1, 2. Wetin Jiova in pipul dɛn dɔn de du fɔ lɔng tɛm naw?

I DƆN te we Jiova in savant dɛn de wet fɔ si wetin di Baybul bin dɔn tɔk se go apin, apin. Fɔ ɛgzampul, Jɛrimaya bin tɔk se dɛn go pwɛl Juda, ɛn dat bin apin insay di ia 607 bifo Krays. Di Babilonian dɛn bin pwɛl Juda. (Jɛr. 25:8-11) Ayzaya, we Jiova bin yuz fɔ tɔk se i go briŋ in pipul dɛn bak na Juda, bin tɔk se: “Ɔl di wan dɛn we de wet fɔ am go gladi.” (Ayz. 30:18) We di prɔfɛt Mayka, bin de tɔk bɔt Gɔd in pipul dɛn we bin de trade trade, insɛf bin tɔk se: “A go kɔntinyu fɔ luk fɔ Jiova.” (Mayk. 7:7) Fɔ lɔng tɛm, Gɔd in savant dɛn bin de wet fɔ si di Mɛsaya ɔ Krays we di Baybul bin dɔn tɔk bɔt.—Lyuk 3:15; 1 Pit. 1:10-12. *

² Gɔd in savant dɛn tide de wet fɔ si di tin dɛn we di Baybul bin dɔn tɔk bɔt di Mɛsaya. Bikɔs sɔntin dɛn de stil we di Mɛsaya go gɛt fɔ du. Jiova go yuz in Kiŋdɔm fɔ pul ɔl di tin dɛn we de mek mɔtalman sɔfa, i go dɔnawe wit ɔl di wikɛd wan dɛn ɛn sev in pipul dɛn na dis wikɛd wɔl we Setan de  kɔntrol. (1 Jɔn 5:19) So lɛ wi de wach ɛn wi fɔ no se dis wɔl de kam dɔn jisnɔ.

3. Us kwɛstyɔn wi kin aks wisɛf if wi dɔn de wet fɔ lɔng tɛm fɔ lɛ di ɛnd kam?

³ Jiova in savant dɛn, rili de wet fɔ si di tɛm we ɔl di tin dɛn we Gɔd want “bi na di wɔl lɛk aw [i] want am na ɛvin.” (Mat. 6:10) Afta wi dɔn wet fɔ lɔng tɛm fɔ lɛ di ɛnd kam, sɔm pipul dɛn go de wɔnda se, ‘Wi gɛt ɛni gud rizin fɔ lɛ wi stil kɔntinyu fɔ de wet?’ Lɛ wi si.

4. Wetin na di men rizin we mek wi fɔ de wach?

⁴ Di Baybul sho wi aw wi fɔ biev as dis wɔl de kam dɔn. Jizɔs bin tɛl in disaypul dɛn se: “una go de wach” ɛn “una rɛdi ɔltɛm.” (Mat. 24:42; Lyuk 21:34-36) Dis na gud rizin fɔ lɛ wi de wet, bikɔs Jizɔs tɛl wi fɔ du so! Jiova in ɔganayzeshɔn dɔn sɛt fayn ɛgzampul fɔ wi. Di buk ɛn magazin dɛn we di ɔganayzeshɔn de mek, dɔn de advays wi fɔ “wet ɛn kɔntinyu fɔ tink bɔt Jiova in de” ɛn fɔ abop pan Jiova in nyu wɔl we i dɔn prɔmis.—Rid Pita In Sɛkɔn Lɛta 3:11-13.

5. Us impɔtant rizin wi gɛt fɔ de wach?

⁵ Jɔs lɛk we i bin impɔtant fɔ lɛ Kristian dɛn we bin de trade trade kɔntinyu fɔ wet, na so bak i impɔtant fɔ wisɛf tide fɔ de wet. Wetin du? Na bikɔs wi de na di tɛm we Krays de rul. Di sayn dɛn fɔ sho se i dɔn bigin fɔ rul bigin insay 1914. Ɛn dɛn sayn dɛn ya na di bad bad tin dɛn we de apin na di wɔl, ɛn di prichin wok we wi de du ɔlsay na di wɔl, dis dɔn sho se wi de na di tɛm we “di wɔl want dɔn.” (Mat. 24:3, 7-14) Jizɔs nɔ tɛl wi aw lɔng dis tɛm go tek bifo di ɛnd kam, so wi fɔ rɛdi ɔltɛm ɛn wi fɔ de wach.

6. Wetin mek wi biliv se di bad bad tin dɛn we de apin na di wɔl go kɔntinyu fɔ wɔs as di ɛnd de kam nia?

⁶ Sɔntɛm wi go de aks se: We di Baybul de tɔk bɔt di tɛm we “di wɔl want dɔn.” fɔ se i de tɔk bɔt di tɛm we bad bad tin dɛn go de wɔs na di wɔl mɔ ɛn mɔ? Di Baybul tɔk se bad bad tin dɛn go de apin mɔ ɛn mɔ “insay di las dez.” (2 Tim. 3:1, 13; Mat. 24:21; Rɛv. 12:12) So wi nɔ fɔ de tink se di bad bad tin dɛn we de apin naw na di wɔl go ridyus, na mɔ ɛn mɔ i go de bɔku.

7. Wetin Matyu 24:37-39 tɔk bɔt di tin dɛn we de apin na di wɔl insay di las dez?

⁷ Bɔt aw bad-ɔf di wɔl go bi bifo “da big trɔbul” bigin? (Rɛv. 7:14) Fɔ ɛgzampul, yu tink se wɔ go de na ɔl di kɔntri dɛn na di wɔl? Yu tink se it nɔ go de fɔ ɔlman? Yu tink se ɔlman go de sik na di wɔl? If dɛn kayn tin ya apin, ivin pipul dɛn we nɔ biliv wetin di Baybul se, go gri se di tin dɛn we di Baybul bin tɔk se go apin de apin. Bɔt Jizɔs bin dɔn tɔk se bɔku pipul dɛn nɔ go “pe atɛnshɔn” di tɛm we i go de rul. Dɛn go de du wetin dɛn yus fɔ du, dɛn nɔ go no natin te di tɛm we Gɔd go kam dɔnawe wit di wɔl. (Rid Matyu 24:37-39.) So di Baybul nɔ tɔk se di bad tin dɛn we de apin na di wɔl insay di las dez, go so bad ɔf dat pipul dɛn go gri fɔ biliv se di ɛnd dɔn nia.—Lyuk 17:20; 2 Pit. 3:3, 4.

8. Bikɔs wi de obe Jizɔs in advays we i se lɛ wi “go de wach” wetin dis dɔn mek wi no?

⁸ Jizɔs bin tɛl in disaypul dɛn fɔ “de wach.” (Mat. 24:27, 42) So fɔ lɛ dɛn go kɔntinyu fɔ fala dis advays dɛn fɔ si dɛn sayn ya, we fɔ sho se di wɔl want dɔn. Ɛn  dɛn sayn ya bin bigin fɔ apin frɔm 1914. Frɔm da tɛm de, di sayn dɛn we Jizɔs bin gi de apin. Wi dɔn si klia wan se wi de naw na di tɛm we “di wɔl want dɔn” ɛn i nɔ go te igen, Jiova go dɔnawe wit Setan in wikɛd wɔl.

9. Us rizin dɛn wi gɛt fɔ wet fɔ di tɛm we di wɔl go dɔn?

⁹ Wetin mek i fayn fɔ lɛ Kristian dɛn we de tide go de wet? Wi de wet bikɔs wi want fɔ du wetin Jizɔs se. Apat frɔm dat, wi dɔn si klia wan se ɔl di tin dɛn we Jizɔs bin se go apin insay di las de dɔn de apin. Wi biliv se di ɛnd dɔn nia, nɔto bikɔs wi de gri wit ɔl di tin dɛn we wi de yɛri, bɔt na bikɔs wi rili biliv se di tin dɛn we di Baybul bin dɔn tɔk de apin. So wi fɔ de wach ɛn rɛdi fɔ di tɛm we di wɔl go dɔn.

10, 11. (a) Wetin Jizɔs bin pripia i disaypul dɛn fɔ du? (b) Wetin Jizɔs bin tɛl in disaypul dɛn fɔ du if dɛn dɔn de wet fɔ di ɛnd pas aw dɛn bin tink se dɛn fɔ wet? (Luk di pikchɔ nia dis atikul in taytul.)

¹⁰ I dɔn te we bɔku pan wi dɔn de wach. Bɔt lɛ wi nɔ alaw di tɛm we dɔn pas fɔ mek wi nɔ gɛt zil igen fɔ wet. Wi fɔ rɛdi fɔ di tɛm we Jizɔs go kam fɔ pul ɔl di bad bad tin dɛn we de apin na dis wɔl. Mɛmba se Jizɔs bin tɛl in disaypul dɛn se: “Una go de luk, una rɛdi ɔltɛm bikɔs una nɔ no di patikyula tɛm. I jɔs tan lɛk wan man we de travul go ɔda kɔntri we lɛf in os ɛn tɛl in slev dɛn wetin fɔ du. I gi ɔlman in wok we i fɔ du ɛn tɛl di wan we de na di domɔt fɔ de wach. So una go de wach, bikɔs una nɔ no di tɛm we di masta we gɛt di os de kam, una nɔ no if na ivintɛm ɔ midulnɛt ɔ na we di ples jɔs bigin brayt ɔ ali mɔnin i go kam, so dat we i kam di tɛm we una nɔ de fil se i fɔ kam, i nɔ go mit una de slip. Wetin a de tɛl una, na in a de tɛl ɔlman: Una go de wach.”—Mak 13:33-37.

¹¹ We Jizɔs in disaypul dɛn bi kam fɔ no se na 1914 Jizɔs bigin fɔ rul, dis bin ɛp dɛn fɔ pripia fɔ di tɛm we di ɛnd go kam. Dɛn bin du dis we dɛn kɔntinyu fɔ du mɔ na di prichin wok. Jizɔs bin tɔk se na leta i go kam, i se sɔntɛm i go kam “we di ples jɔs bigin brayt ɔ ali mɔnin.” If na so i bi, wetin in disaypul dɛn fɔ du? Jizɔs tɛl dɛn se: “Una go de wach.” So ivin if wi dɔn de wet fɔ lɔng tɛm dat nɔ min se di ɛnd de fa fɔs ɔ dat nɔ min se di ɛnd nɔ go bi na wi yon tɛm.

12. Wetin Abakɔk bin aks Jiova? Aw Gɔd bin ansa am?

¹² Lɛ wi tɔk bɔt di prɔfɛt Abakɔk. Gɔd bin gi am di wok fɔ tɛl in pipul dɛn se dɛn gɛt fɔ pwɛl Jerusɛlɛm. Bifo i bigin du dis wok, ɔda prɔfɛt dɛn we bin de bifo am bin dɔn tɔk se dɛn gɛt fɔ pwɛl Jerusɛlɛm. Di tin dɛn we bin de apin bin dɔn so bad-ɔf dat ‘di wikɛd wan dɛn de rawnd di wan dɛn we de du wetin rayt, na dat mek dɛn nɔ de du tin tret igen.’ So wi nɔ go sɔprayz we Abakɔk aks se: “O Jiova, aw lɔng a go de kray fɔ mek yu ɛp mi?” Bifo Jiova ansa dis kwɛstyɔn wantɛm wantɛm, i ɛp in fetful prɔfɛt fɔ no se, wetin i bin dɔn tɔk se go apin to Jerusɛlɛm go apin ɛn “i nɔ go let.” Jiova tɛl Abakɔk “fɔ wet.”—Rid Abakɔk 1:1-4; 2:3.

13. Us kayn we Abakɔk fɔ dɔn de tink? Wetin mek dat nɔ fɔ dɔn mek sɛns?

¹³ Lɛ wi se Abakɔk in at bin pwɛl ɛn i bigin tink se: ‘I dɔn te we a de yɛri se Jerusɛlɛm gɛt fɔ pwɛl. Bɔt wetin go apin if i stil de fa fɔs? I nɔ mek sɛns fɔ lɛ a  kɔntinyu fɔ de tɔk lɛk se Jerusɛlɛm de kam pwɛl wantɛm wantɛm. A go lɛf di wok na ɔda pipul dɛn an.’ If Abakɔk bin de tink dis kayn we, i fɔ dɔn pwɛl in padi biznɛs wit Jiova ɛn sɔntɛm i fɔ dɔn day di tɛm we di pipul dɛn na Babilɔn bin kam pwɛl Jerusɛlɛm!

14. Wetin mek wi no se we wi de wet, wi nɔ go wet fɔ natin?

¹⁴ Insay di nyu wɔl, wi go gɛt gud rizin fɔ de tink bɔt ɔl di tin dɛn we di Baybul bin dɔn tɔk bɔt di tɛm we di wɔl go dɔn. Wetin du? Na bikɔs ɔl wetin di Baybul bin tɔk bin rili apin. We wi de tink bɔt aw dɛn bin apin, dat go mek wi biliv Jiova mɔ ɛn mɔ ɛn biliv se i go du di ɔda tin dɛn we i dɔn prɔmis. (Rid Jɔshwa 23:14.) Wi go tɛl Gɔd tɛnki we ‘no di tem ɛn di sizin,’ ɛn we bin advays wi fɔ rɛdi bikɔs ‘di tɛm fɔ lɛ ɔltin dɔn, dɔn nia.’—Akt 1:7; 1 Pit. 4:7.

15, 16. Wetin mek wi go se na naw di prichin wok impɔtant pas ɔl?

¹⁵ Wi fɔ no se Jiova in ɔganayzeshɔn go kɔntinyu fɔ de mɛmba wi, so dat wi nɔ go lɛf fɔ sav Gɔd. Dɛn tin dɛn ya we di ɔganayzeshɔn kin tɛl wi nɔto fɔ jɔs ɛp wi fɔ sav Gɔd nɔmɔ, bɔt na fɔ ɛp wi fɔ no se di sayn dɛn we de sho se Jizɔs dɔn bigin fɔ rul dɔn de apin. Wetin na di tin we impɔtant pas ɔl we wi fɔ de du naw? Na naw wi fɔ put Gɔd in Kiŋdɔm fɔs na wi layf ɛn du wetin rayt. Aw wi go du dat? Na bay we wi kɔntinyu fɔ prich di gud nyus wit zil!—Mat. 6:33; Mak 13:10.

¹⁶ Wan sista tɔk se: “We wi de prich di gud nyus bɔt Gɔd in Kiŋdɔm, wi de ɛp fɔ sev pipul dɛn layf na dis wɔl we de kam dɔn jisnɔ.” Dis sista bin no wetin i min fɔ sev pɔsin. In ɛn in man bin sev di tɛm we wan pɔsh ship we dɛn kɔl Wilhelm Gustloff bin sink insay dɛn 1945. Dis na bin di wɔs aksidɛnt we dɔn ɛva apin na si. Ivin we dɛn kayn bad tin ya kin apin, pɔsin kin stil nɔ no wetin rili impɔtant. Di sista mɛmba we wan uman bin de kray se: “Mi bɔks dɛn! Mi Bɔks dɛn! Mi riŋ! Mi chen! Ɛn ɔda valyu tin dɛn ɔl dɔn lɛf insay di ship! A dɔn lɔs ɔltin!” Bɔt sɔm ɔda pipul dɛn we bin de na di ship bin no wetin rili impɔtant. Dɛn bin gɛt sɔri at fɔ di pipul dɛn so dɛn tray tranga wan fɔ ɛp sev pipul dɛn we bin dɔn fɔdɔm na di kɔl kɔl wata. Lɛk dɛn pipul ya, wi sɛf fɔ du wi bɛst fɔ ɛp ɔda pipul dɛn. Wi fɔ kɔntinyu fɔ du di prichin wok ɛn ɛp ɔda pipul dɛn  sev bifo di tɛm we Gɔd go dɔnawe wit dis wɔl.

17. Us rizin wi gɛt fɔ biliv se di ɛnd go kam ɛnitɛm frɔm naw?

¹⁷ Di bad tin dɛn we de apin na di wɔl dɔn sho klia wan se di tin dɛn we di Baybul bin tɔk se go apin dɔn de apin naw ɛn di tɛm fɔ lɛ di ɛnd kam dɔn nia. Rɛvɛleshɔn 17:16 tɔk se “di tɛn ɔn” ɛn “di wayl bif” go gɛt fɔ dɔnawe wit ɔl dɛn lay lay rilijɔn dɛn, so wi nɔ fɔ tink se dis wɔl go nid mɔ tɛm fɔ lɛ dis apin. Lɛ wi nɔ fɔgɛt se na Gɔd go “put am na dɛn at” fɔ lɛ dɛn du am, ɛn dis go apin kwik kwik wan ɛn i go bi ɛnitɛm frɔm naw! (Rɛv. 17:17) Di tɛm fɔ lɛ dis wikɛd wɔl dɔn nɔ de fa igen. So wi gɛt gud rizin fɔ du wetin Jizɔs bin tɛl wi. Jizɔs bin se: “Una fɔ pe atɛnshɔn to unasɛf so dat una at nɔ go de ful una fɔ de it pasmak, drink pasmak, fɔ de wɔri bɔt di tin dɛn na layf, ɛn wantɛm wantɛm da de de go kam fɔ una jɔs lɛk trap.” (Lyuk 21:34, 35; Rɛv. 16:15) Lɛ wi mekɔp wi maynd fɔ sav Jiova ɛn wi nɔ fɔ alaw ɛnitin fɔ stɔp wi. Wi fɔ biliv se i go “ɛp di wan dɛn we de wet fɔ am.”—Ayz. 64:4.

18. Us kwɛstyɔn wi go tɔk bɔt insay di nɛks atikul?

¹⁸ As wi de wet fɔ di tɛm we dis wikɛd wɔl go dɔn, i go fayn lɛ wi fala di advays we wan pan Jizɔs in disaypul dɛn we nem Jud bin gi. I bin tɔk se: “Mi brɔda dɛn we a lɛk, una go de du sɔntin we go mek una gɛt mɔ fet, ɛn una fɔ de pre wit oli spirit so dat una go kɔntinyu fɔ du sɔntin we go mek Gɔd lɛk una, as una de wet fɔ di tɛm we wi Masta Jizɔs Krays go sɔri fɔ wi ɛn gi wi layf we go de sote go.” (Jud 20, 21) Bɔt aw wi go sho se wi de wet fɔ di nyu wɔl we Gɔd dɔn prɔmis ɛn aw wi go sho se wi rili want lɛ da de de kam? Na dis wi go tɔk bɔt insay di nɛks atikul.