Mi famili bin de trade nia Lipzig, na di Ist pat na Jamani, we nɔ de fa frɔm di Chɛk ɛn Pɔlish bɔda dɛn te a ol fayv ia. We a ol siks ia wi famili muf go na ɔda kɔntri dɛn bikɔs ɔf mi papa in wok. Fɔs wi bin go na Brazil ɛn lɛta wi go na Ikwedɔ.

We a ol 14 ia, dɛn sɛn mi na wan bɔda skul insay Jamani. Bikɔs mi mama ɛn papa dɛn bin de na Sawt Amɛrika we bin de fa frɔm mi, a bin gɛt fɔ kia fɔ misɛf. So dat bin mek ɔda pɔsin nɔ bin de kɔntrol mi. A nɔ bin de pe tumɔs atɛnshɔn to aw di tin dɛn we a bin de du de afɛkt ɔda pipul dɛn.

We a ɔl 17 ia, mi mama ɛn papa bin kam bak na Jamani. Fɔs, a bin de wit dɛn na os. Bɔt bikɔs a nɔ want pɔsin fɔ kɔntrol mi, dat bin mek i nɔ pɔsibul fɔ mek a kɔntinyu fɔ de wit dɛn. So we a ol 18 ia, a bin lɛf os.

A bin rili tɔmɛnt bikɔs a bin de tray fɔ tink bɔt wetin a go du wit mi layf. Afta we a dɔn tek tɛm tink bɔt di difrɛn we dɛn aw pipul dɛn de liv ɛn di we aw difrɛn ɔganayzeshɔn dɛn de du tin, a bin kam fɔ si se di bɛst tin we a go du wit mi layf na fɔ travul na difrɛn difrɛn ples dɛn na dis fayn fayn wɔl bifo mɔtalman pwɛl am.

A bin lɛf Jamani, bay motobayk, ɛn go na Afrika. Bɔt i nɔ tu te, a bin kam bak na Yurop fɔ mek mi motobayk. Shɔt tɛm afta dat, a bin go na wan bitch insay Pɔtyugal. A bin disayd fɔ stɔp fɔ yuz motobayk fɔ de travul ɛn a bigin fɔ yuz bot.

A bin jɔyn yɔng pipul dɛn na wan grup we bin de rɛdi fɔ travul go na di Atlantik Oshɔn. Na da grup de a mit di uman we a mared, we nem Lɔri. Fɔs, wi travul go na di Karebian ayland dɛn. Dɔn, afta wi de fɔ shɔt tɛm na Poto Riko, wi bin go bak na Yurop. Wi bin op fɔ fɛn bot we wi go ebul fɔ mek ɛn liv insay de. Bɔt afta wi dɔn luk fɔ jɔs tri mɔnt, di projɛkt bin ɛnd jɔs lɛk dat. Dɛn bin mek a jɔyn di Jaman ami.

A bin de wit di Jaman navy ( sojaman dɛn we de fɛt na si) fɔ 15 mɔnt. Insay dɛn tɛm dɛn de, Mi ɛn Lɔri bin mared, ɛn wi bin rɛdi fɔ kɔntinyu fɔ de travul. Shɔt tɛm bifo a jɔyn di ami, wi bin bay wan bot in bɔdi. So we a jɔyn di ami, smɔl smɔl wi bin ebul fɔ mek di bot bɔdi to bot we wi go ebul fɔ travul wit. Wi bin plan fɔ liv insay di bot ɛn kɔntinyu fɔ travul na difrɛn difrɛn ples dɛn na dis fayn fayn wɔl. Na da tɛm de, dat na afta we a dɔn lɛf di ami bɔt bifo wi dɔn fɔ mek di bot, wi mit wit Jiova Witnɛs dɛn ɛn bigin fɔ stɔdi di Baybul.

Fɔs, a nɔ bin si nid fɔ chenj bɔku tin dɛn na mi layf. A bin mared di uman we a bin de wit, ɛn a bin dɔn ɔlrɛdi lɛf fɔ smok. (Ɛfishians 5:​5) Fɔ di plan dɛn we wi gɛt fɔ travul, a bin tink se we wi yuz wi layf fɔ wach di fayn fayn tin dɛn we Gɔd mek na tin we rili fayn fɔ du.

Bɔt di tru na dat, a bin nid fɔ mek sɔm chenj dɛn, mɔ we i kam to mi abit dɛn. Bikɔs a bin rili prawd ɛn nɔ want pɔsin fɔ kɔntrol mi, a bin jɔs pe atɛnshɔn to wetin a ebul fɔ du ɛn di tin dɛn we a dɔn du. A bin jɔs bisin bɔt misɛf.

Wan de, a bin rid wetin Jizɔs bin tɔk ɔp wan mawntin. (Matyu, chapta 5-7) Fɔs, a nɔ bin rili ɔndastand wetin Jizɔs bin se bɔt aw pɔsin go gɛt gladi-at. Fɔ ɛgzampul, i se di wan dɛn we angri ɛn tɔsti go gladi. (Matyu 5:​6) So a bin de wonda, aw pɔsin we angri ɛn tɔsti go gladi. As a kɔntinyu fɔ stɔdi, a bin kam fɔ no se wi ɔl gɛt spirichwal nid bɔt wi fɔ gri se wi gɛt da nid de bifo wi go ebul fɔ satisfay am. Na jɔs lɛk wetin Jizɔs se: “Di wan dɛn we no se dɛn nid fɔ lan bɔt Gɔd gɛt gladi-at.”​—Matyu 5:​3.

Afta we wi bigin fɔ stɔdi di Baybul na Jamani, Mi ɛn Lɔri bin travul go na Frans, ɛn lɛta wi go na Itali. Ɛnisay we wi bin de go, wi bin de mit Jiova Witnɛs dɛn. A bin rili sɔprayz we a si di kayn we aw dɛn lɛk dɛnsɛf ɛn di wanwod we dɛn gɛt. I bin kam fɔ si se Jiova Witnɛs dɛn na famili we de ɔlsay na di wɔl. (Jɔn 13:​34, 35) As tɛm de go, Mi ɛn Lɔri bin baptayz as Jiova Witnɛs dɛn.

Afta wi baptayz, a bin kɔntinyu fɔ mek chenj dɛn na mi layf. Mi ɛn Lɔri bin disayd fɔ travul wit wi bot go na Afrika, dɔn wi krɔs di Atlantik Oshɔn fɔ go na Amɛrika. We wi bin de midul di si insay wi smɔl bot, na da tɛm de a no se a nɔ impɔtant we a kɔmpia misɛf to wi wɔndaful Gɔd we mek ɔltin. A bin gɛt bɔku tɛm, a nɔ bin gɛt bɛtɛ tin fɔ du we wi bin de midul di si, so a disayd fɔ spɛnd bɔku tɛm fɔ de rid di Baybul. We a rid bɔt Jizɔs in layf na di wɔl, dat bin rili tɔch mi at. In na bin pafɛkt man we gɛt kwaliti dɛn we a nɔ go ivin ebul fɔ imajin, bɔt stil i nɔ bin pe atɛnshɔn to insɛf. I nɔ bin de liv in layf di we aw i want bɔt na aw in Papa we de na ɛvin want.

We a tek tɛm tink bɔt Jizɔs in ɛgzampul, a si se a nid fɔ put Gɔd in Kiŋdɔm fɔs na mi layf ɛn nɔ yuz mi layf fɔ du di difrɛn difrɛn tin dɛn we a bin want fɔ du. (Matyu 6:​33) We Mi ɛn Lɔri bin rich na Amɛrika, wi bin disayd fɔ sɛtul de ɛn pe atɛnshɔn pan wi wɔship.

Trade, we a bin jɔs bisin bɔt misɛf a nɔ bin tu shɔ bɔt di tin dɛn we a bin de disayd fɔ du. Bɔt naw, a dɔn fɛn pɔsin we rili gɛt sɛns fɔ gayd mi. (Ayzaya 48:​17, 18) Dɔn bak, we a de wɔship Gɔd ɛn ɛp ɔda pipul dɛn fɔ lan bɔt am, dat dɔn mek mi layf gɛt minin pas trade.

We wi de aplay Baybul prinsipul dɛn, dat dɔn ɛp wi mared os fɔ go bifo. Jiova blɛs wi wit fayn galpikin we no Jiova ɛn lɛk am.

Nɔto ɔltɛm tin kin izi fɔ wi. Bɔt wit Jiova in ɛp, wi dɔn mekɔp wi maynd nɔ fɔ ɛva giv-ɔp ɔ fɔ lɛf fɔ abop pan am.​—Prɔvabs 3:​5, 6.