Wi de na di tɛm we bɔku tin kin mek wi wɔri, bikɔs “bad bad tin dɛn go de apin we nɔ go izi fɔ bia.” (Sɛkɔn Lɛta To Timoti 3:​1) Bɔku pipul dɛn de sɔfa frɔm mɔni prɔblɛm, famili prɔblɛm, wɔ, dɛn bad bad sik dɛn, ɛn dɛn ebi ren ɛn briz we kin pwɛl pipul dɛn os dɛn ɛn ɔda bad bad tin dɛn we mɔtalman kin du we kin mek pipul dɛn wɔri. Apat frɔm dis, ɔda prɔblɛm dɛn de we kin mek pipul dɛn wɔri, sɔm pipul dɛn kin wɔri: ‘If di tin we de gro na dɛn bɔdi, go tɔn to kansa.’ Dɛn kin wɔri bak fɔ no: ‘Uskayn wɔl we dɛn granpikin dɛn go mitɔp.’

Nɔto ɔl wɔri bad. Wi kin wɔri smɔl we wi kin want fɔ go du tɛst, we wi kin want fɔ du sɔntin, ɔ we dɛn de intavyu wi we wi de fɛn wok. We wi de fred fɔ lɛ bad tin nɔ mit wi, dat kin protɛkt wi. Bɔt if wi de wɔri tumɔs ɔ wi de wɔri ɔltɛm, dat kin ambɔg wi, ɛn i kin ivin mek wi lɔs wi layf. Wan stɔdi we 68,000 pipul dɛn bin du sho se ivin we pɔsin kin wɔri fɔ smɔl tɛm i kin mek i day kwik. Na dis mek Jizɔs bin aks se: “Uswan pan una we de wɔri go ebul fɔ ad wan kyubit to in layf?” Fɔ tru, we wi de wɔri i kin mek wi layf nɔ lɔng. So Jizɔs bin advays wi se lɛ wi: “Lɛf fɔ wɔri.” (Matyu 6:​25, 27) Bɔt aw dat pɔsibul?

Fɔ gɛt di ansa, wi nid fɔ du wetin Gɔd in Wɔd tɛl wi fɔ du, wi nid fɔ gɛt mɔ fet pan Gɔd ɛn tray fɔ de tink gud gud wan bɔt di tin dɛn we Gɔd dɔn prɔmis fɔ gi wi. Ivin if wi nɔ gɛt prɔblɛm dɛn we de mɔna wi naw, sɔntɛm wi go mɔs mitɔp prɔblɛm dɛn tumara bambay. So lɛ wi si wetin Pɔl, Jenɛt, ɛn Alɔna bin du we dɛn bin gɛt prɔblɛm dɛn we bin mek dɛn wɔri.