1. Aw wi kin yuz di prea we de na Matyu 6:9-13 we wi de prich?

BƆKU pipul dɛn sabi di Awa Fada prea ɔfɛd. We wi kin go prich frɔm os to os, wi kin tɔk bɔt dis prea fɔ ɛp di pipul dɛn we wi go prich to fɔ ɔndastand se Gɔd in Kiŋdɔm na rial gɔvmɛnt we go mek dis wɔl bi fayn fayn ples. Ɔ wi kin tɔk bɔt di fɔs tin we Jizɔs bin tɔk bɔt insay dis prea fɔ sho se Gɔd gɛt nem, ɛn i want lɛ ɔlman ɔnɔ da nem de, ɔ “tek am as sɔntin we oli.”—Mat. 6:9, futnot.

2. Aw wi no se Jizɔs nɔ bin want fɔ lɛ wi de ripit dis prea wɔd fɔ wɔd ɛnitɛm we wi de pre?

² Fɔ se Jizɔs bin want lɛ wi de ripit di Awa Fada prea wɔd fɔ wɔd ɛnitɛm we wi de pre, jɔs lɛk aw bɔku Kristian dɛn de du? Nɔ, Jizɔs nɔ bin want dat. Jɔs bifo Jizɔs tich in disaypul dɛn aw fɔ pre, i tɔk se: “We una de pre, una nɔ se di sem tin ɔltɛm.” (Mat. 6:7) Wan ɔda tɛm, Jizɔs pre dis sem  prea bɔt i yuz difrɛn wɔd dɛn. (Lyuk 11:1-4) Jizɔs ɛp wi fɔ no uskayn tin dɛn wi nid fɔ pre fɔ ɛn wetin wi fɔ put fɔs we wi de pre. So wi go se dis prea de tich wi aw fɔ pre.

3. Us kwɛstyɔn dɛn wi fɔ de tink bɔt as wi de tɔk bɔt di Awa Fada prea?

³ Insay dis atikul ɛn di ɔda wan, wi go tɔk bɔt di tin dɛn we de insay dis prea. As wi de du so, aks yusɛf dɛn kwɛstyɔn dɛn ya, ‘Aw dis Awa Fada prea go ɛp mi fɔ pre fayn fayn wan? A de liv mi layf di we we de sho se a gri wit dis prea?’

4. We Jizɔs se “wi Papa,” wetin dis de tɛl wi? Aw Jiova bi “Papa” to Kristian dɛn we gɛt di op fɔ de na dis wɔl?

⁴ Insay di Awa Fada prea, Jizɔs bin se “wi Papa,” i nɔ se “mi Papa.” Dis de mɛmba wi se wi de wit “ɔl di brɔda dɛn na di wɔl” ɛn wi rili lɛk wisɛf. (1 Pit. 2:17) Na big big blɛsin dis! Anɔyntɛd Kristian dɛn we Gɔd dɔn pik fɔ bi in pikin dɛn na ɛvin kin kɔl Jiova “Papa.” Dɛn gɛt rayt fɔ du dat bikɔs Jiova na dɛn Papa fɔ tru. (Rom 8:15-17) Kristian dɛn we gɛt di op fɔ de sote go na dis wɔl dɛnsɛf kin kɔl Jiova “Papa.” Na in gi dɛn layf ɛn na in de gi dɛn ɔl wetin dɛn nid. Di wan dɛn we gɛt di op fɔ de na dis wɔl go rili bi Gɔd in pikin dɛn afta dɛn go dɔn pafɛkt ɛn afta dɛn go dɔn sho se dɛn de sɔpɔt Jiova di tɛm we Setan go tɛst mɔtalman fɔ di las tɛm.—Rom 8:21; Rɛv. 20:7, 8.

5, 6. Us fayn gift we mama ɛn papa dɛn go gi to dɛn pikin dɛn? Wetin di pikin dɛn fɔ du wit dis gift? (Luk di pikchɔ nia dis atikul in taytul.)

⁵ Wan fayn gift we mama ɛn papa dɛn go gi dɛn pikin dɛn na we dɛn tich dɛn aw fɔ pre ɛn ɛp dɛn fɔ si Jiova as Papa we bisin bɔt wi. Wan brɔda we de sav as sakit ovasia na Sawt Afrika bin tɔk se: “Frɔm di de we wi bɔn wi gyal pikin dɛn, a kin pre wit dɛn ɛvri nɛt pas nɔmɔ if a nɔ de na os. Wi pikin dɛn kin se dɛn nɔ mɛmba di patikyula wɔd dɛn we a bin de yuz we a de pre. Bɔt dɛn mɛmba aw di ples kin tan lɛk we a kin de pre, wi kin siriɔs we wi de pre to wi Papa, Jiova, wi nɔ kin wɔri igen ɛn wi at kin kol we wi kin dɔn pre. As dɛn bigin pre fɔ dɛnsɛf so, a ɛnkɔrej dɛn fɔ pre lawd wan so dat a go yɛri we dɛn de tɛl Jiova bɔt aw dɛn de tink ɛn fil. Dis na bin fayn we fɔ no wetin de na dɛn at. Ɛn fɔ mek dɛn prea dɛn gɛt mɔ minin, a bin de ɛnkɔrej dɛn fɔ pre bɔt sɔm impɔtant tin dɛn we Jizɔs bin tich wi fɔ pre bɔt.”

⁶ Dis brɔda in gyal pikin dɛn kɔntinyu fɔ go bifo na di trut. Naw dɛn dɔn mared, ɛn dɛn gladi na dɛn mared-os. Dɛn ɛn dɛn man dɛn de yuz ɔl dɛn tɛm fɔ sav Gɔd. No gift nɔ de we mama ɛn papa dɛn go gi dɛn pikin dɛn we bɛtɛ pas fɔ ɛp dɛn fɔ gɛt tayt padi biznɛs wit Jiova. Bɔt i lɛf to di pikin dɛn fɔ kɔntinyu wit dis padi biznɛs. Dis min se dɛn gɛt fɔ lan aw fɔ lɛk Gɔd in nem ɛn sho se dɛn rili rɛspɛkt am.—Sam 5:11, 12; 91:14.

7. Us big big ɔnɔ Gɔd in pipul dɛn gɛt? Wetin dis fɔ mek wi du?

⁷ Na big big ɔnɔ wi gɛt fɔ no Gɔd in nem, bɔt nɔto dat nɔmɔ, na big big ɔnɔ bak wi gɛt fɔ bi pipul dɛn we gɛt Gɔd “in nem.” (Akt 15:14; Ayz. 43:10) Wi kin pre  to wi Papa we de na ɛvin se: “Mek ɔlman ɔnɔ yu nem.” We wi pre dis kayn we, i go mek wi aks Jiova fɔ ɛp wi fɔ avɔyd fɔ du ɔ se ɛnitin we go briŋ badnem pan in oli nem. Wi nɔ want fɔ bi lɛk sɔm Kristian dɛn we bin de insay di apɔsul dɛn tɛm we nɔ bin de du di tin dɛn we dɛn bin de prich. Di apɔsul Pɔl bin tɛl dɛn se: “Di pipul dɛn na di neshɔn dɛn de tɔk bad bɔt Gɔd in nem fɔseka una.”—Rom 2:21-24.

8, 9. Gi wan ɛgzampul we de sho aw Jiova kin blɛs di wan dɛn we want fɔ ɔnɔ in nem.

⁸ Wi want fɔ ɔnɔ Gɔd in nem. Afta wan sista na Nɔwe in man day, na in ɛn in tu ia ol bɔy pikin nɔmɔ bin lɛf. I bin se: “Tin nɔ bin rili izi fɔ mi dɛn tɛm dɛn de. A bin de pre ɛvride, lɛk ɛvri awa so, fɔ lɛ Jiova ɛp mi lɛ mi at nɔ pwɛl tumɔs ɛn fɔ lɛ i ɛp mi mek a nɔ du sɔntin we nɔ mek sɛns ɔ we nɔ fayn na in yay we go mek Setan provok am. A bin want fɔ ɔnɔ Jiova in nem ɛn a bin want mi pikin fɔ si in papa bak we di wɔl go dɔn bi Paradays.”—Prɔv. 27:11.

⁹ Jiova bin ansa dis sista in prea? Yɛs, i ansa am. Dis sista bin de wit di brɔda ɛn sista dɛn ɔltɛm ɛn dɛn bin de ɛnkɔrej am ɛn sho se dɛn bisin bɔt am. Afta fayv ia, i bin gɛt fɔ mared to wan ɛlda. In pikin dɔn ol 20 ia naw ɛn i dɔn baptayz. Di sista se: “A rili gladi we mi man bin ɛp mi fɔ mɛn mi pikin.”

10. Wetin Gɔd go du so dat ɔlman go ɔnɔ in nem?

¹⁰ Wetin Gɔd go du so dat ɔlman go ɔnɔ in nem ɛn pul kɔmɔt ɔl di badnem we dɛn dɔn put pan am? Jiova go du sɔntin fɔ pul ɔl di wan dɛn we nɔ de gri fɔ put dɛnsɛf ɔnda in rul. (Rid Izikɛl 38:22, 23.) Smɔl smɔl, mɔtalman go pafɛkt. Wi de wet fɔ si di tɛm we ɔl di wan dɛn na ɛvin ɛn dis wɔl go ɔnɔ Jiova in oli nem! Da tɛm de, wi Papa na ɛvin go “bi ɔltin to ɔlman.”—1 Kɔr. 15:28.

11, 12. Insay di ia 1876, wetin Jiova bin ɛp tru Kristian dɛn fɔ ɔndastand?

¹¹ Bifo Jizɔs go na ɛvin, in apɔsul dɛn bin aks am se: “Masta, yu de briŋ di kiŋdɔm kam bak na Izrɛl rayt naw?” Di ansa we Jizɔs gi dɛn sho se di tɛm nɔ rich yet fɔ lɛ dɛn no ustɛm Gɔd in Kiŋdɔm go bigin fɔ rul. I tɛl in disaypul dɛn fɔ pe atɛnshɔn pan di wok we impɔtant, dat na fɔ prich di gud nyus bɔt di Kiŋdɔm. (Rid Di Apɔsul Dɛn Wok [Akt] 1:6-8.) Bɔt stil, Jizɔs bin tich in disaypul dɛn fɔ de pre fɔ lɛ Gɔd in Kiŋdɔm kam. So frɔm di apɔsul dɛn tɛm, Kristian dɛn dɔn de pre fɔ lɛ Gɔd in Kiŋdɔm kam.

¹² We di tɛm bin de nia fɔ lɛ Jizɔs bigin rul Gɔd in Kiŋdɔm na ɛvin, Jiova bin ɛp in pipul dɛn fɔ ɔndastand ustɛm dat go bi. Insay 1876, Brɔda Chals Tez Rɔsɛl bin rayt wan atikul insay wan magazin we dɛn kɔl Bible Examiner. Da atikul de bin gɛt di taytul, “Gentile Times: When Do They End?” Ɛn i bin tɔk se 1914 na impɔtant ia. I ɛksplen se di “sɛvin tɛm” we Daniɛl tɔk bɔt ɛn “di patikyula tɛm fɔ di neshɔn dɛn” we Jizɔs tɔk bɔt na di sem. *—Dan. 4:16; Lyuk 21:24.

13. Wetin apin insay di ia 1914? Frɔm da tɛm de, wetin di tin dɛn we de apin na di wɔl de sho?

 ¹³ Insay 1914, wɔ bin apin na dɛn kɔntri dɛn na Yurop. Dis wɔ bin go ɔlsay na di wɔl. Bay di tɛm we di wɔ dɔn insay 1918, bad bad angri bin de ɛn wan sik bin kil bɔku pipul dɛn pas aw di wɔ bin kil pipul dɛn. So di “sayn” we Jizɔs bin gi fɔ sho se i dɔn bi di nyu Kiŋ fɔ di wɔl bin bigin fɔ apin. (Mat. 24:3-8; Lyuk 21:10, 11) Bɔku tin dɛn bin apin insay 1914 we sho klia wan se na da ia de “dɛn gi [Jizɔs Krays] krawn.” Ɛn i “bin de go ɛn win wɔ dɛn, ɛn i go dɔn fɔ win ɔda wɔ dɛn bak.” (Rɛv. 6:2) I fɛt wɔ wit Setan ɛn in dɛbul dɛn ɛn pul dɛn kɔmɔt na ɛvin ɛn ib dɛn dɔŋ na dis wɔl. Frɔm da tɛm de, mɔtalman dɔn si se na tru di Baybul bin tɔk, we i se: “Big trɔbul de na di wɔl ɛn di si, bikɔs di Dɛbul dɔn kam dɔŋ to una ɛn i vɛks bad bad wan, bikɔs i no se na shɔt tɛm lɛf fɔ am.”—Rɛv. 12:7-12.

14. (a) Wetin mek i stil impɔtant fɔ pre fɔ lɛ Gɔd in Kiŋdɔm kam? (b) Us spɛshal wok wi gɛt fɔ du?

¹⁴ Di tin dɛn we rayt na Rɛvɛleshɔn 12:7-12 sho wetin mek Gɔd in Kiŋdɔm bigin rul di sem tɛm we dɛn bad bad tin dɛn bigin fɔ ambɔg mɔtalman. Jizɔs we na di Kiŋ na Gɔd in Kiŋdɔm de rul na ɛvin, bɔt Setan in stil de rul di wɔl. Wi fɔ kɔntinyu fɔ pre fɔ lɛ Gɔd in Kiŋdɔm kam te Jizɔs dɔn fɔ fɛt ɔl in  wɔ dɛn ɛn mek bad bad tin dɛn lɛf fɔ apin na di wɔl. Bɔt nɔto dat nɔmɔ wi fɔ du, wi fɔ liv wi layf di we we de sho se wi gri wit wetin wi de pre fɔ bay we wi ɛp fɔ du wan tin we Jizɔs bin gi as “sayn.” Jizɔs bin se: “Dɛn go prich dis gud nyus bɔt di Kiŋdɔm ɔlsay na di wɔl so dat ɔl di neshɔn dɛn go yɛri, dɔn di ɛnd go kam.”—Mat. 24:14.

15, 16. Aw wi go liv wi layf di we we de sho se wi want fɔ lɛ wetin Gɔd want bi?

¹⁵ Na lɛk 6,000 ia dɔn pas so frɔm we pipul dɛn lɛf fɔ du wetin Gɔd want na dis wɔl. Bɔt we Jiova bin mek di wɔl, ɔltin bin fayn, na in mek i bin tɔk se: “Ɔltin rili fayn.” (Jɛn. 1:31) Afta Setan tɔn in bak pan Jiova, na wan-wan pipul dɛn nɔmɔ bin de du wetin Gɔd want na di wɔl. Bɔt tide wi gladi fɔ de alayf bikɔs na lɛk et milyɔn Witnɛs dɛn so de pre fɔ lɛ wetin Gɔd want bi na dis wɔl. Bɔt nɔto dat nɔmɔ dɛn de du, dɛn de tray fɔ liv dɛn layf di we we de sho se dɛn want fɔ lɛ wetin Gɔd want bi. Dɛn de du dis bay di we aw dɛn de liv dɛn layf ɛn we dɛn de du di prichin wok wit zil.

¹⁶ Fɔ ɛgzampul, wan sista we baptayz insay 1948 ɛn we bin sav as mishɔnari na Afrika bin se: “Fɔ lɛ wetin Gɔd want bi na dis wɔl, a kin pre mek di wan dɛn we rili lɛk Jiova kam fɔ no am bifo i let. Dɔn we a kin want fɔ prich to pɔsin, a kin pre fɔ lɛ Jiova gi mi sɛns so dat wetin a go se go tɔch in at. A kin pre bak fɔ di wan dɛn we dɔn ɔlrɛdi kam fɔ no Jiova, fɔ lɛ Jiova ɛp wi fɔ kia fɔ dɛn.” No wɔnda we mek dis 80 ia ol sista de du wɛl na di prichin wok, ɛn i dɔn ɛp bɔku pipul dɛn fɔ bi Jiova Witnɛs. I go mɔs bi se yu sabi ɔda pipul dɛn we de tray tranga wan fɔ du wetin Gɔd want pan ɔl we dɛn dɔn ol.—Rid Lɛta Fɔ Filipay 2:17.

17. Aw yu fil bɔt di tin dɛn we Jiova gɛt fɔ du fɔ ansa di prea we wi kin pre fɔ mek wetin i want bi?

¹⁷ Wi go kɔntinyu fɔ pre fɔ mek wetin Gɔd want bi te Gɔd pul ɔl in ɛnimi dɛn kɔmɔt na di wɔl. Da tɛm de, ɔl wetin Gɔd want go bi. Bɔku bɔku pipul dɛn we dɔn day go gɛt layf bak na Paradays. Jizɔs bin se: “Una nɔ sɔprayz, bikɔs di tɛm de kam we ɔl di wan dɛn we de na di grev go yɛri [mi] vɔys, ɛn grap.” (Jɔn 5:28, 29) I go rili fayn fɔ de alayf da tɛm de so dat yu go si di wan dɛn we go gɛt layf bak. Gɔd “go wep ɔl di kray wata we de na [wi] yay.” (Rɛv. 21:4) Bɔku pan di wan dɛn we go gɛt layf bak na “di wan dɛn we nɔ bin du wetin rayt.” Dɛn pipul ya nɔ bin lan di tru tin bɔt Jiova Gɔd ɛn in Pikin bifo dɛn day. Na big big ɔnɔ wi go gɛt fɔ tich di wan dɛn we go gɛt layf bak fɔ no wetin Gɔd want ɛn ɛp dɛn fɔ gɛt “layf we go de sote go.”—Akt 24:15; Jɔn 17:3.

18. Wetin mɔtalman rili nid?

¹⁸ Na Gɔd in Kiŋdɔm go mek ɔlman ɔnɔ Gɔd in nem ɛn ɔlman na di wɔl go wɔship Gɔd wit wanwɔd. Da tɛm de, di fɔs tri tin dɛn we de insay di Awa Fada prea go apin, ɛn dis go mek mɔtalman gɛt di tin dɛn we dɛn rili nid. Bɔt te da tɛm de, wi stil gɛt 4 impɔtant tin dɛn we de insay di Awa Fada prea we Jizɔs bi se wi fɔ pre bɔt. Wi go tɔk bɔt dɛn insay di nɛks atikul.