Sɔm pipul dɛn we de sav Gɔd dɔn tɔk sɔntin lɛk dis we dɛn de fɛn pɔsin fɔ mared. Bɔt pan ɔl we dɛn kin tɔk so, dɛn sabi di advays we di apɔsul Pɔl bin gi we i se Kristian dɛn fɔ mared pɔsin we “biliv di Masta.” Dis advays na fɔ ɔlman we na Kristian. (1 Kɔr. 7:39) So, wetin mek naw dɛn kin tɔk so?

Di wan dɛn we kin tɔk so kin fil se sista dɛn bɔku pas brɔda dɛn. Na so i kin bi na bɔku kɔntri dɛn. Lɛ wi tɔk bɔt tu ɛgzampul dɛn: Na Koria, we yu kɔnt 100 Witnɛs dɛn we nɔ mared, 57 pan dɛn na sista dɛn ɛn 43 na brɔda dɛn. Na Kolombia, we yu kɔnt 100 Witnɛs dɛn we nɔ mared, 66 pan dɛn na sista dɛn ɛn 34 na brɔda dɛn.

Na sɔm kɔntri dɛn, mama ɛn papa dɛn we nɔto Witnɛs kin kɔl fɔ bɔku bɔku mɔni bifo pɔsin mared dɛn gyal pikin, so dis kin mek i nɔ izi fɔ brɔda dɛn we nɔ gɛt bɛtɛ mɔni, fɔ mared. We sista dɛn kin tink bɔt dɛn kayn tin ya, dɛn kin fil se i nɔ go izi fɔ mared sɔmbɔdi we “biliv di Masta.” So dɛn kin aks se, “I mek sɛns fɔ lɛ a tink se a go gɛt di kayn pɔsin we a want insay Jiova in ɔganayzeshɔn?” *

If yu dɔn ɛva tink bɔt dɛn tin ya, i go fayn lɛ yu no se Jiova no wetin de apin to yu. Fɔ tru, i no aw yu de fil bɔt dis.—2 Krɔn. 6:29, 30.

Bɔt stil, Jiova dɔn rayt na in Wɔd se na to pɔsin nɔmɔ we biliv di Masta, Kristian dɛn fɔ mared to. Wetin mek? Bikɔs i no wetin gud fɔ  in pipul dɛn. I want fɔ protɛkt in savant dɛn frɔm di pen we dɛn go fil na dɛn at if dɛn du sɔntin we nɔ rayt ɛn i want bak lɛ dɛn gɛt gladi at. Insay Nɛimaya in tɛm, bɔku Ju pipul dɛn bin de mared to pipul dɛn we nɔ de sav Jiova, so Nɛimaya bin mɛmba dɛn bɔt Sɔlɔmɔn in bad ɛgzampul. Pan ɔl we “Gɔd bin lɛk” Sɔlɔmɔn, “in wɛf dɛn we nɔto Izrɛlayt bin mek i sin.” (Nɛi. 13:23-26) So na dis mek Gɔd dɔn tɛl di wan dɛn we de wɔship am, fɔ mared to pɔsin we de wɔship am di rayt we. I du dat fɔ dɛn yon bɛtɛ wan. (Sam 19:7-10; Ayz. 48:17, 18) Tru Kristian dɛn gladi we Gɔd de sho se i lɛk dɛn ɛn bisin bɔt dɛn, ɛn dɛn abop pan am fɔ sho dɛn wetin fɔ du. We dɛn alaw Jiova fɔ rul dɛn, dɛn de sho se na in na di Rula we gɛt pawa pas ɔlman.—Prɔv. 1:5.

Yu nɔ go want fɔ “jɔyn” yusɛf wit pɔsin we go pul kɔmɔt nia Gɔd. (2 Kɔr. 6:14) Bɔku Kristian dɛn tide dɔn obe Gɔd in lɔ ɛn dɛn dɔn kam fɔ si se na di rayt tin dɛn dɔn du. Bɔt ɔda wan dɛn dɔn disayd fɔ pwɛl Gɔd in lɔ.

Wan sista na Ɔstrelia, we nem Magi, * bin tɔk bɔt wetin bin apin to am we i kip sɔmbɔdi we nɔ de sav Jiova. I se: “A bin de mis bɔku mitin jɔs fɔ de wit am. A nɔ bin de ebul fɔ du bɔku tin we a bin de du fɔ sav Jiova.” Wan sista na India we nem Ratana, bigin fɔ lɛk wan in klasmet we bigin stɔdi di Baybul. Bɔt as tɛm de go, in klasmet sho klia wan se i bin jɔs want mek in ɛn Ratana de. Ratana ɛnd ɔp fɔ kɔmɔt na di trut ɛn i ivin go jɔyn ɔda rilijɔn jɔs fɔ lɛ dɛn mared.

Wan ɔda ɛgzampul na bɔt wan sista we nem Dɛnke, we de na Kamɛrun. I bin ol 19 ia we i mared. Di man we i mared to bin prɔmis am se i nɔ go ambɔg am pan in rilijɔn. Bɔt tu wiks afta dɛn mared, in man bin stɔp am fɔ go mitin. Di sista tɔk se: “A bin de fil lɛk se na mi wangren de ɛn a bin de kray. A kam fɔ no se a nɔ ebul fɔ kɔntrol mi layf igen. A bin de fil bad ɔltɛm.”

Nɔto ɔlman we kin mared to pɔsin we nɔ de sav Jiova kin gɛt dɛn prɔblɛm ya. Di pɔsin we dɛn kin mared to, nɔ kin bad ɛn i kin ɔndastand. Bɔt, ivin if yu nɔ gɛt dɛn prɔblɛm ya we yu mared to pɔsin we nɔ de sav Jiova, i go stil fayn fɔ lɛ yu tink bɔt dɛn kwɛstyɔn ya: Aw dis go ambɔg mi padi biznɛs wit Jiova? Aw a go fil we a kam fɔ no se a nɔ bin lisin to di fayn advays we i bin gi mi fɔ mi yon gud? Ɛn di kwɛstyɔn we impɔtant pas ɔl na, aw Jiova go fil bɔt dis tin we a dɔn disayd fɔ du?—Prɔv. 1:33.

Brɔda ɛn sista dɛn we de ɔlsay na di wɔl go gri se fɔ mared to pɔsin we “biliv di Masta” na di bɛst tin fɔ du. Di wan dɛn we nɔ mared yet, rɛdi fɔ mek Gɔd in at gladi, dɛn dɔn mekɔp dɛn maynd se na pɔsin nɔmɔ we de wɔship Jiova dɛn go mared. We wan sista na Jepan, we nem Michiko, nɔ bin mared yet, in fambul dɛn bin de mɔna am fɔ mared to pɔsin we nɔto witnɛs. Pan ɔl we i bin de tray nɔ fɔ du wetin dɛn want, i bin stil gɛt ɔda tin we bin de mɔna am. I bin de si sɔm pan in padi dɛn ɛn sɔm pipul dɛn we i sabi, de mared insay di kɔngrigeshɔn. Dis sista tɔk se: “A kɔntinyu fɔ tɛl misɛf se Jiova na ‘Gɔd we gladi ɔltɛm,’ so wi gladi wan nɔ gɛt natin fɔ du wit if wi mared ɔ wi nɔ mared. A biliv bak se Jiova kin gi wi wetin wi want. So if wi nɔ gɛt pɔsin pan ɔl we wi want fɔ mared, i go fayn fɔ lɛ wi de so fɔs te wi gɛt pɔsin fɔ mared.” (1 Tim. 1:11) Michiko bin ɛnd ɔp fɔ mared to wan gud brɔda, ɛn i gladi we i bin wet.

Sɔm brɔda dɛn de we dɛnsɛf dɔn wet fɔ di rayt pɔsin we dɛn want fɔ mared. Wan pan dɛn brɔda ya na Bil we de na Ɔstrelia. I tɔk se i bin want sɔm uman dɛn we nɔ de na di kɔngrigeshɔn. Bɔt i bin de tray nɔ fɔ mek padi wit dɛn. Wetin du? Na bikɔs i nɔ bin want fɔ du ɛnitin we go mek i “jɔyn” insɛf to pɔsin we nɔ de wɔship Jiova. I bin  si sɔm sista dɛn we i bin lɛk, bɔt di sista dɛn nɔ bin lɛk am. Bil bin gɛt fɔ wet fɔ 30 ia bifo i gɛt wan sista we dɛn ɔl tu fit. Bil se: “A nɔ rigrɛt am atɔl. Dis na rial blɛsin, wi de go fil savis togɛda, stɔdi togɛda, ɛn wɔship togɛda. A kin gladi fɔ si mi wɛf in padi dɛn ɛn spɛn tɛm wit dɛn bikɔs dɛnsɛf de wɔship Jiova. Wi kin yuz di advays dɛn we de na di Baybul fɔ mek wi mared go bifo.”

Wetin yu fɔ de du we yu dɔn lɛf ɔltin na Jiova in an? Wan tin we yu kin du na fɔ tink bɔt wetin mek yu nɔ mared. If yu fil se di men rizin we mek yu nɔ mared yet na bikɔs yu want obe di lɔ we di Baybul gi we i se na to pɔsin nɔmɔ we “biliv di Masta” Kristian dɛn fɔ mared, na gud tin yu dɔn du we yu sho se yu rɛspɛkt di lɔ we Jiova gi. Wan tin we yu fɔ no na dat Jiova gladi we yu dɔn tinap tranga wan fɔ obe di lɔ we de na in Wɔd, di Baybul. (1 Sam. 15:22; Prɔv. 27:11) Kɔntinyu fɔ tɛl Gɔd ɔl wetin de na yu at we yu de pre to am. (Sam 62:8) We yu de pre to Jiova ɔltɛm ɛn wit ɔl yu at, dat de mek yu prea gɛt mɔ minin. Yu padi biznɛs wit Gɔd go de go bifo ɛvride we yu tinap tranga wan pan ɔl we yu at ɛn ɔda pipul dɛn go want mek yu du wetin nɔ rayt. Wan ɔda tin we yu fɔ no na dat Jiova we de pantap ɔlman, lɛk in fetful savant dɛn ɛn yu valyu na in yay. I bisin bɔt yu, i no wetin yu nid ɛn wetin yu want. I nɔ prɔmis se i go gi yu pɔsin fɔ mared. Bɔt if yu rili nid pɔsin fɔ mared, Gɔd no di bɛst we fɔ satisfay yu.—Sam 145:16; Mat. 6:32.

Sɔm tɛm dɛn de, yu go fil lɛk Devid we bin rayt sɔm pan di Sam dɛn. I bin se: “O Jiova, duya ansa mi kwik wan; mi trɛnk dɔn dɔn. Nɔ ayd yu fes pan mi.” (Sam 143:5-7, 10) We tin lɛk dis apin to yu, gi Jiova tɛm fɔ sho yu wetin i want lɛ yu du. Aw yu go ebul fɔ du dat? Fɛn tɛm fɔ rid in Wɔd, di Baybul, ɛn tink gud wan bɔt di tin dɛn we yu de rid. We yu du dat, yu go no in lɔ dɛn ɛn yu go si aw i bin ɛp in pipul dɛn trade. We yu de lisin to am, yu de biliv mɔ ɛn mɔ se i mek sɛns fɔ obe am.

Wetin igen yu go du fɔ mek yu gɛt gladi at ɛn ɛnjɔy yu layf di tɛm we yu nɔ mared yet? Yu kin lan aw fɔ si tin di we aw Jiova de si am, tray fɔ gɛt fri an, tray fɔ de wok tranga wan, tray fɔ nays to pipul dɛn, tray fɔ wɔship Jiova wit ɔl yu at, ɛn tray fɔ gɛt gudnem. Ɔl dɛn tin ya go ɛp yu fɔ gɛt gladi at we yu go dɔn gɛt yu yon famili. (Jɛn. 24:16-21; Rut 1:16, 17; 2:6, 7, 11; Prɔv. 31:10-27) Put Gɔd in Kiŋdɔm fɔs na yu layf. Yu kin du dis bay we yu de du yu bɛst fɔ prich di gud nyus ɛn du ɔda tin dɛn we Kristian dɛn fɔ du. I fayn fɔ du dɛn tin ya bikɔs dɛn go protɛkt yu. Bil, we wi bin dɔn tɔk bɔt, tɛl wi bɔt di tɛm we i bin want fɔ mared. I se: “Di tɛm pas kwik kwik wan! A yuz da tɛm de fɔ sav Jiova as rɛgyula payɔnia.”

So, i stil mek sɛns fɔ mared pɔsin we “biliv di Masta.” We yu obe dis lɔ, i go sho se yu rɛspɛkt Jiova ɛn yu go gɛt gladi at sote go. Di Baybul se: “Di pɔsin we de fred Jiova go gladi ɛn di pɔsin we de ɛnjɔy fɔ du wetin i want go gladi. I go gɛt bɔku jɛntri na in os, ɛn i go kɔntinyu fɔ du wetin rayt sote go.” (Sam 112:1, 3) So, mekɔp yu maynd fɔ obe Gɔd in lɔ ɛn mared to pɔsin nɔmɔ we “biliv di Masta.”