1, 2. Wetin na wan tin we sho se Jizɔs rili lɛk mɔtalman?

DI FƆS pɔsin we Gɔd mek na Jizɔs ɛn di we aw Jiova mek am sho se Jiova rili gɛt sɛns. Ɛn i bin de nia in Papa as “man we sabi wok.” Na imajin nɔmɔ wi go ebul fɔ imajin di kayn we aw Jizɔs bin gladi ɛn satisfay we in Papa “bin de mek di ɛvin” ɛn “di wɔl in fawndeshɔn.” Bɔt pan ɔl we Jizɔs bin lɛk di ɔda tin dɛn we Gɔd mek, “na mɔtalman [i] bin lɛk mɔ.” (Prɔv. 8:22-31) Fɔ tru, frɔm we Jizɔs de na ɛvin, i dɔn sho se i rili lɛk mɔtalman.

² Leta, fɔ sho se Gɔd in fɔs Pikin lɛk in Papa ɛn i de sɔpɔt am ɛn fɔ sho se i rili lɛk “mɔtalman,” i gri fɔ “put insɛf dɔŋ” ɛn kam fɔ bi lɛk mɔtalman. I du dis so dat i go “gi in layf fɔ sev bɔku pipul dɛn.” (Fil. 2:5-8; Mat. 20:28) Jizɔs rili lɛk mɔtalman! We Jizɔs bin de na dis wɔl, Gɔd bin gi am pawa fɔ pafɔm mirekul dɛn we sho aw i rili lɛk mɔtalman. So Jizɔs sho di kayn wɔndaful tin dɛn we i go du jisnɔ ɔlsay na di wɔl.

3. Wetin wi de kam tɔk bɔt naw?

³ We Jizɔs bin kam na di wɔl, i bin de “tɔk di gud nyus bɔt Gɔd in Kiŋdɔm.” (Lyuk 4:43) Jizɔs bin no se  dis Kiŋdɔm go pul ɔl di badnem we dɛn dɔn put pan in Papa in nem ɛn i go sɔlv ɔl mɔtalman prɔblɛm. So na dis mek we Jizɔs bin de prich, i bin de pafɔm bɔku mirekul dɛn fɔ sho se i rili lɛk mɔtalman. Wetin mek wi fɔ pe atɛnshɔn to dis? Na bikɔs di lɛsin dɛn we wi go lan go mek wi biliv ɛn gɛt op fɔ tumara bambay. Lɛ wi tɔk bɔt 4 pan Jizɔs in mirekul dɛn.

4. Ɛksplen wetin bin apin we Jizɔs mit da man we bin gɛt lɛprɔsi.

⁴ Di tɛm we Jizɔs bin de prich, i bin go na Galili. Na wan pan di siti dɛn we de na Galili, Jizɔs bin mit wan man we bin sɔri. (Mak 1:39, 40) Dis man bin gɛt wan bad bad sik we dɛn kɔl lɛprɔsi. Lyuk, we na bin dɔktɔ bin se dis man bin “gɛt lɛprɔsi ɔlsay na in bɔdi,” we sho se di sik bin dɔn bad-ɔf pan dis man. (Lyuk 5:12) “We di man si Jizɔs, i butu ɛn beg am se: ‘Masta, if yu want, yu go mek a klin.’” Di man bin no se Jizɔs gɛt di pawa fɔ mɛn am, bɔt i bin want fɔ no if Jizɔs want fɔ mɛn am. Wetin Jizɔs go du fɔ dis man we beg am? Wetin Jizɔs bin de tink as i de wach dis man we sɔntɛm in bɔdi ɔl bin dɔn pwɛl? Fɔ se Jizɔs go tan lɛk di Faresi dɛn we nɔ bin gɛt wan sɔri-at fɔ di pipul dɛn we gɛt dis bad bad sik? If na bin yu, wetin yu bin fɔ dɔn du?

5. Wetin mek Jizɔs bin se “A want fɔ mek yu klin!” we i bin de mɛn wan man we gɛt lɛprɔsi?

⁵ I go mɔs bi se dis man we bin gɛt di lɛprɔsi nɔ bin se “A nɔ klin o, a nɔ klin!” lɛk aw di Lɔ we Gɔd bin gi Mozis bin se. Bɔt Jizɔs nɔ bin tɔk bɔt dat. Bifo dat, i pe atɛnshɔn to di man ɛn wetin di man bin nid. (Lɛv. 13:43-46) Wi nɔ no wetin Jizɔs bin de tink na in maynd, bɔt wi no aw i bin de fil na in at. Di sɔri-at we Jizɔs bin gɛt bin mek i pafɔm mirekul fɔ di man. Jizɔs stret in an ɛn tɔch di man we gɛt lɛprɔsi, ɛn i tɛl am saful wan se: “A want fɔ mek yu klin.” “Wantɛm wantɛm di lɛprɔsi kɔmɔt pan di man.” (Lyuk 5:13) Jiova nɔ bin jɔs gi Jizɔs Krays pawa fɔ du dis kayn mirekul, bɔt na fɔ mek Jizɔs sho bak se i rili lɛk pipul dɛn.—Lyuk 5:17.

6. Wetin bin mek Jizɔs in mirekul dɛn spɛshal? Wetin dɛn de sho?

⁶ Na Gɔd in pawa bin mek Jizɔs Krays ebul fɔ pafɔm difrɛn difrɛn wɔndaful mirekul dɛn. Nɔto pipul dɛn nɔmɔ we gɛt lɛprɔsi i bin de mɛn bɔt i bin de mɛn ɔlkayn sik ɛn ɔlkayn tin we bin de mɔna pipul dɛn. Di Baybul tɛl wi se: “Di krawd bin sɔprayz as dɛn bin de si we mumu de tɔk, pipul dɛn we pat pan dɛn bɔdi kɔt ɔ damej bin de wɛl, di wan dɛn we nɔ bin ebul waka de waka, di wan dɛn we bin blaynd de si.” (Mat. 15:31) Tide dɔktɔ dɛn kin pul wan pat pan pɔsin ɛn put am pan ɔda pɔsin we sik so dat i go wɛl. Bɔt Jizɔs in nɔ bin nid fɔ pul pat pan pɔsin fɔ mɛn ɔda pɔsin. I bin de mɛn di pat we ambɔg pan di pɔsin! Ɛn i bin de mɛn pipul dɛn wantɛm wantɛm, ɛn sɔntɛnde i kin de fa ɛn mɛn pɔsin. (Jɔn 4:46-54) Wetin dɛn ɛgzampul ya de sho? Dɛn de sho se Jizɔs we dɔn bi Kiŋ naw na ɛvin, nɔ jɔs gɛt di pawa bɔt i want fɔ pul sik kɔmɔt na di wɔl. We wi lan bɔt aw Jizɔs bin de trit pipul dɛn, i de mek wi biliv se insay  di nyu wɔl, dis tin we di Baybul bin tɔk go mɔs bi, we i se: “I go sɔri fɔ di wan dɛn we dɛn nɔ tek mek natin ɛn di po wan dɛn.” (Sam 72:13) Fɔ tru, Jizɔs go du wetin i bin want fɔ du, we na fɔ ɛp ɔl di wan dɛn we de sɔfa.

7, 8. Ɛksplen wetin bin apin bifo Jizɔs mit wan sik man na Bɛtzeta.

⁷ Afta tu-tri mɔnt pas we Jizɔs bin dɔn mɛn da man we bin gɛt lɛprɔsi na Galili, i go na Judia fɔ go prich bɔt Gɔd in Kiŋdɔm. Di mɛsej we Jizɔs bin de prich ɛn di we aw i bin de du tin go dɔn tɔch bɔku bɔku pipul dɛn. Wi si klia wan se Jizɔs bin rili want fɔ prich di gud nyus to di po wan dɛn, i bin want fɔ tɛl di wan dɛn we dɛn dɔn kapchɔ se dɛn go fri, ɛn ɛp di wan dɛn we dɛn at pwɛl.—Ayz. 61:1, 2; Lyuk 4:18-21.

⁸ We di mɔnt we nem Naysan kam, Jizɔs go na Jerusɛlɛm fɔ di Pasova. I du dis fɔ sho se i de obe in Papa in lɔ. Pipul dɛn bin bizi na di siti bikɔs bɔku pipul dɛn bin de kam fɔ dis oli fɛstival. Na di nɔt pat na di tɛmpul, wan ples bin de we wata de. Dɛn bin kɔl dis ples Bɛtzeta, ɛn na de Jizɔs bin mit wan man we sik.

9, 10. (a) Wetin mek pipul dɛn bin de go na Bɛtzeta? (b) Wetin Jizɔs bin du we i go na Bɛtzeta? Wetin dis de tich wi? (Luk di pikchɔ nia dis atikul in taytul.)

⁹ Bɔku pipul dɛn we sik ɛn wik kin go na Bɛtzeta. Wetin mek dɛn bin de go na dis ples? Wi nɔ no di rizin, bɔt dɛn bin biliv se if pɔsin we sik go insay di wata we di wata rɔf, di pɔsin go wɛl wantɛm wantɛm. Imajin aw di ples go dɔn tan lɛk! Ɔlman go de wɔri, dɛn go de mangomango, ɛn pipul dɛn we nɔ gɛt wan op bin want fɔ wɛl. Bɔt wetin mek Jizɔs bin go de, we i bi se i pafɛkt ɛn i nɔ gɛt wan sik na in bɔdi? Na bikɔs Jizɔs bin gɛt sɔri-at. We i go de, i mit wan man we bin dɔn sik fɔ lɔng tɛm. Dis man bin dɔn sik ivin bifo Jizɔs kam na di wɔl.—Rid Jɔn 5:5-9.

¹⁰ Imajin aw dis man bin luk lɛk we Jizɔs bin aks am if i want fɔ wɛl. I nɔ bin westɛm fɔ ansa. Di man bin want fɔ wɛl bɔt no we nɔ bin de, bikɔs i nɔ bin gɛt ɛnibɔdi we go put am insay di wata. So Jizɔs tɛl dis man fɔ du sɔntin we nɔ pɔsibul. I tɛl am fɔ tek in bed na grɔn ɛn waka. Di man biliv wetin Jizɔs se ɛn i tek in bed ɛn bigin fɔ waka. Dis de sho wi wetin Jizɔs gɛt fɔ du na di nyu wɔl! Dis mirekul de sho bak se Jizɔs gɛt sɔri-at. I bin de luk fɔ pipul dɛn we nid pɔsin fɔ ɛp dɛn. Jizɔs in ɛgzampul fɔ gi wi mɔ zil fɔ kɔntinyu fɔ luk fɔ pipul dɛn we dɛn at pwɛl bikɔs dɛn de si bɔku bad bad tin dɛn we de apin na di wɔl.

11. Aw Mak 5:25-34 sho se Jizɔs gɛt sɔri-at fɔ di wan dɛn we sik?

¹¹ Rid Mak 5:25-34. Fɔ 12 ia, wan uman bin gɛt wan sik we bin de mek i shem. Di sik we i bin gɛt bin de ambɔg in layf. I bin de mek i nɔ de ivin go na di tɛmpul fɔ sav Gɔd. Pan ɔl we i bin dɔn “sɔfa na bɔku dɔktɔ dɛn an, ɛn i dɔn spɛn ɔl in mɔni,” i bin jɔs de wɔs. Bɔt wan de, dis uman plan fɔ du difrɛn tin fɔ lɛ i go wɛl. I disayd fɔ go nia Jizɔs. I go midul wan krawd ɛn tɔch Jizɔs in klos. (Lɛv. 15:19, 25) Jizɔs notis  se pawa dɔn kɔmɔt pan am, so i aks: “Udat tɔch mi klos?” Di uman “bin fred ɛn i bin de trimbul,” ɛn i “kam ɛn butu bifo am ɛn tɛl am ɔl wetin apin.” Jizɔs no se na Jiova we na in Papa dɔn mɛn di uman, so i tɔk fayn to am se: “Go wit kolat, dis bad sik we yu gɛt dɔn dɔn.”

12. (a) Frɔm wetin wi dɔn tɔk bɔt, uskayn pɔsin yu go se Jizɔs bi? (b) Us ɛgzampul Jizɔs sɛt fɔ wi?

¹² Jizɔs rili lɛk pipul dɛn! Wi si se i bin de sɔri fɔ pipul dɛn we bin sik. Setan want fɔ lɛ wi biliv se wi nɔ gɛt wan valyu ɛn nɔbɔdi nɔ lɛk wi. Bɔt di mirekul dɛn we Jizɔs bin de pafɔm de sho klia wan se i bisin bɔt wi ɛn wi prɔblɛm dɛn. So wi dɔn si se wi Kiŋ ɛn Ay Prist rili gɛt sɔri-at! (Ibru 4:15) I nɔ kin izi fɔ wi fɔ ɔndastand aw pipul dɛn we sik siriɔs wan kin fil, mɔ we wi nɔ wande gɛt da kayn sik de. Bɔt wan tin we wi fɔ no na dat, Jizɔs bin de sɔri fɔ di wan dɛn we sik pan ɔl we i nɔ wande sik. Lɛ Jizɔs in ɛgzampul ɛp wi fɔ du wi bɛst fɔ gɛt sɔri-at fɔ pipul dɛn.—1 Pit. 3:8.

13. We Jizɔs gi Lazarɔs layf bak, wetin dat de tɛl wi bɔt Jizɔs?

¹³ Jizɔs bin de fil am na in at we i de si ɔda pipul dɛn de sɔfa. Di tɛm we Jizɔs in padi Lazarɔs day, pipul dɛn bin de kray ɛn we Jizɔs si dis, “i fil am bad insay in at, ɛn i bin fil sɔri fɔ dɛn.” I bin fil dis we pan ɔl we i bin no se i de kam gi Lazarɔs layf bak. (Rid Jɔn 11:33-36.) Jizɔs nɔ bin shem fɔ kray. Di pipul dɛn we bin de de bin ebul fɔ si se Jizɔs lɛk  Lazarɔs ɛn in famili. Jizɔs bin sho se i rili gɛt sɔri-at we i yuz di pawa we Gɔd gi am fɔ gi layf bak to in padi we dɔn day!—Jɔn 11:43, 44.

14, 15. (a) Wetin sho se Jiova rili want fɔ mek pipul dɛn lɛf fɔ sɔfa? (b) Wetin wi lan frɔm di Grik wɔd we dɛn yuz fɔ translet di wɔd “grev”?

¹⁴ Di Baybul se “as yu si [Jizɔs] so yu dɔn si Gɔd.” (Ibru 1:3) So di mirekul dɛn we Jizɔs bin pafɔm de sho se in ɛn in Papa want fɔ pul sik ɛn day kɔmɔt. Di pipul dɛn we dɛn go gi layf bak go pas di wan dɛn we bin gɛt layf bak we di Baybul tɔk bɔt. Jizɔs bin se: “Di tɛm de kam we ɔl di wan dɛn we de na di grev go . . . grap.”—Jɔn 5:28, 29.

¹⁵ Di Grik wɔd we dɛn yuz fɔ translet di wɔd “grev” min ‘fɔ mɛmba.’ Na di rayt wɔd dis dɛn yuz bikɔs Gɔd we gɛt pawa pas ɔlman ɛn we mek ɔltin ebul fɔ mɛmba ɔltin bɔt di wan dɛn we dɔn day. I ebul fɔ mɛmba dɛn abit dɛn, di abit dɛn we dɛn bɔn wit ɛn di wan dɛn we dɛn kam gɛt na dis wɔl. (Ayz. 40:26) Bɔt nɔto mɛmba nɔmɔ Jiova ebul mɛmba pipul dɛn we dɔn day bɔt in ɛn in Pikin want fɔ gi dɛn layf bak. Di layf we Lazarɔs ɛn ɔda pipul dɛn bin gɛt bak we di Baybul tɔk bɔt de sho wetin gɛt fɔ apin insay di nyu wɔl.

16. Us blɛsin we bɔku Kristian dɛn we de naw go ɛnjɔy?

¹⁶ If wi kɔntinyu fɔ du wetin Jiova want, wi go si wan pan di mirekul dɛn we pas ɔl ɔda mirekul dɛn, dat na fɔ sev di tɛm we da big big trɔbul go kam na di wɔl. Jɔs afta Amagɛdɔn, bɔku ɔda mirekul dɛn gɛt fɔ apin. Da tɛm de, ɔlman go gɛt wɛlbɔdi. (Ayz. 33:24; 35:5, 6; Rɛv. 21:4) Imajin we yu go de si pipul dɛn de trowe dɛn glasis, dɛn wɔkinstik, dɛn krɔch, dɛn wilchia, di tin dɛn we bin de ɛp dɛn fɔ yɛri, ɛn ɔda tin dɛn. Jiova no se ɔl di wan dɛn we gɛt fɔ sev di tɛm we Amagɛdɔn go kam fɔ gɛt wɛlbɔdi bikɔs dɛn go gɛt plɛnti wok fɔ du. Dɛn go gɛt zil fɔ mek di wan ol wɔl tɔn to Paradays.—Sam 115:16.

17, 18. (a) Wetin na di men rizin we mek Jizɔs bin de pafɔm mirekul dɛn? (b) Wetin mek yu fɔ tray tranga wan fɔ de na Gɔd in nyu wɔl?

¹⁷ Di mɛn we Jizɔs Krays bin de mɛn pipul dɛn trade de ɛnkɔrej di “bɔku bɔku pipul dɛn” we gɛt fɔ sev we da big trɔbul go kam. I de mek dɛn gladi mɔ bikɔs dɛn no se tɛm go kam we Jizɔs go mɛn ɔl dɛn sik dɛn. (Rɛv. 7:9) Di mɛn we i bin de mɛn pipul dɛn de sho aw i bin de rili fil ɛn i bin de sho bak se i lɛk mɔtalman. (Jɔn 10:11; 15:12, 13) Di sɔri-at we Jizɔs bin gɛt de sho se Jiova rili bisin bɔt ɔl in savant dɛn.—Jɔn 5:19.

¹⁸ Mɔtalman de pini, i de sɔfa ɛn day. (Rom 8:22) Wi nid Gɔd in nyu wɔl, usay wi go gɛt di wɛlbɔdi we i dɔn prɔmis. Malakay 4:2 gi wi rizin fɔ biliv se di wan dɛn we go dɔn wɛl go “jomp jomp lɛk dɛn fat fat kaw pikin dɛn,” ɛn dɛn go gladi we dɛn go dɔn gɛt pafɛkt bɔdi. Lɛ di lɛk we wi lɛk Gɔd ɛn di fet we wi gɛt pan di tin dɛn we i dɔn prɔmis mek wi du ɛnitin we wi nid fɔ du so dat wi go de na di nyu wɔl. I rili fayn fɔ no se di mirekul dɛn we Jizɔs bin pafɔm we i bin de na di wɔl de sho aw i gɛt fɔ sɔlv ɔl mɔtalman prɔblɛm dɛn we i go de rul di wɔl!