1, 2. (a) Us ɔda lɔ Jizɔs bin se impɔtant? (b) Us kwɛstyɔn dɛn wi de kam tɔk bɔt?

FƆ TƐST Jizɔs, wan Faresi bin aks am se: “Ticha, us lɔ pas ɔl di ɔda lɔ dɛn?” As wi bin lan insay di las atikul, Jizɔs bin ansa am se: “Yu fɔ lɛk . . . Gɔd wit ɔl yu at, wit ɔl yu layf ɛn wit ɔl yu maynd. Dis na di lɔ we pas ɔl di ɔda wan dɛn. Di ɔda lɔ we impɔtant nain dis: ‘Yu fɔ lɛk yu kɔmpin mɔtalman lɛkɛ aw yu lɛk yusɛf.’”—Mat. 22:34-39.

² Jizɔs bin se wi fɔ lɛk wi kɔmpin mɔtalman lɛk aw wi lɛk wisɛf. So i go fayn mek wi aks wisɛf dɛn kwɛstyɔn ya: Wetin i min fɔ lɛk wi kɔmpin mɔtalman? Aw wi go sho se wi lɛk wi kɔmpin mɔtalman?

3, 4. (a) Us stori Jizɔs bin pul fɔ sho wi wetin i min fɔ lɛk wi kɔmpin mɔtalman? (b) Aw da Samɛritan bin ɛp da man we tifman dɛn bin dɔn tif ɛn bit te i want day? (Luk di pikchɔ nia dis atikul in taytul.)

³ Wan tɛm, wan man we biliv se i de waka tret wit Gɔd, bin aks Jizɔs wan kwɛstyɔn. I bin aks am se: “Udat na mi neba?” Fɔ ansa di man, Jizɔs pul wan stori bɔt wan gud  Samɛritan. (Rid Lyuk 10:29-37.) Wi go de fil se di prist ɛn di Livayt fɔ du wetin ɛni gud mɔtalman go du we dɛn si sɔmbɔdi we tifman dɛn dɔn tif ɛn bit te i want day. Bɔt yu no wetin dɛn du? Dɛn nɔ ɛp di man, bifo dat, dɛn pas am ɛn go dɛn we. Na wan Samɛritan bin kam ɛp dis man. Di Samɛritan dɛn bin rɛspɛkt di Lɔ we Gɔd gi Mozis, bɔt di Ju pipul dɛn nɔ bin lɛk di Samɛritan dɛn atɔl.—Jɔn 4:9.

⁴ Di gud Samɛritan bin put ɔyl ɛn wayn na di man in wund dɛn so dat dɛn go wɛl. Dɔn, i kɛr di man go na wan say usay pipul dɛn kin slip we dɛn de travul, ɛn i gi tu dinaray to di pɔsin we de kia fɔ di ples. Tu dinaray na bin di mɔni we dɛn bin de pe pɔsin we i wok fɔ tu dez. (Mat. 20:2) Insay dis stori, Jizɔs ɛp wi fɔ no se wi fɔ si wi kɔmpin mɔtalman lɛk wi neba, i nɔ mata us kɔntri i kɔmɔt ɔ uskayn kɔlchɔ i gɛt. Wi go tan lɛk neba to dɛn if wi lɛk dɛn ɛn gɛt sɔri-at fɔ dɛn.

5. Aw Jiova in pipul dɛn bin sho se dɛn lɛk dɛn kɔmpin mɔtalman we ebi ebi briz ɛn ren bin kam na wan say na Nyu Yɔk?

⁵ I nɔ izi fɔ si pipul dɛn we gɛt sɔri-at lɛk da gud Samɛritan, mɔ so we di wɔl want dɔn. Bɔku pipul dɛn nɔ lɛk fɔ du gud, dɛn kin wayl, ɛn dɛn nɔ gɛt sɔri-at. (2 Tim. 3:1-3) Fɔ ɛgzampul, insay Ɔktoba 2012, ebi ebi briz ɛn ren bin pwɛl wan say na Nyu Yɔk. Dis bin mek layt ɛn ɔda tin dɛn we pipul dɛn kin nid, nɔ de. Yu nɔ go biliv se pipul dɛn bigin tif di wan dɛn we dis bad tin bin apin to. Bɔt Jiova Witnɛs dɛn bin difrɛn; dɛn ɔganayz dɛnsɛf fɔ ɛp dɛn brɔda dɛn ɛn ɔda pipul dɛn. Dɛn du dis bikɔs tru Kristian dɛn lɛk dɛn kɔmpin mɔtalman. Us ɔda we dɛn de we pɔsin go sho se i lɛk in kɔmpin mɔtalman?

6. Aw wi go yuz di Baybul fɔ ɛp wi kɔmpin mɔtalman?

⁶ Yuz di Baybul fɔ ɛp pipul dɛn. Wi kin du dis bay we wi de tray tranga wan fɔ “kɔrej” pipul dɛn wit di tin dɛn we de na di Baybul. (Rom 15:4) Wi de sho se wi lɛk wi kɔmpin mɔtalman we wi de tɛl dɛn di tru tin dɛn we de na di Baybul. (Mat. 24:14) Na big big ɔnɔ wi gɛt fɔ tɛl pipul dɛn di mɛsej we kɔmɔt frɔm Gɔd we de gi “kol at”!—Rom 15:13.

7. Aw Jizɔs bin se wi fɔ trit ɔda pipul dɛn? Us blɛsin wi go gɛt if wi du wetin Jizɔs se?

⁷ Trit ɔda pipul dɛn di we aw yu go want mek dɛn trit yu. Jizɔs bin se: “Dɛn tin we una want mek ɔda pipul du to una, nain una fɔ du to dɛn. Na dat di Lɔ we Gɔd gi Mozis ɛn dɛn prɔfɛt se.” (Mat. 7:12) We wi trit ɔda pipul dɛn di we aw Jizɔs se wi fɔ trit dɛn, dat de sho se wi de du ɔl wetin de na “di Lɔ we Gɔd gi Mozis” (dat na frɔm Jɛnɛsis to Ditarɔnɔmi) ɛn “dɛn prɔfɛt” dɛn (dat na frɔm Ayzaya to Malakay). Dɛn tin ya we dɛn rayt, de sho klia wan se Gɔd de blɛs di wan dɛn we lɛk dɛn kɔmpin mɔtalman. Fɔ ɛgzampul, Jiova bin tɛl Ayzaya fɔ rayt se wi fɔ “trit ɔlman di sem ɔltɛm ɛn waka tret na [in] yay . . . Di man we de du dis go gɛt blɛsin.” (Ayz. 56:1, 2) Gɔd go blɛs wi, if wi lɛk wi kɔmpin mɔtalman ɛn trit dɛn di we aw wi go want mek dɛn trit wi.

8. Wetin mek wi fɔ lɛk di wan dɛn we et wi? Wetin go apin if wi du so?

⁸ Lɛk di wan dɛn we et yu. Jizɔs bin se: “Una yɛri we dɛn bin se, ‘Una fɔ lɛk una padi dɛn, ɛn et dɛn wan we nɔ lɛk una.’ Bɔt mi de tɛl una se: una fɔ lɛk dɛn pipul we nɔ lɛk una, ɛn una fɔ pre fɔ dɛn pipul we de mek una sɔfa, so dat una go bi una Papa, we de na ɛvin, in pikin dɛn.”  (Mat. 5:43-45) Di apɔsul Pɔl bin tɔk di sem tin we i rayt se: “If pɔsin we nɔ lɛk una, aŋri, una fɔ gi am tin fɔ it; if i tɔsti, una fɔ gi am tin fɔ drink.” (Rom 12:20; Prɔv. 25:21) Di Lɔ we Gɔd bin gi Mozis bin se if wi si pɔsin we nɔ lɛk wi, in animal fɔdɔm na grɔn wit di lod we i tot, wi fɔ ɛp di animal fɔ grap. (Ɛks. 23:4, 5) We wi de ɛp di wan dɛn we nɔ lɛk wi, sɔntɛm wi ɛn dɛn go bi padi bak. Bikɔs wi de sho lɔv to di wan dɛn we nɔ lɛk wi, dat dɔn mek bɔku pan dɛn dɔn lɛf fɔ du wi bad. Sɔm kin ivin kam fɔ sav Jiova!

9. If wi ɛn wi brɔda dɛn mek plaba, wetin Jizɔs se wi fɔ du?

⁹ “Una tray mek una nɔ mek plaba wit ɛnibɔdi.” (Ibru 12:14) Nɔto ɔda pipul dɛn nɔmɔ wi nɔ fɔ mek plaba; wi nɔ fɔ ivin mek plaba wit wi brɔda ɛn sista dɛn, bikɔs Jizɔs bin se: “If yu de mek yu sakrifays na Gɔd in Os, ɛn yu mɛmba se yu brɔda vɛks pan yu, yu fɔ lɛf yu sakrifays na Gɔd in Os, ɛn go to yu brɔda wantɛm, mek una go tɔk di plaba fayn fayn. Wɛn yu dɔn du dat, kam bak na Gɔd in Os ɛn mek yu sakrifays.” (Mat. 5:23, 24) Gɔd go blɛs wi we wi de sho se wi lɛk wi brɔda dɛn ɛn mek pis wit dɛn kwik kwik wan.

10. Wetin mek wi nɔ fɔ de luk fɔ pipul dɛn mistek?

¹⁰ Nɔ luk fɔ pipul dɛn mistek. Jizɔs bin se: “Una nɔ jɔj ɔda pipul, so dat Gɔd nɔ go jɔj una. Aw una jɔj ɔda pipul, na di sem we Gɔd go jɔj unasɛf. Wetin du yu de luk di smɔl tik we de insay yu brɔda in yay, wɛn yu gɛt big bod insay yu yon yay? Aw yu go tɛl yu brɔda se, ‘Bo, mek a pul da smɔl tik de na yu yay,’ wɛn yu gɛt big wan na yu yon yay? Yu ipokrit! Yu pul da big tik we de insay yu yon yay fɔs, da tɛm de yu go si klia wan fɔ pul di smɔl tik we de insay yu brɔda in yay.” (Mat. 7:1-5) Dis na fayn we fɔ tɛl wi se wi nɔ fɔ tɔk bad bɔt ɔda pipul dɛn we dɛn mek smɔl mistek ɛn fɔgɛt se wi de mek big big mistek dɛn.

11, 12. Wetin na di bɛst we fɔ sho se wi lɛk wi kɔmpin mɔtalman?

¹¹ Bɔku we dɛn de we wi go sho se wi lɛk wi kɔmpin mɔtalman. Bɔt Jizɔs bin se di bɛst we fɔ sho se wi lɛk wi kɔmpin mɔtalman na we wi prich di gud nyus bɔt  Gɔd in Kiŋdɔm to dɛn. (Lyuk 8:1) Jizɔs bin tɛl in disaypul dɛn se: “Una go ɔlɔbɔt na di wɔl ɛn mek di pipul dɛn bi mi lanin bɔy dɛn.” (Mat. 28:19, 20) We wi du wetin Jizɔs se, wi de ɛp wi kɔmpin mɔtalman dɛn fɔ kɔmɔt na di big rod we go mek dɛn day ɛn kam na di smɔl rod we go mek dɛn gɛt layf we go de sote go. (Lyuk 13:24) Wi no se Jiova go blɛs wi we wi nɔ taya fɔ ɛp wi kɔmpin mɔtalman dɛn fɔ no bɔt am.

¹² Jizɔs bin ɛp bɔku pipul dɛn fɔ no se dɛn rili nid fɔ no bɔt Jiova. (Mat. 5:3) Wi de falamakata Jizɔs we wi tɛl pipul dɛn ‘di Gud Nyuz we Gɔd gɛt fɔ dɛn.’ (Rom 1:1) Wi kin tich dɛn fɔ no se na di day we Jizɔs day fɔ mɔtalman na in dɔn mek dɛn gɛt di chans fɔ bi Jiova in padi. (2 Kɔr. 5:18, 19) Fɔ prich di gud nyus na wan impɔtant we fɔ sho se wi rili lɛk wi kɔmpin mɔtalman.

13. Aw yu fil bɔt di wok we wi gɛt fɔ tɛl pipul dɛn bɔt di gud nyus?

¹³ We wi rɛdi wisɛf bifo wi go to di wan dɛn we wi bin dɔn prich to ɛn wi Baybul stɔdi dɛn, wi go ebul fɔ ɛp dɛn fɔ du wetin Gɔd want ɛn chenj di we aw dɛn de liv dɛn layf. (1 Kɔr. 6:9-11) Wi kin gladi we wi de si aw Gɔd de ɛp di wan dɛn we rili want fɔ du wetin i want. I kin ɛp dɛn fɔ chenj di we aw dɛn de liv dɛn layf ɛn bi in padi. (Akt 13:48, NW) We pipul dɛn we nɔ gɛt op kin stɔdi di Baybul, dɛn kin gladi. Dɛn nɔ kin wɔri tumɔs igen bikɔs dɛn abop pan Jiova. I kin fayn fɔ si we dɛn nyu wan ya de go bifo pan Gɔd biznɛs! Yu nɔ tink se na big big blɛsin wi go gɛt we wi de prich di gud nyus to wi kɔmpin mɔtalman dɛn?

14. Wetin Fɔs Lɛta Fɔ Kɔrint 13:4-8 tɔk bɔt lɔv?

¹⁴ Di apɔsul Pɔl tɔk bɔt aw lɔv tan lɛk. If wi du di tin dɛn we Pɔl tɔk bɔt, wi nɔ go gɛt bɔku prɔblɛm wit pipul dɛn, wi go gɛt gladi at, ɛn Gɔd go blɛs wi. (Rid Fɔs Lɛta Fɔ Kɔrint 13:4-8.) Lɛ wi tɔk smɔl bɔt wetin Pɔl bin se bɔt lɔv ɛn si aw wi go du wetin i se.

15. (a) Wetin mek wi fɔ bia ɛn gɛt gud at fɔ wi kɔmpin dɛn? (b) Wetin mek wi nɔ fɔ jɛlɔs ɛn bost?

¹⁵ Di Baybul se: “If una lɛk una kɔmpin mɔtalman una go de bia wit dɛn; una go gɛt gud at fɔ dɛn.” Pan ɔl we wi de sin, Gɔd de bia wit wi ɛn i gɛt gud at fɔ wi. So wisɛf fɔ de bia ɛn gɛt gud at fɔ wi kɔmpin dɛn we dɛn mek mistek ɔ tɔk sɔntin we dɛn nɔ tink bifo dɛn tɔk am, ɔ ivin we dɛn biev rud we to wi. Pɔl tɔk se if wi lɛk wi kɔmpin mɔtalman, wi “nɔ go de jɛlɔs” dɛn. Dis min se wi nɔ fɔ milɛ ɔda pɔsin in prɔpati ɔ in wok we i de du na di kɔngrigeshɔn. Apat frɔm dis, if wi gɛt lɔv, wi nɔ go de bost ɔ fil se wi bɛtɛ pas ɔda pipul dɛn. Di Baybul tɔk se: “Fɔ de kak ɛn de blɔf, na tin we bad pɔsin de du, ɛn dat na sin.”—Prɔv. 21:4.

16, 17. Aw wi go fala di advays we de na Fɔs Lɛta Fɔ Kɔrint 13:5, 6?

¹⁶ If wi lɛk wi kɔmpin mɔtalman, wi nɔ go du ɛnitin we go mek dɛn nɔ rɛspɛkt wi. Wi nɔ go lay to dɛn, tif dɛn prɔpati, ɔ du ɛnitin we go mek Jiova nɔ gladi fɔ wi. Lɔv go mek wi nɔ bisin bɔt wi yon biznɛs nɔmɔ, bifo dat, i go mek wi bisin bɔt ɔda pipul dɛn.—Fil. 2:4.

¹⁷ If wi lɛk wi kɔmpin mɔtalman fɔ tru, wi nɔ go de vɛks kwik ɛn ‘kip tin na wi at’ fɔ dɛn. Bikɔs dat go jɔs tan lɛk se wi de rayt di bad tin dɛn we dɛn de du to wi, na wan big buk. (1 Tɛs. 5:15) If wi de kip grɔj na wi at fɔ ɔda pipul dɛn, dat go mek wi at go de wam lɛk faya ɛn wi go de vɛks pan wisɛf ɛn ɔda pipul dɛn. Ɛn dis go mek Gɔd nɔ gladi fɔ wi. (Lɛv. 19:18) We wi gɛt lɔv, wi go gladi fɔ yɛri ɛnitin we na tru, bɔt wi nɔ go gladi fɔ “ɛnitin we nɔ rayt,”  ilɛksɛf di pɔsin we et wi de sɔfa ɔ dɛn de trit am bad.—Rid Prɔvabs 24:17, 18.

18. Wetin na di tin dɛn we wi lan bɔt lɔv na Fɔs Lɛta Fɔ Kɔrint 13:7, 8?

¹⁸ Mek wi tɔk bak bɔt di ɔda tin dɛn we Pɔl tɔk bɔt lɔv. Pɔl bin se lɔv go mek wi “ebul bia ɔltin.” If sɔmbɔdi du wi bad tin, bɔt i beg wi fɔ fɔgiv am, lɔv go mek wi fɔgiv am. If wi gɛt lɔv, wi go “biliv” ɔltin we de na Gɔd in Wɔd, ɛn wi go gladi fɔ di tich we Jiova in ɔganayzeshɔn de tich wi. Lɔv go mek wi “abop” pan ɔl di tin dɛn we de na di Baybul ɛn dis go mek wi tɛl ɔda pipul dɛn bɔt di tin dɛn we wi biliv. (1 Pit. 3:15) Ɛnitɛm we bad tin mit wi, wi fɔ pre ɛn op se ɔltin go fayn. Pɔl bin se lɔv go mek wi nɔ stɔp fɔ lɛk wi kɔmpin mɔtalman, ilɛksɛf dɛn du bad tin to wi. Pɔl tɔk bak se lɔv “go de sote go.” So dis min se di wan dɛn we de du wetin Jiova want go sho lɔv to dɛn kɔmpin mɔtalman sote go.

19, 20. Us advays na di Baybul go ɛp wi fɔ kɔntinyu fɔ sho se wi lɛk wi kɔmpin mɔtalman?

¹⁹ We wi de fala di advays dɛn we de na di Baybul, wi go kɔntinyu fɔ lɛk wi kɔmpin mɔtalman. Dis kayn lɔv go mek wi lɛk ɔlkayn pipul, nɔto jɔs di wan dɛn nɔmɔ we wi ɔl de tɔk di sem langwej ɔ de na di sem kɔntri. Wi fɔ mɛmba bak wetin Jizɔs bin tɔk, we i se: “Yu fɔ lɛk yu kɔmpin mɔtalman lɛkɛ aw yu lɛk yusɛf.” (Mat. 22:39) Papa Gɔd ɛn Jizɔs Krays want mek wi lɛk wi kɔmpin mɔtalman. So if wi nɔ shɔ bɔt wetin fɔ du we sɔntin apin bitwin wi ɛn wi kɔmpin mɔtalman, wi fɔ pre to Gɔd lɛ i gi wi in spirit fɔ ɛp wi fɔ no wetin fɔ du. We wi du dis, Jiova go gladi fɔ wi ɛn ɛp wi fɔ sho lɔv to ɔda pipul dɛn.—Rom 8:26, 27.

²⁰ I rili impɔtant fɔ mek wi lɛk wi kɔmpin mɔtalman lɛk aw wi lɛk wisɛf bikɔs na “Gɔd, we de rul wi,” na in gi wi dis lɔ. (Jems 2:8) Jiova bin gi di Izrɛlayt dɛn bɔku lɔ dɛn fɔ tich dɛn fɔ lɛk dɛn kɔmpin mɔtalman lɛk aw dɛn lɛk dɛnsɛf. Leta, Jiova bin tɛl Pɔl fɔ rayt se: “Ɔl dɛn lɔ ya ɛn ɛni ɔda wan dɛn de insay wan lɔ we se, ‘Una fɔ lɛk una kɔmpin mɔtalman lɛkɛ aw una lɛk unasɛf.’ Ɛnibɔdi we lɛk in kɔmpin mɔtalman, nɔ go du am bad. If ɛnibɔdi lɛk in kɔmpin mɔtalman, da pɔsin de dɔn du ɔl wetin ɔl di lɔ dɛn se.” (Rom 13:8-10) So wi fɔ kɔntinyu fɔ sho se wi lɛk wi kɔmpin mɔtalman.

21, 22. Wetin mek wi fɔ lɛk Gɔd ɛn wi kɔmpin mɔtalman?

²¹ As wi de tink bɔt wetin mek wi fɔ lɛk wi kɔmpin mɔtalman, i go fayn mek wi mɛmba wetin Jizɔs bin tɔk bɔt in Papa. I bin se in Papa “de mek di san shayn pan dɛn bad pipul ɛn pan dɛn gud wan. I de mek ren kam pan dɛn pipul we gud ɛn dɛn wan we bad.” (Mat. 5:43-45) So dis dɔn sho wi se wi fɔ sho lɔv to wi kɔmpin mɔtalman, ilɛksɛf dɛn de du wetin rayt ɔ dɛn nɔ de du wetin rayt. Frɔm wetin wi dɔn tɔk, wi si se di bɛst we fɔ sho se wi lɛk wi kɔmpin mɔtalman na we wi de prich di gud nyus bɔt Gɔd in Kiŋdɔm to dɛn. Bɔku blɛsin go de fɔ wi kɔmpin mɔtalman dɛn if dɛn lisin to di gud nyus ɛn du wetin dɛn de lan!

²² Wi dɔn si bɔku bɔku rizin dɛn we mek wi fɔ lɛk Jiova wit ɔl wi at, layf, ɛn maynd. Ɛn wi dɔn lan bak bɔt plɛnti we dɛn aw wi go sho se wi lɛk wi kɔmpin mɔtalman. If wi lɛk Gɔd ɛn wi kɔmpin mɔtalman, wi de sho se wi de obe di tu lɔ dɛn we impɔtant pas ɔl di ɔda lɔ dɛn. Pantap dat, wi go mek Jiova gladi.