1-2. Wetin de mek Gɔd in pipul dɛn gladi? (Jems 1:​22-25)

 JIOVA ɛn in Bɔypikin we i lɛk want wi fɔ gladi. Di man we rayt Sam 119:2 tɔk se: “Di wan dɛn we de du di tin dɛn we i de mɛmba dɛn, ɛn we de luk fɔ am wit ɔl dɛn at, gɛt gladi-at.” Jizɔs sɛf bin tɔk di sem tin we i se: “Di wan dɛn we de yɛri Gɔd in wɔd ɛn du am na dɛn gɛt gladi-at!”—Lyuk 11:28.

² Jiova in pipul dɛn we de wɔship am gladi. Wetin mek? Bɔku rizin dɛn de we mek wi gladi, bɔt wan pan di men tin dɛn we de mek wi gladi na bikɔs wi de rid Gɔd in Wɔd ɛvride ɛn tray tranga wan fɔ aplay wetin wi de lan.​—Rid Jems 1:​22-25.

3. Aw wi de bɛnifit we wi aplay wetin wi rid na Gɔd in Wɔd?

³ Bɔku bɛnifit dɛn de we wi de gɛt we wi “de du wetin Gɔd in wɔd se.” Fɔ ɛgzampul, we wi aplay wetin wi de lan insay Gɔd in Wɔd, wi de mek Jiova gladi, ɛn dat de mek wisɛf gladi. (Ɛkli. 12:13) We wi de du wetin wi de lan insay Gɔd in Wɔd, dat de mek wi famili gɛt gladi-at ɛn wi de gɛt tayt padi biznɛs wit wi kɔmpin Kristian dɛn. Wan dawt nɔ de se dis go dɔn apin to yu. Apat frɔm dat, wi nɔ de gɛt bɔku pan di prɔblɛm dɛn we kin mit di wan dɛn we nɔ de du wetin Jiova want. Fɔ tru, wi gri wit wetin Kiŋ Devid bin se. Afta Devid siŋ bɔt Jiova in lɔ dɛn, di tin dɛn we i de tɔk, ɛn in jɔjmɛnt dɛn, i bin tɔk se: “If [pɔsin] kɔntinyu fɔ fala dɛn, i go gɛt big blɛsin.”​—Sam 19:​7-11.

4. Wetin mek i nɔ kin izi fɔ du wetin Gɔd in Wɔd se?

 ⁴ Fɔ mek wi go ebul du wetin Gɔd in Wɔd se, wi nid fɔ rid ɛn stɔdi di Baybul fɔ ɔndastand wetin Jiova want wi fɔ du. Bɔt fɔ tɔk tru, i nɔ kin izi fɔ du dat ɔltɛm bikɔs wi gɛt bɔku ɔda tin dɛn fɔ du. Bɔt wi fɔ mek tɛm fɔ du dat. So lɛ wi tɔk bɔt sɔm tin dɛn we go ɛp wi fɔ rid di Baybul ɔltɛm. Wi go tɔk bak bɔt tin dɛn we go ɛp wi fɔ tink bɔt wetin wi de rid ɛn luk fɔ we dɛn fɔ aplay dɛn na wi layf.

MEK TƐM FƆ RID GƆD IN WƆD

5. Wetin na sɔm tin dɛn we wi kin yuz bɔku pan wi tɛm fɔ du?

⁵ Bɔku pan Jiova in pipul dɛn rili bizi. Wi kin spɛn bɔku pan wi tɛm fɔ du tin dɛn we di Baybul se impɔtant. Fɔ ɛgzampul, bɔku pan wi kin wok fɔ kia fɔ wisɛf ɛn wi famili. (1 Tim. 5:8) Bɔku pan wi brɔda ɛn sista dɛn kin kia fɔ dɛn fambul dɛn we sik ɔ we dɔn ol. Ɛn wi ɔl nid fɔ kia fɔ wi yon wɛlbɔdi, ɛn dis kin tek tɛm. Apat frɔm dɛn tin dɛn ya we wi dɔn tɔk bɔt, wi kin gɛt ɔda wok dɛn bak fɔ du na di kɔngrigeshɔn. Wan pan di men wok dɛn we wi gɛt na fɔ prich wit zil. Pan ɔl we yu gɛt ɔl dɛn wok dɛn ya fɔ du, aw yu go mek tɛm fɔ rid di Baybul ɔltɛm, tink gud gud wan bɔt wetin yu de rid, ɛn tray fɔ du wetin yu de lan?

6. Wetin yu go du fɔ mek shɔ se yu du yu Baybul ridin ɔltɛm? (Luk bak di pikchɔ.)

⁶ As Kristian dɛn, fɔ rid di Baybul na wan pan “di tin dɛn we rili impɔtant,” so wi fɔ mek shɔ se wi du am. (Fil. 1:10) We di fɔs sam na di Baybul de tɔk bɔt di man we gladi, i se: “I rili lɛk Jiova in lɔ, ɛn i de rid In lɔ de ɛn nɛt ɛn tek tɛm tink gud gud wan bɔt am.” (Sam 1:​1, 2) Dis sho klia wan se wi nid fɔ mek tɛm fɔ rid di Baybul. Ustɛm na di bɛst tɛm fɔ rid di Baybul? Ɔlman gɛt tɛm we fayn fɔ am. Bɔt wetin impɔtant na fɔ pik tɛm we go mek yu ebul fɔ du yu Baybul ridin ɔltɛm. Wan brɔda we nem Viktɔ tɔk se: “A kin lɛk fɔ du mi Baybul ridin na mɔnin. Pan ɔl we a nɔ kin lɛk fɔ wek kwik, a nɔ  kin gɛt bɔku tin dɛn we de tek mi atɛnshɔn ali mɔnin. A nɔ kin gɛt bɔku tin dɛn fɔ tink bɔt ɛn a kin ebul fɔ rili pe atɛnshɔn.” Na so i bi fɔ yu? Aks yusɛf, ‘Ustɛm na di bɛst tɛm fɔ mi fɔ rid di Baybul?’

TINK BƆT WETIN YU RID

7-8. Wetin kin mek wi nɔ bɛnifit gud gud wan frɔm wetin we de rid? Gi wan ɛgzampul.

⁷ Fɔ tru, sɔntɛnde wi kin rid bɔku tin dɛn, bɔt wi nɔ rili ebul fɔ ɔndastand dɛn. Yu dɔn ɛva rid sɔntin ɛn nɔ ebul fɔ mɛmba wetin yu rid afta shɔt tɛm? Na tin we go dɔn apin to wi ɔl. I sɔri fɔ no se di sem tin kin apin bak we wi de du wi Baybul ridin. Sɔntɛm wi dɔn sɛt gol fɔ rid sɔm chapta dɛn na di Baybul ɛvride. Dat na fayn tin. Wi fɔ sɛt gol dɛn ɛn tray fɔ rich dɛn. (1 Kɔr. 9:26) Bɔt, fɔ rid di Baybul na jɔs di biginin ɛn na fayn tin, bɔt i nɔ du fɔ jɔs rid am. Wi nid fɔ du ɔda tin bak if wi want fɔ rili bɛnifit frɔm wetin wi de rid na Gɔd in Wɔd.

⁸ Tink bɔt dis ɛgzampul: Di plant dɛn nid ren wata fɔ gro. Bɔt if bɔku ren kam insay shɔt tɛm, di wata na di grɔn go bɔku pasmak fɔ di plant dɛn. We dis kayn tin apin, di bɔku ren nɔ go ɛp di plant dɛn. Di grɔn nid tɛm fɔ sɔk di ren wata fɔ mek di plant dɛn go ebul fɔ yuz am. Semweso, wi nɔ fɔ rɔsh we wi de du wi Baybul ridin, bikɔs if wi rɔsh fɔ du am wi nɔ go ebul fɔ ɔndastand, mɛmba, ɛn aplay wetin wi dɔn rid.​—Jems 1:24.

9. Wetin wi go du if wi dɔn gɛt di abit fɔ de rɔsh we wi de du wi Baybul ridin?

⁹ Yu dɔn notis se sɔntɛnde yu jɔs de rɔsh fɔ du yu Baybul ridin? If na so i bi, wetin yu fɔ du? Tek yu tɛm. Tray fɔ tink bɔt wetin yu de rid ɔ wetin yu jɔs dɔn rid. Dis nɔ fɔ bi sɔntin we at fɔ du. Sɔntɛm yu kin disayd fɔ ad pan di tɛm we yu kin yuz fɔ stɔdi fɔ mek yu go ebul fɔ tink gud gud wan. Ɔ sɔntɛm yu kin disayd fɔ ridyus pan di Baybul vas dɛn we yu de rid ɛn yuz di balans tɛm fɔ tink bɔt wetin yu dɔn rid. Viktɔ we wi bin dɔn tɔk bɔt, tɔk  se: “A nɔ kin yuz bɔku tɛm fɔ du mi Baybul ridin. Sɔntɛm na jɔs wan chapta a kin rid. Bikɔs a kin du mi Baybul ridin ali mɔnin, a kin ebul fɔ tink bɔt wetin a dɔn rid te di de dɔn.” Ilɛk wetin yu disayd fɔ du, di tin we impɔtant na fɔ mek yu go rili bɛnifit frɔm wetin yu de rid.​—Sam 119:97; luk di bɔks we gɛt di taytul “ Kwɛstyɔn dɛn fɔ Tink Bɔt.”

10. Gi ɛgzampul bɔt aw yu kin aplay wetin yu de lan. (1 Tɛsalonians 5:​17, 18)

¹⁰ Ilɛk ustɛm yu de du yu Baybul ridin ɛn ɔmɔs tɛm yu de spɛn fɔ du am, mek shɔ se yu luk fɔ we dɛn fɔ aplay wetin yu de rid. We yu de rid ɛni pat na Gɔd in Wɔd, aks yusɛf, ‘Aw a go aplay dis tin we a de lan naw ɔ leta?’ Fɔ ɛgzampul, lɛ wi se 1 Tɛsalonians 5:​17, 18 (Rid) de pat pan yu Baybul ridin. We yu dɔn fɔ rid dɛn tu vas dɛn de, yu kin stɔp ɛn tink bɔt ɔmɔs tɛm yu kin pre ɛn aw lɔng yu kin pre. Yu kin tink bak bɔt tin dɛn we yu gladi fɔ. Sɔntɛm yu disayd fɔ tɛl Jiova tɛnki fɔ tri patikyula tin dɛn we i dɔn du fɔ yu. Ilɛk na jɔs smɔl tɛm yu tek fɔ pe atɛnshɔn to dɛn tin dɛn de, i go ɛp yu fɔ bi pɔsin we de yɛri Gɔd in Wɔd ɛn du wetin i de se. Tink bɔt aw yu go bɛnifit if yu de du dis sem tin ɛvride we yu de du yu Baybul ridin! Fɔ tru, we yu de du dat, yu go kɔntinyu fɔ go bifo as pɔsin we de du wetin Gɔd in Wɔd se. Bɔt wetin yu go du if yu notis se bɔku tin dɛn de we yu nid fɔ du?

SƐT GOL DƐN WE YU GO EBUL FƆ RICH

11. Wetin kin mek sɔntɛnde wi fil se di tin dɛn we wi fɔ du rili bɔku? Gi wan ɛgzampul.

¹¹ We yu rid di Baybul ɛn luk fɔ we dɛn fɔ aplay di tin dɛn we yu de lan, sɔntɛm yu go fil se di tin dɛn we yu nid fɔ du rili bɔku. Imajin se we yu bin de du yu Baybul ridin tide, yu si di advays we se wi nɔ fɔ tek wan pɔsin bɛtɛ pas ɔda pɔsin. (Jems 2:​1-8) Yu si se yu nid fɔ du mɔ we i kam to di we aw yu de trit ɔda pipul dɛn. So yu disayd fɔ ajɔst fɔ mek yu go aplay wetin yu dɔn lan. Dat rili fayn! Dɔn tumara yu rid bɔt sɔntin we de tɔk bɔt wetin mek i impɔtant fɔ tek tɛm wit wetin yu de tɔk. (Jems 3:​1-12) Yu mɛmba se sɔntɛnde yu kin tɔk bɔt tin dɛn we nɔ fayn ɔ we kin mek ɔda pipul dɛn at pwɛl. So yu disayd se yu go tray fɔ de tɔk fayn ɛn ɛnkɔrej ɔda pipul dɛn. Dɔn di ɔda de di Baybul ridin we yu du advays yu fɔ lɛ yu nɔ mek padi wit pipul dɛn na di wɔl. (Jems 4:​4-12) Yu notis se yu nid fɔ tek tɛm wit di tin dɛn we yu de yuz fɔ ɛnjɔy yusɛf. We yu rich di de we mek 4,  sɔntɛm yu go fil se di ajɔstmɛnt dɛn we yu nid fɔ mek rili bɔku.

12. Wetin mek yu at nɔ fɔ pwɛl if we yu de du yu Baybul ridin yu notis se chenj dɛn de we yu nid fɔ mek? (Luk bak di futnot.)

¹² If yu notis se say dɛn de we yu nid fɔ mek chenj dɛn ɔ fɔ du mɔ, lɛ dat nɔ mek yu at pwɛl. Dis de sho se yu na pɔsin we ɔmbul ɛn yu want fɔ du di rayt tin. We pɔsin we ɔmbul ɛn ɔnɛs de rid di Baybul, i de tray fɔ si say dɛn we i nid fɔ mek chenj dɛn. a Mɛmba bak se, fɔ mek pɔsin gɛt “di nyu abit dɛn” nɔto tin we de apin wantɛm wantɛm. (Kol. 3:10; kɔmpia di stɔdi not “is being made new.”) Wetin go ɛp yu fɔ kɔntinyu fɔ bi pɔsin we de du wetin Gɔd in Wɔd se?

13. Aw yu go sɛt gol dɛn we yu go ebul fɔ rich? (Luk bak di pikchɔ.)

¹³ Bifo yu tray fɔ aplay ɔl di tin dɛn we yu de lan wantɛm wantɛm, yu kin sɛt gol dɛn we yu go ebul fɔ rich. (Prɔv. 11:2) Sɔntɛm yu kin tray fɔ du dis: Rayt di ajɔstmɛnt dɛn we yu nid fɔ mek, pik wan ɔ tu pan dɛn we yu want fɔ aplay fɔs ɛn tray fɔ du di ɔda wan dɛn leta. Usay yu fɔ stat?

14. Us gol dɛn yu fɔ stat wit?

¹⁴ Sɔntɛm yu kin disayd fɔ stat wit gol we go izi fɔ rich. Ɔ sɔntɛm yu kin disayd fɔ stat wit di say we yu rili nid fɔ mek ajɔstmɛnt. We yu dɔn no yu gol, yu kin du risach na wi pɔblikeshɔn dɛn, sɔntɛm yu kin yuz di Watch Tower Publications Index ɔ di Risach Gayd fɔ Jiova Witnɛs Dɛn. Pre bɔt yu gol, aks Jiova fɔ ‘mek yu  want fɔ du am ɛn fɔ mek i gi yu di pawa fɔ du am.’ (Fil. 2:13) Dɔn tray fɔ aplay wetin yu dɔn lan. We yu rich yu fɔs gol, dat go mek yu want fɔ rich yu ɔda gol. Infakt, we yu si se yu ebul fɔ mek chenj dɛn ɔ fɔ gɛt wan patikyula kwaliti we Kristian fɔ gɛt, dat go ɛp yu fɔ kɔntinyu fɔ mek ajɔstmɛnt, ɛn sɔntɛm i go izi fɔ mek ɔda chenj dɛn.

UNA ALAW GƆD IN WƆD FƆ “WOK INSAY UNA”

15. Aw Jiova in pipul dɛn difrɛn frɔm bɔku ɔda pipul dɛn we de rid di Baybul? (1 Tɛsalonians 2:13)

¹⁵ Sɔm pipul dɛn kin tɔk se dɛn dɔn rid di Baybul bɔku tɛm. Bɔt dɛn rili biliv wetin de insay di Baybul? Dɛn de du wetin di Baybul se ɔ alaw di Baybul fɔ afɛkt di we aw dɛn de liv dɛn layf? I sɔri fɔ no se bɔku pipul dɛn nɔ de fala di Baybul in advays. Bɔt Jiova in pipul dɛn rili difrɛn! Jɔs lɛk di fɔstɛm Kristian dɛn, wi tek di Baybul “lɛk Gɔd in wɔd, jɔs lɛk aw i rili bi.” So, wi de tray tranga wan fɔ sho se Gɔd in Wɔd de wok insay wi.—Rid 1 Tɛsalonians 2:13.

16. Wetin go ɛp wi fɔ bi pipul dɛn we de du wetin Gɔd in Wɔd se?

¹⁶ I nɔ kin izi ɔltɛm fɔ rid Gɔd in Wɔd ɛn aplay wetin wi de rid. Sɔntɛm i nɔ go izi fɔ lɛ wi mek tɛm fɔ rid am. Ɔ sɔntɛm wi go rɔsh fɔ rid am ɛn nɔ ebul fɔ ɔndastand wetin wi de rid. Ɔ sɔntɛm wi go fil se wi gɛt bɔku ajɔstmɛnt dɛn we wi nid fɔ mek. Ilɛk wetin de mek i nɔ izi fɔ rid di Baybul, yu go stil ebul fɔ rid am. Jiova go ɛp yu fɔ du am. So lɛ wi mek-ɔp wi maynd fɔ gri fɔ mek Jiova ɛp wi ɛn mek wi bi pɔsin we nɔ de fɔgɛt we i yɛri, bɔt pɔsin we de du wetin Gɔd in Wɔd se. Wan dawt nɔ de se wi go gladi mɔ we wi de rid Gɔd in Wɔd ɛn aplay am.—Jems 1:25.