“Tek Tɛm Plan Wetin Yu De Du” So Dat Yu Go Ebul fɔ Du Mɔ fɔ Jiova

PLE

WE GƆD in pipul dɛn bin de lɛf Babilɔn insay di ia 537 bifo Krays, Jiova nɔ bin want lɛ dɛn stren na di rod we dɛn de pas fɔ go na Jerusɛlɛm. So i tɛl dɛn se: “Rɛdi di rod fɔ di pipul dɛn; una bil di men rod, una bil am, klia di ston ston dɛm kɔmɔt pan am.” (Ayz. 62:10) Tink bɔt aw di Ju dɛn go dɔn du dis. Sɔm Ju pipul dɛn go dɔn go bifo fɔ go mek di rod, sɔntɛm dɛn bin put dɔti ɛn ston ston na di ol dɛn we de na di rod so dat di rod go fayn. Dis tin we dɛn bin du bin ɛp dɛn brɔda dɛn we dɛnsɛf bin de go na Jerusɛlɛm.

Dis ɛgzampul go ɛp wi fɔ no wetin fɔ du we wi dɔn plan fɔ du mɔ we wi de sav Jiova. Jiova nɔ want mek ɛnitin ambɔg in savant dɛn we go mek dɛn nɔ du di tin dɛn we dɛn dɔn plan fɔ du we dɛn de sav am. Di Baybul se: “Tek tɛm plan wetin yu de du, fɔ lɛ ɛnitin we yu de du go kɔmɔt fayn.” (Prɔv. 4:26) Dis advays go bɛnifit yu ilɛk yu na yɔŋ pɔsin ɔ big pɔsin.

DISAYD FƆ DU DI RAYT TIN WE GO ƐP YU FƆ DU WETIN YU DƆN PLAN

Yu go mɔs dɔn yɛri we pipul dɛn de tɔk se yɔŋ pipul dɛn gɛt chans fɔ mek am na layf. Yɔŋ pipul dɛn nɔ kin sik so nɔmɔ, dɛn kin tink fast, ɛn dɛn kin want fɔ go bifo na layf. Di Baybul se: “Wɛn man yɔŋ dɛn de kɔle pan am fɔ in trɛnk.” (Prɔv. 20:29) We yɔŋ pɔsin yuz in trɛnk ɛn wetin i sabi, fɔ sav Jiova, i go ebul du di tin dɛn we i bin dɔn plan fɔ du we i de sav Jiova ɛn rili gɛt gladi at.

Yu go dɔn si se pipul dɛn na di wɔl valyu yɔŋ pipul dɛn we de du wɛl. We yɔŋ Witnɛs dɛn de du wɛl na skul, dɛn ticha dɛn, dɛn kɔmpin dɛn na skul, ɛn ɔda pipul dɛn kin mɔna dɛn fɔ lan bɔku bɔku buk. Dɛn kin tɛl dɛn se na dis go mek dɛn go bifo na dis wɔl. Ɔ yɔŋ brɔda ɔ sista we gud pan spɔt go si se pipul dɛn we de pan spɔt biznɛs go want mek dɛn tek spɔt fɔ bi di men tin we dɛn fɔ du. Dɛn kayn tin ya dɔn mit yu, ɔ yu no sɔmbɔdi we dɛn de mɔna fɔ du dis kayn tin? Wetin go ɛp Kristian fɔ disayd fɔ du di rayt tin?

Di tin dɛn we de na di Baybul go ɛp wi fɔ waka di rayt we na layf. Ɛkliziastis 12:1 tɔk se: “Mɛmba PAPA GƆD we mek yu, naw we yu yɔŋ.” Wetin na di bɛst we aw yu ɔ ɛni ɔda yɔŋ pɔsin go ebul fɔ ‘mɛmba PAPA GƆD we mek una’?

Lɛ wi tink smɔl bɔt wetin bin apin to Ɛrik * we de na Wɛst Afrika. Ɛrik bin lɛk fɔ ple futbɔl. Bay di tɛm we i de rich 15 ia, dɛn dɔn pik am fɔ ple na di tim we de ple fɔ di kɔntri. Dis min se, sɔntɛm, dɛn gɛt fɔ sɛn am na Yurop fɔ tren am, ɛn dis go mek i sabi fɔ ple gud gud wan. Bɔt aw di advays we se wi fɔ ‘mɛmba PAPA GƆD we mek wi,’ bin ɛp am? Ɛn wetin na di lɛsin we yu ɔ ɛni ɔda yɔŋ pɔsin go lan frɔm Ɛrik in stori?

We Ɛrik bin de go skul, i bigin fɔ stɔdi di Baybul wit Jiova Witnɛs dɛn. As i de stɔdi, i kam lan se Gɔd gɛt fɔ sɔlv ɔl di prɔblɛm dɛn we de mit mɔtalman. So Ɛrik kam fɔ si se i rili impɔtant fɔ mek i yuz in tɛm ɛn trɛnk fɔ du wetin Gɔd want. Dis bin mek, Ɛrik disayd nɔ fɔ mek futbɔl bi di men tin na in layf. Bifo dat, i bin baptayz ɛn bigin fɔ du wɛl na di kɔngrigeshɔn. Afta sɔm tɛm, dɛn bin mek am ministerial savant ɛn leta, dɛn kɔl am fɔ go wan skul we nem Skul fɔ Brɔda dɛn we Nɔ Mared.

If Ɛrik bin put futbɔl fɔs na in layf, plɛnti pipul dɛn bin fɔ dɔn sabi am ɛn i bin fɔ dɔn gɛt bɔku bɔku mɔni. Bɔt Ɛrik bin mɛmba we di Baybul se: “We man gɛt mɔni, . . . i kin de fil se in mɔni na ɔltin.” (Prɔv. 18:11) Na tru se, bɔku jɛntriman dɛn kin tink se dɛn mɔni go mek prɔblɛm nɔ mit dɛn. Bɔt dat nɔto tru. Di wan dɛn we de rɔnata mɔni kin gɛt ‘bɔku waala ɛn pwɛl at.’—1 Tim. 6:9, 10.

Bɔku yɔŋ wan dɛn dɔn rili gɛt gladi at ɛn dɛn nɔ de wɔri bɔt bɔku tin igen bikɔs dɛn de yuz ɔl dɛn tɛm fɔ sav Jiova. Ɛrik se: “A dɔn jɔyn wan big ‘tim’ usay pipul dɛn de yuz ɔl dɛn tɛm fɔ sav Jiova. Na di bɛst tim dis we a dɔn de so, ɛn a tɛl Jiova tɛnki we i dɔn sho mi di wangren we fɔ gɛt tru tru gladi at ɛn ɛnjɔy mi layf.”

We yu? Bifo yu rɔnata di tin dɛn we de na dis wɔl, yu nɔ tink se i go fayn mek yu “tek tɛm plan wetin yu de du” so dat yu go ebul fɔ payɔnia?—Rid di bɔks we se “ Bɛnifit dɛn we Yunivasiti Nɔ Go Ebul fɔ Gi Wi.”

LƐF DƐN TIN DƐN WE GO AMBƆG YU

We wan brɔda ɛn in wɛf bin go waka na di branch ɔfis we de na Amɛrika, dɛn bin si se di Bɛtɛlayt dɛn we bin de sav Jiova de, bin gladi. Leta, di sista bin tɔk se: “Wi bin de tek am izi we wi de sav Jiova.” So in ɛn in man disayd se dɛn nid fɔ lɛf sɔm tin dɛn we dɛn bin de du so dat dɛn go gɛt mɔ tɛm ɛn trɛnk fɔ du mɔ fɔ sav Jiova.

Wan tɛm, dɛn bin si se i nɔ izi fɔ mek dɛn du wetin dɛn bin dɔn disayd fɔ du. Bɔt wan de, dɛn tink gud wan bɔt di skripchɔ we bin de na di deli tɛks da de de. Di skripchɔ na Jɔn 8:31. Insay da skripchɔ de, Jizɔs se: “If una de du ɔl wetin a tɛl una fɔ du, una na mi lanin bɔy dɛn fɔ tru.” Dis skripchɔ bin ɛp dɛn fɔ no se if dɛn tray fɔ liv simpul layf, dɛn nɔ go rigrɛt ɛnitin we dɛn go lɛf biɛn. So wetin dɛn bin du? Dɛn sɛl dɛn big os, pul ɔda yagba dɛn pan dɛnsɛf, ɛn go na wan kɔngrigeshɔn we bin nid mɔ pɔblisha dɛn fɔ ɛp dɛn. Naw, dɛn de payɔnia ɛn ɛp fɔ bil Kiŋdɔm Ɔl dɛn, ɛn dɛn kin ɛp fɔ wok na kɔnvɛnshɔn dɛn. Aw dis de mek dɛn fil? Dɛn se: “Wi rili sɔprayz fɔ si di we aw wi gladi we wi de liv simpul layf ɛn we wi de du wetin Jiova in ɔganayzeshɔn de ɛnkɔrej wi fɔ du.”

NƆ ALAW ƐNITIN FƆ STƆP YU FƆ DU MƆ FƆ SAV JIOVA

Sɔlɔmɔn bin rayt se: “No usay yu de go, nɔ ɛva butu yu ed wit shem.” (Prɔv. 4:25) We pɔsin de drayv, i nɔ fɔ butu in ed, i fɔ de luk stret usay i de go. I nɔ fɔ alaw ɛnitin fɔ pul in atɛnshɔn pan di drayv we i de drayv. Semweso, wisɛf nɔ fɔ alaw ɛnitin fɔ stɔp wi fɔ lɛ wi nɔ plan fɔ du mɔ fɔ sav Jiova ɛn wi nɔ fɔ alaw ɛnitin fɔ pul wi atɛnshɔn pan di tin dɛn we wi dɔn plan fɔ du we wi de sav Jiova.

Wetin na sɔm tin dɛn we yu go plan ɛn ebul fɔ du we yu de sav Jiova? Wan fayn tin we yu go ebul du na we yu de yuz ɔl yu tɛm fɔ sav Jiova. Ɔda tin we yu go du na we yu go na kɔngrigeshɔn we nid pipul dɛn we sabi prich so dat dɛn go ebul fɔ prich na ɔl di eria dɛn we dɛn fɔ prich. Ɔ yu kin go na kɔngrigeshɔn we gɛt bɔku pɔblisha, bɔt we nɔ gɛt bɔku ɛlda ɛn ministerial savant dɛn. Yu go ebul fɔ ɛp fɔ du wan pan dɛn tin ya? Yu nɔ tink se i go fayn mek yu tɔk to di sakit ovasia fɔ si if yu go ebul fɔ ɛp na dɛn say ya? If yu want fɔ go na fa say, yu kin aks mek dɛn tɛl yu bɔt di kɔngrigeshɔn dɛn we de fa ɛn we nid pɔblisha dɛn fɔ ɛp dɛn. *

Lɛ wi go bak to wetin Ayzaya 62:10 bin tɔk. Sɔm Ju dɛn go dɔn wok tranga wan fɔ klia di rod we dɛn go yuz fɔ go na Jerusɛlɛm so dat Gɔd in pipul dɛn go rich usay dɛn de go. If yu de tray tranga wan fɔ du wetin yu dɔn plan fɔ du we yu de sav Jiova, nɔ taya atɔl. Gɔd go ɛp yu fɔ du di tin dɛn we yu dɔn plan fɔ du we yu de sav am. So kɔntinyu fɔ beg Jiova mek i gi yu sɛns so dat yu go pul di tin dɛn we go want fɔ ambɔg yu. As tɛm de go, yu go si aw i go ɛp yu fɔ “tek tɛm plan di tin dɛn we yu de du.”—Prɔv. 4:26.

^ par. 8 Nɔto in rial nem.

^ par. 18 Rid pej 111 ɛn pej 112 na wan buk we dɛn kɔl Organized to Do Jehovah’s Will.

Bɛnifit dɛn we Yunivasiti Nɔ Go Ebul fɔ Gi Wi

WE WAN uman we nem Flavia, bin yɔŋ, in grani we na Jiova Witnɛs, bin de tɔk to am bɔt di Baybul. Bɔt in papa we na bin ticha bin want mek i lan bɔku buk. Ɔda pipul dɛn bin de tɛl am se, “Na yɔŋ pipul dɛn go ebul fɔ mek dis wɔl nɔ pwɛl.” Flavia in papa bin de ɛnkɔrej am ɛn sɔpɔt am fɔ go na yunivasiti, usay i bin go bigin fɔ stɔdi bɔt aw fɔ mek klin fyuɛl we nɔ go ambɔg di wɔl.

Flavia kam fɔ no se bɔku pan in kɔmpin dɛn we dɛn ɔl de na yunivasiti ‘nɔ want fɔ ɛp fɔ mek di wɔl nɔ pwɛl.’ Ɛn i kam fɔ no bak se bikɔs sɔm kɔmni dɛn bin de gi mɔni to di yunivasiti fɔ ɛp dɛn fɔ stɔdi bɔt sɔntin, dat bin de mek in kɔmpin studɛnt dɛn bin lɛk dɛn kɔmni ya ɛn dɛn nɔ bin bisin fɔ ɛp fɔ mek di wɔl nɔ pwɛl. Dis tin we bin de apin na di yunivasiti bin de mɔna Flavia. Bɔt we Jiova Witnɛs dɛn bin go prich to am bɔt di tin dɛn we di Baybul tɔk bɔt Gɔd ɛn di tumara bambay, i bin gladi ɛn want fɔ no mɔ.

Flavia bin gri wit wetin di Baybul de tich ɛn i bin baptayz. Bɔt bikɔs i bin de lan bɔku bɔku buk na di yunivasiti, i nɔ bin de ebul fɔ spɛn mɔ tɛm fɔ du di prichin wok. Wan de, we dɛn bin gɛt sakit visit, i bin lisin gud wan we di sakit ovasia bin de tɔk bɔt di skripchɔ na Jems 4:17, we se: “Ɛnibɔdi we no wetin i fɔ du ɛn i nɔ du am, da pɔsin de dɔn sin.” Dis bin mek Flavia tink gud wan bɔt wetin i de du. I tɔk se: “A bin want lɛ Jiova blɛs mi, bɔt a bin want bak fɔ ɛnjɔy di sayɛns wok we a bin de du. So a bin gɛt fɔ disayd wetin fɔ du.”

Flavia bin disayd fɔ lɛf yunivasiti. Yu tink se dat bin mek i rigrɛt? Na dis Flavia bin se:

“Di bɛnifit dɛn we a dɔn gɛt we a de sav Jiova, pas di bɛnifit we a bin fɔ gɛt na yunivasiti. Jiova dɔn du bɔku gud tin dɛn fɔ mi. Ɛn i dɔn tich mi fɔ du bɔku tin dɛn, lɛk aw fɔ du gud tin to ɔda pipul dɛn, aw fɔ sho lɔv, ɛn aw fɔ ɛp ɔda pipul dɛn fɔ no am. Pantap dat, a gɛt gud mared ɛn a op fɔ gɛt fayn tumara bambay we bɛtɛ pas di wan we sayɛns bin fɔ gi mi. A dɔn no se na Jiova nɔmɔ go ebul mek dis wɔl nɔ pwɛl. A nɔ go ɛva tɔn mi bak pan am.” Flavia ɛn in man de wok na Jiova Witnɛs dɛn ɛdkwata na Nyu Yɔk.

DI WACHTAWA