1-3. Wetin mek wan sista shɔ se Jiova no wetin wi nid?

WAN sista we nem Lana nɔ go ɛva fɔgɛt wetin apin to am na Jamani insay 2012. I pre to Jiova fɔ tu tin ɛn i fil se Jiova ansa am. I pre fɔ di fɔs tin we i bin de insay tren de go na iapɔt. I bin pre lɛ Jiova mek we fɔ lɛ i ebul fɔ prich. We i rich na di iapɔt, i kam no se i nɔ go ebul fɔ travul da de de pas te di nɛks de. So Lana pre di sɛkɔn prea bikɔs i nɔ bin gɛt bɛtɛ mɔni ɛn i nɔ bin gɛt say fɔ slip da nɛt de.

² As Lana dɔn fɔ pre di sɛkɔn prea so, na de i yɛri sɔmbɔdi se, “Aw yu du Lana, wetin yu de du na ya?” Di yɔŋ man we bin de tɔk to am na bin in skulmet trade. Dis yɔŋ man bin de go na Sawt Afrika. Ɛn in mama ɛn grani kam lɛf am na iapɔt. We dis yɔŋ man in mama we nem Ɛlk kam fɔ no se Lana nɔ gɛt say fɔ slip, i tɛl Lana mek i kam de wit dɛn. Ɛlk ɛn in mama bin trit Lana fayn ɛn dɛn bin de aks am  kwɛstyɔn dɛn bɔt wetin i biliv ɛn bɔt di yuz we i bin de yuz ɔl in tɛm fɔ prich.

³ Na mɔnin, afta dɛn dɔn it, Lana ansa mɔ Baybul kwɛstyɔn dɛn we dɛn bin de aks am ɛn i tek dɛn adrɛs ɛn fon nɔmba fɔ ɛp dɛn fɔ no mɔ. Lana rich sef na in kɔntri ɛn kɔntinyu fɔ rɛgyula payɔnia. I fil se na di “Wan we de yɛri prea” ɛp am.—Sam 65:2.

4. Wetin wi de kam tɔk bɔt?

⁴ We prɔblɛm kin mit wi, i kin izi fɔ lɛ wi pre, ɛn Jiova kin gladi we in fetful savant dɛn kin pre to am. (Sam 34:15; Prɔv. 15:8) Bɔt if wi tink gud wan bɔt di Awa Fada prea, wi go si se ɔda impɔtant tin dɛn de we wi nɔ kin pe tumɔs atɛnshɔn to. Fɔ ɛgzampul, lɛ wi kam tɔk bɔt aw di las 4 tin dɛn na di Awa Fada prea go sho wi aw fɔ kam nia Jiova mɔ. Ɛnitin de we wi fɔ du we wi de pre to Jiova fɔ gi wi wetin wi go it fɔ di de?—Rid Matyu 6:11-13.

5, 6. Wetin mek i fayn fɔ pre fɔ wetin wi go it fɔ di de ilɛksɛf wi gɛt plɛnti tin fɔ it?

⁵ Jizɔs tɛl wi fɔ pre fɔ wetin “wi” go it, nɔto wetin “a” go it. Wan sakit ovasia na Afrika, we nem Viktɔ tɔk se: “A kin tɛl Jiova tɛnki bɔku tɛm bikɔs mi ɛn mi wɛf nɔ gɛt fɔ wɔri bɔt it biznɛs ɔ wɔri bɔt udat go pe di rɛnt. Wi brɔda dɛn kin kia fɔ wi ɛvride. Bɔt a kin pre fɔ di wan dɛn we de kia fɔ wi so dat dɛn go ebul fɔ bia wit di mɔni prɔblɛm dɛn we dɛn de gɛt.”

⁶ If wi gɛt plɛnti tin fɔ it, wi fɔ de tink bɔt wi brɔda dɛn we po ɔ wi brɔda dɛn we de na say we ebi briz ɔ ren dɔn pwɛl. Wi nɔ fɔ jɔs pre fɔ dɛn nɔmɔ bɔt wi fɔ du sɔntin fɔ ɛp dɛn. Fɔ ɛgzampul, wi kin gi wetin wi gɛt to dɛn brɔda dɛn ya. Wi kin gi mɔni bak fɔ sɔpɔt di wok we Jiova Witnɛs dɛn de du ɔlsay na di wɔl, bikɔs wi no se dɛn kin yuz dɛn mɔni ya di rayt we.—1 Jɔn 3:17.

7. Us ɛgzampul Jizɔs gi wi we i advays wi se “una nɔ wɔri bɔt tumara”?

⁷ We Jizɔs bin se wi fɔ pre fɔ wetin wi go it fɔ di de, i bin min se wi fɔ de pre fɔ di tin dɛn we wi rili nid. Na dat mek i bin sho aw Gɔd de kia fɔ di flawa dɛn ɛn i aks se: “Una nɔ tink se Gɔd go gi una klos fɔ wɛr, una we gɛt smɔl fet? So nɔ wɔri ɛn bigin tɔk se, . . . ‘Wetin wi fɔ wɛr?’” Bifo Jizɔs dɔn fɔ tɔk, i ripit dis fayn advays: “Una nɔ wɔri bɔt tumara.” (Mat. 6:30-34) Dis sho se wi nɔ fɔ bi pɔsin we want want, wi fɔ satisfay wit wetin wi nid fɔ di de. Sɔm pan di tin dɛn we wi nid na fayn say fɔ de ɛn wok we go ɛp wi fɔ kia fɔ wi famili. Ɛn wi nid sɛns we go ɛp wi fɔ disayd fɔ du di rayt tin we wi sik. I nɔ go fayn if na dɛn tin ya nɔmɔ wi de pre fɔ. Ɔda tin dɛn de we rili impɔtant we wi fɔ pre fɔ.

8. We Jizɔs se wi fɔ de pre fɔ wetin wi fɔ it fɔ di de, wetin dat de mek wi mɛmba? (Luk di pikchɔ nia dis atikul in taytul.)

⁸ We Jizɔs se wi fɔ pre fɔ wetin wi fɔ it fɔ di de, dis de mɛmba wi se wi nid fɔ lan bɔt Gɔd. Jizɔs, we na wi Masta bin se: “Nɔto tin fɔ it nɔmɔ go mek mɔtalman liv, bɔt na ɔl di tin dɛn we Jiova de tɔk go mek mɔtalman liv.” (Mat. 4:4) So wi fɔ de pre so dat Jiova go kɔntinyu fɔ ɛp wi fɔ lan mɔ bɔt am.

9. Wetin mek wi go se wi sin dɛn tan lɛk dɛt?

⁹ Jizɔs bin tich wi fɔ pre fɔ lɛ Gɔd  “fɔgiv wi sin dɛn.” (Mat. 6:12; Lyuk 11:4) Wi sin dɛn tan lɛk dɛt. Insay 1951, Di Wachtawa bin tɔk se: “We wi brok Gɔd in lɔ, wi gɛt dɛt fɔ pe am. . . . Gɔd kin disayd fɔ tek wi layf we wi sin agens am. . . . I kin mek wi nɔ gɛt pis, ɛn wi padi biznɛs wit am kin pwɛl. . . . Wi gɛt dɛt fɔ pe Gɔd, dis dɛt na lɔv. Ɛn wi kin pe dis dɛt we wi obe am, bɔt we wi sin, wi dɔn lɛf fɔ pe dis dɛt. We wi sin, i de sho se wi nɔ lɛk Gɔd.”—1 Jɔn 5:3.

10. Wetin kin mek Jiova de fɔgiv wi sin dɛn? Aw wi fɔ fil bɔt dis?

¹⁰ Wi de sin ɛvride ɛn di wangren rizin we mek Gɔd de fɔgiv wi na bikɔs Jizɔs bin day fɔ wi sin. I dɔn pas lɛk 2,000 ia so we Jizɔs bin dɔn kam day fɔ wi sin dɛn, bɔt wi fɔ valyu dis gift lɛk se na tide Gɔd gi wi am. “Di prayz fɔ bay” wi layf bak “so valyu” dat natin nɔ de we ɛni mɔtalman go du we go nia sɛf fɔ pe fɔ am. (Rid Sam 49:7-9; Pita In Fɔs Lɛta 1:18, 19.) Fɔ tru, wi nɔ fɔ ɛva stɔp fɔ tɛl Jiova tɛnki fɔ dis wɔndaful gift. We Jizɔs bin de tich wi fɔ pre, i bin se wi fɔ pre fɔ “wi sin dɛn,” i nɔ se wi fɔ pre fɔ “mi sin dɛn.” Dis de mek wi mɛmba se wi ɔl we de sav Jiova nid Jiova fɔ fɔgiv wi. Dis sho klia wan se Jiova nɔ jɔs want lɛ wi bisin bɔt wi padi biznɛs wit am nɔmɔ, bɔt i want lɛ wi bisin bak bɔt ɔda pipul dɛn padi biznɛs wit am, ivin di wan dɛn we dɔn du wi bad. Bɔku tɛm, di tin dɛn we dɛn kin du wi nɔ kin dat bad ɛn i kin gi wi di chans fɔ sho se wi rili lɛk wi brɔda dɛn ɛn wi rɛdi fɔ fɔgiv dɛn jɔs lɛk aw Gɔd de fɔgiv wi.—Kɔl. 3:13.

11. Wetin mek i impɔtant fɔ lɛ wi de fɔgiv ɔda pipul dɛn?

¹¹ I sɔri fɔ no se bikɔs wi nɔ pafɛkt, wi kin kip grɔj na wi at fɔ ɔda pipul dɛn. (Lɛv. 19:18) If wi bigin fɔ tɛl ɔda pipul dɛn bɔt di prɔblɛm, dɛn go sɔpɔt wi ɛn dat go mek wanwɔd nɔ de na di kɔngrigeshɔn. If wi alaw dis kayn tin fɔ kɔntinyu, i go sho se wi nɔ gladi fɔ di sɔri we Gɔd de sɔri fɔ wi ɛn wi nɔ valyu di day we Jizɔs bin kam day fɔ wi. If wi nɔ de fɔgiv wi brɔda dɛn, Jiova go stɔp fɔ yuz Jizɔs in sakrifays fɔ fɔgiv wi.  (Mat. 18:35) Jizɔs tɔk mɔ bɔt dis jɔs afta i tich wi aw fɔ pre. (Rid Matyu 6:14, 15.) So fɔ lɛ Gɔd go de fɔgiv wi, wi fɔ tray tranga wan fɔ lɛ wi nɔ mek am abit fɔ de sin siriɔs wan. Wan tin we go ɛp wi lɛ wi nɔ mek am abit fɔ de sin na we wi pre fɔ di nɛks tin we Jizɔs bin tich wi fɔ pre fɔ.—1 Jɔn 3:4, 6.

12, 13. (a) Wetin apin jɔs afta Jizɔs baptayz? (b) Wetin mek na wisɛf wi go blem we wi du wetin bad? (c) We Jizɔs du wetin Gɔd want te i day, wetin dat sho?

¹² We wi tink bɔt wetin apin jɔs afta Jizɔs baptayz, i go ɛp wi fɔ ɔndastand wetin mek wi fɔ pre lɛ Gɔd “nɔ lɛf wi we sɔntin tɛmpt wi.” Gɔd in spirit bin kɛr Jizɔs go na di ɛmti land usay nɔbɔdi nɔ go ebul fɔ de “so dat di Dɛbul go tɛmpt am.” (Mat. 4:1; 6:13) Yu tink se dis fɔ mek wi sɔprayz? Wi nɔ go sɔprayz if wi no di men rizin we mek Gɔd sɛn in Pikin fɔ kam na di wɔl. Gɔd sɛn in Pikin fɔ kam sɔlv di prɔblɛm we bin apin di tɛm we Adam ɛn Iv bin sho se Gɔd nɔ gɛt rayt fɔ rul. Tɛm bin nid fɔ pas fɔ lɛ ɔlman gɛt di ansa to sɔm kwɛstyɔn dɛn. Kwɛstyɔn dɛn lɛk, sɔntin bin rɔng wit di we aw Gɔd mek mɔtalman? I pɔsibul fɔ lɛ pafɛkt mɔtalman sho se na Gɔd gɛt di rayt fɔ rul pan ɔl we “di wikɛd wan” de tɛmpt am? Mɔtalman in layf go bɛtɛ if Gɔd nɔ rul dɛn? (Jɛn. 3:4, 5) I go tek tɛm fɔ no di ansa to dɛn kwɛstyɔn ya, bɔt i go mek ɔl di enjɛl dɛn ɛn mɔtalman no se na Jiova de rul di bɛst we.

¹³ Jiova oli so i nɔ go ɛva tɛmpt ɛnibɔdi fɔ du bad. Na Setan na in “de tɛmpt” pɔsin. (Mat. 4:3) Setan kin tɛmpt wi difrɛn difrɛn we dɛn. Bɔt na wi go disayd if wi go alaw Setan fɔ mek wi sin ɔ nɔ sin. (Rid Jems 1:13-15.) We Setan tɛmpt Jizɔs, Jizɔs bin de kot Gɔd in Wɔd wantɛm wantɛm ɛn i nɔ bin du wetin Setan tɛl am. So Jizɔs sho se na Gɔd gɛt di rayt fɔ rul. Bɔt Setan nɔ bin taya. I “wet fɔ ɔda fayn tɛm.” (Lyuk 4:13) Jizɔs nɔ bin ɛva alaw Setan fɔ mek i du wetin Gɔd nɔ want. Krays sho se na Jiova gɛt di rayt fɔ rul ɛn i sho bak se pafɛkt mɔtalman go ebul du wetin Gɔd want ilɛk uskayn bad tin mit am. Bɔt Setan de tray fɔ tɛmpt di wan dɛn we de fala Jizɔs, ɛn i de ivin tray fɔ tɛmpt yu.

14. Wetin go ɛp wi fɔ du di rayt tin we Setan tɛmpt wi?

¹⁴ Bikɔs Setan bin se Jiova nɔ gɛt rayt fɔ rul, dis dɔn mek Jiova dɔn alaw am fɔ yuz dis wɔl fɔ tɛmpt wi. Nɔto Gɔd de tɛmpt wi. Bifo dat, i biliv se wi go du wetin rayt ɛn i want fɔ ɛp wi. Bikɔs wi gɛt fridɔm fɔ disayd wetin wi want fɔ du, Jiova nɔ de stɔp Setan we i de tray fɔ tɛmpt wi. So wi nid fɔ du tu tin, wi fɔ kɔntinyu fɔ de nia Jiova ɛn wi fɔ de pre ɔltɛm. Aw Jiova kin ansa wi prea dɛn?

15, 16. (a) Wetin na sɔm bad tin dɛn we wi nɔ fɔ put an pan? (b) Udat wi fɔ blem we wi du bad tin?

¹⁵ Jiova kin gi wi in pawaful oli spirit we go ɛp wi fɔ lɛ wi nɔ du bad tin we sɔntin tɛmpt wi. Dɔn Gɔd kin yuz in Wɔd, di Baybul ɛn wi mitin dɛn fɔ wɔn wi bɔt tin dɛn we wi nid fɔ avɔyd. Tin dɛn lɛk fɔ spɛn bɔku tɛm, mɔni, ɛn trɛnk pan tin dɛn we nɔ impɔtant. Wan brɔda we nem Ɛspɛn ɛn in wɛf we nem Jian de liv na wan kɔntri na Yurop usay bɔku pipul dɛn gɛt mɔni. Fɔ lɔng tɛm, dɛn bin de rɛgyula payɔnia na wan say na dɛn kɔntri usay dɛn bin nid mɔ pipul dɛn fɔ  prich. Bɔt dɛn stɔp fɔ payɔnia we dɛn bɔn dɛn fɔs pikin ɛn naw dɛn dɔn bɔn ɔda pikin bak. Ɛspɛn se: “Wi kin pre to Jiova ɔltɛm mek i ɛp wi lɛ wi nɔ put an pan wetin bad naw we wi nɔ de spɛn bɔku tɛm na di prichin wok lɛk trade. Wi kin pre bak to Jiova mek i ɛp wi lɛ wi kɔntinyu fɔ du wetin rayt ɛn kɔntinyu fɔ gɛt zil fɔ du di prichin wok.”

¹⁶ Wan ɔda tin we Setan de yuz fɔ tɛmpt wi dɛn biɛn tɛm ya na dɛn rud rud pikchɔ dɛn. If wi wach dɛn rud rud pikchɔ dɛn, wi nɔ go blem Setan. Wetin mek? Na bikɔs Setan ɛn in wɔl nɔ ebul fos wi fɔ du ɛnitin we bad. Sɔm pipul dɛn dɔn wach dɛn rud rud pikchɔ dɛn bikɔs dɛn de tink bɔt bad tin dɛn. Bɔt i pɔsibul fɔ lɛ wi nɔ wach dɛn rud rud pikchɔ dɛn, jɔs lɛk aw bɔku brɔda dɛn dɔn du.—1 Kɔr. 10:12, 13.

17. (a) Aw wi go sho se wi want lɛ Jiova protɛkt wi frɔm Setan? (b) Wetin Jiova gɛt fɔ du we go mek wi rili gladi?

¹⁷ Fɔ lɛ wi go sho se wi want lɛ Jiova “sev wi frɔm di wikɛd wan,” wi fɔ tray tranga wan nɔ fɔ “du wetin [Setan in] wɔl de du.” Wi nɔ fɔ “lɛk [Setan in] wɔl ɔ di tin dɛn we de na di wɔl.” (Jɔn 15:19; 1 Jɔn 2:15-17) Dis na tin we nɔ izi fɔ du, bɔt wi fɔ tray fɔ avɔyd ɛnitin na Setan in wɔl. Wi go rili gladi we Jiova go pul Setan ɛn in wikɛd wɔl kɔmɔt! Bɔt wan tin we wi fɔ mɛmba na dat we dɛn bin drɛb Setan na ɛvin, i no se na shɔt tɛm lɛf fɔ am. Bikɔs Setan in at wam, i de du ɔl wetin i ebul fɔ du fɔ pwɛl wi padi biznɛs wit Jiova. So na dis mek wi fɔ kɔntinyu fɔ pre mek Jiova protɛkt wi frɔm am.—Rɛv. 12:12, 17.

18. Fɔ lɛ wi go sev di de we Jiova go dɔnawe wit Setan in wɔl, wetin wi fɔ kɔntinyu fɔ du?

¹⁸ Yu go want fɔ de di tɛm we Setan nɔ go de igen? If yu ansa na yɛs, na fɔ kɔntinyu fɔ pre lɛ Gɔd in Kiŋdɔm mek ɔlman ɔnɔ Gɔd in nem ɛn mek wetin Gɔd want bi na di wɔl. Wi fɔ abop pan Jiova fɔ ɛp wi fɔ kam nia am ɛn fɔ gi wi di tin dɛn we wi nid. Fɔ tru, i go fayn lɛ wi mekɔp wi maynd fɔ liv wi layf di we we de sho se wi gri wit di Awa Fada prea.