1. Insay wɔ tɛm, wetin di bigman dɛn na chɔch bin de du?

YU TINK se Gɔd want mek tru Kristian dɛn fɛt wɔ ɛn kil pipul dɛn we de na ɔda kɔntri? Insay di 100 ia we dɔn pas, bɔku pipul dɛn we kɔl dɛnsɛf Kristian, dɔn kil ɔda pipul dɛn pan wɔ. Di bigman dɛn na di Katolik chɔch dɔn pre pan sojaman dɛn ɛn dɛn gɔn dɛn, fɔ go fɛt ɛn kil dɛn kɔmpin Katolik dɛn we de na ɔda kɔntri. Protɛstant dɛnsɛf dɔn du dis sem tin. Insay Wɔl Wɔ Tu, bɔku pipul dɛn we kɔl dɛnsɛf Kristian bin kil dɛn kɔmpin dɛn.

2, 3. Wetin Jiova Witnɛs dɛn nɔ bin du insay Wɔl Wɔ Tu ɛn afta Wɔl Wɔ Tu? Wetin mek dɛn nɔ bin du dat?

² Insay Wɔl Wɔ Tu, wetin Jiova Witnɛs dɛn bin du? Di wan dɛn we kin rayt bɔt tin dɛn we dɔn pas bin rayt se Jiova Witnɛs dɛn nɔ bin put an pan di wɔ we bin apin Wɔl Wɔ Tu. Wetin mek dɛn nɔ bin put an pan di wɔ? Na bikɔs dɛn bin want fɔ falamakata Jizɔs ɛn du wetin i se. Jizɔs bin se: “Ɔlman go no se una na mi disaypul dɛn if una lɛk unasɛf.” (Jɔn 13:35) Dɛn bin de mɛmba di tin dɛn we di apɔsul Pɔl bin rayt to di Kristian dɛn we bin de na Kɔrint.—Rid Sɛkɔn Lɛta Fɔ Kɔrint 10:3, 4.

 ³ Di Baybul de ɛp tru Kristian dɛn fɔ no wetin gud ɛn wetin bad, so dɛn kɔnshɛns nɔ de alaw dɛn fɔ lan fɔ fɛt ɔ put an pan wɔ. Bikɔs Jiova Witnɛs dɛn want fɔ du wetin tru Kristian dɛn fɔ du, pipul dɛn de mek dɛn sɔfa. Dɛn dɔn put bɔku pan wi brɔda ɛn sista dɛn na prizin ɛn fos dɛn fɔ wok tranga tranga wan, ilɛksɛf dɛn yɔŋ ɔ dɛn ol. Di tɛm we di Nazi gɔvmɛnt na Jamani bin de na pawa, dɛn bin ivin kil sɔm pan wi brɔda dɛn. Pan ɔl we dɛn bin de du dɛn bad bad tin ya to wi brɔda dɛn we bin de na Yurop, dɛn bin stil de prich di gud nyus bɔt Jiova in Kiŋdɔm. Dɛn bin kɔntinyu fɔ prich we dɛn put dɛn na prizin, na kamp dɛn, ɛn ivin we dɛn pul dɛn na dɛn kɔntri. * Insay 1994, we di pipul dɛn na Ruwanda bin de kil dɛn kɔmpin dɛn we bin de na ɔda trayb, Jiova Witnɛs dɛn nɔ bin jɔyn dɛn fɔ du dat. Ɛn dɛn nɔ bin miks pan di wɔ we bin apin na wan kɔntri we dɛn bin de kɔl Yugoslavia.

4. Bikɔs Jiova Witnɛs dɛn nɔ de put an pan wɔ, wetin pipul dɛn dɔn se?

⁴ Bikɔs Jiova Witnɛs dɛn nɔ kin put an pan wɔ, bɔku pipul dɛn dɔn kam fɔ biliv se Jiova Witnɛs dɛn rili lɛk Gɔd ɛn pipul dɛn. Dis min se na dɛn de du wetin tru Kristian dɛn fɔ du. Bɔt nɔto dis nɔmɔ, ɔda tin dɛn de we wi de du we dɔn mek bɔku pipul dɛn biliv se na Jiova Witnɛs dɛn de du wetin tru Kristian dɛn fɔ du.

5. Us nyu tin we Jizɔs in disaypul dɛn bin du?

⁵ Frɔm di tɛm we Jizɔs bigin fɔ prich, i bin sho se i rili impɔtant fɔ prich di gud nyus bɔt Gɔd in Kiŋdɔm. I chuz 12 disaypul dɛn fɔ bigin di prichin wok we go rich ɔlsay na di wɔl; afta dat, i bin tren 70 disaypul dɛn. (Lyuk 6:13; 10:1) Jizɔs bin rɛdi dɛn disaypul ya fɔ prich di gud nyus to ɔda pipul dɛn. Bɔt i tɛl dɛn fɔ tich di Ju pipul dɛn fɔs. Leta Jizɔs bin tɛl dɛn fɔ prich di gud nyus to pipul dɛn we de na ɔda neshɔn dɛn. Fɔ mek di Ju disaypul dɛn prich to ɔda pipul dɛn we nɔto Ju, na bin big big tin to dɛn.—Akt 1:8.

6. Wetin mek Pita bin kam fɔ no se Jiova nɔ lɛk wan neshɔn pas ɔda neshɔn?

⁶ Jiova bin sɛn di apɔsul Pita fɔ go na Kɔnilyɔs in os, pan ɔl we Kɔnilyɔs nɔto bin Ju ɛn i nɔ bin sakɔmsayz. Dis bin mek Pita kam fɔ no se fɔ tru Gɔd nɔ lɛk wan neshɔn pas ɔda neshɔn. Kɔnilyɔs ɛn in famili bin baptayz. (Akt 10:9-48) Frɔm da de de, Pita ɛn ɔl Jizɔs in ɔda disaypul dɛn bigin fɔ prich to pipul dɛn we de ɔlsay na di wɔl.

7, 8. Wetin Jiova in ɔganayzeshɔn dɔn du fɔ ɛp pipul dɛn fɔ yɛri di gud nyus? (Luk di pikchɔ nia dis atikul in taytul.)

⁷ Insay wi yon tɛm tide, di wan dɛn we de bifo na Jiova in ɔganayzeshɔn de tray tranga wan fɔ kɛr di prichin ɛn tichin wok go bifo ɔlsay na di wɔl. Tide, na lɛk et milyɔn Witnɛs dɛn so de du dɛn bɛst fɔ prich di gud nyus. I dɔn pas 600 langwej dɛn we dɛn de prich di gud nyus. Ɛn dɛn go kɔntinyu fɔ du dat insay bɔku ɔda langwej dɛn. Dɛn no Jiova Witnɛs dɛn as pipul dɛn we de prich frɔm os to os, na strit, ɛn sɔntɛnde, dɛn kin yuz tebul ɛn ɔda tin dɛn fɔ put dɛn magazin ɛn buk dɛn we dɛn de prich.

⁸ I dɔn pas 2,900 transletɔ dɛn we dɛn dɔn tren fɔ translet di Baybul ɛn ɔda buk dɛn we de tɔk bɔt di Baybul. Bɔt nɔto jɔs dɛn men langwej dɛn nɔmɔ dɛn de translet. Dɛn de translet bɔku ɔda langwej dɛn we pipul dɛn nɔ no bɔt. Pan ɔl we pipul dɛn nɔ no  bɔt dɛn langwej ya, bɔku bɔku pipul dɛn de we de tɔk dɛn langwej ya. Fɔ ɛgzampul, insay Spen bɔku pipul dɛn we na Katalonian de tɔk Katalan ɛvride. Dɛn biɛn tɛm ya, bɔku pipul dɛn dɔn bigin fɔ tɔk Katalan bak na difrɛn difrɛn say dɛn, lɛk Andora, Alikanti, di Baliɛrik Ayland dɛn, ɛn Valɛnsha. Jiova Witnɛs dɛn de mek Baybul buk dɛn naw insay Katalan langwej, ɛn dɛn kin ol mitin dɛn insay di Katalan langwej. Dis dɔn ɛp di Katalan pipul dɛn fɔ ɔndastand wetin dɛn de lan bɔt Jiova.

9, 10. Wetin sho se Gɔd in ɔganayzeshɔn want lɛ ɔlman lan di tru tin bɔt Gɔd?

⁹ Jiova Witnɛs dɛn de translet ɛn tich pipul dɛn na dɛn yon langwej na bɔku bɔku say dɛn na di wɔl. Di langwej we bɔku pipul dɛn de tɔk na Mɛksiko, na Spanish, bɔt dɛn gɛt ɔda pipul dɛn bak we de tɔk ɔda langwej dɛn, bɔt dɛn pipul ya nɔ bɔku. Wan pan dɛn langwej ya we dɛn pipul ya de tɔk na Maya. Di branch ɔfis na Mɛksiko bin mek di Maya transleshɔn tim go de na di say usay dɛn de tɔk di Maya langwej ɛvride. Wan ɔda ɛgzampul na Nepali. Nepali na wan pan di langwej dɛn we dɛn de tɔk na Nepal. Di pipul dɛn we de na Nepal pas 29 milyɔn. Na lɛk 120 langwej dɛn so dɛn de tɔk na Nepal, bɔt i pas tɛn milyɔn pipul dɛn we de tɔk Nepali ɛn bɔku ɔda pipul dɛn de tɔk Nepali pan ɔl we dɛn gɛt dɛn yon langwej. Wi brɔda dɛn de translet wi Baybul buk dɛn insay Nepali langwej.

¹⁰ Di transleshɔn wok we Jiova in ɔganayzeshɔn de du na bɔku say dɛn na di wɔl dɔn sho se dɛn tek di prichin wok as sɔntin we rili impɔtant. Jiova Witnɛs dɛn dɔn gi bɔku bɔku trakt dɛn, buk dɛn, ɛn magazin dɛn ɔlsay na di wɔl. Dɛn nɔ de aks pipul dɛn fɔ pe fɔ dɛn buk ya. Na di mɔni we Jiova Witnɛs dɛn de gi na in dɛn de yuz fɔ mek dɛn buk ɛn magazin ya. Di Witnɛs dɛn de du wetin Jizɔs bin se. I bin se: “Una gɛt dis fri, so una gi fri.”—Mat. 10:8.

11, 12. Wetin bɔku pipul dɛn dɔn se bɔt di prichin wok we Jiova Witnɛs dɛn de du ɔlsay na di wɔl?

¹¹ Jiova Witnɛs dɛn biliv se dɛn no di tru tin dɛn bɔt Gɔd so dɛn de du ɔl wetin dɛn ebul fɔ du fɔ tɛl ɔda pipul dɛn di gud nyus na dɛn yon langwej. Bɔku pan wi brɔda ɛn sista dɛn dɔn disayd fɔ liv simpul layf ɛn lan ɔda langwej. Ɛn dɛn  dɔn yus to di pipul dɛn kɔlchɔ. Dɛn de du ɔl dɛn tin ya so dat dɛn go ebul fɔ prich di gud nyus to pipul dɛn. Di prichin ɛn tichin wok we Jiova Witnɛs dɛn de du ɔlsay na di wɔl, dɔn mek pipul dɛn biliv se Jiova Witnɛs dɛn de rili fala Jizɔs Krays.

¹² Jiova Witnɛs dɛn de du ɔl dis bikɔs dɛn biliv se dɛn no di tru tin bɔt Gɔd. Bɔt wetin igen dɔn mek bɔku bɔku pipul dɛn biliv se Jiova Witnɛs dɛn no di tru tin bɔt Gɔd?—Rid Lɛta Fɔ Rom 14:17, 18.

13. Aw Jiova Witnɛs dɛn dɔn mek shɔ se di wan dɛn we de na dɛn ɔganayzeshɔn de du wetin rayt?

¹³ Wi brɔda ɛn sista dɛn gi difrɛn rizin dɛn we mek dɛn biliv se dɛn de na di tru rilijɔn. Lɛ wi si di rizin dɛn we dɛn gi ɛn si aw wi go bɛnifit frɔm dɛn. Wan brɔda we dɔn sav Jiova fɔ lɔng tɛm, bin tɔk aw i fil bɔt Jiova in ɔganayzeshɔn. I se: “Jiova in ɔganayzeshɔn de du ɔl wetin i ebul fɔ du so dat di wan dɛn we de insay de go de du wetin rayt. Jiova in ɔganayzeshɔn nɔ de fred fɔ kɔrɛkt ɔ advays ɛnibɔdi, ilɛk udat yu bi.” Aw Jiova in ɔganayzeshɔn de mek shɔ se di wan dɛn we de de, de du wetin rayt? Dɛn de du dis bay we dɛn de fala di tin dɛn we de insay di Baybul ɛn dɛn de falamakata di we aw Jizɔs ɛn in disaypul dɛn bin de liv dɛn layf. So insay wi yon tɛm, di Jiova Witnɛs dɛn we dɛn kin disfɛloship nɔ kin bɔku, bikɔs bɔku pan dɛn de du wetin Gɔd want, ivin di wan dɛn we nɔ bin de du wetin Gɔd want bifo dɛn bi Jiova Witnɛs.—Rid Fɔs Lɛta Fɔ Kɔrint 6:9-11.

14. Wetin bɔku pan di wan dɛn we dɛn kin pul na di kɔngrigeshɔn dɔn du? Wetin dɔn apin we dɛn dɔn chenj?

¹⁴ Wetin wi go se bɔt di wan dɛn we dɛn kin pul na di kɔngrigeshɔn bikɔs dɛn nɔ de du wetin di Baybul se? Bɔku pan dɛn dɔn lɛf di bad tin we dɛn de du ɛn dɛn dɔn alaw dɛn fɔ kam bak na di kɔngrigeshɔn. (Rid Sɛkɔn Lɛta Fɔ Kɔrint 2:6-8.) Bikɔs Jiova Witnɛs dɛn de liv dɛn layf di we aw di Baybul se, dat dɔn mek di kɔngrigeshɔn klin na Gɔd in yay. Ɛn bikɔs dɛn de du wetin Gɔd want, bɔku pipul dɛn dɔn si se dɛn difrɛn frɔm dɛn chɔch dɛn we de alaw dɛn mɛmba dɛn fɔ du ɛnitin we dɛn want. Dis na wan ɔda tin we dɔn mek bɔku pipul dɛn biliv se na Jiova Witnɛs dɛn de du wetin tru rilijɔn fɔ du.

15. Wetin mek wan brɔda biliv se i de na di tru rilijɔn?

¹⁵ Ɔda Jiova Witnɛs dɛn we dɔn sav Jiova fɔ lɔng tɛm biliv se dɛn de na di tru rilijɔn. Wetin mek? Wan brɔda we dɔn pas 50 ia bin tɔk se: “Frɔm we a yɔŋ, a dɔn biliv dɛn tri tin ya: (1) a biliv se Gɔd de; (2) a biliv se na Gɔd in wɔd de na di Baybul; ɛn (3) a biliv se Gɔd de yuz Jiova Witnɛs dɛn, ɛn i de blɛs dɛn. As a de stɔdi di Baybul, a de tray fɔ si if dɛn tin ya  we a biliv pan, na tru. Ɛvri ia, a de biliv mɔ ɛn mɔ se dɛn tin ya we a biliv pan, na tru, ɛn a dɔn rili biliv se na wi de na di tru rilijɔn.”

16. Wetin ɛp wan sista fɔ biliv se i de na di tru rilijɔn?

¹⁶ Wan sista we mared ɛn we de wok na Jiova Witnɛs dɛn ɛdkwata na Nyu Yɔk, tɔk sɔntin bɔt Jiova in ɔganayzeshɔn. I se: “Na di wangren ɔganayzeshɔn dis we de tɛl ɔda pipul dɛn bɔt Jiova in nem. I rili mek sɛns fɔ tɔk bɔt Gɔd in nem bikɔs in nem de na di Baybul lɛk 7,000 tɛm so! A rili lɛk wetin de na 2 Krɔnikul 16:9 we se: ‘Jiova in yay de pas pas ɔlsay na di wɔl fɔ sho in pawa fɔ di wan dɛn we lɛk am wit ɔl dɛn at.’” Dis sista kɔntinyu fɔ tɔk se: “Di tru tin dɛn we a dɔn lan na di Baybul dɔn sho mi aw fɔ put ɔl mi at pan Jiova so dat i go ɛp mi. A valyu mi padi biznɛs wit Jiova pas ɛni ɔda tin. Ɛn a rili gladi fɔ di wok we Jizɔs de du fɔ mek a no Gɔd gud gud wan ɛn na dis dɔn rili ɛp mi.”

17. Wetin wan brɔda we nɔ bin biliv pan Gɔd, dɔn kam fɔ biliv? Wetin mek i biliv dis?

¹⁷ Wan brɔda we nɔ bin biliv pan Gɔd bin tɔk se: “Di tin dɛn we Gɔd mek dɔn ɛp mi fɔ biliv se Gɔd want lɛ mɔtalman ɛnjɔy layf, so i nɔ go alaw wi fɔ sɔfa sote go. Di mɔ we pipul dɛn de du wetin Jiova nɔ want, na di mɔ Jiova in yon pipul dɛn de gɛt fet, zil, ɛn lɔv. Na Jiova in spirit nɔmɔ de du dis kayn tin.”—Rid Pita In Fɔs Lɛta 4:1-4.

18. Wetin mek tu brɔda dɛn biliv se dɛn de na di tru rilijɔn? Aw yu fil bɔt dat?

¹⁸ Wan ɔda Jiova Witnɛs we dɔn sav Jiova fɔ lɔng tɛm bin tɔk wetin mek i biliv di tin dɛn we wi de prich. I tɔk se: “Di stɔdi we a de stɔdi di Baybul ɔl dɛn tɛm ya dɔn ɛp mi fɔ biliv se Jiova Witnɛs dɛn de tray tranga wan fɔ wɔship Gɔd lɛk aw dɛn fɔstɛm Kristian dɛn bin de wɔship Gɔd. As a de travul arawnd di wɔl, a dɔn si di wanwɔd we Jiova Witnɛs dɛn gɛt. Di tru tin dɛn we a dɔn lan na di Baybul dɔn mek a satisfay ɛn dɛn dɔn ɛp mi fɔ gɛt tru tru gladi at.” We dɛn aks wan brɔda we dɔn pas 60 ia, wetin mek i biliv se i dɔn fɛn di tru rilijɔn, i tɔk sɔntin bɔt Jizɔs Krays. Di brɔda tɔk se: “Wi dɔn tek tɛm fɔ stɔdi di we aw Jizɔs bin liv in layf ɛn di we aw i bin de prich to pipul dɛn ɛn wi gladi fɔ di ɛgzampul we i sɛt fɔ wi. Wi dɔn chenj di we aw wi bin de liv wi layf, ɛn Jizɔs Krays dɔn mek wi ebul fɔ kam nia Gɔd. Wi dɔn kam fɔ no se na di day we Jizɔs Krays day fɔ wi na in go mek wi sev. Ɛn wi dɔn kam fɔ no bak se Gɔd bin dɔn gi am layf bak. Ɛn bɔku pipul dɛn bin si am we i gɛt layf bak.”—Rid Fɔs Lɛta Fɔ Kɔrint 15:3-8.

19, 20. (a) Wetin Pɔl bin tɛl di Kristian dɛn na Rom fɔ du? (b) Us wok Jiova Witnɛs dɛn gɛt?

¹⁹ Tru Kristian dɛn rili lɛk pipul dɛn, na dat mek wi fɔ tɛl ɔda pipul dɛn bɔt di fayn fayn tin dɛn we wi dɔn lan. Pɔl bin tɛl di Kristian dɛn na Rom se: “If yu de yuz yu mɔt fɔ mek pipul dɛn no se Jizɔs na Masta, ɛn sho se yu biliv na yu at se Gɔd dɔn gi am layf bak, yu go sev. Na wit di at pɔsin kin sho se i biliv gud gud wan fɔ du wetin rayt, bɔt na di mɔt pɔsin go yuz fɔ ɛp pipul dɛn fɔ sev.”—Rom 10:9, 10.

²⁰ Wi Jiova Witnɛs dɛn, biliv se wi dɔn lan di tru tin dɛn bɔt Gɔd, ɛn wi no se wi fɔ prich di gud nyus bɔt Gɔd in Kiŋdɔm we gɛt fɔ kam rul di wɔl. So as wi de du wi prichin wok, lɛ wi nɔ jɔs tich pipul dɛn di Baybul, bɔt lɛ wi mek shɔ se di we aw wi de liv wi layf sho se wi de na di tru rilijɔn.