Dɛn bin de yuz grenin ston fɔ gren it dɛn lɛk wit ɔ bali fɔ mek i tɔn to flawa fɔ mek bred. Sɔm uman dɛn ɔ sɔm savant dɛn na bɔku os dɛn bin de yuz dɛn ston ya fɔ gren ɛvride. Di sawnd we bin de kɔmɔt pan di ston we dɛn bin de yuz fɔ gren na sɔntin we bin kɔmɔn to pipul dɛn we bin de trade trade.—Ɛksodɔs 11:​5; Jɛrimaya 25:⁠10.

Sɔm drɔin ɛn sɔm tin dɛn we dɛn bin de kav na Ijipt sho aw dɛn bin de yuz grenin ston. Dɛn bin de put di it we dɛn want fɔ gren pan ston we flat ɛn dip smɔl. Di wan we kin gren kin nil dɔŋ bifo di grenin ston ɛn i kin ol wan ɔda smɔl grenin ston wit in tu an ɛn rol am bifo ɛn biɛn fɔ gren di it we de pantap di big flat grenin ston. Wan buk sho se di smɔl ston we di pɔsin kin yuz fɔ gren kin we bitwin 4 ɛn 9 pawn (2 ɛn 4 kilo). If pɔsin yuz dis ston as wɛpɔn, i kin kil pɔsin wit am.—Di Jɔj Dɛn 9:​50-54.

Fɔ gren it dɛn lɛk wit ɛn bali bin rili impɔtant to famili dɛn. Na dat mek di Baybul se we yu lɛnt sɔmbɔdi sɔntin yu nɔ fɔ siz di ston we i de yuz fɔ gren bikɔs i nɔ gri fɔ du wetin una dɔn gri pan. Dyutɔrɔnɔmi 24:​6 tɔk se: “Nɔbɔdi nɔ fɔ tek di grenin ston ɔ di smɔl ston we in kɔmpin de yuz fɔ gren bikɔs i kam trɔs sɔntin to am. If pɔsin du dat, i go tan lɛk se i dɔn tek in kɔmpin in layf.”

Di Baybul tɔk se Jizɔs “de nia di ­Papa.” (Jɔn 1:​18) Dis wɔd de sho se Gɔd rili lɛk Jizɔs ɛn di padi biznɛs we de bitwin dɛn rili tayt. Dis wɔd bin de sho bak wetin di Ju pipul dɛn bin yus fɔ du we dɛn de it.

Insay Jizɔs in tɛm, di Ju dɛn bin de sidɔm pan lɔng chia dɛn we bin de rawnd di tebul usay dɛn de it. We dɛn de it rawnd di tebul, dɛn ɔl ed kin de nia di tebul ɛn dɛn fut dɛn kin de fa frɔm di tebul, ɛn dɛn kin ling pan wan smɔl pila wit dɛn lɛft an. Dis we aw dɛn kin sidɔm kin mek dɛn rayt an fri. Di pipul dɛn we de it na di tebul kin ling na dɛn lɛft ɛn dɛn kin de nia dɛn kɔmpin. Wan buk se: “Wan pɔsin in ed kin de nia di ɔda pɔsin in chɛst we sidɔm biɛn am.” Dat min se “i de nia” am.

Na bin big big ɔnɔ fɔ sidɔm nia di wan we de bifo di famili ɔ di pɔsin we invayt di pipul dɛn fɔ kam it. So we Jizɔs bin it di las Pasova wit in disaypul dɛn na ‘di disaypul we i lɛk,’ we na apɔsul Jɔn bin de nia am. So i izi fɔ lɛ Jɔn ling pan Jizɔs in chɛst fɔ aks am kwɛstyɔn.​—Jɔn 13:23-​25; 21:20.