1. Us jɔjmɛnt go apin jisnɔ?

 WI DE insay tɛm we big chenj dɛn go apin. I nɔ go te igen, Jizɔs go jɔj ɔlman we de alayv. We Jizɔs bin de tɔk bɔt di tɛm we i go jɔj pipul dɛn, i sho in disaypul dɛn “sayn” we de sho se i de wit wi ɛn “di tɛm want fɔ dɔn.” (Mat. 24:3) Dis sayn we i tɔk bɔt de na Matyu chapta 24 ɛn 25, Mak chapta 13, ɛn Lyuk chapta 21.

2. Wetin wi go pe atɛnshɔn pan? Aw dis go ɛp wi?

² Jizɔs bin yuz tri parebul dɛn fɔ wɔn wi. Dɛn parebul dɛn ya na di parebul bɔt di ship ɛn di got dɛn, di vajin dɛn we bin gɛt sɛns ɛn di vajin dɛn we bin ful, ɛn di parebul bɔt di talɛnt dɛn. Ɛniwan pan dɛn parebul dɛn ya go ɛp wi fɔ ɔndastand aw di we aw pɔsin de biev go afɛkt di we aw Jizɔs go jɔj am. As wi de tɔk bɔt dɛn parebul dɛn ya, lɛ wi tray fɔ si di lɛsin dɛn we wi go lan ɛn aw wi go aplay dɛn. Di fɔs parebul we wi go tɔk bɔt na di parebul bɔt di ship ɛn di got dɛn.

DI SHIP ƐN DI GOT DƐN

3. Ustɛm Jizɔs go jɔj pipul dɛn?

³ Insay di parebul bɔt di ship ɛn di got dɛn, Jizɔs bin tɔk bɔt di we aw i go jɔj pipul dɛn we bin gɛt chans fɔ yɛri di gud nyuz ɛn fɔ sɔpɔt in anɔyntɛd brɔda dɛn. (Mat. 25:​31-46) Insay di tɛm fɔ da “big big trɔbul,” i go jɔj pipul dɛn jɔs bifo Amagɛdɔn bigin. (Mat. 24:21) Jɔs lɛk aw shɛpad de put ship dɛn wansay ɛn put got dɛn ɔdasay, na so Jizɔs go put di wan dɛn we kɔntinyu fɔ de biɛn in anɔyntɛd brɔda dɛn wansay ɛn put di wan dɛn we nɔ sɔpɔt dɛn ɔdasay.

4. Akɔdin to Ayzaya 11:​3, 4, wetin mek wi shɔ se Jizɔs go jɔj pipul dɛn fia wan? (Luk bak na di frɔnt pej.)

 ⁴ Di Baybul tɔk se Jizɔs we Jiova dɔn pik fɔ bi Jɔj, go jɔj pipul dɛn fia wan. (Rid Ayzaya 11:​3, 4.) I de wach wetin pipul dɛn de du, wetin dɛn de tink bɔt, wetin dɛn de tɔk, ɛn aw dɛn de trit in anɔyntɛd brɔda dɛn. (Mat. 12:​36, 37; 25:40) Jizɔs go no udat dɛn bin sɔpɔt in anɔyntɛd brɔda dɛn ɛn ɛp dɛn fɔ du dɛn wok. a Wan pan di men we dɛn we di wan dɛn we tan lɛk ship de sɔpɔt Krays in brɔda dɛn na we dɛn de ɛp dɛn fɔ du di prichin wok. Jizɔs go jɔj di wan dɛn we de sɔpɔt dɛn dis kayn we as pipul dɛn “we de du wetin rayt” ɛn dɛn go gɛt chans fɔ gɛt “layf we go de sote go” na dis wɔl. (Mat. 25:46; Rɛv. 7:​16, 17) Dis na wɔndaful blɛsin fɔ di wan dɛn we go kɔntinyu fɔ sav Jiova fetful wan! We dɛn kɔntinyu fɔ sav Jiova fetful wan di tɛm fɔ da big big trɔbul ɛn afta dat, dɛn nem dɛn go de na “di buk we de sho se pɔsin go gɛt layf.”—Rɛv. 20:15.

5. Us lɛsin wi lan frɔm di parebul bɔt di ship ɛn di got dɛn? Udat dɛn go bɛnifit frɔm am?

⁵ Sho se yu na pɔsin we fetful ɛn we nɔ de kɔmɔt biɛn Jiova. Jizɔs in parebul bɔt di ship ɛn di got dɛn de mɔ fɔ di wan dɛn we gɛt di op fɔ de na dis wɔl. Dɛn nɔ jɔs de sho se dɛn gɛt fet bay we dɛn de ɛp Krays in brɔda dɛn fɔ du di prichin wok, bɔt dɛn de sho se dɛn gɛt fet bak bay we dɛn de kɔntinyu fɔ fala di dayrɛkshɔn we di anɔyntɛd brɔda dɛn we Jizɔs dɔn pik de gi. (Mat. 24:45) Bɔt di wan dɛnsɛf we gɛt op fɔ go de na ɛvin fɔ pe atɛnshɔn to di wɔnin we de na dis parebul. Wetin mek? Na bikɔs Jizɔs de pe atɛnshɔn to di tin dɛn we dɛn de du, di we aw dɛn de tink, ɛn di tin dɛn we dɛn de tɔk. Dɛnsɛf fɔ kɔntinyu fɔ fetful. Infakt, Jizɔs bin tɔk bɔt tu ɔda parebul dɛn we na wɔnin fɔ di anɔyntɛd dɛn. Dɛn parebul dɛn ya de bak na Matyu chapta 25. Naw lɛ wi tɔk bɔt di parebul bɔt di vajin dɛn we bin gɛt sɛns ɛn di wan dɛn we bin ful.

DI VAJIN DƐN WE BIN GƐT SƐNS ƐN DI VAJIN DƐN WE BIN FUL

6. Aw fayv pan di vajin dɛn bin sho se dɛn gɛt sɛns? (Matyu 25:​6-10)

⁶ Insay di parebul bɔt di vajin dɛn, Jizɔs bin tɔk bɔt tɛn vajin dɛn we bin go fɔ go mit wan ɔkɔ. (Mat. 25:​1-4) Dɛn ɔl bin de op se dɛn go go lɛf di ɔkɔ na di mared pati. Jizɔs bin tɔk se fayv pan dɛn bin “gɛt sɛns” ɛn di ɔda fayv bin “ful.” Di vajin dɛn we bin gɛt sɛns bin rɛdi ɛn dɛn bin de wach. Dɛn bin rɛdi fɔ wet fɔ di ɔkɔ te i kam, ilɛk i kam let na nɛt. So dɛn bin kam wit lamp dɛn we gɛt ɔyl so dat dɛn go gɛt layt na nɛt. Dɛn bin ivin kam wit ɛkstra ɔyl we dɛn go yuz if di ɔkɔ let fɔ kam. So dɛn bin du sɔntin fɔ mek dɛn lamp dɛn nɔ ɔt. (Rid Matyu 25:​6-10.) We di ɔkɔ kam, di vajin dɛn we gɛt sɛns bin go wit am na di mared pati. Semweso, dɛn go jɔj anɔyntɛd Kristian dɛn we dɔn sho se dɛn rɛdi bay we dɛn kɔntinyu fɔ de wach ɛn fetful te di tɛm we Krays go kam, as pipul dɛn we fit fɔ jɔyn di Ɔkɔ we na Jizɔs na in Kiŋdɔm we de na ɛvin. b (Rɛv. 7:​1-3) Wetin wi go se bɔt di fayv vajin dɛn we ful?

7. Wetin bin apin to di fayv vajin dɛn we ful? Wetin mek?

 ⁷ Di fayv vajin dɛn we ful nɔ bin rɛdi di tɛm we di ɔkɔ kam lɛk aw di fayv vajin dɛn we gɛt sɛns bin rɛdi. Dɛn lamp bin want fɔ ɔt ɛn dɛn nɔ bin kam wit ɛkstra ɔyl. We dɛn no se i nɔ go te di ɔkɔ go kam, dɛn bin go bay ɔyl. Dɛn nɔ bin de we di ɔkɔ kam. Da tɛm de, di ɔkɔ “go na di mared pati wit di vajin dɛn we rɛdi. Afta dat, dɛn lɔk di domɔt.” (Mat. 25:10) Leta we di vajin dɛn we ful kam bak, dɛn bin want fɔ go insay, bɔt di ɔkɔ tɛl dɛn se: “A nɔ no una.” (Mat. 25:​11, 12) Dɛn vajin dɛn de nɔ bin rɛdi fɔ wet fɔ di ɔkɔ te i kam. Wetin na di lɛsin fɔ anɔyntɛd Kristian dɛn?

8-9. Us lɛsin anɔyntɛd Kristian dɛn go lan frɔm di parebul bɔt di vajin dɛn? (Luk bak di pikchɔ.)

⁸ Sho se yu na pɔsin we rɛdi ɛn we de wach. Jizɔs nɔ bin de se tu grup dɛn go de we na anɔyntɛd Kristian dɛn, ɛn wan grup go rɛdi fɔ wet te di wɔl dɔn ɛn di ɔda wan nɔ go rɛdi. Bifo dat, i bin de tɔk bɔt wetin go apin to anyɔntɛd Kristian dɛn if dɛn nɔ rɛdi fɔ bia fetful wan te di ɛnd kam. If dɛn nɔ rɛdi, dɛn nɔ go gɛt dɛn blɛsin. (Jɔn 14:​3, 4) Dat rili siriɔs! Ilɛk wi op na fɔ go na ɛvin ɔ fɔ de na dis wɔl, wi ɔl fɔ pe atɛnshɔn to di wɔnin we de na di parebul bɔt di vajin dɛn. Wi ɔl fɔ kɔntinyu fɔ de wach ɛn rɛdi fɔ bia te di ɛnd kam.—Mat. 24:13.

⁹ Afta Jizɔs dɔn tɔk bɔt di parebul bɔt di vajin dɛn fɔ sho aw i impɔtant fɔ mek wi rɛdi ɛn go de wach, i bin tɔk bɔt di parebul bɔt di talɛnt dɛn. Da parebul de de tɔk bɔt wetin mek i impɔtant fɔ wok tranga wan.

DI TALƐNT DƐN

10. Aw tu slev dɛn bin sho se dɛn fetful? (Matyu 25:​19-23)

¹⁰ Insay di parebul bɔt di talɛnt dɛn, Jizɔs bin tɔk bɔt tu slev dɛn we bin fetful to dɛn masta ɛn wan we nɔ bin fetful.  (Mat. 25:​14-18) Di tu slev dɛn bin sho se dɛn fetful bay we dɛn wok tranga wan fɔ mek prɔfit fɔ dɛn masta. Bifo di masta travul, i bin gi dɛn talɛnt dɛn we na bɔku bɔku mɔni. Di tu slev dɛn bin wok tranga wan ɛn dɛn bin yuz di mɔni fɔ du biznɛs ɛn mek prɔfit. Wetin bin apin? We dɛn masta kam bak, i si se dɛn bin dɔn dɔbul di mɔni we i gi dɛn. Di masta bin tɛl dɛn tɛnki ɛn dɛn bin “jɔyn [dɛn] masta fɔ gladi.” (Rid Matyu 25:​19-23.) Bɔt wetin bin apin to di tɔd slev? Wetin i bin du wit di mɔni we in masta bin gi am?

11. Wetin bin apin to di slev we “lezi”? Wetin mek?

¹¹ Di masta bin gi di tɔd slev wan talɛnt, bɔt di slev bin “lezi.” In masta bin de ɛkspɛkt se i go yuz di talɛnt ɛn mek prɔfit. Bɔt bifo i du dat, i bin bɛr am na grɔn. We di masta kam bak, na wan talɛnt nɔmɔ di slev bin gi am. Di slev nɔ bin biev fayn. Bifo di slev tɛl in masta se i sɔri bikɔs i nɔ dɔbul di mɔni, i bin tɔk se in masta in “biznɛs tranga” ɛn dat nɔto bin tru. Di masta nɔ bin gladi fɔ dis slev. Ɛn wetin pas dat, di masta tek di talɛnt na in an ɛn drɛb am kɔmɔt na in os.—Mat. 25:​24, 26-30.

12. Udat dɛn di tu slev dɛn we bin fetful tinap fɔ tide?

¹² Di tu slev dɛn we fetful tinap fɔ anɔyntɛd Kristian dɛn. Di masta we na Jizɔs de invayt dɛn fɔ ‘jɔyn am fɔ gladi.’ Dɛn go gɛt dɛn pe na ɛvin as di fɔs pipul dɛn we go gɛt layf bak. (Mat. 25:​21, 23; Rɛv. 20:5b) Bɔt di bad ɛgzampul bɔt di slev we lezi na wɔnin fɔ anɔyntɛd Kristian dɛn. Aw?

13-14. Us lɛsin anɔyntɛd Kristian dɛn kin lan frɔm di parebul bɔt di talɛnt dɛn? (Luk bak di pikchɔ.)

¹³ Sho se yu na pɔsin we de wok tranga wan ɛn we nɔ lezi. Jɔs lɛk di parebul bɔt di vajin dɛn, insay di parebul bɔt di talɛnt dɛn, Jizɔs nɔ bin de tɔk se di anɔyntɛd Kristian dɛn go lezi. Bifo dat, i bin de tɔk bɔt wetin go apin if dɛn nɔ kɔntinyu fɔ gɛt zil. Dɛn nɔ go ebul “kɔntinyu fɔ de pan di wan dɛn we Gɔd dɔn kɔl ɛn  pik,” ɛn dɛn nɔ go alaw dɛn fɔ go na di Kiŋdɔm we de na ɛvin.—2 Pit. 1:10.

¹⁴ Jizɔs in parebul dɛn bɔt di vajin dɛn ɛn di talɛnt dɛn mek wi no klia wan se anɔyntɛd Kristian dɛn ɔl fɔ rɛdi ɛn dɛn fɔ de wach, ɛn dɛn fɔ de wok tranga wan ɛn nɔ lezi. Bɔt fɔ se Jizɔs tɔk ɔda tin bak we na wɔnin fɔ di anɔyntɛd dɛn? Yɛs i bin du dat! Di wɔd dɛn we Jizɔs tɔk na Matyu 24:​40, 41 gɛt sɔntin fɔ du bak wit di faynal jɔjmɛnt fɔ di anɔyntɛd dɛn.

UDAT “DƐN GO TEK”?

15-16. Aw Matyu 24:​40, 41 tɔk bɔt wetin mek i impɔtant fɔ mek anɔyntɛd Kristian dɛn kɔntinyu fɔ de wach?

¹⁵ Bifo Jizɔs tɔk bɔt di tri parebul dɛn, i bin tɔk bɔt di faynal jɔjmɛnt fɔ di anɔyntɛd dɛn we go sho udat Gɔd gladi fɔ. I tɔk bɔt tu man dɛn we de wok na fam ɛn tu uman dɛn we de gren na grenin ston. I tan lɛk se di tu man dɛn bin de du di sem wok ɛn di tu uman dɛnsɛf bin de du di sem wok, bɔt Jizɔs bin tɔk se “dɛn go tek wan ɛn lɛf di ɔda wan.” (Rid Matyu 24:​40, 41.) Dɔn i ɛnkɔrej in disaypul dɛn se: “Una go de wach, bikɔs una nɔ no di de we una Masta de kam.” (Mat. 24:42) Jizɔs bin tɔk sɔntin we fiba dɛn wɔd dɛn ya afta i pul di parebul bɔt di vajin dɛn. (Mat. 25:13) Fɔ se di wɔd dɛn we i tɔk na Matyu 24:42 gɛt sɔntin fɔ du wit wetin i tɔk na Matyu 25:13? Na so i luk lɛk. Na anɔyntɛd Kristian dɛn nɔmɔ we fetful “dɛn go tek” ɛn na dɛn Jizɔs go go wit na di Kiŋdɔm we de na ɛvin.—Jɔn 14:3.

¹⁶ Sho se yu na pɔsin we de kɔntinyu fɔ wach. Ɛni anɔyntɛd Kristian we nɔ kɔntinyu fɔ de wach nɔ go de pat pan “di wan dɛn we Gɔd dɔn pik.” (Mat. 24:31) Dis min se ɔl Gɔd in pipul dɛn ilɛk dɛn op na fɔ de sote go na dis wɔl ɔ na ɛvin, fɔ si Jizɔs in wɔd dɛn as wɔnin fɔ kɔntinyu fɔ de wach ɛn kɔntinyu fɔ fetful to Jiova.

17. Wetin mek wi nɔ fɔ sɔprayz if Jiova disayd fɔ anɔynt sɔm pipul dɛn wit in oli spirit insay wi yon tɛm?

¹⁷ Wi dɔn sabi Jiova gud gud wan, so wi biliv se i de jɔj fia wan. Na dat mek wi nɔ go sɔprayz if Jiova disayd fɔ anɔynt sɔm fetful Kristian dɛn wit in oli spirit insay wi yon tɛm. c Wi de mɛmba wetin Jizɔs bin tɔk bɔt di wokman dɛn we bin kam wok 5 oklɔk ivintɛm insay in parebul bɔt di vayn gadin. (Mat. 20:​1-16) Dɛn bin pe di wan dɛn we bin kam wok ivintɛm ɛn di wan dɛn we bin wok frɔm mɔnin di sem mɔni. Semweso, ilɛk ustɛm Gɔd pik anɔyntɛd Kristian dɛn, dɛn go gɛt di pe fɔ go de na ɛvin if dɛn jɔj dɛn as pipul dɛn we fetful.

PE ATƐNSHƆN TO DI WƆNIN DƐN

18-19. Us lɛsin ɛn wɔnin dɛn wi dɔn tɔk bɔt?

¹⁸ Wetin wi dɔn tɔk bɔt? Fɔ di wan dɛn we gɛt di op fɔ de sote go na dis wɔl, di parebul bɔt di ship ɛn got dɛn sho wetin mek i impɔtant fɔ mek dɛn kɔntinyu fɔ fetful ɛn de biɛn Jiova naw ɛn insay di tɛm fɔ da big big trɔbul. Jɔs bifo Amagɛdɔn bigin, Jizɔs go jɔj fetful wan dɛn as pipul dɛn we fit fɔ “gɛt layf we go de sote go.”—Mat. 25:46.

¹⁹ Wi tɔk bak bɔt tu parebul dɛn we gɛt wɔnin fɔ di anɔyntɛd dɛn. Insay Jizɔs in parebul bɔt di vajin dɛn we gɛt sɛns ɛn  di vajin dɛn we ful, fayv pan dɛn bin sho se dɛn gɛt sɛns. Dɛn bin rɛdi ɛn dɛn bin de wach, ɛn dɛn bin rɛdi fɔ wet te di ɔkɔ kam. Bɔt di vajin dɛn we ful nɔ bin rɛdi. So di ɔkɔ nɔ bin gri fɔ mek dɛn go na in mared pati. Wisɛf fɔ rɛdi fɔ wet ilɛk aw lɔng wi go nid fɔ wet te Jizɔs mek dis wɔl dɔn. Dɔn bak, insay Jizɔs in parebul bɔt di talɛnt dɛn, wi tɔk bɔt di tu slev dɛn we bin wok tranga wan ɛn we nɔ lezi. Dɛn bin wok tranga wan fɔ dɛn masta ɛn i bin gladi fɔ dɛn. Bɔt di masta bin drɛb di slev we bin lezi. Wetin na di lɛsin? Wi fɔ kɔntinyu fɔ bizi de sav Jiova te di ɛnd kam. Faynali, wi bin tɔk bɔt aw anɔyntɛd Kristian dɛn fɔ kɔntinyu fɔ de wach so dat Jizɔs go “tek” dɛn ɛn go wit dɛn na ɛvin. Dɛn de rili wet fɔ di tɛm we dɛn go “de togɛda wit” Jizɔs na ɛvin. Afta Amagɛdɔn, dɛn go bi Jizɔs in yawo pan di Yɔŋ Ship in mared.—2 Tɛs. 2:1; Rɛv. 19:9.

20. Wetin Jiova go du fɔ di wan dɛn we lisin to in wɔnin dɛn?

²⁰ Pan ɔl we i nɔ de fa igen fɔ mek Jizɔs jɔj pipul dɛn, nid nɔ de fɔ mek wi fred. If wi kɔntinyu fɔ fetful, wi Papa we de na ɛvin we lɛk wi go gi wi “di pawa we pas mɔtalman in yon” so dat wi “go sev . . . [ɛn] tinap bifo mɔtalman Pikin.” (2 Kɔr. 4:7; Lyuk 21:36) Ilɛk wi op na fɔ go na ɛvin ɔ fɔ de na dis wɔl, wi go mek wi Papa gladi if wi lisin to di wɔnin dɛn we de na Jizɔs in parebul dɛn. Bikɔs ɔf Jiova in gudnɛs we wi nɔ fit fɔ gɛt, wi nem dɛn go de na “di buk” we de sho se pɔsin go gɛt layf.—Dan. 12:1; Rɛv. 3:5.