1. Aw Pɔl bin fil bɔt di wan dɛn we de du dɛn bɛst fɔ sav Jiova?

DI APƆSUL Pɔl bin mɛmba di wan dɛn we dɔn wok tranga wan fɔ kɛr di gud nyus go bifo. I bin rayt se: “Wi de kɔntinyu fɔ mɛmba ɔl una gud wok, di lɛk we una lɛk fɔ wok tranga wan, ɛn di bia we una de bia bikɔs una gɛt op pan wi Masta Jizɔs Krays bifo wi Gɔd ɛn wi Papa.” (1 Tɛs. 1:3) Jiova insɛf de mɛmba di wok we in fetful savant dɛn de du bikɔs dɛn lɛk am, ilɛksɛf na smɔl dɛn ebul fɔ du.—Ibru 6:10.

2. Wetin wi go tɔk bɔt insay dis atikul?

² Bɔku pan wi kɔmpin dɛn we de sav Jiova naw ɛn we bin dɔn sav Jiova trade, dɔn lɛf plɛnti tin biɛn fɔ lɛ dɛn ebul fɔ sav Jiova wit ɔl dɛn tɛm. Naw i go fayn lɛ wi kam tɔk bɔt aw sɔm Kristian dɛn bin de sav Gɔd di tɛm we di apɔsul dɛn bin de. Wi go tɔk bak bɔt di difrɛn we dɛn we wi go yuz ɔl wi tɛm fɔ sav Jiova, ɛn wi go si aw wi go ɛp di wan dɛn we de sav Jiova dis spɛshal we.

3, 4. (a) Aw sɔm Kristian dɛn we bin de trade trade bin de sav Jiova? (b) Aw dɛn bin de gɛt di tin dɛn we dɛn nid?

³ Jɔs afta Jizɔs bin baptayz, i bin bigin fɔ du di prichin wok we go rich ɔlsay na di wɔl. (Lyuk 3:21-23; 4:14, 15, 43) Afta i day, in  apɔsul dɛn kɔntinyu fɔ du dis wok ɛn mek shɔ se dis wok rich ɔlsay na di wɔl. (Akt 5:42; 6:7) Sɔm Kristian dɛn bin lɛf dɛn os dɛn fɔ go bi mishɔnari na ɔdasay dɛn. Fɔ ɛgzampul, Filip bin go prich na difrɛn say dɛn na Palestayn. (Akt 8:5, 40; 21:8) Pɔl ɛn in kɔmpin dɛn bin de travul na fa ples dɛn fɔ go prich di gud nyus. (Akt 13:2-4; 14:26; 2 Kɔr. 1:19) Ɔda Kristian dɛn lɛk Mak, Lyuk, ɛn Silvanɔs (we dɛn kin kɔl bak Saylas), bin rayt Baybul buk dɛn ɔ bin bi sɛktri to di wan dɛn we rayt Baybul buk dɛn. (1 Pit. 5:12) Sɔm Kristian sista dɛn bin de we de ɛp dɛn fetful brɔda dɛn ya. (Akt 18:26; Rom 16:1, 2) Ɔl dɛn tin ya we dɛn bin du, de ɛp fɔ mek wi ɛnjɔy we wi de rid frɔm Matyu to Rɛvɛleshɔn, ɛn dɛn de sho se Jiova de mɛmba di gud tin dɛn we in savant dɛn de du.

⁴ Aw di Kristian dɛn we bin de yuz ɔl dɛn tɛm fɔ sav Jiova trade trade, bin de gɛt tin fɔ it ɛn ɔda tin dɛn we dɛn nid? Sɔntɛnde, dɛn kɔmpin Kristian dɛn bin de gi dɛn tin fɔ it, say fɔ slip, ɛn ɔda tin dɛn we dɛn nid. Bɔt nɔto dɛn bin de aks dɛn kɔmpin Kristian dɛn fɔ ɛp dɛn. (1 Kɔr. 9:11-15) Sɔm brɔda dɛn bin de ɛp dɛn ɛn di kɔngrigeshɔn sɛf bin de ɛp dɛn. (Rid Di Apɔsul Dɛn Wok [Akt] 16:14, 15; Lɛta Fɔ Filipay 4:15-18.) Pɔl ɛn di ɔda brɔda dɛn we bin de travul wit am, bin de du ɔda af-af wok dɛn so dat dɛn go ebul fɔ kia fɔ dɛnsɛf.

5. Wetin wan brɔda ɛn in wɛf bin tɔk bɔt di we aw dɛn de yuz ɔl dɛn tɛm fɔ sav Jiova?

⁵ Tide sɛf, bɔku brɔda ɛn sista dɛn de yuz ɔl dɛn tɛm fɔ sav Jiova difrɛn difrɛn we dɛn. (Luk di bɔks we se “ Difrɛn We dɛn fɔ Yuz Ɔl Yu Tɛm fɔ Sav Jiova.”) Aw dɛn fil bɔt dis kayn we aw dɛn chuz fɔ yuz dɛn layf? Dis na fayn kwɛstyɔn we yu fɔ aks dɛn, ɛn yu go bɛnifit frɔm di ansa we dɛn go gi yu. Naw, lɛ wi tɔk bɔt wan ɛgzampul: Wan brɔda we bin dɔn sav as rɛgyula payɔnia, spɛshal payɔnia, mishɔnari, ɛn we rayt naw de sav as Bɛtɛlayt na ɔda kɔntri bin tɔk se: “Fɔ yuz ɔl mi tɛm fɔ sav Jiova na wan pan di bɛst tin dɛn we a dɔn ɛva chuz fɔ du. We a bin ol 18 ia, i nɔ bin izi fɔ mi fɔ disayd if a fɔ go yunivasiti, ɔ yuz ɔl mi tɛm fɔ wok, ɔ if a fɔ payɔnia. Di tin dɛn we a dɔn si dɔn sho mi se Jiova nɔ de ɛva fɔgɛt di tin dɛn we yu dɔn lɛf biɛn so dat yu go ebul fɔ yuz ɔl yu tɛm fɔ sav am. A dɔn ebul fɔ yuz di tin dɛn we Jiova dɔn mek a sabi. Ɛn di we aw a de yuz dɛn tin ya, dɔn pas di we aw a bin fɔ yuz dɛn if a bin de wok na di wɔl.” Dis brɔda in wɛf insɛf bin tɔk se: “Ɔl di wok dɛn we a dɔn du fɔ sav Jiova dɔn ɛp mi fɔ gɛt mɔ fet. Di we aw Jiova dɔn de protɛkt wi ɛn sho wi wetin fɔ du, pas di we aw i bin fɔ du am if wi nɔ bin disayd fɔ yuz ɔl wi tɛm fɔ sav am. A de tɛl Jiova tɛnki ɛvride bikɔs wi ebul fɔ yuz ɔl wi tɛm fɔ sav am.” Yu go lɛk fɔ yuz yu layf dis kayn we?

6. Aw Jiova de fil bɔt di tin dɛn we wi de du fɔ sav am?

⁶ Sɔm brɔda ɛn sista dɛn de we nɔ ebul fɔ yuz ɔl dɛn tɛm fɔ sav Jiova rayt naw. Bɔt stil, wi no se Jiova valyu di tin dɛn we dɛn de du fɔ sav am wit ɔl dɛn at. Tink bɔt ɔl di wan dɛn we Pɔl bin tɔk bɔt na Faylimɔn 1-3, ɛn ɔl di wan dɛn we bin de na di kɔngrigeshɔn na Kɔlɔse. (Rid.) Pɔl bin gladi fɔ di tin dɛn we dɛn de du, ɛn Jiova insɛf bin gladi fɔ dɛn. Tide sɛf, wi Papa we de na ɛvin gladi fɔ di tin dɛn we yu de du fɔ sav am. Bɔt naw, aw wi go ɛp di wan dɛn we de yuz ɔl dɛn tɛm fɔ sav Jiova?

7, 8. Wetin i min fɔ bi payɔnia? Aw ɔda pipul dɛn na di kɔngrigeshɔn go ɛp payɔnia dɛn?

⁷ Payɔnia dɛn we gɛt zil kin rili ɛnkɔrej di kɔngrigeshɔn, jɔs lɛk di wan dɛn we bin de prich di gud nyus insay di apɔsul dɛn tɛm.  Bɔku payɔnia dɛn de tray fɔ prich fɔ 70 awa ɛvri mɔnt. Aw yu go ebul fɔ ɛp dɛn?

⁸ Wan payɔnia sista we nem Shari bin tɔk se: “I kin tan lɛk se payɔnia dɛn nɔ gɛt sɔntin we de mɔna dɛn, bikɔs ɛvride, dɛn kin de na fil savis. Bɔt stil, dɛn nid pɔsin fɔ ɛnkɔrej dɛn.” (Rom 1:11, 12) Wan ɔda sista we bin ebul fɔ payɔnia fɔ sɔm tɛm bin tɔk se di payɔnia dɛn na in kɔngrigeshɔn de wok tranga wan ɛn dɛn nɔ de taya fɔ prich. Ɛn i kɔntinyu fɔ tɔk se, we ɔda brɔda ɛn sista dɛn kin invayt payɔnia dɛn na dɛn os fɔ go it, ɔ gi dɛn mɔni fɔ pe transpɔt, ɔ gi dɛn ɔda tin dɛn, dɛn kin gladi ɛn dis kin mek dɛn fil se ɔda pipul dɛn de we rili kia fɔ dɛn.

9, 10. Wetin sɔm brɔda ɛn sista dɛn dɔn du fɔ ɛp payɔnia dɛn we de na dɛn kɔngrigeshɔn?

⁹ Yu go lɛk fɔ ɛp payɔnia dɛn na di ministri? Wan payɔnia we nem Bɔbi bin tɔk se: “Wi nid mɔ sɔpɔt insay di wik.” Wan ɔda payɔnia we insɛf de na di sem kɔngrigeshɔn bin tɔk se: “Fɔ gɛt sɔmbɔdi we go wok wit yu aftanun tɛm, na rial prɔblɛm.” Wan sista we de wok na di Bruklin Bɛtɛl bin gladi fɔ tɔk bɔt di tɛm we i bin de payɔnia. I bin se: “Wan sista we bin gɛt motoka bin tɔk se, ‘Ɛnitɛm we yu nɔ gɛt pɔsin fɔ wok wit na di ministri, jɔs kɔl mi nɔmɔ, a go go wit yu.’ Dis sista bin rili ɛp mi fɔ kɔntinyu fɔ payɔnia.” Shari bin sho wi wan fayn tin we wi go du fɔ ɛp payɔnia dɛn. I se: “Afta payɔnia dɛn we nɔ mared, kin dɔn fɔ prich fɔ di de, dɛn nɔ kin gɛt nɔbɔdi fɔ kip kɔmpin wit. Wan wan tɛm, i go fayn lɛ wi de invayt brɔda ɛn sista dɛn we nɔ mared, fɔ jɔyn wi pan wi famili wɔship. We yu de kɔl dɛn fɔ du ɔda tin dɛn, dat go ɛp dɛn fɔ kɔntinyu fɔ payɔnia.”

¹⁰ We wan sista we dɔn yuz ɔl in tɛm fɔ sav Jiova fɔ lɛk 50 ia so, bin de tɔk bɔt di tɛm we i bin de payɔnia wit ɔda sista dɛn we nɔ mared, i bin tɔk se: “Di ɛlda dɛn bin de go fɛn di payɔnia dɛn ɛvri tu-tri mɔnt. Dɛn bin de aks bɔt wi wɛlbɔdi wan, di wok we wi de du, ɛn dɛn bin de chɛk fɔ si if wi gɛt ɛnitin we de mɔna wi. Dɛn bin rili sho se dɛn bisin bɔt wi. Dɛn bin de go fɛn wi na wi os dɛn fɔ no if wi nid ɛnitin we dɛn go ebul fɔ ɛp wi wit.” Dis kin mek wi mɛmba aw Pɔl bin gladi fɔ di gud tin dɛn we wan famili man na Ɛfisɔs bin du fɔ am.—2 Tim. 1:18.

11. Wetin i min fɔ bi spɛshal payɔnia?

 ¹¹ Sɔm kɔngrigeshɔn dɛn kin gɛt spɛshal payɔnia dɛn we de prich wit dɛn. Bɔku pan dɛn spɛshal payɔnia ya kin tray fɔ prich fɔ 130 awa ɛvri mɔnt. Bikɔs dɛn de yuz bɔku tɛm fɔ prich ɛn fɔ ɛp fɔ du ɔda tin dɛn, dɛn nɔ gɛt tɛm fɔ wok fɔ gɛt mɔni. So di branch ɔfis kin gi dɛn smɔl tin we di mɔnt dɔn so dat dɛn go pe atɛnshɔn pan di prichin wok we dɛn de du.

12. Aw ɛlda dɛn ɛn ɔda brɔda dɛn kin ɛp spɛshal payɔnia dɛn?

¹² Aw wi go ebul fɔ ɛp spɛshal payɔnia dɛn? Wan ɛlda we de wok na wan branch ɔfis ɛn we kin tɔk wit bɔku payɔnia dɛn bin tɔk se: “Di ɛlda dɛn nid fɔ de tɔk to dɛn payɔnia ya, tray fɔ no wetin de apin to dɛn, ɛn si aw dɛn go ebul fɔ ɛp dɛn. Sɔm Witnɛs dɛn kin tink se spɛshal payɔnia dɛn gɛt ɔltin bikɔs di branch de gi dɛn mɔni. Bɔt stil, ɔda we dɛn de we di brɔda dɛn na di kɔngrigeshɔn go ebul ɛp dɛn.” Jɔs lɛk rɛgyula payɔnia dɛn, spɛshal payɔnia dɛnsɛf kin gladi we dɛn gɛt pɔsin fɔ wok wit na di ministri. Yu go ebul fɔ ɛp dɛn dis we?

13, 14. (a) Wetin wi fɔ mɛmba bɔt sakit ovasia dɛn? (b) Wetin yu tink se yu go du fɔ ɛp di wan dɛn we de du sakit wok?

¹³ Wi kin si sakit ovasia ɛn dɛn wɛf dɛn as pipul dɛn we gɛt strɔng fet ɛn we kin ɛnkɔrej ɔda pipul dɛn. Na tru se na so dɛn de, bɔt stil, dɛnsɛf nid pɔsin fɔ ɛnkɔrej dɛn, ɛn wok wit dɛn na di ministri. Ɛn dɛn kin gladi we brɔda dɛn kin invayt dɛn fɔ du ɔda tin dɛn we kin mek dɛn ɛnjɔy. Wetin wi go du if dɛn sik ɛn de na ɔspitul, ɔ if dɛn gɛt fɔ du ɔpreshɔn pan dɛn? Dɛn go rili gladi we brɔda ɛn sista dɛn ɛp dɛn ɛn sho dɛn se dɛn bisin bɔt dɛn. I go mɔs bi se Lyuk, we rayt di Baybul buk we na Akt, go dɔn trit Pɔl ɛn in kɔmpin dɛn fayn, so na dat mek Pɔl bin tɔk se Lyuk “na di dɔktɔ we wi lɛk.”—Kɔl. 4:14; Akt 20:5–21:18.

¹⁴ Sakit ovasia ɛn dɛn wɛf dɛn nid pɔsin we go ɛnkɔrej dɛn ɛn bi dɛn tayt padi. Wan sakit ovasia bin se: “I tan lɛk se mi padi dɛn kin no we a nid pɔsin fɔ ɛnkɔrej mi. Dɛn kin tek tɛm fɔ aks mi kwɛstyɔn dɛn, ɛn dis kin ɛp mi fɔ tɔk bɔt wetin de wɔri mi. Di lisin sɛf we dɛn kin lisin to mi kin rili ɛp mi.” Sakit ovasia ɛn dɛn wɛf dɛn kin rili gladi we brɔda ɛn sista dɛn kin sho se dɛn lɛk dɛn.

15, 16. Us wok di wan dɛn we de wok na Bɛtɛl ɛn Asɛmbli Ɔl dɛn de du? Aw wi go ebul fɔ ɛp dɛn?

¹⁵ Di wan dɛn we de wok na Bɛtɛl ɛn dɛn Asɛmbli Ɔl dɛn, de sɔpɔt di prichin wok na di kɔntri dɛn we de ɔnda dɛn branch ɔfis. If yu kɔngrigeshɔn ɔ sakit gɛt Bɛtɛlayt dɛn, aks yusɛf dis kwɛstyɔn: ‘Aw a go sho se a de mɛmba dɛn?’

¹⁶ We brɔda ɛn sista dɛn kin jɔs go na Bɛtɛl, dɛn kin fil lɛk se dɛn nɔ gɛt nɔbɔdi fɔ tɔk to, bikɔs dɛn dɔn lɛf dɛn fambul ɛn padi dɛn. Bɔt dɛn kin gladi we dɛn kɔmpin Bɛtɛlayt dɛn ɛn di brɔda ɛn sista dɛn we de na di nyu kɔngrigeshɔn usay dɛn sɛn dɛn kin mek padi wit dɛn. (Mak 10:29, 30) Di wok we Bɛtɛlayt dɛn de du kin gi dɛn di chans fɔ go mitin ɛn fil savis ɛvri wik. Bɔt wan wan tɛm, Bɛtɛlayt dɛn kin gɛt ɔda wok dɛn we kin mek dɛn nɔ ebul fɔ go mitin ɔ fil savis. We wi brɔda ɛn sista dɛn ɔndastand dis ɛn sho se dɛn gladi fɔ di wok we di Bɛtɛlayt dɛn de du, ɔlman go bɛnifit.—Rid Fɔs Lɛta Fɔ Tɛsalonayka 2:9.

17, 18. Uskayn wok brɔda dɛn we kin yuz ɔl dɛn tɛm fɔ sav Jiova na ɔda kɔntri, kin du?

¹⁷ Di wan dɛn we kin go sav na ɔda kɔntri, kin gɛt fɔ it nyu fud dɛn, lan nyu langwej, ɛn  tray fɔ yus to di pipul dɛn kɔlchɔ. Ɛn dɛn gɛt fɔ yus to di we aw di pipul dɛn de liv. Wetin na di difrɛn we dɛn we brɔda dɛn kin yuz ɔl dɛn tɛm fɔ sav Jiova na ɔda kɔntri?

¹⁸ Sɔm dɛn de we na mishɔnari. Dɛn kin yuz ɔl dɛn tɛm na fil savis fɔ mek bɔku pipul dɛn bɛnifit frɔm di spɛshal trenin we dɛn dɔn gɛt. Di branch ɔfis kin gi di mishɔnari dɛn os fɔ de ɛn gi dɛn smɔl mɔni we dɛn go yuz fɔ kia fɔ dɛnsɛf. Ɔda brɔda dɛn de we dɛn kin sɛn na ɔda kɔntri. Dɛn brɔda ya kin wok na di branch ɔfis, ɔ ɛp fɔ bil di branch ɔfis, transleshɔn ɔfis dɛn we de fa frɔm di branch, Asɛmbli Ɔl dɛn, ɔ Kiŋdɔm Ɔl dɛn. Na di branch ɔfis ɔ di brɔda dɛn we de na di kɔntri kin kia fɔ dɛn brɔda ya. Dɛn kin gi dɛn tin fɔ it, say fɔ slip, ɛn du ɔda tin dɛn fɔ dɛn. Jɔs lɛk di Bɛtɛlayt dɛn, dɛn brɔda ya kin go mitin ɛn fil savis ɔltɛm. So di kɔngrigeshɔn kin bɛnifit frɔm wetin dɛn brɔda ya dɔn lan.

19. Wetin wi fɔ mɛmba bɔt di wan dɛn we de sav na ɔda kɔntri?

¹⁹ Wetin yu go du fɔ sho se yu de mɛmba dɛn brɔda ɛn sista ya we de yuz ɔl dɛn tɛm fɔ sav Jiova na ɔda kɔntri? Mɛmba se we dɛn kin jɔs kam, dɛn nɔ kin yus to di it dɛn we de na di kɔntri. So yu fɔ mɛmba dis we yu de invayt dɛn na yu os fɔ kam it. I go fayn lɛ yu aks dɛn fɔs wetin dɛn go lɛk fɔ it ɔ us nyu fud, dɛn go want lɛ yu kuk fɔ dɛn. Duya, peshɛnt wit dɛn as dɛn de lan di langwej ɛn di kɔlchɔ. I go tek sɔm tɛm bifo dɛn ɔndastand ɔl wetin yu de se. Ɛn i go fayn lɛ yu tek tɛm sho dɛn aw fɔ kɔl di wɔd dɛn fayn. Wan tin we yu fɔ no na dat, dɛn want fɔ lan!

20. Aw wi go ebul fɔ ɛp di wan dɛn we de yuz ɔl dɛn tɛm fɔ sav Jiova na ɔda kɔntri? Aw wi go ebul fɔ ɛp dɛn mama ɛn papa dɛn?

²⁰ As tɛm de go, na so di wan dɛn we de yuz ɔl dɛn tɛm fɔ sav Jiova, de ol, ɛn dɛn mama ɛn papa dɛnsɛf de ol. Mama ɛn papa dɛn we na Witnɛs dɛn, kin want mek dɛn pikin dɛn kɔntinyu fɔ yuz ɔl dɛn tɛm fɔ sav Jiova. (3 Jɔn 4) Bɔt stil, di wan dɛn we de yuz ɔl dɛn tɛm fɔ sav Jiova fɔ du ɔl wetin dɛn ebul fɔ du fɔ kia fɔ dɛn mama ɛn papa we dɔn ol, ɛn if nid de, dɛn fɔ go to dɛn fɔ ɛp dɛn. Ɛn di brɔda ɛn sista dɛn we de na di sem kɔngrigeshɔn wit dɛn brɔda ya dɛn mama ɛn papa, fɔ ɛp fɔ kia fɔ dɛn. I go fayn bak lɛ wi mɛmba se di brɔda dɛn we de yuz ɔl dɛn tɛm fɔ sav Jiova na ɔda kɔntri, gɛt siriɔs wok fɔ du we go ɛp fɔ kɛr di prichin wok go bifo. Ɛn dis prichin wok impɔtant pas ɛni ɔda wok na di wɔl. (Mat. 28:19, 20) Yu go ebul fɔ ɛp dɛn brɔda ya dɛn mama ɛn papa? Ɔ yu kɔngrigeshɔn go ebul fɔ ɛp dɛn?

21. Aw di wan dɛn we de yuz ɔl dɛn tɛm fɔ sav Jiova kin fil we ɔda pipul dɛn ɛp ɛn ɛnkɔrej dɛn?

²¹ Nɔto fɔ mɔni, dɛn brɔda ya de yuz ɔl dɛn tɛm fɔ sav Jiova, bɔt dɛn de du am bikɔs dɛn want fɔ gi Jiova dɛn bɛst ɛn ɛp ɔda pipul dɛn. Dɛn kin gladi pasmak we yu du ɛnitin fɔ ɛp dɛn. Wan sista we de sav na ɔda kɔntri, bin tɔk bɔt aw bɔku brɔda ɛn sista dɛn we de yuz ɔl dɛn tɛm fɔ sav Jiova, kin fil. I bin tɔk se: “Ilɛksɛf na shɔt lɛta dɛn rayt to yu fɔ tɛl yu aw dɛn gladi fɔ wetin yu de du, dis de sho se ɔda pipul dɛn de tink bɔt yu ɛn dɛn gladi fɔ wetin yu de du.”

22. Aw yu fil bɔt di wan dɛn we de yuz ɔl dɛn tɛm fɔ sav Jiova?

²² Fɔ yuz ɔl yu tɛm fɔ sav Jiova na di bɛst we aw yu go liv yu layf. Na wok we nɔ izi, bɔt i de mek yu lan bɔku tin ɛn ɛnjɔy yu layf. Na fayn we fɔ rɛdi yusɛf fɔ di wok we yu gɛt fɔ ɛnjɔy fɔ du ɔnda Gɔd in Kiŋdɔm. Ɛn na dis wok ɔl Jiova in fetful savant dɛn de wet fɔ du. So lɛ wi ɔl ‘kɔntinyu fɔ mɛmba di gud wok’ we di wan dɛn we de yuz ɔl dɛn tɛm fɔ sav Jiova, de du ɛn di we aw dɛn de “wok tranga wan” fɔ kɛr di gud nyus go bifo.—1 Tɛs. 1:3.