1-2. (a) Aw layf bin tan lɛk na Judia di tɛm we apɔsul Pɔl bin rayt di lɛta to di Ibru Kristian dɛn? (b) Wetin mek wi go se dɛn bin rili nid dis lɛta da tɛm de?

 TIN nɔ bin izi fɔ di Ibru Kristian dɛn we bin de na Jerusɛlɛm ɛn Judia afta Jizɔs day. Jɔs afta di Kristian kɔngrigeshɔn bigin, dɛn bigin fɔ mek di Kristian dɛn sɔfa bad bad wan. (Akt 8:1) Dɔn afta lɛk 20 ia, Krays in disaypul dɛn bin de sɔfa bikɔs tin fɔ it bin shɔtin ɛn dɛn bin po. (Akt 11:​27-30) Bɔt arawnd di ia 61 afta Krays, di Kristian dɛn bin gɛt smɔl pis bikɔs dɛn nɔ bin de mek dɛn sɔfa lɛk aw dɛn go gɛt fɔ mek dɛn sɔfa leta. Insay da tɛm de, apɔsul Pɔl bin rayt wan lɛta to dɛn we go rili ɛp dɛn leta.

² Di lɛta we apɔsul Pɔl bin rayt to di Ibru Kristian dɛn bin kam di rayt tɛm bikɔs di pis we dɛn bin gɛt nɔ go las. Pɔl bin gi advays to di Kristian dɛn we go ɛp dɛn fɔ bia di prɔblɛm dɛn we dɛn go gɛt insay shɔt tɛm. Di tɛm we Jizɔs bin se dɛn go dɔnawe wit Jerusɛlɛm bin dɔn de kam nia. (Lyuk 21:20) As wi ɔl no, Pɔl ɛn di Kristian dɛn na Judia nɔ bin no di patikyula tɛm we dɛn go dɔnawe wit Jerusɛlɛm. Bɔt dɛn Kristian dɛn de go ebul fɔ yuz di tɛm we dɔn lɛf fɔ mek dɛn gɛt kwaliti dɛn lɛk fet ɛn fɔ bia.​—Ibru. 10:25; 12:​1, 2.

3. Wetin mek Kristian dɛn insay wi yon tɛm fɔ rili pe atɛnshɔn to di tin dɛn we de insay di Baybul buk we nem Ibruz?

 ³ I nɔ go te igen, wi go gɛt big big trɔbul we pas di wan we di Ibru Kristian dɛn bin gɛt fa fawe. (Mat. 24:21; Rɛv. 16:​14, 16) So lɛ wi tɔk bɔt sɔm pan di fayn advays dɛn we Jiova bin gi dɛn Kristian dɛn de we go bɛnifit wisɛf.

“TRAY TRANGA WAN FƆ MACHƆ”

4. Us prɔblɛm dɛn di Ju dɛn we bin dɔn bi Kristian bin gɛt? (Luk bak di pikchɔ.)

⁴ Di Ju dɛn we bin dɔn bi Kristian bin nid fɔ mek big chenj dɛn ɛn dat nɔ bin izi fɔ dɛn. Di Ju dɛn na bin Jiova in pipul dɛn. Fɔ lɔng tɛm, Jerusɛlɛm na bin impɔtant ples bikɔs na de di kiŋ dɛn we bin de rul fɔ Jiova bin de, ɛn di tɛmpul na bin di men ples we dɛn bin de go fɔ wɔship Jiova di rayt we. Ɔl di Ju pipul dɛn we bin fetful bin de fala di Lɔ we Gɔd Bin Gi Mozis jɔs lɛk aw di bigman dɛn pan Gɔd biznɛs bin de tɛl dɛn fɔ du. Di tin dɛn we dɛn bin de tich dɛn bin de afɛkt di tin dɛn we dɛn bin de it, di we aw dɛn de si sakɔmsishɔn, ɛn di we aw dɛn bin de si pipul dɛn we nɔto Ju. Bɔt Jiova bin lɛf fɔ tek di Ju pipul dɛn sakrifays dɛn afta Jizɔs day. Dis na tin we nɔ bin izi fɔ di Ju Kristian dɛn we dɔn yus fɔ fala di Lɔ. (Ibru. 10:​1, 4, 10) I nɔ bin izi fɔ ivin Kristian dɛn we machɔ lɛk apɔsul Pita fɔ ajɔst to sɔm pan dɛn chenj dɛn ya. (Akt 10:​9-14; Gal. 2:​11-14) Bikɔs ɔf di nyu tin dɛn we di Kristian dɛn bin biliv, di Ju bigman dɛn pan Gɔd biznɛs bin de mek dɛn sɔfa.

5. Wetin di Kristian dɛn bin nid fɔ tek tɛm wit?

⁵ Di Ibru Kristian dɛn bin gɛt tu difrɛn grup dɛn we bin de agens dɛn. Di Ju bigman dɛn pan Gɔd biznɛs bin de trit dɛn lɛk apɔstet dɛn. Pantap dat, sɔm pipul dɛn we bin de se dɛn na Kristian bin de pin se Krays in disaypul dɛn fɔ kɔntinyu fɔ obe di Lɔ we Gɔd Bin Gi Mozis. Sɔntɛm dɛn bin du dat fɔ lɛ dɛn  nɔ mek dɛn sɔfa. (Gal. 6:12) Wetin go ɛp di Kristian dɛn we fetful fɔ kɔntinyu fɔ sav Jiova?

6. Wetin Pɔl bin ɛnkɔrej in kɔmpin Kristian dɛn fɔ du? (Ibruz 5:14–6:1)

⁶ Insay di lɛta we Pɔl rayt to in kɔmpin Ibru Kristian dɛn, i bin ɛnkɔrej dɛn fɔ stɔdi ɛn tink gud gud wan bɔt wetin de insay Gɔd in Wɔd. (Rid Ibruz 5:14–6:1.) Pɔl bin yuz di Ibru Skripchɔ dɛn fɔ ɛp in brɔda ɛn sista dɛn fɔ si se di we aw di Kristian dɛn de wɔship bɛtɛ fa fawe pas di we aw di Ju dɛn de wɔship. a Pɔl bin no se if dɛn Ibru Kristian dɛn de sabi bɔku pan di tru tin dɛn na Gɔd in Wɔd ɛn ɔndastand dɛn gud gud wan, dat go ɛp dɛn fɔ no di lay lay tin dɛn we pipul dɛn de tich ɛn nɔ gri fɔ lisin to dɛn, so dat dɛn nɔ go kɔmɔt biɛn Jiova.

7. Us prɔblɛm dɛn wi de gɛt tide?

⁷ Jɔs lɛk aw i bin de apin insay di Ibru Kristian dɛn tɛm, pipul dɛn tide de prɛd infɔmeshɔn ɛn aydia dɛn we de agens wetin Jiova se rayt. Bɔku tɛm, di wan dɛn we de agens wi kin tɔk bad bɔt di tin dɛn we wi biliv bɔt mami ɛn dadi biznɛs ɛn dɛn kin ivin tɔk se wi nɔ de trit pipul dɛn fia wan ɛn wi na bad pipul dɛn. Di we aw pipul dɛn na di wɔl de biev ɛn tink de go agens di pafɛkt we aw Jiova de si tin mɔ ɛn mɔ as tɛm de go. (Prɔv. 17:15) So wi fɔ tray tranga wan fɔ sabi di tin dɛn we di wan dɛn we de agens wi de yuz fɔ mek wi at pwɛl ɔ fɔ mek wi stɔp fɔ sav Jiova.​—Ibru. 13:9.

8. Wetin go ɛp wi fɔ kɔntinyu fɔ bi machɔ Kristian dɛn?

⁸ I go fayn fɔ mek wi pe atɛnshɔn to di advays we Pɔl bin gi di Ibru Kristian dɛn we na fɔ kɔntinyu fɔ bi machɔ Kristian dɛn. Dis min se wi fɔ sabi di tru tin dɛn we de insay Gɔd in Wɔd gud gud wan ɛn tray fɔ tink di we aw Jiova de tink. Wi go kɔntinyu fɔ du dat ivin afta wi dɔn gi wi layf to Jiova ɛn baptayz. Ilɛk aw lɔng wi dɔn de na di trut, wi ɔl nid fɔ de rid ɛn stɔdi Gɔd in Wɔd ɔltɛm. (Sam 1:2) If wi de du wi pasɔnal stɔdi ɔltɛm, dat go ɛp wi fɔ gɛt mɔ fet we na kwaliti we Pɔl bin tɔk mɔ bɔt insay di lɛta we i bin rayt to di Ibru Kristian dɛn.​—Ibru. 11:​1, 6. 

LƐ WI “GƐT FET WE GO MEK WI SEV WI LAYF”

9. Wetin mek i bin impɔtant fɔ mek di Ibru Kristian dɛn gɛt strɔng fet?

⁹ Di Ibru Kristian dɛn go nid fɔ gɛt strɔng fet fɔ mek dɛn go sev di tɛm we di big trɔbul go apin na Judia. (Ibru. 10:​37-39) Jizɔs bin dɔn wɔn in disaypul dɛn se we dɛn si sojaman dɛn de rawnd Jerusɛlɛm, dɛn fɔ rɔnawe go na di mawntin dɛn. Di advays we i bin gi na fɔ ɔl di Kristian dɛn, ilɛk dɛn de na di siti ɔ na di eria dɛn we de nia di siti. (Lyuk 21:​20-24) Trade, we sojaman dɛn de kam fɔ atak, di pipul dɛn kin rɔnawe go na siti dɛn we gɛt wɔl we go protɛkt dɛn lɛk Jerusɛlɛm. I nɔ bin fɔ mek sɛns fɔ rɔnawe go ɔp di mawntin dɛn, so pɔsin go nid fɔ gɛt strɔng fet fɔ du dat.

10. Wetin Kristian dɛn go du if dɛn gɛt strɔng fet? (Ibruz 13:17)

¹⁰ Di Ibru Kristian dɛn bin nid bak fɔ abop pan di wan dɛn we Jizɔs de  yuz fɔ dayrɛkt di kɔngrigeshɔn. I go bi se di wan dɛn we de bifo bin tɛl ɔlman na di kɔngrigeshɔn patikyula tin dɛn we dɛn fɔ du fɔ fala wetin Jizɔs bin tɛl dɛn di rayt tɛm ɛn fɔ du am di kayn we we go sho se dɛn ɔganayz. (Rid Ibruz 13:17.) Di Grik wɔd dɛn we dɛn yuz na Ibruz 13:17 fɔ di wɔd dɛn “una obe” min we pɔsin de obe bikɔs i abop pan di pɔsin we tɛl am wetin fɔ du. Dat min se di wan we de obe nɔ jɔs de obe bikɔs di pɔsin we de tɛl am fɔ obe gɛt pawa fɔ tɛl am wetin fɔ du. So di Ibru Kristian dɛn bin nid fɔ lan fɔ abop pan di wan dɛn we de bifo, bifo di trɔbul bigin. If dɛn dɔn yus fɔ du di tin dɛn we di wan dɛn we de bifo de tɛl dɛn fɔ du di tɛm we pis de, i go izi mɔ fɔ mek dɛn obe di tɛm we prɔblɛm go de.

11. Wetin mek i impɔtant fɔ mek Kristian dɛn gɛt strɔng fet naw?

¹¹ Jɔs lɛk di Ibru Kristian dɛn we Pɔl bin rayt in lɛta to, wisɛf nid fɔ gɛt fet. Wi de insay tɛm we bɔku pipul dɛn nɔ biliv di wɔnin we di Baybul gi fɔ se dis wɔl go dɔn jisnɔ, ɛn dɛn de ivin provok wi. (2 Pit. 3:​3, 4) Pantap dat, pan ɔl we di Baybul tɔk bɔt bɔku tin dɛn we gɛt fɔ apin di tɛm fɔ da big big trɔbul, bɔku ɔda tin dɛn de we wi nɔ no bɔt. Wi fɔ gɛt strɔng fet se dis wɔl go dɔn di rayt tɛm ɛn Jiova go protɛkt wi.​—Aba. 2:3.

12. Wetin go ɛp wi fɔ sev di tɛm fɔ da big big trɔbul?

¹² Wisɛf fɔ gɛt strɔng fet pan “di slev we fetful ɛn gɛt sɛns” we Jiova de yuz fɔ gayd wi tide. (Mat. 24:45) We da big big trɔbul bigin, sɔntɛm dɛn go tɛl wi patikyula tin dɛn we wi fɔ du we go mek wi sev jɔs lɛk aw dɛn go dɔn tɛl di Ibru Kristian dɛn we di Roman sojaman dɛn bin sɔrawnd Jerusɛlɛm. Na naw wi fɔ abop pan di wan dɛn we de bifo na Jiova in ɔganaynzeshɔn ɛn sho se wi gɛt kɔnfidɛns pan dɛn. Wi nɔ fɔ ɛkspɛkt se wi go ebul fɔ du wetin dɛn go tɛl wi fɔ du di tɛm fɔ da big big trɔbul if i nɔ izi fɔ mek wi du wetin dɛn de tɛl wi fɔ du naw.

13. Wetin mek di advays we de na Ibruz 13:5 rili impɔtant?

¹³ We di Ibru Kristian dɛn bin de wet fɔ di tɛm we di Roman sojaman dɛn go sɔrawnd di siti, dɛn bin nid fɔ liv simpul layf ɛn “nɔ lɛk mɔni.” (Rid Ibruz 13:5.) Sɔm pan dɛn bin po ɛn dɛn bin dɔn sɔfa di tɛm we tin fɔ it bin shɔtin. (Ibru. 10:​32-34) Pan ɔl we bifo dis tɛm dɛn bin rɛdi fɔ sɔfa bikɔs ɔf di gud nyuz, sɔntɛm sɔm bin dɔn bigin fɔ pe atɛnshɔn fɔ gɛda bɔku mɔni bikɔs dɛn tink se i go protɛkt dɛn. Bɔt ilɛk ɔmɔs mɔni dɛn gɛt, dat nɔ go mek dɛn sev di tɛm we dɛn go kam fɔ dɔnawe wit Jerusɛlɛm. (Jems 5:3) Infakt, i go at mɔ fɔ di wan dɛn we lɛk prɔpati fɔ rɔnawe ɛn lɛf dɛn os ɛn prɔpati dɛn biɛn.

14. If wi gɛt strɔng fet, aw dat go afɛkt di tin dɛn we wi de disayd fɔ du naw bɔt mɔni ɛn prɔpati?

¹⁴ If wi biliv tranga wan se dis wɔl go dɔn jisnɔ, dat go mek wi nɔ pe atɛnshɔn fɔ gɛda bɔku mɔni ɔ prɔpati. Pipul dɛn “go trowe dɛn silva dɛn na strit” bikɔs dɛn go no se “dɛn silva ɔ gold nɔ go ebul fɔ sev dɛn di tɛm we Jiova vɛks.” (Izi. 7:19) Bifo wi pe atɛnshɔn fɔ gɛda bɔku mɔni, wi fɔ disayd fɔ du tin dɛn we go ɛp wi fɔ liv simpul layf ɛn kɔntinyu fɔ sav Jiova. Dis min se wi fɔ avɔyd fɔ tek dɛt dɛn we wi nɔ nid ɔ fɔ spɛn bɔku tɛm fɔ kia fɔ di bɔku prɔpati dɛn we wi gɛt. Wi  want fɔ tek tɛm bak nɔ fɔ lɛk di tin dɛn we wi dɔn gɛt pasmak. (Mat. 6:​19, 24) As wi de wet fɔ lɛ dis wɔl dɔn, sɔntɛm mɔni, prɔpati, ɛn ɔda tin dɛn go tɛst di fet we wi gɛt.

“UNA NID FƆ BIA”

15. Wetin mek di Ibru Kristian dɛn bin rili nid fɔ bia?

¹⁵ Di Ibru Kristian dɛn go nid fɔ bia we di tin dɛn we gɛt fɔ apin na Judia go tɛst dɛn fet. (Ibru. 10:36) Pan ɔl we dɛn bin dɔn mek sɔm Ibru Kristian dɛn sɔfa bad bad wan, bɔku pan dɛn bin bi Kristian afta dɛn bin dɔn lɛf fɔ mek dɛn sɔfa smɔl. Pɔl bin tɔk se pan ɔl we dɛn bin bia we dɛn bin de mek dɛn sɔfa bikɔs ɔf wetin dɛn biliv, dɛn nɔ bin dɔn sɔfa yet lɛk aw Jizɔs bin sɔfa, dat na fɔ sɔfa te dɛn day. (Ibru. 12:4) Bɔt we di Kristian rilijɔn stat fɔ prɛd, di Ju dɛn we bin de agens dɛn bin de vɛks bad bad wan ɛn mek dɛn sɔfa. Sɔm ia bifo Pɔl rayt in lɛta, i bin kam na Jerusɛlɛm ɛn pipul dɛn bin atak am. I bin pas 40 Ju dɛn we “swɛ se lɛ bad tin apin to dɛn if dɛn it ɔ drink bifo dɛn kil Pɔl.” (Akt 22:22; 23:​12-14) Pan ɔl we di Kristian dɛn bin gɛt pipul dɛn we et dɛn ɛn we bin de mek dɛn sɔfa, dɛn bin stil nid fɔ mit togɛda fɔ wɔship Jiova, prich di gud nyuz, ɛn kɔntinyu fɔ du tin dɛn we go mek dɛn fet strɔng mɔ ɛn mɔ.

16. Aw di lɛta we Pɔl bin rayt to di Ibru Kristian dɛn go ɛp wi fɔ tink di rayt we bɔt di sɔfa we dɛn de mek wi sɔfa? (Ibruz 12:7)

¹⁶ Wetin go ɛp di Ibru Kristian dɛn fɔ bia we pipul dɛn de agens dɛn? Pɔl bin no se dɛn go nid fɔ tink di rayt we bɔt di prɔblɛm dɛn we de mit dɛn. So i bin ɛksplen se Gɔd kin alaw di tin dɛn we de tɛst wi fet fɔ tren wi. (Rid Ibruz 12:7.) Da kayn trenin de, de ɛp wi fɔ gɛt impɔtant Kristian kwaliti dɛn ɛn impruv di kwaliti dɛn we wi ɔlrɛdi gɛt. If di Ibru Kristian dɛn pe atɛnshɔn pan di gud tin  dɛn we go apin afta dɛn prɔblɛm dɛn de dɔn, dat go mek i izi mɔ fɔ mek dɛn bia.—Ibru. 12:11.

17. Wetin Pɔl bin lan bɔt fɔ bia we dɛn bin de mek i sɔfa?

¹⁷ Pɔl bin ɛnkɔrej di Ibru Kristian dɛn fɔ gɛt maynd fɔ bia ɛn nɔ giv-ɔp we dɛn gɛt prɔblɛm dɛn. In na bin di rayt pɔsin fɔ tɔk to dɛn bɔt dat. As pɔsin we bin dɔn de mek di Kristian dɛn sɔfa, i bin no di kayn prɔblɛm dɛn we dɛn go gɛt. I bin no bak aw pɔsin go ebul fɔ bia we dɛn de mek i sɔfa. Afta ɔl, i bin dɔn sɔfa difrɛn we dɛn afta i bi Kristian. (2 Kɔr. 11:​23-25) So Pɔl bin ebul tɔk wit kɔnfidɛns bɔt wetin go ɛp pɔsin fɔ bia. I bin mɛmba di Ibru Kristian dɛn se we dɛn de sɔfa, dɛn fɔ abop pan Jiova ɛn nɔ abop pan dɛnsɛf. Na dat mek Pɔl bin gɛt maynd fɔ tɔk se: “Na Jiova de ɛp mi; a nɔ go fred.”​—Ibru. 13:6.

18. Wetin wi fɔ no bɔt tumara bambay we go ɛp wi fɔ bia we dɛn de mek wi sɔfa?

¹⁸ Dɛn de mek sɔm pan wi brɔda ɛn sista dɛn sɔfa rayt naw. Wi kin sɔpɔt dɛn bay we wi de pre fɔ dɛn ɛn sɔntɛnde du tin dɛn fɔ ɛp dɛn. (Ibru. 10:33) Bɔt di Baybul tɔk klia wan se “ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” (2 Tim. 3:12) Na dat mek wi ɔl nid fɔ rɛdi fɔ wetin gɛt fɔ apin. Lɛ wi kɔntinyu fɔ abop pan Jiova wit ɔl wi at ɛn gɛt kɔnfidɛns se i go ɛp wi fɔ bia ɛni prɔblɛm we go mit wi. We di rayt tɛm rich, i go mek ɔl di wan dɛn we de sav am fetful wan lɛf fɔ sɔfa.​—2 Tɛs. 1:​7, 8.

19. Wetin wi go du naw we go ɛp wi fɔ rɛdi fɔ da big big trɔbul? (Luk bak di pikchɔ.)

¹⁹ Wan dawt nɔ de se di lɛta we Pɔl bin rayt to di Ibru Kristian dɛn bin ɛp dɛn fɔ rɛdi fɔ di trɔbul we gɛt fɔ mit dɛn. Pɔl bin ɛnkɔrej in brɔda ɛn sista dɛn fɔ stɔdi Gɔd in Wɔd gud gud wan ɛn ɔndastand wetin de insay de. We dɛn du dat, i go mek dɛn no tin dɛn we pipul dɛn de tich we go ambɔg dɛn fet ɛn avɔyd dɛn. I bin ɛnkɔrej dɛn fɔ gɛt mɔ fet so dat dɛn nɔ go westɛm fɔ fala di tin dɛn we Jizɔs ɛn di wan dɛn we de bifo na di kɔngrigeshɔn de tɛl dɛn fɔ du. Ɛn i bin ɛp di Kristian dɛn fɔ ebul fɔ si di prɔblɛm dɛn we bin de mit dɛn di rayt we ɛn si dɛn as chans fɔ mek dɛn Papa we lɛk dɛn tren dɛn. I go fayn mek wisɛf fala dis advays we kɔmɔt na di Baybul. We wi du dat, wisɛf go ebul fɔ bia fetful wan te di ɛnd kam.​—Ibru. 3:14.