If yu kin lisin nyus, yu go dɔn notis se pipul dɛn kin yuz rilijɔn fɔ du bad tin. Nɔto ɔl rilijɔn de du wetin Gɔd want. (Matyu 7:15) Fɔ tru, rilijɔn dɔn ful bɔku pipul dɛn.—Rid Jɔn In Fɔs Lɛta 5:19.

Bɔt pan ɔl dat, Gɔd no di pipul dɛn we rili want fɔ wɔship am di rayt we ɛn we lɛk fɔ du wetin gud. (Jɔn 4:23) Gɔd want lɛ dɛn pipul ya lan di tru tin bɔt am na in Wɔd, di Baybul.—Rid Fɔs Lɛta To Timoti 2:3-5.

Jiova Gɔd de mek pipul dɛn we kɔmɔt na difrɛn difrɛn rilijɔn dɛn kam togɛda. Aw i de du dat? Na bay we i de tich dɛn di tru tin dɛn bɔt am ɛn we i de tich dɛn fɔ lɛk dɛnsɛf. (Mayka 4:2, 3) So yu go ebul fɔ no di pipul dɛn we de na di tru rilijɔn we yu wach di we aw dɛn de kia fɔ dɛn kɔmpin dɛn.—Rid Jɔn 13:35.

Pipul dɛn we de wɔship Gɔd di rayt we biliv di tin dɛn we de na di Baybul ɛn dɛn de liv dɛn layf di we aw di Baybul se. (Sɛkɛn Lɛta To Timoti 3:16) Dɛn de sho se dɛn rɛspɛkt Gɔd in nem ɛn dɛn de tɛl pipul dɛn bɔt am. (Sam 83:18, NW) Ɛn dɛn de prich se na Gɔd in Kiŋdɔm nɔmɔ go ebul fɔ sɔlv mɔtalman prɔblɛm. (Daniɛl 2:44) Dɛn de falamakata Jizɔs bay we dɛn de mek dɛn ‘layt shayn,’ we min se dɛn de du gud tin to ɔda pipul dɛn. (Matyu 5:16) Tru Kristian dɛn kin go mit pipul dɛn na dɛn os dɛn fɔ tɛl dɛn di gud nyus bɔt Gɔd in Kiŋdɔm.—Rid Matyu 24:14; Di Apɔsul Dɛn Wok [Akt] 5:42; 20:20.