1, 2. Aw di wach we Jiova de wach wi difrɛn frɔm di wach we kamɛra kin wach pipul dɛn?

BƆKU kɔntri dɛn de yuz kamɛra fɔ wach motoka dɛn we de pas na strit ɛn fɔ si aw aksidɛnt dɛn kin apin. We sɔm pipul dɛn kin kɔz aksidɛnt, dɛn kin rɔnawe. Bɔt if di kamɛra si di pɔsin, i kin ɛp di polis dɛn fɔ arɛst di drayva we rɔnawe. Bikɔs kamɛra dɛn kin de ɔlsay, dat dɔn mek polis dɛn ebul fɔ kech di wan dɛn we kin brok lɔ.

² Yu tink se di we aw bɔku kɔntri dɛn de yuz kamɛra, fɔ mek wi mɛmba di we aw Jiova de wach wi? Di Baybul se Jiova “de si ɔlsay.” (Prɔv. 15:3) Fɔ se dis min se i de wach wi ɔltɛm jɔs fɔ si if wi nɔ de obe in lɔ dɛn? Yu tink se Gɔd jɔs de wach wi nɔmɔ fɔ mek i pɔnish wi if wi nɔ obe am? (Jɛr. 16:17; Ibru 4:13) Nɔto so i bi atɔl! Wan men rizin we mek Jiova de wach wi, na bikɔs i lɛk wi ɔl ɛn i bisin bɔt wi.—1 Pit. 3:12.

3. Us fayv we dɛn wi de kam tɔk bɔt we de sho se Gɔd lɛk wi?

³ Wetin go ɛp wi fɔ gladi fɔ di wach we Gɔd de wach wi bikɔs i lɛk wi? Wan tin we go ɛp wi na we wi tɔk bɔt di  difrɛn difrɛn we dɛn aw i kin du dis. (1) Na bay we i de wɔn wi we wi want fɔ du bad, (2) na bay we i kin kɔrɛkt wi we wi kin dɔn put wi an pan bad tin, (3) na bay we i de advays wi wit in Wɔd, di Baybul, (4) na bay we i de ɛp wi we wi gɛt difrɛn prɔblɛm dɛn, ɛn (5) na bay we i de blɛs wi we wi du wetin i want.

4. Wetin mek Jiova bin wɔn Ken se ‘sin de na in domɔt’?

⁴ Fɔs, lɛ wi tɔk bɔt aw Gɔd de wɔn wi we wi want fɔ du bad. (1 Kro. 28:9) Fɔ ɛp wi fɔ gladi fɔ di we aw Gɔd de wach wi, lɛ wi tɔk bɔt wetin Gɔd bin tɛl Ken, we i bin “vɛks bad bad wan” bikɔs Gɔd nɔ bin gladi fɔ am. (Rid Jɛnɛsis 4:3-7.) Jiova bin ɛnkɔrej Ken fɔ “du wetin rayt.” Bɔt Jiova bin wɔn am se if i nɔ du wetin rayt, sin ‘de na in domɔt de wet fɔ am.’ Gɔd tɛl am se: “Yu fɔ tray nɔ fɔ kɔmit sin.” Gɔd bin want mek Ken lisin to di wɔn we i de wɔn am so dat i go ‘tek in sakrifays.’ If Ken bin lisin to Gɔd, i bin fɔ kɔntinyu fɔ bi Gɔd in padi.

5. Us we dɛn Jiova de yuz fɔ wɔn wi?

⁵ Yu tink se Gɔd de wach wi tide? Jiova de si rayt insay wi at, so wi nɔ go ebul ayd wetin wi de tink ɛn wetin wi want fɔ du. Wi Papa na ɛvin, lɛk wi ɛn i want mek wi du wetin rayt; bɔt i nɔ de fos wi fɔ chenj wi we. I de yuz in Wɔd, di Baybul, fɔ wɔn wi we wi want fɔ du sɔntin we nɔ rayt. Aw i kin du dis? We wi kin rid di Baybul ɛvride, wi kin kam fɔ lan tin dɛn we kin ɛp wi fɔ chenj di bad we aw wi de tink ɛn bigin fɔ tink di rayt we. Pantap dat, di buk ɛn magazin dɛn we wi kin gɛt kin tɔk bɔt di bad abit dɛn we wi dɔn de tray fɔ lɛf ɛn dɛn kin sho wi aw wi go ebul fɔ lɛf dɛn bad abit dɛn de. Ɛn we wi kin go mitin, wi kin gɛt advays di rayt tɛm we wi nid am!

6, 7. (a) Wetin sho se Jiova kia fɔ yu? (b) Aw yu go bɛnifit frɔm di kia we Jiova de kia fɔ yu?

⁶ Ɔl dɛn we ya we Jiova de yuz fɔ wɔn wi, de sho se i rili lɛk wi, i de wach wi, ɛn i de kia fɔ wi. Na tru se, di Baybul dɔn de fɔ lɔng lɔng tɛm naw, ɛn di buk ɛn magazin dɛn we Gɔd in ɔganayzeshɔn de rayt, na fɔ bɔku bɔku pipul dɛn, ɛn di advays we wi de gɛt na di mitin dɛn, na fɔ ɔlman na di kɔngrigeshɔn. Bɔt pan ɔl dat, Jiova de stil yuz di Baybul fɔ ɛp yu fɔ tink di rayt we. So dis de sho se Jiova rili lɛk yu ɛn i kia fɔ yu.

⁷ Fɔ mek wi bɛnifit frɔm di wɔnin dɛn we Gɔd de gi wi, wi fɔ biliv se Gɔd rili bisin bɔt wi. Dɔn, wi fɔ du wetin di Baybul se, ɛn tray tranga wan fɔ pul ɛni bad tin na wi at we Gɔd nɔ lɛk. (Rid Ayzaya 55:6, 7.) If wi lisin to di advays dɛn we Gɔd de gi wi, wi nɔ go gɛt bɔku pwɛl at. Bɔt aw wi Papa we de na ɛvin, go ɛp wi if wi du bad tin?

8, 9. We pɔsin yuz di Baybul fɔ advays wi, aw dis de sho se Jiova kia bɔt wi? Gi wan ɛgzampul.

⁸ Di tɛm mɔ we wi kin no se Jiova kia fɔ wi, na we i kɔrɛkt wi. (Rid Di Ibru Pipul Dɛn 12:5, 6.) Na tru se, wi nɔ kin gladi we dɛn de kɔrɛkt wi. (Ibru 12:11) Bɔt we sɔmbɔdi gi wi advays frɔm di Baybul, i fayn fɔ mek wi tray fɔ ɔndastand wetin mek i gi wi di advays. I nɔ gi wi di advays bikɔs i want fɔ mek wi fil bad, bɔt na bikɔs i si se wi padi biznɛs wit Jiova Gɔd want fɔ pwɛl. Ɛn i rɛdi fɔ yuz in tɛm fɔ sho wi frɔm di Baybul aw wi go chenj wi we so dat  Jiova go gladi fɔ wi. Dɛn advays ya kɔmɔt frɔm Jiova, ɛn i bisin bɔt wi pas ɛnibɔdi we wi kin tink bɔt.

⁹ Lɛ wi tɔk bɔt wan ɛgzampul we de sho aw pɔsin we de gi advays kin falamakata di we aw Gɔd bisin bɔt wi. Bifo wan brɔda bin lan bɔt Jiova, i bin de wach dɛn rud rud pikchɔ dɛn ɔltɛm. We i lan bɔt Jiova, i bin ebul fɔ lɛf da abit de. Bɔt wan wan tɛm, i bin de tink smɔl smɔl bɔt dɛn tin dɛn de. We i bay nyu fon, i bigin dis bad abit bak. (Jems 1:14, 15) I bin de yuz di fon fɔ go na dɛn Intanɛt wɛbsayt dɛn usay rud rud pikchɔ dɛn de. Wan de, we in ɛn wan ɛlda bin de yuz fon fɔ prich, i gi di ɛlda in fon fɔ mek i fɛn sɔm adrɛs dɛn. We di ɛlda bigin yuz di fon, i si sɔm wɛbsayt dɛn we de sho rud rud pikchɔ dɛn. I bin bɛtɛ we di ɛlda si di kayn wɛbsayt dɛn we di brɔda bin de luk. Di ɛlda bin advays am wantɛm wantɛm. Di brɔda bin lisin to di advays, ɛn dat bin ɛp am fɔ lɛf dis bad abit. Wi gladi we wi Papa na ɛvin, kin si di sin dɛn we wi kin du na kɔna, ɛn kɔrɛkt wi bifo wi go tu fa!

10, 11. (a) Aw wi go luk to Gɔd fɔ sho wi wetin fɔ du? (b) Aw wan famili bin kam fɔ no se i mek sɛns fɔ du wetin Jiova want?

¹⁰ Wan pan di man dɛn we rayt di Sam buk, bin tɛl Jiova se: “Yu de sho mi usay a fɔ go.” (Sam 73:24) Ɛnitɛm we wi want fɔ mek Jiova ‘put an pan ɔl wetin wi de du,’ wi fɔ luk insay in Wɔd, di Baybul fɔ si aw i tink bɔt wetin wi want fɔ du. We wi du wetin di Baybul se, wi go kɔntinyu fɔ bi Jiova in padi ɛn gɛt di tin dɛn we wi nid.—Prɔv. 3:6.

¹¹ Wan ɛgzampul we de sho aw Jiova dɔn ɛp pipul dɛn, na bɔt wan brɔda na wan kɔntri we dɛn kɔl Filipins, we bin rɛnt land fɔ mek fam. In ɛn in wɛf na bin rɛgyula payɔnia dɛn, pan ɔl we dɛn bin gɛt bɔku pikin dɛn. Wan de, dɛn bin sɔprayz we dɛn lanlɔd gi dɛn notis. Wetin mek i gi dis famili notis? Na bikɔs pipul dɛn bin lay pan dɛn se dɛn du bad tin. Pan ɔl we di brɔda bin de wɔri bɔt usay i go fɛn ples fɔ in famili, i se: “Jiova go ɛp wi. I kin gi wi wetin wi nid ɔltɛm, ilɛk wetin apin.” Di brɔda  bin rili biliv se Jiova go ɛp am ɛn Jiova bin ɛp am. Afta sɔm dez, di lanlɔd bin tɛl dɛn se mek dɛn kɔntinyu fɔ yuz di land fɔ mek fam. Wetin mek i tɛl dɛn so? Di lanlɔd bin kam si se pan ɔl we pipul dɛn bin dɔn lay pan dis famili, di famili bin stil de du wetin di Baybul se, ɛn dɛn bin kɔntinyu fɔ sho rɛspɛkt ɛn dɛn nɔ bin mek plaba wit ɛnibɔdi. Di lanlɔd bin so sɔprayz dat, i gi dɛn mɔ land fɔ mek dɛn plant. (Rid Pita In Fɔs Lɛta 2:12.) Dis de sho wi klia wan se Jiova de yuz in Wɔd, di Baybul fɔ ɛp wi fɔ bia wit wi prɔblɛm dɛn.

12, 13. Wetin kin mek pɔsin bigin tink if Gɔd rili de si di bad tin dɛn we de apin to am?

¹² Sɔntɛnde, wi kin gɛt prɔblɛm we kin mɔna wi fɔ lɔng tɛm. Sɔntɛm wi gɛt sik we dɔn te pan wi, ɔ wi famili de mɔna wi we wi de sav Jiova, ɔ ɔda pipul dɛn de mek wi sɔfa ɔltɛm bikɔs wi de du wetin Jiova want. Wan ɔda tin we kin mɔna wi na we wi gɛt siriɔs prɔblɛm wit ɔda pɔsin na di kɔngrigeshɔn.

¹³ Fɔ ɛgzampul, yu go vɛks we sɔmbɔdi se sɔntin to yu we yu tink se bad. Yu go ivin tɔk se: ‘Dis nɔ fɔ apin na Gɔd in ɔganayzeshɔn!’ Bɔt di brɔda we se dis tin to yu de du spɛshal wok dɛn na di kɔngrigeshɔn ɛn ɔda pipul dɛn de tink se in na gud pɔsin. Yu go de tink se, ‘Wetin mek dis fɔ bi? Fɔ se Jiova nɔ de si? Fɔ se i nɔ go du ɛnitin?’—Sam 13:1, 2; Abak. 1:2, 3.

14. Wetin kin bi wan rizin we mek Gɔd nɔ kin sɔlv sɔm prɔblɛm dɛn we wi kin gɛt wit wi brɔda dɛn?

¹⁴ Jiova go mɔs gɛt gud rizin we mek i nɔ de du natin bɔt di prɔblɛm we yu gɛt. Fɔ ɛgzampul, we yu go de fil se di ɔda pɔsin na in dɔn du bad to yu, Gɔd in no se na yu dɔn du mɔ bad. Infakt, di tɔk we yu go de tink se na bad tɔk, kin bi se na advays we yu rili nid ɛn we yu fɔ tink bɔt. Wan brɔda we nem Kal Klayn, we bin de na di Gɔvnin Bɔdi, bin rayt bɔt insɛf. I bin tɔk bɔt wan tɛm we Brɔda J. F. Rutafɔd bin tɛl am tru wɔd. Leta, Brɔda Rutafɔd bin grit Brɔda Klayn fayn fayn wan, bɔt Brɔda Klayn in at bin stil wam, so i nɔ bin grit Brɔda Rutafɔd fayn. We Brɔda Rutafɔd bin si se Brɔda Klayn de kip grɔj na in at fɔ am, i wɔn Brɔda Klayn se mek i tek tɛm mek i nɔ fɔdɔm na Setan in trap. Leta, Brɔda Klayn bin rayt se: “We wi kip grɔj na wi at fɔ wi brɔda, mɔ we i bi se i tɔk sɔntin we i gɛt rayt fɔ tɔk bikɔs na in wok i de du, wi de gi Setan chans fɔ ebul wi.” *

15. Wetin go ɛp yu fɔ peshɛnt we yu de wet fɔ mek Jiova ɛp yu wit yu prɔblɛm?

¹⁵ Bɔt stil, wi nɔ kin ebul fɔ bia we i tan lɛk se wi prɔblɛm nɔ de dɔn. Aw wi go ebul bia? Lɛ wi se yu de drayv na wan aywe ɛn yu go mitɔp trafik. Yu nɔ no ustɛm di trafik go klia. If yu vɛks ɛn tray fɔ fɛn ɔda rod, sɔntɛm yu go lɔs ɔ yu go tek lɔng tɛm fɔ rich usay yu de go, pas if yu bin peshɛnt na di trafik. Na di sem tin kin apin we wi gɛt prɔblɛm. If wi peshɛnt ɛn kɔntinyu fɔ du wetin Gɔd in Wɔd se, Jiova go ɛp wi.

16. Wetin na wan ɔda rizin we mek Jiova nɔ kin sɔlv ɔl di prɔblɛm dɛn we wi kin gɛt?

¹⁶ Jiova kin alaw sɔm prɔblɛm dɛn fɔ mit wi, bikɔs i want mek wi lan impɔtant tin dɛn we go ɛp wi. (Rid Pita  In Fɔs Lɛta 5:6-10, NW.) Mɛmba se nɔto Gɔd de mek wi de sɔfa. (Jems 1:13) Na Setan de mek wi de sɔfa. Bɔt Gɔd kin yuz di prɔblɛm dɛn we wi gɛt, fɔ mek wi padi biznɛs wit am tayt mɔ ɛn mɔ. I de si we wi de sɔfa, ɛn “bikɔs i bisin” bɔt wi, i go mek shɔ se wi nɔ sɔfa fɔ lɔng tɛm. Yu gladi we Jiova de wach yu ɛn kia fɔ yu we yu gɛt prɔblɛm? Yu biliv se i go ɛp yu pan yu prɔblɛm?—2 Kɔr. 4:7-9.

17. Udat dɛn Jiova de luk fɔ? Wetin mek i de luk fɔ dɛn?

¹⁷ Jiova de luk ɔlman in at fɔ si udat rili lɛk am. Jiova bin yuz wan prɔfɛt we nem Anani, fɔ tɛl Kiŋ Esa se, ‘PAPA GƆD in yay de ɔlsay na di wanol wɔl, fɔ sho in pawa fɔseka di wan dɛn we dɛn at klin fɔ am.’ (2 Kro. 16:9) Gɔd go “sho in pawa” fɔ ɛp yu if yu kɔntinyu fɔ du wetin i want.

18. We yu fil se nɔbɔdi nɔ de si di gud tin dɛn we yu de du, wetin yu fɔ mɛmba bɔt Jiova? (Luk di pikchɔ nia dis atikul in taytul.)

¹⁸ Gɔd want mek wi luk fɔ wetin gud, “lɛk ɛnitin we gud,” ɛn “du gud” so dat i go “sɔri” fɔ wi. (Na wi mek am italiks; Lɛta Fɔ Rom 12:9; Emɔs 5:14, 15; 1 Pit. 3:11, 12) Jiova de blɛs di wan dɛn we de du wetin i want, ilɛksɛf nɔbɔdi nɔ de si di gud tin dɛn we dɛn de du. (Sam 34:15) Fɔ ɛgzampul, tink bɔt di Ibru uman dɛn we nem Shifra ɛn Pua we bin de ɛp di Izrɛlayt uman dɛn fɔ bɔn. We di Izrɛlayt dɛn bin de as slev na Ijipt, Fɛro bin tɛl Shifra ɛn Pua fɔ kil ɔl di bɔy pikin dɛn we di Izrɛlayt uman dɛn de bɔn. Bɔt Shifra ɛn Pua bin de fred Gɔd pas Fɛro. So dɛn kɔnshɛns nɔ bin alaw dɛn fɔ kil di Izrɛlayt dɛn bɔy pikin dɛn. Leta, Jiova bin gi Shifra ɛn Pua dɛn yon famili. (Ɛks. 1:15-17, 20, 21) Jiova bin si wetin dɛn uman ya du. Sɔntɛnde, wi kin fil se nɔbɔdi nɔ de si di gud tin dɛn we wi de du. Bɔt Jiova in de si di gud tin dɛn we wi de du. I no ɔl di gud tin dɛn we wi dɔn du, ɛn i go blɛs wi fɔ dɛn.—Mat. 6:4, 6; 1 Tim. 5:25; Ibru 6:10.

19. Aw wan sista bin kam fɔ no se Jiova de si di gud tin dɛn we wi de du?

¹⁹ Wan sista we bin de na wan kɔntri we dɛn kɔl Ɔstria bin kam fɔ no se Jiova de si di gud wok we i de du. Bikɔs in na bin Ɔŋgerian, dɛn bin gi am adrɛs fɔ fɛn wan Ɔŋgerian uman. Wantɛm wantɛm, i go na di ples, bɔt nɔbɔdi nɔ bin de na di os. I go de bak plɛnti plɛnti tɛm. Sɔntɛnde, i bin no se pɔsin de insay di os, bɔt nɔbɔdi nɔ bin de ansa. I bin de lɛf magazin dɛn, rayt lɛta dɛn to di uman, lɛf in adrɛs, fon nɔmba, ɛn ɔda tin dɛn. Afta di sista dɔn go de plɛnti plɛnti tɛm fɔ wan ɛn af ia, di uman bin opin in domɔt! Di uman bin grit di sista fayn fayn wan ɛn tɛl am se: “Duya kam insay. A bin de rid ɔltin we yu bin de lɛf na mi domɔt ɛn a bin de wet fɔ yu.” Di uman tɛl di sista se i bin de tek wan tritmɛnt we dɛn kɔl kɛmotɛrapi ɛn i nɔ bin de fil fɔ tɔk to pipul dɛn. In ɛn di sista bin bigin fɔ stɔdi di Baybul. Wi si se Gɔd blɛs dis sista bikɔs i bin tray tranga wan fɔ du dis gud wok!

20. Aw yu de fil we Jiova de wach ɛn kia fɔ yu?

²⁰ Jiova de si ɛnitin we yu de du, ɛn i go blɛs yu if yu de du di rayt tin. We Gɔd de wach yu, nɔ fil se i de wach yu lɛk dɛn kamɛra dɛn we de wach fɔ pɔsin we de du bad tin. Bɔt Gɔd de wach yu bikɔs i lɛk yu ɛn i rili bisin bɔt yu. So i go fayn mek yu kam nia am mɔ ɛn mɔ!