WI GO want fɔ gɛt ansa to dis kwɛstyɔn. Di Baybul sho se Jiova de lisin to prea dɛn tide. Na wi go mek i lisin to wi prea ɔ i nɔ lisin to am.

Di tɛm we Jizɔs bin de na di wɔl, i bin kɔndɛm di bigman dɛn pan Gɔd biznɛs we bin de pre ipokrit wan; dɛn bin jɔs want lɛ pipul dɛn si dɛn as pipul dɛn we de du wetin rayt. I bin tɔk se dɛn man dɛn de “go gɛt dɛn pe,” we min se dɛn go gɛt wetin dɛn rili want we na di pipul dɛn atɛnshɔn bɔt Gɔd nɔ go lisin to dɛn prea we na dat dɛn rili nid. (Matyu 6:​5) Semweso tide, bɔku pipul dɛn de pre akɔdin to aw dɛn want nɔto aw Gɔd want. If dɛn nɔ fala di Baybul prinsipul dɛn we wi dɔn tɔk bɔt, Gɔd nɔ go lisin to dɛn prea.

Wetin yu tink bɔt yusɛf? Yu tink se Gɔd go yɛri ɛn ansa yu prea dɛn? Gɔd nɔ go ansa to yu prea dɛn bikɔs ɔf yu kɔlɔ, di kɔntri we yu kɔmɔt, ɔ di kayn pɔsin we yu bi. Di Baybul tɛl wi se: “Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.” (Akt 10:​34, 35) Na da kayn pɔsin de yu bi? Fɔ fred Gɔd min se wi fɔ gɛt dip rɛspɛkt fɔ am, ɛn wi fɔ fred fɔ du tin we go mek i nɔ gladi. Fɔ du wetin rayt min se wi fɔ du wetin Gɔd se rayt ɛn nɔ tray fɔ du wetin wi want ɔ wetin ɔda pɔsin want. Yu rili want fɔ mek Gɔd lisin to yu prea dɛn? Di Baybul go sho yu aw yu go pre to Gɔd fɔ mek i go lisin to yu. *

Fɔ tru, bɔku pipul dɛn want fɔ mek Gɔd yuz mirekul fɔ ansa dɛn prea dɛn. Bɔt ivin di tɛm we dɛn bin de rayt di Baybul, na wan wan tɛm Gɔd bin de pafɔm mirekul. Sɔm tɛm dɛn de, we wan mirekul apin, i kin tek lɔng tɛm bifo ɔda wan apin. Dɔn bak di Baybul sho se mirekul dɛn bin stɔp fɔ apin afta di tɛm we di apɔsul dɛn bin de. (1 Kɔrintians 13:​8-​10) Fɔ se dat min se Gɔd nɔ de ansa prea dɛn tide? Nɔ, nɔto so i bi. Lɛ wi tɔk bɔt sɔm prea dɛn we Gɔd de ansa.

Gɔd de gi pɔsin sɛns. Na Jiova de gi tru tru sɛns. I gɛt fri an, i de gi sɛns to ɔl di wan dɛn we want fɔ mek i gayd dɛn, ɛn we want fɔ du wetin i se.​—Jems 1:​5.

Gɔd de gi in oli spirit ɛn i de bɛnifit wi. Oli spirit na di pawa we Gɔd de yuz fɔ du sɔntin. Natin nɔ de we gɛt pawa pas di oli spirit. I go ɛp wi fɔ bia prɔblɛm dɛn. I go ɛp wi fɔ gɛt kolat we wi wɔri. I go ɛp wi fɔ gɛt ɔda fayn fayn kwaliti dɛn. (Galeshians 5:​22, 23) Jizɔs bin tɛl in disaypul dɛn se Gɔd de gladi fɔ gi dis gift.​—Lyuk 11:​13.

Gɔd de gi sɛns to di wan dɛn we aks am. (Akt 17:​26, 27) Pipul dɛn de difrɛn say dɛn na di wɔl we rili want fɔ no di tru. Dɛn want fɔ no bɔt Gɔd, wetin na in nem, wetin mek i mek di wɔl ɛn mɔtalman, ɛn aw dɛn go ebul fɔ go nia am. (Jems 4:​8) Jiova Witnɛs dɛn kin mit dɛn kayn pipul dɛn de ɛn dɛn kin gladi fɔ sho dɛn di Baybul in ansa to dɛn kwɛstyɔn dɛn de.

Yu tek dis magazin bikɔs yusɛf want fɔ no di ansa to dɛn kwɛstyɔn dɛn de? Yusɛf want fɔ no bɔt Gɔd? Sɔntɛm na dis we i dɔn ansa yu prea.