Bɔku pipul dɛn ɔlsay na di wɔl biliv se na Gɔd in Kiŋdɔm mek dɛn gɛt op fɔ di tumara bambay. Dɛn de falamakata Jizɔs in ɛgzampul, we i bin tich in disaypul dɛn fɔ pre se: “Lɛ yu Kiŋdɔm kam. Mek wetin yu want, bi na di wɔl.”—Matyu 6:10.

Yu go sɔprays fɔ no se pan ɔl we bɔku pipul dɛn rili want fɔ no bɔt Gɔd in Kiŋdɔm, bɔku rilijɔn dɛn nɔ de tɔk tumɔs bɔt am. Na dat mek wan man we nem H. G. Wɛls, we de rayt bɔt tin dɛn we dɔn apin, bin rayt se Jizɔs bin “yuz ɔl in tɛm . . . fɔ tich pipul dɛn bɔt di Kiŋdɔm we De na Ɛvin,” bɔt pan ɔl dat, H. G. Wɛls se “bɔku chɔch dɛn nɔ de tich se Gɔd in Kiŋdɔm . . . rili impɔtant.”

Jiova Witnɛs dɛn nɔ tan lɛk dɛn chɔch dɛn. Dɛn de put mɔ atɛnshɔn pan Gɔd in Kiŋdɔm. Tink bɔt dis: Wi men buk we yu de rid so naw, de insay 220 langwej dɛn. Na lɛk 46 milyɔn kɔpi dɛn kin print ɛn dɛn dɔn sheb dis buk pas ɔl ɔda buk dɛn na di wɔl. Wetin na di men tin we dis buk de tɔk bɔt? Notis wetin di ful taytul se: Di Wachtawa De Tɔk bɔt Jiova in Kiŋdɔm.  *

Wetin mek Jiova Witnɛs dɛn de tray tranga wan fɔ tɔk bɔt Gɔd in Kiŋdɔm? Wan rizin na dat, wi biliv se insay di buk we impɔtant pas ɔl we na di Baybul, di men mɛsej we de de na bɔt Gɔd in Kiŋdɔm. Apat frɔm dat, wi biliv gud gud wan se na Gɔd in Kiŋdɔm nɔmɔ go sɔlv di prɔblɛm dɛn we de mit mɔtalman.

Jiova Witnɛs dɛn de ɛp pipul dɛn fɔ no bɔt Gɔd in Kiŋdɔm, bikɔs dɛn de tray fɔ falamakata Jizɔs in ɛgzampul. We Jizɔs bin de na di wɔl, di tin we bin impɔtant pas ɔl na in layf na Gɔd in Kiŋdɔm ɛn na in na bin di men tin we i bin de prich bɔt. (Lyuk 4:43) Wetin mek di Kiŋdɔm bin impɔtant to Jizɔs? Ɛn wetin di Kiŋdɔm go du fɔ yu? Yu go gɛt di Baybul in ansa dɛn insay di ɔda atikul dɛn.