Fɔ lɔng tɛm naw, wi buk ɛn magazin dɛn bin de ɛksplen se Gɔg we de na Megɔg na di nem we dɛn gi Setan di Dɛbul afta dɛn drɛb am na ɛvin. Wi bin de ɛksplen am dis we bikɔs di Baybul buk we na Rɛvɛleshɔn sho se na Setan gɛt fɔ de bifo di wan dɛn we gɛt fɔ atak Gɔd in pipul dɛn ɔlsay na di wɔl. (Rɛv. 12:1-17) So wi bin de tink se Gɔg na ɔda nem fɔ Setan.

Bɔt dis we aw wi bin de ɛksplen am kam wit sɔm impɔtant kwɛstyɔn dɛn. Wetin mek? Tink bɔt dis: We Jiova bin de tɔk bɔt di tɛm we Gɔg nɔ go de igen, i bin tɛl Gɔg se: “A go mek yu bi tin fɔ it to ɔlkayn bɔd ɛn wayl animal dɛn.” (Izik. 39:4) Jiova tɔk bak se: “Da de de, a go gi Gɔg bɛringrɔn na Izrɛl . . . Na de dɛn go bɛr Gɔg ɛn ɔl di wan dɛn we de wit am.” (Izik. 39:11) Bɔt aw “bɔd ɛn wayl animal dɛn” go it pɔsin we na spirit? Aw dɛn go gi Setan “bɛringrɔn” na di wɔl? Di Baybul sho klia wan se dɛn nɔ gɛt fɔ it ɔ bɛr Setan, bɔt dɛn go put am na wan ol we nɔ gɛt bɔtɔm, fɔ 1,000 ia.—Rɛv. 20:1, 2.

Di Baybul tɛl wi se we di 1,000 ia dɔn, dɛn go pul Setan na di ol we nɔ gɛt bɔtɔm, ɛn “i go go fɔ ful dɛn neshɔn dɛn we de na di 4 kɔna dɛn na di wɔl, Gɔg ɛn Megɔg, fɔ gɛda dɛn togɛda fɔ di wɔ.” (Rɛv. 20:8) Bɔt aw Setan go ful Gɔg if na in na Gɔg? So di “Gɔg” we Izikɛl ɛn Rɛvɛleshɔn de tɔk bɔt nɔto Setan.

Udat naw na Gɔg we de na Megɔg? Fɔ no di ansa, wi nid fɔ luk insay di Baybul fɔ no udat gɛt fɔ atak Gɔd in pipul dɛn. Di Baybul nɔ jɔs tɔk bɔt di atak we “Gɔg we de na Megɔg” gɛt fɔ atak, bɔt i tɔk bak bɔt di atak we “di kiŋ we de na di nɔt” gɛt fɔ atak ɛn di atak we “di kiŋ dɛn na di wɔl” gɛt fɔ atak. (Izik. 38:2, 10-13; Dan. 11:40, 44, 45; Rɛv. 17:14; 19:19) Fɔ se ɔl dɛn atak ya na difrɛn difrɛn atak dɛn? Nɔto so i luk lɛk. I tan lɛk se di Baybul de yuz difrɛn nem dɛn fɔ tɔk bɔt di sem atak. Wetin mek wi se so? Na bikɔs di Baybul tɛl wi se ɔl di neshɔn dɛn na di wɔl go kam togɛda fɔ atak Gɔd in pipul dɛn fɔ di las tɛm ɛn na dat go briŋ kam Amagɛdɔn.—Rɛv. 16:14, 16.

 Wi we kɔmpia ɔl dɛn skripchɔ ya na di Baybul we de tɔk bɔt di las atak we dɛn gɛt fɔ atak Gɔd in pipul dɛn, wi de si klia wan se di nem Gɔg we de na Megɔg, nɔto Setan, bɔt na di neshɔn dɛn we gɛt fɔ kam togɛda. Fɔ se na “di kiŋ we de na di nɔt” go de bifo di neshɔn dɛn we gɛt fɔ atak Gɔd in pipul dɛn? Wi nɔ shɔ bɔt dat. Bɔt dis gri wit wetin Jiova bin tɔk bɔt Gɔg. I bin se: “Yu go kɔmɔt usay yu de ɛn kam, yu go kɔmɔt na di say we fa pas ɔl na di nɔt, yu ɛn bɔku ɔda pipul dɛn we go de wit yu, dɛn ɔl de rayd ɔs, dɛn bɔku te dɛn bɔku, dɛn ɔl na bɔku bɔku amiman dɛn.”—Izik. 38:6, 15.

Semweso, di prɔfɛt Daniɛl we bin de di tɛm we Izikɛl bin de, tɔk bɔt di kiŋ we de na di nɔt. I se: “Di tin dɛn we i go yɛri frɔm di ist ɛn di nɔt go mɔna am, ɛn i go vɛks bad bad wan fɔ go dɔnawe ɛn kil bɔku pipul dɛn. Ɛn i go put in tɛnt we kiŋ dɛn kin yuz, bitwin di big si ɛn di oli mawnten we dɛn mek fayn; ɛn i go kam te i kam mitɔp usay i go ɛnd, ɛn nɔbɔdi nɔ go de fɔ ɛp am.” (Dan. 11:44, 45) Dis gri wit wetin di prɔfɛt Izikɛl tɔk bɔt wetin Gɔg go du.—Izik. 38:8-12, 16.

Wetin go apin afta dis las atak? Daniɛl tɛl wi se: “Da tɛm de, Maykɛl [we na Jizɔs Krays] go tinap [we Amagɛdɔn kam], di gret prins we tinap [frɔm 1914] fɔ yu pipul dɛn. Ɛn trɔbul go kam [da big big trɔbul] we nɔ wande bi yet frɔm we mɔtalman bigin fɔ liv na di wɔl te to da tɛm de. Ɛn dɛn tɛm dɛn de, yu pipul dɛn go sev, ɔl di wan dɛn we dɛn nem rayt na di buk.” (Dan. 12:1) Rɛvɛleshɔn 19:11-21 insɛf tɔk bɔt dis sem tin we Jizɔs gɛt fɔ du.

Bɔt udat na di “Gɔg ɛn Megɔg” we Rɛvɛleshɔn 20:8 tɔk bɔt? Afta di 1,000 ia, dɛn gɛt fɔ tɛst mɔtalman fɔ wan las tɛm. Insay da tɛm de, di wan dɛn we go tɔn dɛn bak pan Jiova go want fɔ kil Jiova in pipul dɛn jɔs lɛk “Gɔg we de na Megɔg,” we na di neshɔn dɛn we go atak Gɔd in pipul dɛn we da big trɔbul want dɔn. Dɛn tu grup ya go day, ɛn dɛn nɔ go gɛt layf igen igen. (Rɛv. 19:20, 21; 20:9) So wi go se “Gɔg ɛn Megɔg” na ɔl di wan dɛn we gɛt fɔ tɔn dɛn bak pan Gɔd we da Wan Tawzin Ia Rul go dɔn.

As pipul dɛn we de stɔdi di Baybul gud gud wan, wi de wet fɔ si udat go bi “di kiŋ we de na di nɔt.” Bɔt ilɛk udat go de bifo di neshɔn dɛn we dɛn kam togɛda, wi shɔ bɔt tu tin: (1) Dɛn go dɔnawe wit Gɔg we de na Megɔg ɛn in amiman dɛn; ɛn (2) wi Kiŋ we na Jizɔs Krays, go sev Gɔd in pipul dɛn ɛn mek dɛn de na di nyu wɔl usay dɛn go gɛt pis ɛn usay natin nɔ go mek dɛn fred igen.—Rɛv. 7:14-17.