Di Baybul In Ansa To Sɔm Kwɛstyɔn Dɛn
Uskayn pɔsin Gɔd bi?
Gɔd na spirit; wi nɔ de si am. Na in mek di ɛvin, di wɔl, ɛn ɔltin we gɛt layf. Nɔbɔdi nɔ mek Gɔd; i nɔ gɛt biginin. (Di Sam Dɛm 90:2) Gɔd want mek pipul dɛn fɛn am ɛn tray fɔ no di tru bɔt am.—Rid Di Apɔsul Dɛn Wok [Akt] 17:24-27.
Wi go ebul no Gɔd in nem. Wi go ebul ɔndastand sɔm kwaliti dɛn we i gɛt we wi tink gud wan bɔt di tin dɛn we i dɔn mek. (Lɛta Fɔ Rom 1:20) Bɔt fɔ mek wi no Gɔd gud gud wan, wi fɔ stɔdi in Wɔd we na di Baybul. Di Baybul go tɛl wi di kayn pɔsin we Gɔd bi, ɛn aw i lɛk wi.—Rid Di Sam Dɛm 103:7-10.
Aw Gɔd de fil we pipul dɛn nɔ de trit dɛn kɔmpin fayn?
Jiova we mek wi, et we pipul dɛn nɔ de trit dɛn kɔmpin fayn. (Ditarɔnɔmi 25:16) Ɛn i mek mɔtalman lɛk aw in tan. Na dat mek bɔku pan wi et we mɔtalman de trit in kɔmpin bad. Nɔto Gɔd de mek pipul dɛn de trit dɛn kɔmpin bad. Gɔd gi mɔtalman fridɔm fɔ disayd wetin i want fɔ du. Bɔt o-ya, bɔku pipul dɛn nɔ de yuz dɛn fridɔm di rayt we, ɛn dɛn de trit dɛn kɔmpin dɛn bad. Jiova de “fil am bad.”—Rid Jɛnɛsis 6:5, 6; Ditarɔnɔmi 32:4, 5.
Jiova lɛk we wi de trit ɔda pipul dɛn fayn, ɛn i nɔ go gri fɔ mek pipul dɛn kɔntinyu fɔ trit dɛn kɔmpin dɛn bad. (Di Sam Dɛm 37:28, 29) Di Baybul prɔmis wi se, i nɔ go te igen, Gɔd go mek pipul dɛn lɛf fɔ trit dɛn kɔmpin dɛn bad.—Rid Ayzaya 26:21; Pita In Sɛkɛn Lɛta 3:13.
Di Baybul prɔmis wi se, i nɔ go te igen Gɔd go mek pipul dɛn trit dɛn kɔmpin dɛn fayn
You May Also Like
IMPƆTANT BAYBUL TICHIN DƐN
Wetin Mek Gɔd De Alaw Wi fɔ Sɔfa?
Bɔku pipul dɛn kin aks wetin mek di wɔl ful-ɔp wit bad at, ɛn wetin mek pipul dɛn de sɔfa? Di Baybul gɛt ansa to dɛn kwɛstyɔn dɛn ya we go satisfay ɛn kɔrej wi.
