1. Wetin mɔtalman kin lɛk fɔ du? Udat dɛn mɔ wi kin lɛk fɔ de nia?

MƆTALMAN kin lɛk fɔ de nia in kɔmpin mɔtalman. Dɛn kin se tu pipul dɛn “go bi tayt padi, if dɛn rili lɛk dɛnsɛf ɛn no dɛnsɛf bɛtɛ bɛtɛ wan.” Wi kin gladi we wi gɛt fambul ɛn padi dɛn we rili lɛk wi, valyu wi, ɛn ɔndastand wi. Bɔt di Pɔsin we wi nid fɔ mek tayt padi biznɛs wit mɔ na Jiova, we mek ɔltin.—Ɛkli. 12:1.

2. Wetin Jiova dɔn prɔmis wi? Wetin mek bɔku pipul dɛn nɔ biliv dis prɔmis?

² Jiova de ɛnkɔrej wi fɔ kam nia am, ɛn i prɔmis wi se if wi kam nia am, insɛf go kam nia wi. (Jems 4:8) Wi rili gladi we wi no dis! Bɔt stil, bɔku pipul dɛn kin tink se i nɔ mek sɛns fɔ biliv se Gɔd want fɔ kam nia dɛn; dɛn kin fil se dɛn nɔ fit fɔ go nia Gɔd ɔ Gɔd de tu fa frɔm dɛn. Yu tink se wi go rili ebul fɔ go nia Jiova?

3. Wetin na wan tin we wi fɔ no bɔt Jiova?

³ Wan tin we wi fɔ no na dat Jiova ‘de nia’ ɛnibɔdi we want fɔ kam nia am. So dis dɔn sho wi se wi go ebul fɔ kam nia Gɔd. (Rid Di Apɔsul Dɛn Wok [Akt] 17:26, 27; Sam 145:18.) Pan ɔl we wi nɔ pafakt, Gɔd stil want mek wi kam nia am, ɛn i rɛdi fɔ bi wi tayt padi. (Ayz. 41:8; 55:6) Di tin dɛn we bin apin to  wan pan di man dɛn we rayt di Sam buk, bin mek i rayt bɔt Jiova se: “Yu we de ansa wi prea, ɔlman na [di] wɔl go kam fɔ wɔship yu. I fayn fɔ di wan dɛn we yu pik fɔ de nia yu.” (Na wi mek am italiks; Sam 65:2, 4) Lɛ wi tɔk bɔt wan kiŋ na Juda we nem Esa. In ɛgzampul go sho wi aw sɔmbɔdi kin go nia Jiova, ɛn wetin Jiova bin du we i go nia am. *

4. Aw Kiŋ Esa bin sɛt gud ɛgzampul fɔ di pipul dɛn na Juda?

⁴ Kiŋ Esa bin sho se i gɛt zil fɔ wɔship Gɔd di rayt we. Aw i bin sho se i gɛt zil? I bin sho se i gɛt zil we i drɛb di wan dɛn we bin de wɔship lay lay gɔd ɛn di wan dɛn we bin de liv fri layf na di tɛmpul. (1 Kiŋ 15:9-13) Bikɔs Esa in padi biznɛs wit Jiova bin tayt, dat bin mek i bin fil fri fɔ tɛl di pipul dɛn se dɛn “fɔ pre to PAPA GƆD we na dɛn papa dɛn Gɔd ɛn fɛnɔt wetin i want, obe di lɔ, ɛn du ɔl wetin i tɛl dɛn.” Jiova bin blɛs Esa insay di fɔs tɛn ia we i bin de rul, so pis bin de na ɔl di say dɛn we i bin de rul. Esa bin no se na Jiova gi dɛn dis pis. Na dis mek i tɛl di pipul dɛn se, ‘Na wi stil gɛt di grɔn bikɔs wi dɔn pre to PAPA GƆD ɛn wi dɔn kam fɔ no wetin I want; so I dɔn gi wi kolat ɔlsay.’ (2 Kro. 14:1-7) Naw lɛ wi tɔk bɔt wetin apin nɛks.

5. Us prɔblɛm we bin mit Esa? Wetin bin apin we i abop pan Gɔd?

⁵ Lɛ wi se yu na bin Esa. Wan Itiopian man we nem Zera, bin kam fɔ fɛt yu wit 1,000,000 sojaman dɛn ɛn bɔku bɔku chariɔt dɛn. (2 Kro. 14:8-10) Wetin yu go du we yu si dɛn bɔku bɔku sojaman ya de kam fɔ fɛt yu? Yu yon sojaman dɛn na jɔs 580,000! Dis min se wan pan yu yon sojaman dɛn go fɛt lɛk tu pan di Itiopian sojaman dɛn. Yu go wɔnda wetin mek Gɔd fɔ alaw dɛn sojaman ya fɔ kam fɛt yu. We dis tin dɔn apin to yu so, yu tink se yu fɔ abop pan yu yon sɛns? Di tin we Esa bin du bin sho se in ɛn Jiova na bin tayt padi ɛn i bin abop pan Jiova. I bin pre to Jiova ɛn beg am se, ‘Duya PAPA GƆD, ɛp wi, bikɔs na yu wi abop pan, na insay yu nem wi kam fɔ kam fɛt dɛn bɔku bɔku pipul dɛn ya. Duya PAPA GƆD, na yu na wi Gɔd; nɔ gri mek ɛnibɔdi pul nem pan yu.’ Aw Jiova bin ansa Esa in prea? Jiova mek di Izrɛlayt dɛn win di Itiopian dɛn pan di wɔ. Nɔn pan di Itiopian sojaman dɛn nɔ bin lɛf; dɛn ɔl bin day pan di wɔ!—2 Kro. 14:11-13.

6. Aw wi fɔ falamakata Esa?

⁶ Wetin bin ɛp Esa fɔ abop pan Gɔd fɔ protɛkt ɛn gayd am? Di Baybul se ‘Esa bin du wetin rayt na PAPA GƆD in yay’ ɛn ‘ɔl in at bin de wit PAPA GƆD.’ (1 Kiŋ 15:11, 14) Wisɛf fɔ wɔship Gɔd wit ɔl wi at. I rili impɔtant fɔ lɛ wi du dat, bikɔs na dat nɔmɔ go mek wi padi biznɛs wit am tayt naw ɛn tumara bambay. Wi rili gladi we Jiova dɔn kɔl wi fɔ kam nia am, ɛn we i de ɛp wi fɔ bi in padi ɛn kɔntinyu fɔ de nia am! Naw lɛ wi kam tɔk bɔt tu we dɛn aw Gɔd dɔn du dis.

7. (a) Wetin Jiova dɔn du fɔ lɛ wi kam nia am? (b) Wetin na di bɛst we we Gɔd dɔn drɔ wi kam nia am?

⁷ Jiova dɔn sho se i lɛk mɔtalman. Aw i dɔn sho se i lɛk wi? Na bay we i mek dis wɔl fayn fayn wan fɔ lɛ wi de de. Ɛn i de kɔntinyu fɔ gi wi tin fɔ it ɛn ɔda tin dɛn we de ɛp wi fɔ kɔntinyu fɔ liv. (Akt 17:28; Rɛv. 4:11) Di tin we impɔtant mɔ na dat, Jiova de ɛp wi fɔ no am. (Lyuk 12:42) I dɔn  prɔmis wi se na insɛf sɛf go de lisin we wi de pre to am. (1 Jɔn 5:14) Bɔt di bɛst we we Gɔd dɔn drɔ wi kam nia am ɛn sho se i lɛk wi, na we i sɛn in Pikin fɔ kam day fɔ wi. (Rid Jɔn In Fɔs Lɛta 4:9, 10, 19.) Jiova sɛn in “wangren Pikin” na di wɔl so dat i go pul wi pan sin ɛn day.—Jɔn 3:16.

8, 9. Aw Jizɔs dɔn ɛp wi?

⁸ Jiova dɔn mek Jizɔs in day wan de bɛnifit ɔlman, ivin di wan dɛn we bin dɔn day bifo Jizɔs kam na di wɔl. Frɔm di tɛm we Jiova bin tɔk se sɔmbɔdi gɛt fɔ kam day fɔ sev mɔtalman, to Jiova i bin tan lɛk se da pɔsin de dɔn ɔlrɛdi kam day fɔ sev mɔtalman, bikɔs Jiova no se ɛnitin we i tɔk, go mɔs bi. (Jɛn. 3:15) Afta sɔm tɛm, di apɔsul Pɔl bin tɛl Gɔd tɛnki fɔ we “Jizɔs Krays dɔn bay ɔlman wit in blɔd fɔ mek dɛn fri.” Pɔl tɔk bak se: “Fɔs tɛm, [Gɔd] bin de bia wit mɔtalman ɛn i nɔ bin de pɔnish dɛn fɔ ɛni bad we dɛn du.” (Rom 3:21-26) So if nɔto bin fɔ Jizɔs wi nɔ bin fɔ dɔn ebul fɔ kam nia Jiova!

⁹ Na Jizɔs nɔmɔ ebul fɔ mek ɔmbul pipul dɛn no Jiova, kam nia am, ɛn bi in tayt padi. Aw di Baybul ɛp wi fɔ no dis? Pɔl bin rayt se: “Gɔd dɔn sho wi aw i lɛk wi bikɔs pan ɔl we sin bin plɛnti na wi layf, Krays day fɔ wi.” (Rom 5:6-8) Di rizin we mek Jiova mek Jizɔs kam day fɔ wi nɔto bikɔs wi fit lɛ i day fɔ wi, bɔt na bikɔs Gɔd ɛn Jizɔs rili lɛk wi. Na dat mek Jizɔs bin tɔk se: “Nɔbɔdi nɔ go kam to mi pas mi Papa we sɛn mi briŋ di pɔsin kam to mi.” Wan ɔda tɛm, i tɔk bak se: “Mi na di rod we fɔ pas go to Gɔd.” (Na wi mek am italiks; Jɔn 6:44; 14:6) Jiova de yuz in oli spirit ɛn Jizɔs fɔ briŋ pipul dɛn kam to am, ɛn i de ɛp dɛn fɔ kɔntinyu fɔ du wetin i lɛk so dat dɛn go gɛt layf we go de sote go tumara bambay. (Rid Jud In Lɛta 20, 21.) Lɛ wi tɔk bɔt wan ɔda we we Jiova de yuz fɔ mek wi kam nia am.

10. Aw di Baybul de ɛp wi fɔ kam nia Gɔd?

¹⁰ Frɔm paregraf wan to paregraf nayn nɔmɔ, wi dɔn tɔk bɔt 14 Baybul buk dɛn. If wi nɔ bin gɛt di Baybul, aw wi bin fɔ dɔn no se wi go ebul go nia Gɔd, we mek wi? If wi nɔ bin gɛt di Baybul, aw wi bin fɔ dɔn no se Jiova dɔn mek we fɔ sev wi, ɛn aw wi bin fɔ dɔn no se na Jizɔs in day go mek wi ebul fɔ go nia Jiova? Jiova bin yuz in oli spirit fɔ mek dɛn rayt di Baybul, we sho wi di fayn fayn kwaliti dɛn we i gɛt. Ɛn di Baybul ɛp wi fɔ no bak bɔt di wɔndaful tin dɛn we Gɔd dɔn prɔmis fɔ du. Fɔ ɛgzampul, insay Ɛksodɔs 34:6, 7 Jiova bin sho in kwaliti dɛn to Mozis. I bin tɔk se in na ‘Gɔd we gud ɛn de sho masi, i nɔ de vɛks kwik, in lɔv nɔ de fel, ɛn pɔsin kin put in op ɛn trɔs pan am. I de sho lɔv to bɔku bɔku pipul dɛn ɛn i de fɔgiv udat de du bad.’ Udat nɔ go lɛk fɔ go nia dis kayn pɔsin? Jiova no se di mɔ we wi de lan bɔt am na di Baybul, na di mɔ wi go de si am as rial Pɔsin, ɛn na di mɔ wi go de si se i de nia wi.

11. Wetin mek wi fɔ tray fɔ lan bɔt Gɔd in kwaliti dɛn? (Luk di pikchɔ nia dis atikul in taytul.)

¹¹ Di fɔs pej pan di Draw Close to Jehovah buk ɛksplen aw pɔsin kin kam nia Gɔd. I se: “Ɛni padi biznɛs we wi se wi de mek, di tin we go mek da padi biznɛs de go bifo, na we wi tray fɔ no di pɔsin ɛn lɛk di gud abit dɛn we i gɛt. Di Baybul ɛp wi fɔ no Gɔd in kwaliti dɛn so i go fayn fɔ lɛ wi stɔdi dɛn kwaliti dɛn de.” Wi fɔ tɛl Jiova tɛnki we i mek dɛn rayt di Baybul di we aw wi mɔtalman go ebul fɔ ɔndastand am!

12. Wetin mek Jiova yuz mɔtalman fɔ rayt di Baybul?

¹² Jiova bin fɔ dɔn mek di enjɛl dɛn rayt di Baybul, bikɔs dɛn bisin bɔt wi ɛn dɛn  rili want fɔ no wetin wi de du. (1 Pit. 1:12) So dɛn bin fɔ dɔn rayt di Baybul fɔ mɔtalman. Bɔt di enjɛl dɛn nɔ tan lɛk mɔtalman, so yu tink se dɛn bin fɔ dɔn si tin di we aw mɔtalman de si am? Yu tink se dɛn bin fɔ ebul fɔ no di tin dɛn we wi nid, di tin dɛn we wi nɔ ebul du, ɛn di tin dɛn we wi kin want fɔ du? Nɔ, dɛn nɔ bin fɔ ebul fɔ no ɔl dɛn tin ya. Jiova no wetin di enjɛl dɛn nɔ ebul fɔ du so na dat mek i nɔ yuz dɛn fɔ rayt di Baybul. We Jiova yuz mɔtalman fɔ rayt di Baybul, i sho se na fɔ wi i mek am. So dis dɔn mek wi ebul fɔ ɔndastand di we aw di pipul dɛn we rayt di Baybul ɛn di ɔda pipul dɛn we dɛn rayt bɔt bin de tink ɛn fil. We wi rid bɔt di tin dɛn we bin de mek dɛn at pwɛl, di tin dɛn we bin de mek dɛn dawt, di fred we dɛn bin de fred, di mistek dɛn we dɛn bin de mek, ɛn di tin dɛn we bin de mek dɛn gladi, wi kin ebul fɔ no aw dɛn bin de fil. Jɔs lɛk di prɔfɛt Ilayja, ɔl di pipul dɛn we rayt di Baybul “na bin mɔtalman lɛkɛ wisɛf.”—Jems 5:17.

13. Aw yu fil bɔt Jona in prea?

¹³ Lɛ wi tɔk bɔt Jona we na bin wan pan Gɔd in prɔfɛt dɛn. Yu tink se di enjɛl dɛn bin fɔ dɔn rili ebul fɔ rayt bɔt aw Jona bin de fil we i rɔnawe pan di wok we Gɔd gi am? I bɛtɛ we Gɔd yuz Jona fɔ rayt bɔt di tin dɛn we apin to am, ɛn di pre we i bin pre to Gɔd we i bin de insay di fish in bɛlɛ. Jona bin se: “Di tɛm we mi at ɔl dɔn pwɛl, a mɛmba PAPA GƆD.”—Jona 1:3, 10; 2:1-9.

14. Wetin mek yu ebul fɔ ɔndastand di tin dɛn we Ayzaya rayt bɔt insɛf?

¹⁴ Tink bak bɔt di tin dɛn we Jiova bin mek Ayzaya rayt bɔt insɛf. Afta di prɔfɛt bin dɔn si di we aw Gɔd wɔndaful pan wan vishɔn, i tɔk se: “Trɔbul dɔn mit mi!  A dɔn dɔn; bikɔs mi na man we mi mɔt nɔ klin na Gɔd yay, ɛn a tap midul pipul dɛn we dɛn mɔt nɔ klin na Gɔd yay; bikɔs a dɔn tek mi yay si di kiŋ, we na PAPA GƆD Ɔlmayti.” (Ayz. 6:5) Us enjɛl bin fɔ dɔn tɔk dɛn kayn wɔd ya we Ayzaya bin tɔk? Nɔn pan di enjɛl dɛn nɔ bin fɔ ebul fɔ tɔk so. Bɔt Ayzaya in bin ebul fɔ tɔk dɛn wɔd ya bikɔs in na pɔsin we de sin ɛn bikɔs wisɛf de sin, dat dɔn ɛp wi fɔ no aw Ayzaya bin de fil.

15, 16. (a) Wetin mek wi ebul fɔ ɔndastand di we aw wi kɔmpin mɔtalman de fil? Gi sɔm ɛgzampul dɛn. (b) Wetin go ɛp wi fɔ kam nia Jiova mɔ ɛn mɔ?

¹⁵ Yu tink se di enjɛl dɛn bin fɔ dɔn ebul fɔ tɔk se dɛn “nɔ fit” lɛk aw Jekɔb bin se i nɔ fit? Ɔ yu tink se dɛn fɔ dɔn tɔk se dɛn “de pan sin” lɛk aw Pita bin se ‘in na man we de sin’? (Jɛn. 32:10; Lyuk 5:8) Yu tink se dɛn bin fɔ dɔn “fred” lɛk aw Jizɔs in disaypul dɛn bin de fred? Ɔ yu tink se di enjɛl dɛn nid fɔ mek maynd fɔ prich, jɔs lɛk aw di apɔsul Pɔl ɛn ɔda Kristian dɛn bin de mek maynd fɔ prich pan ɔl we pipul dɛn bin de mek dɛn sɔfa? (Jɔn 6:19; 1 Tɛs. 2:2) Nɔ, di enjɛl dɛn pafɛkt pan ɔl wetin dɛn de du ɛn dɛn pas mɔtalman fa fawe. Bɔt di pipul dɛn we Gɔd yuz fɔ rayt di Baybul na mɔtalman dɛn lɛk wi, so wi kin ebul fɔ ɔndastand di we aw dɛn bin de fil. We wi de rid Gɔd in Wɔd, wi kin ebul fɔ ‘gladi wit pipul dɛn we dɛn gladi ɛn sɔri wit pipul dɛn we dɛn sɔri.’—Rom 12:15.

¹⁶ If wi de tink gud wan bɔt aw Jiova bin de trit in fetful savant dɛn we bin de trade, wi go lan bɔku wɔndaful tin dɛn bɔt Gɔd na di Baybul. Wi go lan bɔt aw Gɔd bin lɛk dɛn, aw i bin de bia wit dɛn, ɛn aw i bin de kam nia dɛn. We wi lan bɔt ɔl dɛn tin ya, i go mek wi rili no Jiova ɛn lɛk am wit ɔl wi at. Ɛn dis go mek wi kam nia am mɔ ɛn mɔ.—Rid Prɔvabs 3:32.

17. (a) Us gud advays we di prɔfɛt Azaraya bin gi Esa? (b) Wetin Esa bin du we sho se i nɔ bin fala Azaraya in advays? Wetin bin apin we i nɔ fala di advays we Azaraya bin gi am?

¹⁷ Afta Kiŋ Esa bin dɔn kil ɔl di Itiopian sojaman dɛn pan wɔ, Gɔd in prɔfɛt we na Azaraya bin gi wan fayn advays to Kiŋ Esa ɛn in pipul dɛn. Di prɔfɛt bin tɛl dɛn se: “PAPA GƆD de wit una we una de wit am. If una luk fɔ am, una go fɛn am, bɔt if una kɔmɔt biɛn am, insɛf go kɔmɔt biɛn [una].” (2 Kro. 15:1, 2) Afta sɔm tɛm, Esa bin lɛf fɔ fala dis advays. Di tɛm we di kiŋdɔm na di nɔt pat na Izrɛl bin kam fɔ fɛt Esa, i bin go to di Siryan pipul dɛn fɔ ɛp am. Bifo i pre bak to Jiova fɔ ɛp am, i disayd fɔ mek padi biznɛs wit pipul dɛn we de wɔship lay lay gɔd dɛn so dat dɛn go ɛp am. So na dis mek Jiova tɛl Esa se: “Na fulish we yu biev so; bikɔs as frɔm tide, na so so wa yu go de fɛt.” Wetin Jiova bin tɛl am, bin apin. Esa bin kɔntinyu fɔ de fɛt wɔ te i day. (2 Kro. 16:1-9) Wetin na di lɛsin we wi lan?

18, 19. (a) Wetin wi fɔ du if wi notis se wi dɔn de kɔmɔt nia Jiova smɔl smɔl? (b) Aw wi go ebul fɔ kam nia Jiova?

¹⁸ Wi nɔ fɔ ɛva kɔmɔt nia Jiova. If wi dɔn notis se wi dɔn de kɔmɔt nia Jiova smɔl smɔl, wi fɔ du wetin Ozie 12:6 se. Dis vas tɔk se ‘wi fɔ kam bak to PAPA GƆD, lɛk wisɛf, trit wi kɔmpin dɛn fayn ɛn du wetin PAPA GƆD want.’ So wi fɔ de tink gud gud wan bɔt di day we Jizɔs kam day fɔ wi ɛn tek tɛm fɔ stɔdi di Baybul, bikɔs na dis go mek wi kam nia Jiova mɔ ɛn mɔ.—Rid Ditarɔnɔmi 13:4.

¹⁹ Wan pan di man dɛn we rayt di Sam buk bin se: “I fayn fɔ de nia PAPA GƆD.” (Sam 73:28) So i go fayn fɔ lɛ wi ɔl kɔntinyu fɔ de lan nyu tin dɛn bɔt Jiova so dat wi go gɛt bɔku rizin fɔ lɛk am mɔ ɛn mɔ. We wi du dis, Jiova insɛf go kam nia wi naw, ɛn i go de wit wi sote go.