛt. Wi bin want fɔ liv simpul layf bikɔs wi bin de op se wan de wi go ebul fɔ yuz ɔl wi tɛm bak fɔ sav Jiova. Wi bin sɔprayz fɔ no se wi ebul fɔ du dat ivin bifo di tɛm we wi bin de tink.

A bin bigin fɔ vɔlɔntia dɛn Satide dɛn na wan kɔnstrɔkshɔn sayt usay dɛn bin de bil nyu Asɛmbli Ɔl na Nɔval insay Ɔntario. As tɛm de go, dɛn bin tɛl mi fɔ bi di Asɛmbli  Ɔl ovasia. Shila in bɔdi bin de bɛtɛ ɛn wi bin fil se i go ebul fɔ du dis nyu asaynmɛnt. So wi transfa na di Asɛmbli Ɔl apatmɛnt insay Jun 1974. Wi bin rili gladi fɔ bigin ful-taym savis bak!

Wi bin gladi bikɔs Shila in bɔdi bin kɔntinyu fɔ bɛtɛ. Afta tu ia, wi bin gri fɔ du di sakit wok. Di sakit bin de na wan Kanedian prɔvins we de na Manitoba ɛn na ples we kin kol bad bad wan. Bɔt wi bin rili ɛnjɔy fɔ spɛn tɛm wit di brɔda ɛn sista dɛn we de de. Wi bin lan se wetin rili impɔtant nɔto usay wi de sav Jiova, bɔt na fɔ kɔntinyu fɔ sav am ɛnisay wi de.

Afta wi dɔn du di sakit wok fɔ lɔng tɛm, dɛn bin invayt wi fɔ go wok na di Kanada Branch insay 1978. Shɔt tɛm afta dat, a bin lan wan lɛsin we bin at, bɔt we bin impɔtant. Dɛn bin tɛl mi fɔ gi 1:30 minit tɔk insay Frɛnch na wan spɛshal mitin we dɛn bin gɛt na Mɔntrial. I sɔri fɔ no se di ɔdiɛns nɔ bin bɛnifit frɔm di tɔk ɛn wan brɔda we de wok na di Savis Dipatmɛnt bin tɔk to mi bɔt dat. Fɔ tɔk tru, a bin fɔ dɔn mɛmba se mi na pɔsin we nɔ rili sabi gi tɔk. Bɔt a bin vɛks we i kɔrɛkt mi. Di tɔk nɔ bin kɔmɔt fayn bikɔs a bin fil se i tu gɛt-na-an, ɛn i nɔ ivin tɛl mi tɛnki fɔ di say dɛn we a du wɛl. A bin mek mistek ɛn nɔ gri fɔ tek di advays bikɔs ɔf aw di pɔsin tɔk to mi ɛn di we aw a bin de fil bɔt di pɔsin we tɔk to mi.

Afta sɔm dez, wan pan di brɔda dɛn we de na di Branch Kɔmiti bin tɔk to mi bɔt wetin apin. A bin gri se a nɔ biev fayn we di brɔda kɔrɛkt mi ɛn tɔk se a rigrɛt wetin a du. Afta dat, a bin tɔk to di brɔda we bin kɔrɛkt mi. I bin rɛdi fɔ fɔgiv mi. Dis tin we bin apin tich mi wan impɔtant lɛsin we na fɔ put misɛf dɔŋ ɛn dat na sɔntin we a nɔ go ɛva fɔgɛt. (Prɔv. 16:18) A dɔn pre to Jiova bɔku tɛm bɔt dis, ɛn a dɔn mek-ɔp mi maynd se a nɔ go ɛva vɛks we pɔsin kɔrɛkt mi.

I dɔn pas 40 ia naw we a de na di Branch na Kanada, ɛn frɔm 1985 a dɔn gɛt di ɔnɔ fɔ bi wan pan di brɔda dɛn na di Branch Kɔmiti. Insay Fɛbwari 2021, mi wɛf Shila we a rili lɛk bin day. Apat frɔm di pwɛlat we a gɛt bikɔs i dɔn day, a gɛt mi yon wɛlbɔdi prɔblɛm dɛn bak. Bɔt bikɔs a de wok fɔ Jiova, dat de mek a rili bizi ɛn gladi, ɛn i at fɔ lɛ a “notis se . . . tɛm de pas.” (Ɛkli. 5:20) Pan ɔl we a dɔn gɛt sɔm prɔblɛm dɛn, di gladi-at we a gɛt pas dɛn fa fawe. Fɔ put Jiova fɔs na mi layf ɛn fɔ ebul sav am ful-taym fɔ 70 ia, dɔn mek a rili gladi. A pre se wi yɔŋ brɔda ɛn sista dɛnsɛf go kɔntinyu fɔ put Jiova fɔs na dɛn layf bikɔs a biliv tranga wan se if dɛn du dat, dɛnsɛf go satisfay ɛn gladi ɛn na we pɔsin de sav Jiova nɔmɔ i go gɛt da kayn layf de.