Rud rud pikchɔ ɔ fim dɛn de ɔlsay na di wɔl. * I kin de pan advatizmɛnt dɛn, fashɔn, fim dɛn, myusik dɛn, ɛn magazin dɛn. I kin de bak na tɛlivishɔn, vidio gem dɛn, smatfon dɛn, tablɛt ɛn kɔmpyuta dɛn, Wɛbsayt dɛn, ɛn dɛn say dɛn usay pɔsin kin post pikchɔ dɛn ɔnlayn. Bɔku pipul dɛn naw-a-dez nɔ gɛt prɔblɛm fɔ wach rud rud pikchɔ ɔ fim dɛn. Naw bɔku pipul dɛn we de na bɔku ples dɛn kin wach rud rud pikchɔ ɔ fim dɛn pas ɛni ɔda tɛm.​—Rid di bɔks we gɛt di taytul  “Di Tru bɔt Rud Rud Pikchɔ ɛn Fim Dɛn.”

Di we aw rud rud pikchɔ ɛn fim dɛn bin de trade dɔn chenj. Professor Gail Dines bin rayt se: “Trade pipul dɛn kin shɔk we dɛn si pikchɔ dɛn we de sho nekɛd man ɔ uman ɔ we de sho man ɛn uman de du mami ɛn dadi biznɛs. Bɔt naw pipul dɛn nɔ de rili si am lɛk se na tin we rili bad.”

Aw yu si dɛn tin dɛn de? Yu tink se rud rud pikchɔ ɔ fim dɛn na tin we nɔ bad, na tin we tan lɛk bad bad pɔyzin, ɔ na tin we nɔ tu bad? Jizɔs bin se: “Ɛni tik we gud de bia fayn frut, bɔt ɛni tik we rɔtin nɔ de bia fayn frut.” (Matyu 7:​17) Uskayn frut rud rud pikchɔ ɔ fim dɛn kin bia? Fɔ sabi di ansa, lɛ wi tɔk bɔt sɔm simpul kwɛstyɔn dɛn bɔt rud rud pikchɔ ɔ fim dɛn.

WETIN MASTA-SABI BUKMAN DƐN SE: Rud rud pikchɔ ɔ fim dɛn na tin we pɔsin kin yus to. Ɛn masta-sabi bukman dɛn ɛn dɔktɔ dɛn se i tan lɛk we pɔsin de tek koken.

Brayan, * we bin dɔn yus fɔ de wach rud rud pikchɔ ɔ fim dɛn na di Intanɛt bin tɔk se: “Natin nɔ bin ebul fɔ stɔp mi. I bin tan lɛk se a de drim. A kin trimbul ɛn gɛt pen na mi ed. A tray tranga wan fɔ stɔp bɔt afta sɔm ia, a bin stil de wach am.”

Pipul dɛn we de wach rud rud pikchɔ ɔ fim dɛn nɔ kin want mek ɔda pipul dɛn no bɔt dɛn abit. Dɛn kin ayd ɛn dɛn kin lay. Na dat mek wi nɔ sɔprayz fɔ no se bɔku pan dɛn kin fil lɛk se na dɛn wangren de, dɛn kin shem, dɛn kin wɔri, dɛn at kin pwɛl pasmak, ɛn dɛn kin vɛks. Ɛn sɔm ɔda wan dɛn kin ivin tink fɔ kil dɛnsɛf. Sage we bin de dawnlod rud rud pikchɔ ɔ fim dɛn na in mobayl fon ɔlmost ɛvride bin tɔk se: “A bin jɔs de tink bɔt misɛf. A bin de fil lɛk se a nɔ gɛt wan yus, a de du bad, na mi wangren de, ɛn lɛk se a de na trap. A bin de shem ɛn fred fɔ aks fɔ ɛp.”

Ilɛk na fɔ shɔt tɛm nɔmɔ yu wach rud rud pikchɔ ɔ fim dɛn ɔ na bay mistek, i kin stil ambɔg yu bad bad wan. Dr. Judith Reisman we na pɔsin we de bifo fɔ du risach pan rud rud pikchɔ ɔ fim dɛn bin tɔk bifo di U.S. Senate committee se: “Rud rud pikchɔ ɔ fim dɛn kin te na pɔsin in bren ɛn ilɛksɛf pɔsin nɔ want fɔ mɛmba am, i kin at ɔ nɔ pɔsibul fɔ fɔgɛt bɔt am.” Suzan we ol 19 ia ɛn we bin de wach rud rud pikchɔ ɔ fim dɛn ɔnlayn bin tɔk se: “Di pikchɔ dɛn fasin na mi maynd. A kin jɔs mɛmba dɛn nɔmɔ lɛk dat. I kin tan lɛk se a nɔ go ɛva ebul fɔ pul dɛn kɔmɔt na mi maynd.”

DI MEN PƆYNT: Rud rud pikchɔ ɔ fim dɛn de mek pɔsin bi slev ɛn i de ambɔg di wan dɛn we de wach am bad bad wan.​—2 Pita 2:​19.

WETIN MASTA-SABI BUKMAN DƐN SE?: “Mared-os dɛn ɛn famili dɛn dɔn skata bikɔs ɔf rud rud pikchɔ ɔ fim dɛn.”​—The Porn Trap, by Wendy and Larry Maltz.

Rud rud pikchɔ ɔ fim dɛn kin ambɔg mared-os ɛn famili bay we i de mek

• Maredman ɛn in wɛf nɔ trɔst dɛnsɛf igen, dɛn padi biznɛs nɔ kin tayt igen lɛk aw i bin de, ɛn dɛn nɔ kin lɛk dɛnsɛf igen.​—Prɔvabs 2:​12-17.

• Pɔsin jɔs bizin bɔt insɛf, jɔs kip to insɛf, ɛn i kin mek pɔsin nɔ satisfay wit in man ɔ in wɛf.​—Ɛfishians 5:​28, 29.

• Pɔsin bigin fɔ imajin mami ɛn dadi biznɛs di kayn we we nɔ fayn ɛn i kin fil fɔ du am.​—2 Pita 2:​14.

• Di wan dɛn we de wach dɛn fos dɛn man ɔ dɛn wɛf dɛn fɔ du mami ɛn dadi biznɛs di kayn we we nɔ fayn.​—Ɛfishians 5:​3, 4.

• Pɔsin de tink bɔt mami ɛn dadi biznɛs ɛn ivin lɛf in man ɔ wɛf ɛn du mami ɛn dadi biznɛs wit ɔda pɔsin.​—Matyu 5:​28.

Di Baybul tɛl maredman ɛn in wɛf nɔ fɔ “du wikɛd tin dɛn” to dɛnsɛf. (Malakay 2:​16) We pɔsin lɛf in man ɔ in wɛf ɛn du mami ɛn dadi biznɛs wit ɔda pɔsin na wan kayn wikɛd tin we kin damej mared-os ɛn i kin mek dɛn pat ɔ dayvɔs. Dɛn kayn tin dɛn de kin ambɔg di pikin dɛn we dɛn bɔn.

Rud rud pikchɔ ɔ fim dɛn kin ambɔg pikin dɛn. Brayan we wi bin dɔn tɔk bɔt bin ɛksplen se: “We a bin ol tɛn ia, a mistek si mi papa in magazin we gɛt rud rud pikchɔ dɛn we a bin de ple, ple-kech.” A bigin fɔ ayd fɔ wach dɛn, a nɔ bin rili ɔndastand wetin mek a bin de wach dɛn pikchɔ dɛn de. Na so a bigin da bad abit de we a kɔntinyu te a big.” Risach dɔn sho se rud rud pikchɔ ɔ fim dɛn kin mek pikin dɛn we dɔn pas 12 ia kin bigin du mami ɛn dadi biznɛs we dɛn yɔŋ, ɛn i kin mek dɛn du mami ɛn dadi biznɛs wit difrɛn pipul dɛn, dɛn kin du bad bad tin dɛn fɔ du mami ɛn dadi biznɛs, di we aw dɛn kin fil ɛn di we aw dɛn kin tink kin chenj chenj.

DI MEN PƆYNT: Rud rud pikchɔ ɔ fim dɛn tan lɛk pɔyzin we de ambɔg tayt padi biznɛs, ɛn i kin briŋ pwɛlat ɛn pen.​—Prɔvabs 6:​27.

GƆD IN WƆD SE: “Una dɛdin di pat dɛn na una bɔdi . . . so dat una nɔ go du mami ɛn dadi biznɛs di we aw Gɔd nɔ want, una nɔ go du ɛni dɔti tin, una go ebul fɔ kɔntrol unasɛf we i kam pan mami ɛn dadi biznɛs, una nɔ go de want fɔ du bad, ɛn una nɔ go want ɔltin fɔ unasɛf, we na aydɔl wɔship.”​—Koloshians 3:​5.

I simpul, Jiova * Gɔd et rud rud pikchɔ ɔ fim dɛn. Dis nɔto bikɔs i nɔ want tɔk ɛnitin bɔt mami ɛn dadi biznɛs. Na in mek mɔtalman ebul fɔ du mami ɛn dadi biznɛs, ɛn i mek am fɔ lɛ pipul dɛn we mared yuz am fɔ ɛnjɔy dɛnsɛf, fɔ kam nia dɛnsɛf mɔ ɛn mɔ, ɛn fɔ gɛt di blɛsin fɔ briŋ pikin dɛn kam na di wɔl.​—Jems 1:​17.

Wetin mek wi go se Jiova rili et rud rud pikchɔ ɔ fim dɛn? Lɛ wi tɔk bɔt sɔm rizin dɛn.

• I no se rud rud pikchɔ ɔ fim dɛn kin ambɔg pɔsin in layf.​—Ɛfishians 4:​17-​19.

• I lɛk wi ɛn i want fɔ protɛkt wi frɔm bad.​—Ayzaya 48:​17, 18.

• Jiova want fɔ protɛkt mared-os ɛn famili dɛn.​—Matyu 19:​4-6.

• I want wi fɔ liv klin layf ɛn fɔ rɛspɛkt ɔda pipul dɛn rayt.​—1 Tɛsalonians 4:​3-6.

• I want wi fɔ rɛspɛkt di ɔnɔ we wi gɛt fɔ bɔn pikin dɛn ɛn fɔ yuz am di rayt we.​—Ibruz 13:​4.

• Jiova no se rud rud pikchɔ ɔ fim dɛn de sho di bad we aw Setan de tink bɔt mami ɛn dadi biznɛs ɛn fɔ se i jɔs bisin bɔt insɛf.​—Jɛnɛsis 6:​2; Jud 6, 7.

DI MEN PƆYNT: Rud rud pikchɔ ɔ fim dɛn de ambɔg pɔsin in padi biznɛs wit Gɔd.—Romans 1:​24.

Bɔt Jiova rili gɛt sɔri-at fɔ di wan dɛn we want fɔ lɛf fɔ wach rud rud pikchɔ ɔ fim dɛn. Di Baybul se: “PAPA GƆD [“Jiova”, NWT] gɛt sɔri-at bad, i nɔ de vɛks kwik bɔt i rɛdi fɔ sho wi aw i lɛk wi. I no aw i mek wi; i nɔ de fɔgɛt se na dɔti i tek mek wi.” (Sam 103:​8, 14) I de invayt pipul dɛn we ɔmbul fɔ tɔn to am “so dat i go sɔri fɔ [dɛn] ɛn gi [dɛn] in spɛshal gudnɛs fɔ ɛp [dɛn] di rayt tɛm.”​—Ibruz 4:​16; rid di bɔk we gɛt di taytul “ Wetin Go Ɛp Yu fɔ Lɛf fɔ Wach Rud Rud Pikchɔ ɔ Fim Dɛn?.”

Bɔku bɔku pipul dɛn dɔn gri fɔ mek Gɔd ɛp dɛn. I bin ebul ɛp dɛn? Notis wetin di Baybul tɔk bɔt sɔm pipul dɛn we bin ebul lɛf bad abit. I se: “Gɔd dɔn was una fayn, i dɔn mek una oli . . . i dɔn tɔk se una de du wetin rayt insay Masta Jizɔs Krays in nem ɛn wit In spirit.” (1 Kɔrintians 6:​11) Jɔs lɛk di apɔsul Pɔl, dɛn kayn pipul dɛn kin ebul fɔ tɔk se: “A kin gɛt trɛnk fɔ du ɔltin bikɔs pɔsin de we de gi mi di pawa.”​—Filipians 4:​13.

Suzan we bin ebul lɛf fɔ wach rud rud pikchɔ ɔ fim dɛn bin tɔk se: “Na Jiova nɔmɔ go ɛp yu fɔ lɛf fɔ wach rud rud pikchɔ ɔ fim dɛn. If yu aks am fɔ yu ɛn gayd yu, yu go ebul gɛt klin kɔnshɛns bifo am. I nɔ go ɛva disapɔynt yu.”