1-2. Aw wi de bɛnifit bikɔs Jiova mek wi di kayn we we de mek wi gɛt mɔ gladi-at we wi de gi pas we dɛn de gi wi?

 WE JIOVA bin mek mɔtalman, i mek dɛn di kayn we we go mek dɛn gɛt mɔ gladi-at we dɛn de gi pas we dɛn de gi dɛn. (Akt 20:35) Fɔ se dis min se wi nɔ de gladi atɔl we dɛn de gi wi? Nɔ. Wi ɔl kin gladi we dɛn gi wi gift. Bɔt wi kin gladi mɔ we wi de gi ɔda pipul dɛn. Ɛn fɔ tru, wi de bɛnifit bikɔs Jiova mek wi dis kayn we. Wetin mek?

² We Jiova mek wi dis kayn we, dat de mek wi du tin dɛn we de mek wi gɛt gladi-at. Wi go gɛt mɔ gladi-at we wi tink bɔt mɔ we dɛn we wi go gi to ɔda pipul dɛn ɛn du am. Yu nɔ tink se dis we aw Jiova mek wi rili wɔndaful?—Sam 139:14.

3. Wetin mek di Baybul kɔl Jiova “di Gɔd we gladi”?

³ Di Skripchɔ dɛn mek wi no se wi de gɛt gladi-at we wi gi, so na dat mek wi nɔ sɔprayz we di Baybul kɔl Jiova “di Gɔd we gladi.” (1 Tim. 1:11) Na in fɔs bigin gi ɛn na in na di Pɔsin we dɔn gi pas ɔlman. Jɔs lɛk wetin apɔsul Pɔl bin tɔk, na Jiova “gi wi layf, na in mek wi de muv, ɛn na in mek wi de na ya.” (Akt 17:28) Fɔ tru, “ɔl gud gift ɛn ɔl pafɛkt prɛzɛnt” kɔmɔt frɔm Jiova.—Jems 1:17.

4. Wetin go ɛp wi fɔ gɛt mɔ gladi-at?

⁴ Sɔntɛm, wi ɔl go want fɔ bɛnifit mɔ frɔm di gladi-at we pɔsin de gɛt we i de gi. Wi go ebul du dat bay we wi falamakata di fri-an we Jiova gɛt. (Ɛfi. 5:1) As wi de tɔk bɔt di gladi-at we pɔsin de gɛt we i de gi, lɛ wi si wetin wi go du if wi fil se ɔda pipul dɛn nɔ de sho tɛnki fɔ di gud tin  dɛn we wi de du fɔ dɛn. Dis go ɛp wi fɔ kɔntinyu fɔ gi ɛn gɛt mɔ gladi-at we wi de gi.

FALAMAKATA JIOVA IN FRI-AN

5. Wetin na sɔm tin dɛn we Jiova de gi wi?

⁵ Wetin na sɔm tin dɛn we Jiova de du we de sho se i gɛt fri-an? Lɛ wi tɔk bɔt sɔm ɛgzampul dɛn. Jiova de gi wi di tin dɛn we wi nid. Sɔntɛm wi nɔ go ebul liv pɔsh layf ɔltɛm, bɔt Jiova de gi wi di tin dɛn we wi nid. Fɔ ɛgzampul, i de mek wi gɛt tin fɔ it, klos fɔ wɛr, ɛn say fɔ slip. (Sam 4:8; Mat. 6:​31-33; 1 Tim. 6:​6-8) Fɔ se Jiova de gi wi di tin dɛn we wi nid jɔs bikɔs na tin we i fɔ du paopa? Nɔ, nɔto so i bi! Wetin mek Jiova de gi wi di tin dɛn we wi nid?

6. Wetin wi lan frɔm Matyu 6:​25, 26?

⁶ Jiova de gi wi di tin dɛn we wi nid bikɔs i lɛk wi. Tink bɔt di wɔd dɛn we Jizɔs tɔk na Matyu 6:​25, 26. (Rid.) Jizɔs yuz di tin dɛn we Gɔd mek as ɛgzampul dɛn. We Jizɔs bin de tɔk bɔt di bɔd dɛn, i se: “Dɛn nɔ de plant sid ɔ avɛst ɔ kip na stɔ.” Bɔt notis wetin i tɔk afta dat. I se: “Una Papa we de na ɛvin de fid dɛn.” Dɔn i aks se: “Una nɔ tink se una bɛtɛ pas bɔd dɛn?” Wetin dis tich wi? Jiova valyu in savant dɛn fa fawe pas animal dɛn. If Jiova de gi di animal dɛn di tin dɛn we dɛn nid, wi nɔ gɛt wan dawt se i go gi wi di tin dɛn we wi nid! Jɔs lɛk mɔtalman papa we bisin bɔt in famili, Jiova de gi in famili di tin dɛn we dɛn nid bikɔs i lɛk dɛn.—Sam 145:16; Mat. 6:32.

7. Tɔk bɔt wan we aw wi go falamakata Jiova in fri-an. (Luk bak di pikchɔ.)

⁷ Jɔs lɛk Jiova, wisɛf go ebul gi ɔda pipul dɛn di tin dɛn we dɛn nid bikɔs wi lɛk dɛn. Fɔ ɛgzampul, yu sabi ɛni brɔda ɔ sista we nid tin fɔ it ɛn klos fɔ wɛr? Jiova kin yuz yu fɔ ɛp da yu brɔda ɔ sista de. Wan patikyula tin we dɛn sabi Jiova in pipul dɛn fɔ na dat dɛn nɔ de westɛm fɔ ɛp pipul dɛn we dizasta apin. Fɔ ɛgzampul, insay di COVID-19 pandɛmik, brɔda ɛn sista dɛn bin de gi tin fɔ it, klos fɔ wɛr, ɛn ɔda tin dɛn to di wan dɛn we bin nid am. Bɔku brɔda ɛn sista dɛn bak bin gi kɔntribyushɔn fɔ sɔpɔt di wok we de apin ɔlsay na di wɔl. Dat bin ɛp fɔ sɔpɔt di brɔda ɛn sista dɛn we dizasta bin afɛkt ɔlsay na di wɔl. Dɛn brɔda ɛn sista dɛn de bin  fala wetin de na Ibruz 13:16 we se: “Una nɔ fɔgɛt fɔ de du gud ɛn sheb wetin una gɛt wit ɔda pipul dɛn, bikɔs Gɔd rili lɛk dɛn kayn sakrifays dɛn de.”

8. Us we dɛn wi de bɛnifit frɔm Jiova in pawa? (Filipians 2:13)

⁸ Jiova de gi pawa. Jiova gɛt trɛnk we nɔ de dɔn ɛn i kin gladi fɔ gi da trɛnk de to in fetful savant dɛn. (Rid Filipians 2:13.) Yu dɔn ɛva pre fɔ mek Jiova gi yu trɛnk fɔ mek yu nɔ du bad we sɔntin tɛmt yu ɔ fɔ ebul bia prɔblɛm we nɔ izi? Sɔntɛm yu go dɔn pre bak fɔ mek Jiova gi yu trɛnk fɔ du di tin dɛn we yu nid fɔ du insay di de. We Jiova bin ansa yu prea ɛn gi yu trɛnk, yu go dɔn gri wit di wɔd dɛn we Pɔl bin rayt we i se: “A kin gɛt trɛnk fɔ du ɔltin bikɔs pɔsin de we de gi mi di pawa.”—Fil. 4:13.

9. Aw wi go falamakata Jiova fɔ sho se wi gɛt fri-an we wi de yuz wi trɛnk? (Luk bak di pikchɔ.)

⁹ Pan ɔl we wi nɔ pafɛkt, wi go ebul falamakata Jiova fɔ sho se wi gɛt fri-an we wi de yuz wi trɛnk. Wi nɔ ebul fɔ gi ɔda pipul dɛn pawa ɔ trɛnk lɛk Jiova. Bɔt wi kin yuz wi trɛnk fɔ ɛp dɛn. Fɔ ɛgzampul, sɔntɛm wi kin du os wok dɛn ɔ go bay-bay fɔ brɔda ɔ sista we dɔn ol ɔ we sik. If wi ebul, wi kin ɛp fɔ klin di Kiŋdɔm Ɔl ɔ mek di say dɛn we dɔn pwɛl. We wi de yuz wi trɛnk dɛn we dɛn ya, i de ɛp ɔda pipul dɛn we de wɔship Jiova.

10. Aw wi go yuz di wɔd dɛn we wi de tɔk fɔ bɛnifit ɔda pipul dɛn?

¹⁰ Nɔ fɔgɛt bak se di wɔd dɛn we yu de tɔk gɛt pawa. Yu ebul tink bɔt pɔsin we go bɛnifit we yu tɛl am se yu gladi fɔ wetin i de du? Yu sabi ɛnibɔdi we nid pɔsin fɔ kɔrej am? If yu sabi ɛniwan pan dɛn pipul dɛn ya, yu nɔ tink se i go fayn fɔ mek yu du sɔntin fɔ sho se yu bisin bɔt am? Yu kin go fɛn di pɔsin, kɔl am na fon, ɔ sɔntɛm yu kin sɛn kad to am, imel, ɔ tɛks mɛsej. Yu nɔ nid fɔ wɔri tumɔs bɔt wetin fɔ se. Sɔntɛm jɔs smɔl tin we yu go tɔk frɔm yu at go bi di ɛgzakt tin we yu kɔmpin Kristian nid fɔ kɔntinyu fɔ sav Jiova fetful wan ɔ fɔ gɛt op we bad tin apin to am.—Prɔv. 12:25; Ɛfi. 4:29.

11. Aw Jiova de yuz in sɛns?

¹¹ Jiova de gi sɛns. Jems we na bin disaypul rayt se: “If ɛniwan pan una nɔ gɛt bɛtɛ sɛns, mek i kɔntinyu fɔ aks Gɔd, . . . bikɔs i de gi bɔku bɔku wan ɛn i nɔ de fɛn fɔlt.” (Jems 1:5.) Dɛn wɔd dɛn ya sho se Jiova nɔ de kip in sɛns to insɛf ɛn i de gladi fɔ gi pipul dɛn. Notis bak se we Jiova de gi sɛns “i nɔ de fɛn fɔlt.” I nɔ de ɛva  mek wi fil bad we wi sho se wi want mek i gayd wi. Di tru na dat, i de ɛnkɔrej wi fɔ aks am fɔ sɛns.—Prɔv. 2:​1-6.

12. Us chans dɛn wi gɛt fɔ sho ɔda pipul dɛn wetin wi sabi?

¹² Wetin wi go du? Fɔ se wi go ebul falamakata Jiova bay we wi sho ɔda pipul dɛn wetin wi sabi? (Sam 32:8) Jiova in pipul dɛn gɛt bɔku chans dɛn fɔ sho ɔda pipul dɛn wetin dɛn dɔn lan. Fɔ ɛgzampul, we wi de na fil savis, bɔku tɛm wi kin tren nyu pɔblisha dɛn fɔ sabi aw fɔ prich. Ɛlda dɛn de peshɛnt we dɛn de ɛp ministerial savant dɛn ɛn brɔda dɛn we dɔn baptayz fɔ lan aw fɔ du dɛn wok dɛn na di kɔngrigeshɔn. Di wan dɛn we gɛt ɛkspiriɛns pan kɔnstrɔkshɔn ɛn mɛntenans wok kin ɛp fɔ tren di wan dɛn we nɔ gɛt bɛtɛ ɛkspiriɛns fɔ du wok dɛn na di ɔganayzeshɔn.

13. We wi de tren ɔda pipul dɛn, aw wi go falamakata di we aw Jiova de gi sɛns?

¹³ I go fayn fɔ mek di wan dɛn we de tren ɔda pipul dɛn falamakata di we aw Jiova de gi sɛns. Mɛmba se Jiova de gladi fɔ gi ɔda pipul dɛn sɛns. Semweso, wisɛf fɔ gladi fɔ sho ɔda pipul dɛn di tin dɛn we wi sabi ɛn wi ɛkspiriɛns we wi de tren dɛn. Wi nɔ fɔ fred fɔ tich dɛn ɔl wetin wi sabi bikɔs wi de fred se as tɛm de go dɛn go tek wi ples. Ɛn wi nɔ fɔ tink lɛk aw ɔda pipul dɛn kin tink. Dɛn kin se: ‘Nɔbɔdi nɔ tren mi! Lɛ i lan fɔ insɛf.’ Jiova in pipul dɛn nɔ fɔ ɛva tink da we de. Bifo dat, wi fɔ gladi fɔ sho di wan dɛn we wi de tren wetin wi sabi ɛn “gi wisɛf” we wi de tren dɛn. (1 Tɛs. 2:8) Wi op se dɛnsɛf “go rili kwalifay fɔ tich ɔda pipul dɛn.” (2 Tim. 2:​1, 2) If wi ɔl gladi fɔ sho ɔda pipul dɛn wetin wi sabi, wi ɛn dɛn go gɛt sɛns ɛn gladi mɔ ɛn mɔ.

IF WI FIL SE DI PIPUL DƐN WE WI DE DU GUD TO NƆ DE SHO SE DƐN GƐT TƐNKI

14. Wetin bɔku pipul dɛn kin du we wi du gud to dɛn?

¹⁴ We wi gi ɔ du sɔntin, mɔ fɔ wi brɔda ɛn sista dɛn, bɔku tɛm dɛn kin sho se dɛn gladi fɔ wetin wi du fɔ dɛn. Sɔntɛm dɛn go rayt not fɔ tɛl tɛnki ɔ sho se dɛn gladi ɔda we dɛn. (Kol. 3:15) We dɛn sho se dɛn gladi dɛn kayn we dɛn ya fɔ wetin wi gi ɔ du fɔ dɛn, dat kin mek wi gladi mɔ.

15. Wetin wi fɔ mɛmba we sɔm pipul dɛn nɔ sho tɛnki fɔ wetin wi du fɔ dɛn?

¹⁵ Bɔt fɔ tɔk tru, sɔntɛnde sɔm nɔ kin sho tɛnki fɔ wetin wi du fɔ dɛn ɔltɛm. Sɔntɛnde, wi kin yuz wi tɛm, trɛnk, ɛn ɔda tin dɛn fɔ ɛp pɔsin, bɔt afta wi du dat wi kin wɔnda if di pɔsin rili gladi fɔ wetin wi du fɔ am. If da kayn tin de apin, wetin wi go du fɔ mek wi kɔntinyu fɔ gladi ɛn nɔ vɛks? Mɛmba di wɔd dɛn we de na wi tim skripchɔ we na Akt 20:35. Di gladi-at we wi de gɛt we wi de gi nɔ gɛt natin fɔ du wit di we aw pipul dɛn de biev we wi du gud to dɛn. Wi kin disayd fɔ gladi ivin if i tan lɛk se di wan dɛn we wi de du gud to nɔ sho se dɛn gɛt tɛnki. Aw? Lɛ wi tɔk bɔt sɔm we dɛn.

16. Wetin wi fɔ pe atɛnshɔn to we wi de gi?

¹⁶ Pe atɛnshɔn fɔ falamakata Jiova. I de gi gud tin dɛn to pipul dɛn ilɛk dɛn sho se dɛn gɛt tɛnki ɔ dɛn nɔ sho se dɛn gɛt tɛnki. (Mat. 5:​43-48) Jiova prɔmis se we wisɛf de gi ɛn “nɔ abop fɔ gɛt ɛnitin bak,” wi “go gɛt bɔku blɛsin.” (Lyuk 6:35) Di wɔd “ɛnitin” kin min we pɔsin de sho se i gladi fɔ wetin yu du fɔ am. Ilɛksɛf pipul dɛn sho se dɛn gladi fɔ wetin wi du fɔ dɛn ɔ dɛn nɔ du dat, Jiova go blɛs wi ɔltɛm fɔ di gud tin dɛn we wi de du fɔ ɛp  ɔda pipul dɛn bikɔs wi de “gladi fɔ gi.”—Prɔv. 19:17; 2 Kɔr. 9:7.

17. Wetin na di men rizin we mek wi want fɔ du gud to ɔda pipul dɛn? (Lyuk 14:​12-14)

¹⁷ Wan ɔda tin we wi kin du fɔ falamakata Jiova we wi de gi, na fɔ du wetin Jizɔs se na Lyuk 14:​12-14. (Rid.) I nɔ bad fɔ du gud ɔ sho se wi gɛt fri-an to pipul dɛn we go du di sem kayn tin fɔ wi. Bɔt wetin wi go du if wi notis se wi de du gud to ɔda pipul dɛn bikɔs wi de op se dɛnsɛf go du gud to wi? If na so i bi, i go fayn fɔ mek wi tray fɔ du wetin Jizɔs bin se. Wi kin du gud to pɔsin we wi no se nɔ go ebul du gud to wi bak. Dat go mek wi gɛt gladi-at bikɔs wi de falamakata Jiova. Ɛn if wi nɔ de ɛkspɛkt ɔda pipul dɛn fɔ du gud to wi bak, wi go gɛt gladi-at ɔltɛm we wi gi ɔda pipul dɛn ilɛksɛf dɛn nɔ sho se dɛn gɛt tɛnki.

18. Wetin wi nɔ fɔ du? Wetin mek?

¹⁸ Nɔ tink se ɔda pipul dɛn nɔ gɛt tɛnki. (1 Kɔr. 13:7) If ɔda pipul dɛn nɔ sho tɛnki fɔ wetin wi du fɔ dɛn, i go fayn mek wi aks wisɛf: ‘Fɔ se dɛn nɔ rili gladi fɔ wetin wi du ɔ fɔ se dɛn jɔs fɔgɛt fɔ sho se dɛn gladi fɔ wetin wi du fɔ dɛn?’ Sɔntɛm ɔda rizin dɛn de we mek dɛn nɔ sho se dɛn gɛt tɛnki fɔ wetin wi du fɔ dɛn lɛk aw wi bin de ɛkspɛkt. Sɔm pipul dɛn go rili gladi fɔ wetin wi du fɔ dɛn, bɔt i nɔ izi fɔ mek dɛn sho am. Sɔntɛm dɛn de shem fɔ lɛ ɔda pipul dɛn ɛp dɛn, mɔ if na dɛn bin de ɛp ɔda pipul dɛn trade. Bɔt ilɛk wetin apin, di lɛk we wi lɛk wi brɔda ɛn sista dɛn go mek wi nɔ tink bad bɔt dɛn ɛn i go mek wi kɔntinyu fɔ gɛt gladi-at we wi de gi.—Ɛfi. 4:2.

19-20. Wetin mek i impɔtant fɔ lɛ wi peshɛnt we wi de du gud to ɔda pipul dɛn? (Luk bak di pikchɔ.)

¹⁹ Go de peshɛnt. We Kiŋ Sɔlɔmɔn we gɛt sɛns bin de tɔk bɔt fɔ gɛt fri-an, i bin rayt se: “Sɛn yu bred na wata, bikɔs afta sɔm tɛm yu go si am bak.” (Ɛkli. 11:1) Dɛn wɔd dɛn ya sho se na “afta sɔm tɛm” dɔn pas sɔm pipul dɛn go sho se dɛn gladi  fɔ wetin wi bin du fɔ dɛn. Na dat bin apin to wan sista.

²⁰ Trade, wan sakit ovasia in wɛf bin rayt shɔt not to wan sista we bin jɔs baptayz fɔ ɛnkɔrej am fɔ kɔntinyu fɔ fetful. Afta lɛk et ia so, di sista bin rayt lɛta bak to di sakit ovasia in wɛf. I bin rayt se: “A bin fil se a jɔs nid fɔ rayt ɛn tɛl yu bɔt di ɛp we yu dɔn ɛp mi di ia dɛn we dɔn pas pan ɔl we yu nɔ bin no.” I kɔntinyu fɔ tɔk se: “[Yu not] bin rili ɛnkɔrej mi, bɔt na di skripchɔ bin rili tɔch mi at ɛn a nɔ bin ɛva fɔgɛt am.” a Afta di sista dɔn tɔk bɔt sɔm pan di prɔblɛm dɛn we dɔn mit am insay di et ia we dɔn pas, i tɔk se: “Tɛm dɛn bin de we a bin jɔs want giv-ɔp pan ɔltin ɛn stɔp fɔ sav Jiova, bɔt a kin mɛmba ɔltɛm di skripchɔ we yu bin rayt ɛn i bin de gi mi trɛnk fɔ mek a nɔ stɔp fɔ sav Jiova.” I kɔntinyu fɔ tɔk se: “Insay dɛn et ia dɛn de, natin nɔ bin ebul ɛnkɔrej mi lɛk di not ɛn di skripchɔ we yu bin sɛn.” Jɔs imajin aw dis sakit ovasia in wɛf go dɔn gladi we i gɛt dis lɛta “afta sɔm tɛm”! Sɔntɛm dis sem kayn tin go apin to wi bak we ɔda pipul dɛn go sho se dɛn gladi fɔ wetin wi du fɔ dɛn afta lɔng tɛm dɔn pas.

21. Wetin mek yu dɔn mek-ɔp yu maynd fɔ falamakata Jiova in fri-an?

²¹ As wi bin dɔn lan, Jiova mek wi di kayn we we wi go ebul fɔ du wan spɛshal tin. Pan ɔl we wi kin gladi we ɔda pipul dɛn gi wi, wi de gɛt mɔ gladi-at we wi gi ɔda pipul dɛn. Wi kin fil fayn we wi ebul fɔ ɛp wi kɔmpin Kristian dɛn. Ɛn wi kin gladi we dɛn sho se dɛn gladi fɔ wetin wi du fɔ dɛn. Bɔt ilɛk dɛn sho se dɛn gladi fɔ wetin wi du fɔ dɛn ɔ dɛn nɔ du dat, wi go gladi bikɔs wi du di rayt tin. Nɔ ɛva fɔgɛt se ilɛk wetin yu gi, “Jiova ebul gi yu pas dat fa fawe.” (2 Kro. 25:9) Wi nɔ go ɛva ebul gi pas Jiova! Ɛn no gladi-at nɔ de we pas di gladi-at we wi go gɛt we Jiova pe wi bak. So lɛ wi mek-ɔp wi maynd fɔ kɔntinyu fɔ falamakata wi Papa we de na ɛvin we gɛt fri-an.