DI TƆPIK NA DI FRƆNT PEJ | SETAN NA RIAL PƆSIN?
Wi Fɔ Fred Setan?
Sɔntin de we at fɔ si. I nɔ gɛt kɔlɔ ɛn yu nɔ go ebul fɔ smɛl am. Pipul dɛn nɔ kin ivin no se na in de kil dɛn. I go mɔs bi se na in kin kil af pan di pipul dɛn we pɔyzin dɔn kil. Wetin na dis tin? Na kabɔn monoɔgzayd. Bɔt nid nɔ de fɔ fred. Bɔku we de fɔ no bɔt dis gas ɛn protɛkt yusɛf. Bɔku pipul dɛn dɔn fik mashin dɛn we kin mek dɛn no we dis gas de arawnd ɛn dɛn kin tray fɔ kɔmɔt na di ples we di mashin alam.
Jɔs lɛk aw wi nɔ de si kabɔn monoɔgzayd, na so wi nɔ de si Setan. Setan tu wikɛd, ɛn i at fɔ lɛ mɔtalman no bɔt in we dɛn. Bɔt Gɔd nɔ lɛf wi so nɔmɔ, i gi wi sɔntin fɔ ɛp wi. So nid nɔ de fɔ fred Setan if yu du dɛn tin ya we Gɔd dɔn tɛl wi fɔ du.
Yu gɛt fɔ disayd. Jems 4:7 tɛl wi se: “Una nɔ du wetin di Dɛbul want, ɛn i go rɔnawe pan una.” Pan ɔl we Setan gɛt pawa, i nɔ go ebul fɔ fos yu fɔ du sɔntin we yu nɔ want fɔ du. Yu gɛt fɔ disayd wetin fɔ du. Pita In Fɔs Lɛta 5:9 se: “Una nɔ du wetin [Setan] want, una tinap tranga wan fɔ di tin dɛn we una biliv.” Mɛmba se, Setan bin lɛf Jizɔs we Jizɔs nɔ gri fɔ du di tri tin dɛn we i bin want lɛ i du. (Matyu 4:11) Yusɛf kin disayd nɔ fɔ du wetin Setan want.
Mek padi biznɛs wit Gɔd. Jems 4:8 ɛnkɔrej wi fɔ “kam nia Gɔd.” Na Jiova insɛf sɛf want lɛ yu bi in tayt padi. Aw yu go ebul fɔ du dat? Di bɛst we fɔ bigin na we yu de lan mɔ bɔt am na di Baybul. (Jɔn 17:3) Di tin dɛn we yu de lan bɔt Jiova go mek yu lɛk am, ɛn dis lɛk we yu go lɛk am go mek yu du wetin i want. (1 Jɔn 5:3) As yu de kam nia yu Papa we de na ɛvin, wetin insɛf go du? Jems kɔntinyu fɔ se, ‘Gɔd go kam nia yu.’
Jiova de gi yu tin dɛn we go protɛkt yu
Gɔd prɔmis fɔ protɛkt wi. Prɔvabs 18:10 se: “Jiova in nem tan lɛk strɔng tawa. Di wan dɛn we de du wetin rayt de rɔn go de ɛn i de protɛkt dɛn.” Dis nɔ min se Gɔd in nem na sɔntin we wi go jɔs kɔl ɛn gɛt gud lɔk. Bɔt i min se di wan dɛn we de du wetin Gɔd want kin kɔl in nem ɛnitɛm fɔ lɛ i protɛkt dɛn.
Wan ɛgzampul na di Baybul. Di Apɔsul Dɛn Wok [Akt] 19:19 tɛl wi wan fayn tin we di pipul dɛn na Ɛfisɔs bin du jɔs afta dɛn bi Kristian. I se: “Bɔku pan di wan dɛn we bin de ple majik bin briŋ dɛn majik buk dɛn wan ples ɛn bɔn dɛn bifo ɔlman. Ɛn we dɛn chɛk di mɔni we dɛn tek fɔ bay di buk dɛn, i rich 50,000 silva mɔni.” * Dɛn Kristian ya bin bɔn ɛnitin we dɛn bin gɛt we bin gɛt sɔntin fɔ du wit juju biznɛs, pan ɔl we na bin dia dia tin dɛn. Dis na fayn fayn ɛgzampul fɔ wi. Di wɔl we wi de insay tide ful-ɔp wit ɔlkayn juju biznɛs. Ivin juju tin dɛn we wi kin fil se nɔ bad ɛn ɔda tin dɛn we wi kin du we wi kin fil se nɔ bad kin mek dɛbul dɛn kam wi we. I go fayn lɛ wi nɔ gɛt natin fɔ du wit dɛn tin dɛn ya, no mata wetin wi go lɔs.—Dyutɔrɔnɔmi 18:10-12.
Rogɛlio we wi bin tɔk bɔt na di fɔs atikul, nɔ bin biliv se Setan de te i ol 50 ia. Bɔt leta i bin chenj di we aw i de tink. Wetin mek? Rogɛlio se: “Fɔ di fɔs tɛm na mi layf, a gɛt Baybul. Di tin dɛn we a bin de lan na di Baybul mek a biliv se Setan de. Na dɛn sem tin ya we a dɔn lan de ɛp mi mek a nɔ fɔdɔm na in trap.”
“Di tin dɛn we a bin de lan na di Baybul mek a biliv se Setan de. Na dɛn sem tin ya we a dɔn lan de ɛp mi mek a nɔ fɔdɔm na in trap”
Yu go lɛk fɔ si di de we Setan nɔ go de igen? I pɔsibul fɔ lɛ yu si da de de. Di Baybul se tɛm de kam we dɛn go trowe Setan, we de ful bɔku pipul dɛn, “insay di wata we gɛt faya ɛn sɔlfɔ.” (Rɛvɛleshɔn 20:10) Wi no se tru tru faya ɛn sɔlfɔ nɔ go ebul du natin to spirit pɔsin. So, di wata we faya de kech pan, usay dɛn gɛt fɔ trowe Setan, min se Setan nɔ go de igen igen. Setan nɔ go ɛva de igen. Ɔl di wan dɛn we lɛk Gɔd go rili gladi da tɛm de.
Te da tɛm de rich, kɔntinyu fɔ lan ɔl wetin yu ebul lan bɔt Jiova ɛn di tin dɛn we i de du. * Jɔs tink bɔt aw i go tan lɛk fɔ liv di tɛm we dɛn go se, “Setan nɔ de igen!”
^ par. 8 If di silva mɔni we dɛn tɔk bɔt na ya na di Roman dinayrɔs, dat min se na bin bɔku bɔku mɔni! Pɔsin fɔ wok fɔ lɛk 50,000 dez fɔ gɛt dis kayn mɔni.
^ par. 11 If yu want fɔ no mɔ bɔt Setan ɛn aw Gɔd si juju biznɛs, na fɔ rid chapta 10 na wan buk we dɛn kɔl Wetin Rili di Baybul De Tich? Aks ɛni Jiova Witnɛs fɔ gi yu am.
