DI TƆPIK NA DI FRƆNT PEJ | WE PƆSIN DAY, ƆLTIN DƆN DƆN?
We Pɔsin Day, Ɔltin Nɔ Dɔn!
Bɛtani na bin wan smɔl vilej we bin de tu mayl frɔm Jerusɛlɛm. (Jɔn 11:18) Wan sɔri tin bin apin de di tɛm we i bin dɔn nia fɔ lɛ Jizɔs day. Lazarɔs we na wan pan Jizɔs in tayt padi dɛn, bin kam sik siriɔs wan ɛn day.
We Jizɔs bin yɛri se Lazarɔs dɔn day, i bin tɛl in disaypul dɛn se Lazarɔs de slip ɛn i want go de fɔ go wek am. (Jɔn 11:11) Bɔt Jizɔs in disaypul dɛn nɔ bin ɔndastand wetin i bin de tɔk bɔt, so Jizɔs tɛl dɛn klia wan se: “Lazarɔs dɔn day.”—Jɔn 11:14.
Jizɔs bin rich na Bɛtani 4 dez afta dɛn bin dɔn bɛr Lazarɔs, ɛn i bin tray fɔ kɔrej Lazarɔs in sista we nem Mata. Mata bin tɔk se: “Masta, if yu bin de na ya, mi brɔda nɔ bin fɔ day.” (Jɔn 11:17, 21) Jizɔs bin tɛl am se: “Na mi de mek pipul rayz frɔm dɛn grev ɛn na mi de gi dɛn layf. Ɛnibɔdi we biliv pan mi, go stil gɛt layf, i lɛk sɛf i dɔn day.”—Jɔn 11:25.
“Lazarɔs, kam na do!”
Fɔ sho se wetin Jizɔs bin tɔk na tru, i bin go na di grev ɛn tɔk lawd wan se: “Lazarɔs, kam na do!” (Jɔn 11:43) Di pipul dɛn we bin de wach, bin sɔprayz we dɛn si Lazarɔs de kɔmɔt na do.
Bifo dis tɛm, Jizɔs bin dɔn gi layf bak to tu pipul dɛn. I bin dɔn gi layf bak to wan smɔl gyal pikin. Di pikin na bin Jayrɔs in gyal pikin. Jɔs bifo Jizɔs gi am layf bak, i bin tɔk se na slip di pikin de slip.—Lyuk 8:52.
Mɛmba se we Jizɔs bin de tɔk bɔt di day we Lazarɔs ɛn Jayrɔs in pikin bin day, i bin kɔmpia day to slip. Day ɛn slip na tin dɛn we fiba. Aw dɛn fiba? We pɔsin de slip i nɔ de no natin. So dis de sho se we pɔsin dɔn day, i nɔ de fil pen ɛn i nɔ de sɔfa. (Ɛkliziastis 9:5; rid di bɔks we se, “Day Tan Lɛk Dip Slip.”) Jizɔs in disaypul dɛn bin no wetin rili de apin to pɔsin we dɔn day. Di Encyclopedia of Religion and Ethics bin tɔk se: “Di wan dɛn we bin de fala Jizɔs bin biliv se day na slip, ɛn di grev na di say we di wan dɛn we fetful te dɛn day, de rɛst.” *
Wi gladi fɔ no se di wan dɛn we dɔn day, de slip na dɛn grev ɛn dɛn nɔ de sɔfa. So wi no wetin de apin to pɔsin we dɔn day, ɛn wi nɔ nid fɔ fred igen.
“IF MƆTALMAN DAY, I GO KAM BAK NA DIS WƆL?”
Wi kin ɛnjɔy fɔ slip na nɛt, bɔt udat pan wi go want fɔ slip sote go? Us op wi gɛt fɔ se di wan dɛn we dɔn day go gɛt layf bak lɛk Lazarɔs ɛn Jayrɔs in pikin?
Job bin aks dis sem kwɛstyɔn we i bin fil se i gɛt fɔ day. I bin aks se: “If mɔtalman day, i go kam bak na dis wɔl?”—Job 14:14.
Job insɛf bin ansa in kwɛstyɔn we i bin de tɔk to Gɔd. I bin se: “Yu go kɔl mi, ɛn a go ansa yu; yu go dɔn aŋri fɔ si di wan we na yu mek.” (Job 14:15) Job bin shɔ se Jiova want mek di tɛm kam kwik kwik wan we I go gi layf bak to In fetful savant dɛn. Yu fil se Job bin de tink bɔt sɔntin we nɔ gɛt fɔ apin? Nɔ, i bin de tink bɔt sɔntin we gɛt fɔ apin.
Di gi we Jizɔs bin de gi layf bak to pipul dɛn, sho klia wan se Gɔd bin dɔn gi am pawa fɔ pul day. Infakt, di Baybul se Jizɔs “gɛt pawa oba day.” (Rɛvɛleshɔn 1:18) Jɔs lɛk aw Jizɔs bin gɛt pawa fɔ gi layf bak to Lazarɔs na so i gɛt pawa fɔ gi layf bak to pipul dɛn tumara bambay.
Di Baybul tɔk bɔku bɔku tɛm se di wan dɛn we dɔn day go gɛt layf bak. Wan enjɛl bin tɛl di prɔfɛt Daniɛl se: “Go ɛn go rɛst. Yu go tinap na di ples we dɛn dɔn kip fɔ yu we di tɛm kam we ɔltin fɔ dɔn.” (Daniɛl 12:13) Jizɔs bin tɔk bɔt dis tɔpik to di Sadyusi dɛn. Di Sadyusi dɛn na bin di Ju pipul dɛn lida dɛn we nɔ bin biliv se di wan dɛn we dɔn day go gɛt layf bak. Jizɔs bin tɛl dɛn se: “Una dɔn mistek bad, bikɔs una nɔ no wetin rayt na Gɔd in Buk, ɛn una nɔ no Gɔd in pawa.” (Matyu 22:23, 29) Di apɔsul Pɔl bin se: “A biliv . . . se Gɔd go mek ɔlman, gud ɔ bad, rayz frɔm dɛn grev.”—Di Apɔsul Dɛn Wok [Akt] 24:15.
USTƐM DI WAN DƐN WE DƆN DAY GO GƐT LAYF BAK?
Ustɛm di wan dɛn we de du wetin gud ɛn di wan dɛn we de du wetin bad go gɛt layf bak? Di enjɛl bin tɛl Daniɛl se i go gɛt layf bak “we di tɛm kam we ɔltin fɔ dɔn.” Mata insɛf bin biliv se in brɔda we na Lazarɔs, “go rayz frɔm in grev di las de we ɔlman go rayz frɔm dɛn grev.”—Jɔn 11:24.
Di Baybul se dis “las de” min di tɛm we Krays de rul na in Kiŋdɔm. Pɔl bin rayt se: “Krays mɔs rul te Gɔd put ɔltin we nɔ de fɔ am, ɔnda in fut. Di las tin we Gɔd go pwɛl na day.” (Fɔs Lɛta Fɔ Kɔrint 15:25, 26) Dis na gud gud rizin fɔ mek wi pre fɔ mek Gɔd in Kiŋdɔm kam ɛn fɔ mek wetin Gɔd want, bi na dis wɔl. *
Job bin no se Gɔd want fɔ gi layf bak to di wan dɛn we dɔn day. We da tɛm de kam, day nɔ go gɛt pawa fɔ du ɛnibɔdi ɛnitin. Ɛn nɔbɔdi nɔ go tink bɔt dis kwɛstyɔn we se, ‘We pɔsin day, ɔltin dɔn dɔn?’
^ par. 8 Di Grik wɔd we dɛn bin de yuz fɔ “bɛringrɔn” min “say we pɔsin de slip.”
^ par. 18 Fɔ no mɔ bɔt Gɔd in Kiŋdɔm, na fɔ rid chapta 8 na wan buk we dɛn kɔl Wetin Rili di Baybul De Tich? Na Jiova Witnɛs dɛn mek am. I de na www.pr418.com.
