Yuz Gɔd in Wɔd—I Gɛt Layf!
“Gɔd in wɔd gɛt layf ɛn i gɛt pawa.”—IBRU 4:12.
1, 2. Us wok Jiova bin gi Mozis? Wetin i bin prɔmis Mozis?
AW YU go fil if yu bin gɛt fɔ tɔk fɔ Jiova in pipul dɛn to wan pawaful rula na dis wɔl? Sɔntɛm yu go wɔri, ɔ yu go de fil se yu nɔ go ebul du am, ɛn yu go ivin fred. Yu go de wɔnda aw yu go go tɔk. Wetin yu go du so dat yu go ebul fɔ tɔk fayn fayn wan lɛk pɔsin we Gɔd sɛn?
2 Na dat bin apin to Mozis. Mozis ‘na bin di pɔsin we put insɛf dɔŋ pas ɔlman na di wɔl.’ Jiova bin tɛl am se i de sɛn am to Fɛro fɔ go fri in pipul dɛn we na bin slev dɛn na Ijipt. (Nɔm. 12:3) Fɛro bin prawd ɛn i nɔ bin gɛt wan rɛspɛkt fɔ pɔsin. (Ɛks. 5:1, 2) Bɔt stil, Jiova bin want lɛ Mozis tɛl Fɛro fɔ fri lɛk tri milyɔn slev dɛn we bin de na in kɔntri! No wɔnda, Mozis bin aks Jiova se “udat nain fɔ go tinap bifo di kiŋ ɛn pul di Izrɛlayt dɛn kɔmɔt na Ijipt”! Mozis go mɔs dɔn fil se i nɔ fit fɔ du di wok ɛn i nɔ go ebul fɔ du am. Bɔt Jiova bin prɔmis am se, ‘i go de wit am.’—Ɛks. 3:9-12.
3, 4. (a) Wetin Mozis bin de fred? (b) Wetin mek di we aw wi kin fil kin fiba di we aw Mozis bin de fil?
3 Wetin Mozis bin de fred? I bin de fred se Fɛro nɔ go lisin to di pɔsin we Jiova go sɛn. Mozis bin de fred bak se in yon pipul dɛn nɔ go biliv se na in Jiova dɔn sɛn fɔ pul dɛn kɔmɔt Ɛks. 3:15-18; 4:1.
na Ijipt. So Mozis bin aks Jiova se, ‘If di pipul dɛn nɔ biliv mi ɛn nɔ gri fɔ lisin to wetin a de tɛl dɛn, ɛn dɛn se, na lay a de lay PAPA GƆD nɔ apia to mi, wetin a fɔ se’?—4 Di tin we Jiova tɛl Mozis ɛn di tin dɛn we apin afta dat go tich wi wan impɔtant lɛsin. Sɔntɛm yu nɔ go ɛva tɔk to sɔmbɔdi we na bigman na gɔvmɛnt. Bɔt yu dɔn ɛva fil se i tranga fɔ tɔk bɔt Gɔd in Kiŋdɔm to ɔdinari pipul dɛn we yu de mit? If yu ansa na yɛs, lɛ wi si wetin wi kin lan frɔm di tin dɛn we bin apin to Mozis.
‘WETIN YU OL NA YU AN’?
5. Wetin Jiova bin mek Mozis ebul fɔ du? Aw dat bin ɛp am fɔ lɛf fɔ fred? (Luk di pikchɔ nia dis atikul in taytul.)
5 We Mozis bin de tɛl Gɔd se i de fred se dɛn nɔ go tek in wɔd siriɔs, Gɔd bin sho am wetin i fɔ du so dat di pipul dɛn go biliv se na in sɛn am. Di Baybul se, ‘PAPA GƆD aks Mozis wetin i ol nain an. Mozis ansa se nain wɔkinstik. PAPA GƆD se, “Ib di tik na grɔn.” So Mozis ib di tik na grɔn ɛn di tik tɔn snek. We Mozis si di snek i fred ɛn jomp kɔmɔt nia am. Na de PAPA GƆD tɛl Mozis se, “Ol di snek nain tel.” So we Mozis ol di snek nain tel fɔ es am ɔp, di snek tɔn bak to wɔkinstik nain an. PAPA GƆD tɛl Mozis se, “Pafɔm dis mirekul fɔ mek di Izrɛlayt dɛn biliv se na mi PAPA GƆD, apia to yu.”’ (Ɛks. 4:2-5) So Jiova bin sho Mozis wetin fɔ du we go sho se na in sɛn am. Gɔd in pawa bin mek di wɔkinstik we ɔlman bin de fil se na ɔdinari stik, tɔn to snek! Dis mirekul we Mozis go du go mek ɔlman biliv se na Jiova sɛn am. So Jiova bin tɛl am se: “Mek shɔ se yu tek yu tik we yu kin yuz we yu de mɛn dɛn ship ɛn got, bikɔs nain yu go de tek ple wɔnda.” (Ɛks. 4:17) Dis pawa we Gɔd dɔn gi Mozis, go mek i ebul fɔ go bifo in yon pipul dɛn ɛn Fɛro fɔ sho dɛn se na Gɔd rili sɛn am.—Ɛks. 4:29-31; 7:8-13.
6. (a) Wetin kin de na wi an we wi de prich? Wetin mek wi kin ol am na wi an? (b) Wetin di Baybul min we i se “Gɔd in wɔd gɛt layf” ɛn “i gɛt pawa”?
6 We wi kin go fɔ go prich Gɔd in wɔd to ɔda pipul dɛn, wetin wi kin ol na wi an? Bɔku tɛm, di Baybul kin de na wi an. Wi kin dɔn rɛdi fɔ yuz am. Sɔm pipul dɛn kin se di Baybul na jɔs ɔdinari buk, bɔt di Baybul nɔto ɔdinari buk, na in Jiova de yuz fɔ tɔk to wi. (2 Pit. 1:21) Di Baybul tɔk bɔt ɔl di tin dɛn we Gɔd dɔn prɔmis fɔ du we in Kiŋdɔm go de rul. Na dat mek di apɔsul Pɔl bin rayt se: “Gɔd in wɔd gɛt layf ɛn i gɛt pawa.” (Rid Di Ibru Pipul Dɛn 4:12.) Wetin di Baybul min we i se Gɔd in Wɔd gɛt layf? I min se Gɔd de du sɔntin ɔltɛm fɔ lɛ ɔl wetin i dɔn prɔmis, bi. Ɛn ɔl di tin dɛn we Gɔd dɔn prɔmis se i go du, go mɔs bi. (Ayz. 46:10; 55:11) We pɔsin kam fɔ no se wetin Jiova in Wɔd tɔk go mɔs bi, dat go ɛp am fɔ du di tin dɛn we i de rid na di Baybul.
7. Aw wi go ebul fɔ ‘lan pipul dɛn di tru wɔd bɔt Gɔd, di we aw wi fɔ lan dɛn’?
7 Jiova dɔn gi wi in Wɔd, di Baybul, we wi go yuz fɔ sho se wetin wi de prich na tru ɛn i kɔmɔt frɔm am. Na dat mek afta we Pɔl bin dɔn rayt to di Ibru Kristian dɛn, i bin ɛnkɔrej Timoti fɔ ‘tray tranga wan fɔ lan pipul dɛn di tru wɔd bɔt Gɔd, di we aw i fɔ lan dɛn.’ (2 Tim. 2:15) Aw wisɛf go ebul fɔ du dis sem tin? Na we wi rid di rayt skripchɔ we go rili tɔch di pipul dɛn at. Di trakt dɛn we dɛn bin pul insay 2013 go ɛp wi fɔ du dat.
RID DI RAYT SKRIPCHƆ
8. Wetin wan savis ovasia tɔk bɔt di nyu trakt dɛn?
8 Ɔl di nyu trakt dɛn gɛt di sem stayl.
So we wi lan fɔ yuz wan pan dɛn, wi dɔn lan fɔ yuz dɛn ɔl. Dɛn trakt ya izi fɔ yuz. Wan savis ovasia na Away, insay Amɛrika, bin rayt se: “Wi nɔ bin ɛva no se dɛn nyu trakt ya rili fayn fɔ yuz we wi de prich frɔm os to os ɛn ɔdasay dɛn we pipul dɛn bɔku.” I dɔn kam fɔ no se di we aw dɛn rayt dɛn trakt ya kin mek pipul dɛn want fɔ lisin ɛn tɔk to wi. Wetin mek dɛn trakt ya kin mek pipul dɛn tɔk to wi? Di brɔda fil se na bikɔs di trakt dɛn aks kwɛstyɔn ɛn gi tri ansa dɛn we de na di frɔnt pej, we pɔsin kin chuz frɔm. So di pɔsin we wi de tɔk to nɔ go wɔri se i go gi di rɔng ansa.9, 10. (a) Aw wi trakt dɛn kin ɛp wi fɔ yuz di Baybul? (b) Uswan pan di trakt dɛn we yu kin yuz fɔ prich we kin mek pipul dɛn lisin to yu mɔ? Wetin mek dɛn kin lisin?
9 Ɔl di trakt dɛn gɛt di rayt skripchɔ we wi fɔ rid to di pɔsin we wi go prich to. Fɔ ɛgzampul, lɛ wi tɔk smɔl bɔt di trakt we nem Wi Go Ɛva Lɛf fɔ Sɔfa? I nɔ mata if di pɔsin pik “yɛs,” “nɔ,” ɔ “sɔntɛm” fɔ ansa di kwɛstyɔn. Yu nɔ nid fɔ tɔk ɛnitin igen, jɔs opin di trakt ɛn tɛl di pɔsin se, “Na dis di Baybul se.” Dɔn, rid Rɛvɛleshɔn 21:3, 4.
10 Semweso, we wi de yuz di trakt we nem Aw Yu Si di Baybul? i nɔ mata us ansa di pɔsin pik na di frɔnt pej. Jɔs opin di trakt ɛn se, “Di Baybul tɔk se ‘na Gɔd tɛl pipul ɔltin we rayt nain Buk.’” Yu kin tɔk bak se, “Bɔt nɔto dis nɔmɔ di skripchɔ tɔk.” Dɔn opin yu Baybul ɛn rid Sɛkɛn Lɛta To Timoti 3:16, 17.
11, 12. (a) Wetin go mek wi gladi mɔ we wi yuz di trakt dɛn fɔ prich? (b) Aw di trakt dɛn go ɛp wi fɔ go bak to di pɔsin we wi bin dɔn tɔk to?
11 Di we aw di pɔsin we yu go prich to, tɔk to yu, na in go mek yu no if yu fɔ rid ɛn tɔk mɔ bɔt di trakt to am. Apat frɔm di gi we yu gi di pɔsin di trakt, yu go gladi mɔ we yu rid Gɔd in Wɔd to am, ilɛksɛf na wan ɔ tu vas yu rid to am di fɔs tɛm we yu go mit am. Leta, yu kin go bak to am ɛn ɛp am fɔ no mɔ.
12 Di las pej na di trakt dɛn, gɛt wan sɔbɛdin we se “Tin fɔ Tink Bɔt.” Dis sɔbɛdin gɛt wan kwɛstyɔn ɛn sɔm skripchɔ dɛn we yu go yuz fɔ tɔk to di pɔsin we yu go bak to am. Insay di trakt we nem Wetin Yu Tink bɔt di Bambay? di kwɛstyɔn we wi go yuz we wi go bak to di pɔsin na “Aw Gɔd go mek di wɔl fayn fɔ wi?” Di skripchɔ dɛn we de ɔnda dis kwɛstyɔn na Matyu 6:9, 10 ɛn Daniɛl 2:44. Fɔ di trakt we nem Yu Tink Se di Wan dɛn We Dɔn Day Go Gɛt Layf Bak? di kwɛstyɔn we wi go yuz we wi go bak to di pɔsin na “Wetin mek wi de ol ɛn day?” Di skripchɔ dɛn we de ɔnda dis kwɛstyɔn na Jɛnɛsis 3:17-19 ɛn Lɛta Fɔ Rom 5:12.
13. Ɛksplen aw fɔ yuz di trakt dɛn fɔ stat Baybul stɔdi.
13 Yuz di trakt dɛn fɔ stat Baybul stɔdi wit pipul dɛn. If sɔmbɔdi skan di QR kod * we de na di las pej, i go kɛr am go na wan say na wi Wɛbsayt we go ɛnkɔrej am fɔ stɔdi di Baybul. Di trakt dɛn sho wan buk we nem Gɔd Gɛt Gud Nyus fɔ Wi! ɛn dɛn sho wi us patikyula lɛsin we wi fɔ rid insay di buk. Fɔ ɛgzampul, di trakt we nem Udat Rili De Rul di Wɔl? go sho wi lɛsin 5 insay dis buk we wi go yuz fɔ stɔdi di pɔsin. Di trakt we nem Wetin Na di Men Tin we Go Mek Famili Gɛt Gladi At? go sho wi lɛsin 9 insay dis buk we wi go yuz fɔ stɔdi di pɔsin. We yu de yuz di trakt dɛn, dɛn we ya, i min se yu de yuz di Baybul di fɔs tɛm we yu go mit pɔsin, ɛn we yu go bak to di pɔsin we yu bin dɔn tɔk to. Ɛn dis go ɛp wi fɔ stat bɔku Baybul stɔdi dɛn. Us ɔda tin yu go du we go mek yu yuz Gɔd in Wɔd gud gud wan we yu de prich?
TƆK BƆT SƆNTIN WE DE NA PIPUL DƐN MAYND
14, 15. Aw yu go falamakata Pɔl in ɛgzampul we yu de prich?
14 Pɔl bin rili want fɔ ɔndastand di we aw bɔku pipul dɛn we i de prich to, de tink. (Rid Fɔs Lɛta Fɔ Kɔrint 9:19-23.) Pɔl bin want fɔ sev di ‘Ju pipul dɛn, di wan dɛn we de ɔnda di Lɔ, di wan dɛn we nɔ de ɔnda di Lɔ, ɛn di wan dɛn we nɔ go fa yet pan Krays in we.’ Dis de sho se Pɔl bin rili de “fɛn ɔl kayn we” fɔ prich to ɔlkayn pipul dɛn “so dat sɔm pipul mɔs sev.” (Akt 20:21) Aw wi go falamakata Pɔl in ɛgzampul we wi de rɛdi fɔ go prich to “ɔlman” we wi de mit?—1 Tim. 2:3, 4.
15 Ɛni mɔnt, Wi Kiŋdɔm Ministri kin gɛt sɔm pat dɛn we de sho wi aw fɔ prich to pipul dɛn. I go fayn mek wi tray dɛn. Bɔt if yu si se na ɔda tin de na di pipul dɛn maynd, i go fayn mek yu tɔk bɔt da tin de. I go fayn bak mek yu de tink bɔt di say we yu de, di pipul dɛn we de de, wetin dɛn kin want fɔ no, ɛn wetin mɔ kin wɔri dɛn. Dɔn, tink bɔt di rayt skripchɔ we yu go yuz fɔ ɛp dɛn. Wan sakit ovasia tɔk bɔt di we aw in ɛn in wɛf kin yuz di Baybul mɔ we dɛn de prich. I se: “Bɔku pan di pipul dɛn we wi kin tɔk to kin gri mek wi rid wan vas to dɛn if wi nɔ tɔk bɔku ɛn jɔs tɔk bɔt di men tin we mek wi go to dɛn. Wi Baybul kin de na wi an, so afta wi dɔn grit, wi kin rid di skripchɔ.” Naw lɛ wi tɔk bɔt sɔm tɔpik, kwɛstyɔn, ɛn skripchɔ dɛn we sɔm brɔda ɛn sista dɛn dɔn yuz. Ɛn lɛ wi si aw wisɛf go tray fɔ yuz dɛn we wi de prich.
Yu de yuz di Baybul ɛn di trakt dɛn fayn fayn wan we yu de prich? (Luk na paregraf 8 to 13)
16. Aw yu go yuz Ayzaya 14:7 we yu de prich?
16 If yu de na eria usay bad bad tin dɛn de apin, yu kin aks di pɔsin se: “Yu dɔn ɛva tink se tɛm go kam we dɛn go anawns se, ‘Bad bad tin dɛn nɔ de apin igen, pis dɔn de ɔlsay na di wɔl, pipul dɛn de gladi ɛn siŋ’? Na dat di Baybul bin dɔn tɔk na Ayzaya 14:7. Infakt, di Baybul gɛt bɔku bɔku prɔmis dɛn usay Gɔd tɔk se pis go de ɔlsay na di wɔl tumara bambay.” Afta yu dɔn tɔk dis, rid wan pan dɛn prɔmis ya na di Baybul to am.
17. Aw yu go yuz Matyu 5:3 we yu de tɔk to sɔmbɔdi?
17 Yu tink se i nɔ izi fɔ bɔku man dɛn na yu eria fɔ fɛn dɛn an-to-mɔt? If na so Matyu 5:3 ɛn tɛl am se yu go lɛk fɔ stɔdi di Baybul wit am.
i bi, yu kin aks di pɔsin se: “Ɔmɔs mɔni yu tink se papa fɔ fɛn so dat in famili go gɛt gladi at?” Afta di pɔsin dɔn tɔk wetin i tink, yu kin se: “Bɔku papa dɛn de we de mek mɔni pas dat, bɔt stil, dɛn famili nɔ gɛt gladi at. So, wetin wi rili nid?” Afta di pɔsin dɔn tɔk wetin i tink, rid18. Aw wi go yuz Jɛrimaya 29:11 fɔ ɛnkɔrej di pipul dɛn we wi de prich to?
18 Bifo yu go prich, aks yusɛf dis kwɛstyɔn, ‘Dis biɛn tɛm, bad bad tin dɔn apin to pipul dɛn we de na yu eria?’ If na so i bi, we yu bigin fɔ prich to pɔsin, yu kin se: “A kam na yu os fɔ ɛnkɔrej yu. (Rid Jɛrimaya 29:11.) As wi rid insay dis vas, wi si se Gɔd want lɛ wi ɛnjɔy wi layf naw ɛn tumara bambay. Bɔt aw dis go bi?” Sho di pɔsin di rayt lɛsin insay di buk we nem Gɔd Gɛt Gud Nyus fɔ Wi!
19. Aw wi go yuz Rɛvɛleshɔn 14:6, 7 we wi de tɔk to pipul dɛn we lɛk Gɔd biznɛs?
19 Yu de na eria usay pipul dɛn lɛk Gɔd biznɛs? If na so i bi, yu kin aks di pɔsin we yu go prich to se: “If enjɛl tɔk to yu, yu go want fɔ lisin to wetin i go se?” (Rid Rɛvɛleshɔn 14:6, 7.) Afta yu dɔn rid dis skripchɔ, aks di pɔsin se, “We dis enjɛl se wi fɔ ‘fred Gɔd,’ yu nɔ tink se i impɔtant fɔ lɛ yu go no di rayt Gɔd we i de tɔk bɔt? Di enjɛl tɔk sɔntin we mek wi no di Gɔd we i de tɔk bɔt. I tɔk bɔt di Gɔd we ‘mek ɛvin ɛn di wɔl.’ Udat na da Gɔd de?” Afta i dɔn gi in ansa, rid Sam 124:8, we se: “Na [‘Jiova,’ NW] nɔmɔ we mek ɛvin ɛn ath de ɛp wi.” Afta dat, tɛl am se yu go want fɔ ɛp am fɔ lan mɔ bɔt Jiova Gɔd.
20. (a) Aw yu go yuz Prɔvabs 30:4 fɔ sho pɔsin Gɔd in nem? (b) Ɛni patikyula skripchɔ de we yu kin yuz fɔ sho pipul dɛn Gɔd in nem?
20 If yu de prich to yɔŋ pɔsin, yu kin tɛl am se: “A go lɛk fɔ rid wan skripchɔ we aks impɔtant kwɛstyɔn dɛn.” (Rid Prɔvabs 30:4.) Afta yu dɔn rid di skripchɔ to di pɔsin, tɛl am se: “Nɔbɔdi nɔ de na di wɔl we go se na in dis skripchɔ de tɔk bɔt, so i go mɔs bi se dis skripchɔ de tɔk bɔt di Pɔsin we mek ɔltin. * Aw wi go ebul fɔ no in nem? A go lɛk fɔ sho yu in nem na di Baybul.”
LƐ GƆD IN WƆD ƐP YU WE YU DE PRICH
21, 22. (a) We wi yuz di rayt skripchɔ, aw dat kin chenj pɔsin in layf? (b) Wetin yu dɔn mekɔp yu maynd fɔ du we yu de go prich?
21 We yu rid di rayt skripchɔ to pɔsin, yu nɔ no aw da skripchɔ de go ɛp am. Fɔ ɛgzampul, tu Witnɛs dɛn na Ɔstrelia bin go prich to wan yɔŋ uman na in os. Wan pan dɛn aks di uman se, “Yu sabi Gɔd in nem?” Dɔn i rid Sam 83:18 to di uman (NW). Di uman se: “A bin so sɔprayz dat a nɔ bin ebul fɔ tɔk! Afta dɛn go, a drayv 35 mayl fɔ go na wan bukshɔp, fɔ go chɛk if Gɔd in nem de na ɔda Baybul dɛn ɛn a luk bak fɔ di nem na dikshɔnari. Afta a dɔn si se Gɔd in nem na Jiova, a bigin wɔnda wetin igen a nɔ no.” I nɔ tu te, in ɛn di man we dɛn ɔl tu fɔ mared bigin fɔ stɔdi di Baybul, ɛn leta dɛn baptayz.
22 Gɔd in Wɔd gɛt di pawa fɔ chenj pipul dɛn layf. We pɔsin rid di Baybul, i kin gɛt mɔ fet pan di tin dɛn we Jiova dɔn prɔmis. Ɛn dis fet we i dɔn gɛt kin mek i du wetin i de lan. (Rid Fɔs Lɛta Fɔ Tɛsalonayka 2:13.) Di tin dɛn we de insay di Baybul gɛt pawa pas ɛnitin we wi go se fɔ tɔch pɔsin in at. Na dat mek wi fɔ de yuz Gɔd in Wɔd ɔltɛm we wi de prich. Bikɔs Gɔd in Wɔd gɛt pawa!