Wi nɔ fɔ tink se jɔs bikɔs di 70 disaypul dɛn nɔ bin de di tɛm we Jizɔs bin bigin di Masta in Ivintɛm It, min se Jizɔs nɔ bin gladi fɔ dɛn ɔ dɛn bin dɔn kɔmɔt biɛn am. Jizɔs bin jɔs want fɔ de wit in apɔsul dɛn da tɛm de.

I bin gladi fɔ in 12 apɔsul dɛn ɛn in 70 disaypul dɛn. Fɔs, Jizɔs bin pik 12 man dɛn frɔm di bɔku disaypul dɛn we i bin gɛt ɛn kɔl dɛn apɔsul dɛn. (Lyuk 6:​12-16) Na Galili i bin de we i “kɔl di 12” ɛn “sɛn dɛn fɔ go prich bɔt Gɔd in Kiŋdɔm ɛn mɛn di wan dɛn we sik.” (Lyuk 9:​1-6) Leta, we Jizɔs bin de na Judia, i bin “pik 70 disaypul dɛn ɛn sɛn dɛn tu-tu.” (Lyuk 9:51; 10:1) So Jizɔs bin gɛt disaypul dɛn na di difrɛn say dɛn we dɛn bin de prich bɔt am.

Di Ju dɛn we bin dɔn bi Jizɔs in disaypul dɛn go stil du di Pasova we dɛn kin du wantɛm insay di ia, ɛn sɔntɛm dɛn go du am wit dɛn famili dɛn. (Ɛks. 12:​6-11, 17-20) We di tɛm fɔ mek Jizɔs day bin de kam nia, in ɛn in disaypul dɛn bin go na Jerusɛlɛm. Bɔt i nɔ bin mek big Pasova fɔ ɔl in disaypul dɛn we de na Judia, Galili, ɛn Pɛria. Dis sho klia wan se Jizɔs bin jɔs want fɔ de wit in apɔsul dɛn da tɛm de. I bin tɛl dɛn se: “A rili want fɔ it dis Pasova it wit una bifo a sɔfa.”—Lyuk 22:15.

I bin gɛt gud rizin fɔ du dat. Tɛm nɔ bin de fa igen fɔ mek Jizɔs day as “Gɔd in Yɔŋ Ship we de pul sin na di wɔl.” (Jɔn 1:29) Dat bin fɔ apin na Jerusɛlɛm usay dɛn bin dɔn de mek sakrifays dɛn to Gɔd fɔ lɔng tɛm. Di yɔŋ Pasova ship bin de mɛmba di Izrɛlayt dɛn se Jiova bin fri dɛn we dɛn bin de as slev na Ijipt. Bɔt Jizɔs in sakrifays go du pas dat. In sakrifays go fri ɔl mɔtalman frɔm sin ɛn day. (1 Kɔr. 5:​7, 8) Di tin we Jizɔs bin du go mek di 12 apɔsul dɛn bi fawndeshɔn fɔ di Kristian kɔngrigeshɔn. (Ɛfi. 2:​20-22) Di Baybul buk we nem Rɛvɛleshɔn tɔk se di Jerusɛlɛm we na di oli siti gɛt “12 fawndeshɔn ston dɛn” ɛn “di Yɔŋ Ship in 12 apɔsul dɛn 12 nem dɛn bin rayt pan dɛn.” (Rɛv. 21:​10-14) Fɔ tru, di fetful apɔsul dɛn go du impɔtant wok fɔ mek wetin Gɔd want bi. So naw wi ɔndastand wetin mek Jizɔs bin mek in 12 apɔsul dɛn de wit am fɔ di las Pasova ɛn wetin gɛt fɔ apin afta dat, we na di Masta in Ivintɛm It.

Di 70 disaypul dɛn ɛn di ɔda wan dɛn nɔ bin de wit Jizɔs da tɛm de. Bɔt stil, ɔl di disaypul dɛn we bin kɔntinyu fɔ fetful ɛn sho se dɛn gɛt fet go bɛnifit frɔm di Masta in Ivintɛm It we Jizɔs bin du. Ɔl di disaypul dɛn we go bi anɔyntɛd Kristian dɛn go de pan di agrimɛnt fɔ di kiŋdɔm we Jizɔs bin tɛl in apɔsul dɛn bɔt da nɛt de.—Lyuk 22:​29, 30.