Frɔm we a bin smɔl a bin lɛk di tin dɛn we Gɔd mek. Bɔku tɛm, mi famili kin ɛnjɔy fɔ go awtin usay fayn fɔrɛst ɛn lek dɛn de arawnd di say we wi bin de na Yuvaskyula, na di Sɛntral pat na Finland. A lɛk animal dɛn bak. We a bin smɔl, we a bin de si pus ɛn dɔg a kin want fɔ ɔg dɛn! We a bin de gro ɔp a nɔ bin lɛk fɔ si we pipul dɛn de du bad tin to animal dɛn. As tɛm de go, a jɔyn wan animal rayt ɔganayzeshɔn, usay a bin mit pipul dɛn we lɛk animal dɛn lɛk mi.

Wi bin gɛt zil fɔ kampen fɔ animal dɛn rayt. Wi bin sheb sheb anbil dɛn ɛn arenj fɔ protɛst agens shɔp dɛn we de sɛl animal ia ɛn say dɛn we dɛn bin de du ɛkspɛrimɛnt pan animal dɛn. Wi bin ivin mek wan nyu ɔganayzeshɔn fɔ protɛkt animal dɛn. Bikɔs wi bin de du difrɛn tin dɛn fɔ tray fɔ kɔntinyu wit dis ɔganayzeshɔn, bɔku tɛm wi bin de gɛt prɔblɛm wit di gɔvmɛnt. Bɔku tɛm dɛn bin de arɛst mi ɛn kɛr mi go na kɔt.

Apat frɔm we a bisin bɔt animal dɛn, ɔda prɔblɛm dɛn de we bin de apin arawnd di wɔl we bin de mek a nɔ gladi. So a bin jɔyn difrɛn ɔganayzeshɔn dɛn, lɛk Amnesty International ɛn Greenpeace. A bi yuz ɔl mi trɛnk fɔ sɔpɔt di tin dɛn we dɛn bin de du. A bin de fɛt fɔ di wan dɛn we po ɛn di wan dɛn we nɔ bin de gɛt bɛtɛ tin fɔ it.

Bɔt smɔl smɔl, a bin kam fɔ no se a nɔ go ebul fɔ chenj di wɔl. Pan ɔl we dɛn ɔganayzeshɔn dɛn de bin ebul fɔ kɔrɛkt smɔl prɔblɛm dɛn, di big prɔblɛm dɛn bin jɔs de wɔs. I bin jɔs tan lɛk fɔ se bad bad tin dɛn de afɛkt di wan ol wɔl ɛn nɔbɔdi nɔ bisin bɔt ɛnitin. A nɔ bin ebul fɔ du natin.

Mi at bin rili pwɛl bikɔs a nɔ ebul fɔ du natin. So a bigin fɔ tink bɔt Gɔd ɛn di Baybul. A bin dɔn de stɔdi di Baybul wit Jiova Witnɛs dɛn trade. Pan ɔl we a bin no se Jiova Witnɛs dɛn gud ɛn dɛn de sho se dɛn lɛk mi, a nɔ bin rɛdi fɔ chenj mi layf. Bɔt dis tɛm, tin bin difrɛn.

A bin tek mi Baybul ɛn bigin fɔ rid. I bin rili kɔrej mi. A bin notis bɔku skripchɔ dɛn we tich se wi fɔ trit animal dɛn fayn. Fɔ ɛgzampul Prɔvabs 12:​10 se, “pɔsin we de waka tret na PAPA GƆD in yay de trit in animal dɛn gud.”(Krio Fɔs Oli Baybul) A bin kam fɔ no bak se nɔto Gɔd de mek prɔblɛm dɛn de apin na di wɔl. Bifo dat, di pɔblɛm dɛn de wɔs bikɔs bɔku pipul dɛn nɔ de du wetin Gɔd se. A bin rili gladi we a lan se Jiova lɛk wi ɛn i de peshɛnt.​—Sam 103:​8-​14.

Arawnd dis tɛm, a bin fɛn wan kupɔn fɔ di buk we mek Wetin Rili di Baybul De Tich? ɛn sɛn am. I nɔ tu te wan brɔda ɛn in wɛf bin kam na mi domɔt ɛn dɛn bin aks if a go want fɔ stɔdi di Baybul, ɛn a bin gri. A bigin bak fɔ atɛnd Kristian mitin dɛn na Kiŋdɔm Ɔl. Bikɔs ɔf dat, a bigin fɔ lɛk di tin dɛn we a bin de lan frɔm di Baybul.

Bikɔs ɔf di Baybul, a bin ebul fɔ mek bɔku chenj dɛn. A bin lɛf fɔ smok ɛn fɔ drink pasmak. A bin tray fɔ mek misɛf nit ɛn lɛf fɔ yuz bad wɔd dɛn. Ɛn a bin ajɔst di we aw a bin de tink bɔt di lɔ dɛn we gɔvmɛnt de gi. (Romans 13:​1) A bin lɛf fɔ liv fri layf, we na layf we nɔ bi izi fɔ mi fɔ lɛf.

Di wan we bin at pas ɔl na fɔ tink di rayt we bɔt ɔganayzeshɔn dɛn we de fɛt fɔ mɔtalman ɛn animal dɛn rayt. I nɔ bin apin wantɛm wantɛm. Fɔs, a bin tink se if a rizayn i go tan lɛk a dɔn kɔmɔt biɛn dɛn ɔganayzeshɔn dɛn de. Bɔt a bin kam fɔ no se na Gɔd in Kiŋdɔm nɔmɔ go pul di prɔblɛm dɛn na di wɔl. A bin disayd fɔ yuz mi trɛnk fɔ sɔpɔt da Kiŋdɔm de ɛn ɛp ɔda pipul dɛn fɔ lan bɔt am.​—Matyu 6:​33.

As pɔsin we bin de fɛt fɔ mek tin chenj, a bin yus fɔ sheb pipul dɛn to tu grup; gud ɔ bad, ɛn a bin rɛdi fɔ tek akshɔn agens ɛnibɔdi we a tink se bad. Bɔt di Baybul dɔn ɛp mi fɔ mek a nɔ et ɔda pipul dɛn. Bifo dat, a de tray fɔ sho Kristian lɔv to ɔlkayn pipul dɛn. (Matyu 5:​44) Wan ɔda we we a de sho se a lɛk pipul dɛn na we a de prich di gud nyuz bɔt Gɔd in Kiŋdɔm to dɛn. A gladi fɔ si aw dis fayn wok de mek pipul dɛn gɛt kolat, gladi-at ɛn de gi dɛn rial op.

A dɔn gɛt kolat bay we a lɛf ɔltin na Jiova in an. A biliv se as di Wan we mek ɔltin, i nɔ go alaw dɛn du bad to animal ɛn mɔtalman sote go, ɛn i nɔ go alaw fɔ mek dɛn donawe wit dis fayn wɔl. Bɔt i nɔ go te igen, i go yuz in Kiŋdɔm fɔ mek ɔl di tin dɛn we dɛn dɔn pwɛl. (Ayzaya 11:​1-9) A nɔ jɔs gladi fɔ sabi dɛn tru tin dɛn ya, bɔt a gladi bak fɔ ɛp ɔda pipul dɛn fɔ biliv dɛn. A nɔ de fil igen se a fɔ chenj di wɔl