1, 2. (a) Wetin mek yu biliv se Jiova lɛk in pipul dɛn? (b) Wetin Jiova mek wi fɔ du?

WETIN mek yu biliv se Jiova lɛk in pipul dɛn? Bifo yu ansa dis kwɛstyɔn, i go fayn lɛ yu tink bɔt dɛn ɛgzampul ya. Fɔ lɔng tɛm, sɔm brɔda ɛn sista dɛn dɔn de ɛnkɔrej wan sista we nem Telin. Dɛn kin tɛl am se lɛ i nɔ de tink fɔ du mɔ pas wetin i ebul fɔ du. Di sista tɔk se: “If Jiova nɔ bin lɛk mi, i nɔ fɔ dɔn kɔntinyu fɔ advays mi.” Wan ɔda sista we nem Brijɛt, we in man bin dɔn day ɛn we gɛt tu pikin dɛn bin tɔk se: “Fɔ mɛn pikin dɛn na dis wɔl we Setan de rul na tin we nɔ rili izi, mɔ we na yu wan. Bɔt a biliv se Jiova lɛk mi bikɔs i kin ɛp mi we a gɛt prɔblɛm ɛn i nɔ ɛva alaw tin fɔ mit mi we a nɔ ebul fɔ bia.” (1 Kɔr. 10:13) Wan ɔda sista we nem Sandra bin sik bad bad wan ɛn di sik we i gɛt nɔ de mɛn. Na wan kɔnvɛnshɔn, wan sista bin sho se i rili bisin bɔt am. Bɔku pipul dɛn no dis sista in man. Sandra in man tɔk se: “Pan ɔl we wi nɔ no dis sista, di we aw i sho se i bisin bɔt wi mek wi rili gladi. Ivin di smɔl smɔl tin dɛn we wi brɔda ɛn sista dɛn kin du fɔ sho se dɛn lɛk wi kin mek a no se Jiova rili lɛk wi.”

 ² Gɔd bin mek wi fɔ sho lɔv to ɔda pipul dɛn ɛn fɔ lɛ ɔda pipul dɛn sho lɔv to wi. So we bad tin kin mit wi, lɛk we wi kin sik, we wi gɛt mɔni prɔblɛm, ɔ we wi prichin wok nɔ de go bifo, i kin izi fɔ lɛ wi fil se Jiova nɔ lɛk wi. If wi de fil dis kayn we, i go fayn lɛ wi de mɛmba se Jiova valyu wi ɛn i de ɔltɛm fɔ “ol [wi] rayt an” ɛn ɛp wi. I nɔ go ɛva fɔgɛt wi if wi de du wetin i want.—Ayz. 41:13; 49:15.

3. Wetin go ɛp wi fɔ biliv se Jiova go kɔntinyu fɔ lɛk wi?

³ Di pipul dɛn we wi jɔs dɔn tɔk bɔt biliv se Gɔd bin de wit dɛn we dɛn gɛt prɔblɛm. Wisɛf kin biliv dis sem tin fɔ se Jiova de wit wi. (Sam 118:6, 7) Dis atikul go tɔk bɔt 4 tin dɛn we sho se Gɔd rili lɛk wi. (1) Di tin dɛn we i mek. (2) In Wɔd, di Baybul. (3) Prea. (4) Di mek we i mek Jizɔs kam day fɔ wi. We wi de tink gud wan bɔt ɔl dɛn tin ya we Jiova dɔn du fɔ sho se i rili lɛk wi, dat go mek wi de tɛl am tɛnki mɔ ɛn mɔ.—Rid Sam 77:11, 12.

4. We wi de tink bɔt di tin dɛn we Jiova dɔn mek, wetin dat go ɛp wi fɔ no?

⁴ Yu ebul fɔ si di lɔv we Jiova gɛt fɔ wi pan di tin dɛn we i dɔn mek? Yɛs, wi ebul bikɔs di tin dɛn we Gɔd mek de sho se i gɛt lɔv. (Rom 1:20) Fɔ ɛgzampul, Jiova mek di wɔl so dat wi go ebul fɔ du mɔ tin dɛn, nɔto fɔ lɛ wi jɔs de na di wɔl nɔmɔ. I dɔn gi wi ɔltin we wi nid fɔ ɛnjɔy layf. Wi nid fɔ it so dat wi go kɔntinyu fɔ liv. Jiova dɔn mek shɔ se difrɛn difrɛn plant dɛn gro na di grɔn, so dat wi go de yuz dɛn fɔ mek tin fɔ it. Ɛn i ivin mek wi de ɛnjɔy ɛn satisfay we wi de it! (Ɛkli. 9:7) Wan sista we nem Katrin kin ɛnjɔy fɔ wach di tin dɛn we Jiova mek, mɔ arawnd dɛn Epril tɛm insay Kanada. I tɔk se: “I rili wɔndaful fɔ no aw ɔltin kam fɔ gɛt layf, di we aw di flawa dɛn kin bigin fɔ gro ɛn di we aw di bɔd dɛn kin kam bak afta sɔm tɛm. Ɛn wan pan dɛn na dɛn smɔl smɔl bɔd dɛn we kin kam fɛn it biɛn mi kichin winda. Jiova rili lɛk wi, na dat mek i gi wi ɔl dɛn tin ya so dat wi go gladi.” Wi Papa we de na ɛvin, lɛk di tin dɛn we i mek ɛn i want lɛ wi ɛnjɔy di tin dɛn we i dɔn mek.—Akt 14:16, 17.

5. Aw di we aw Jiova mek mɔtalman de sho se i lɛk wi?

⁵ Jiova mek wi fɔ lɛ wi ebul fɔ du fayn fayn wok dɛn we go mek wi ɛnjɔy wi layf. (Ɛkli. 2:24) I want lɛ mɔtalman dɛn ful-ɔp di wɔl, tɔn am to fayn fayn gadin, kia fɔ di fish dɛn, di bɔd dɛn, ɛn ɔda tin dɛn we gɛt layf. (Jɛn. 1:26-28) Jiova rili lɛk wi. Fɔ sho se i lɛk wi, i dɔn gi wi fayn fayn kwaliti dɛn so dat wi go ebul fɔ falamakata am!—Ɛfi. 5:1.

6. Wetin mek wi fɔ rili valyu Gɔd in Wɔd?

⁶ Gɔd dɔn sho se i rili lɛk wi, we i gi wi in Wɔd, di Baybul. Di Baybul de sho wi wetin wi nid fɔ no bɔt Gɔd ɛn aw i de fil bɔt mɔtalman. Fɔ ɛgzampul, di Baybul tɛl wi aw Jiova bin fil bɔt di Izrɛlayt dɛn, we dɛn nɔ bin de gri fɔ du wetin i want ɔltɛm. Sam 78:38 tɔk se: “I bin de sɔri fɔ dɛn; i de fɔgiv dɛn sin ɛn i nɔ kil dɛn. We i kin vɛks, i nɔ kin du wetin i want fɔ du to dɛn.” So we wi de tink bɔt dis vas, i go ɛp wi fɔ no se Jiova lɛk wi  ɛn i bisin bɔt wi. Yu fɔ no se Jiova valyu yu.—Rid Pita In Fɔs Lɛta 5:6, 7.

7. Wetin mek wi fɔ rili valyu di Baybul?

⁷ Wi fɔ rili valyu di Baybul bikɔs na di men tin we Gɔd de yuz fɔ tɔk to wi. We mama, papa, ɛn dɛn pikin dɛn de tɔk tru to dɛnsɛf, i kin mek dɛn lɛk dɛnsɛf mɔ ɛn mɔ ɛn i kin mek dɛn biliv dɛnsɛf. Yu nɔ tink se Jiova go du di sem tin? Pan ɔl we wi nɔ wande si Gɔd ɔ yɛri in vɔys, i de yuz in Wɔd, di Baybul fɔ “tɔk” to wi ɛn wi nid fɔ lisin we i de tɔk to wi. (Ayz. 30:20, 21) Jiova want fɔ gayd wi we dɔn gi wi layf to am, ɛn i want fɔ protɛkt wi lɛ bad tin nɔ mit wi. I want bak lɛ wi no am ɛn abop pan am.—Rid Sam 19:7-11; Prɔvabs 1:33.

8, 9. Wetin Jiova want lɛ wi no? Gi wan ɛgzampul na di Baybul.

⁸ Jiova want lɛ wi no am as pɔsin we lɛk wi ɛn i want lɛ wi no se i nɔ de pe atɛnshɔn tumɔs pan di mistek dɛn we wi de mek. Bɔt i de luk fɔ di gud tin dɛn we wi de du. (2 Krɔn. 16:9) Fɔ ɛgzampul, i bin de si di gud tin dɛn we Kiŋ Jɛoshafat na Juda bin du. Wan tɛm, Jɛoshafat nɔ bin du tin wit sɛns, i bin gri fɔ go wit Kiŋ Eab we bin de na Izrɛl fɔ go fɛt di Siryan pipul dɛn fɔ tek wan ples na dɛn an we dɛn kɔl Ramɔt-giliad. Pan ɔl we 400 lay lay prɔfɛt dɛn tɛl wikɛd Kiŋ Eab se i go win di fɛt, Jiova in prɔfɛt we na Makaya bin tɔk se dɛn go win Eab pan di fɛt. Eab bin day pan di fɛt, bɔt Jɛoshafat  in bin manej fɔ sev. We i kam bak na Jerusɛlɛm, Jeu we na Anani in pikin bin tɔk pan am bikɔs i gri fɔ fala Eab fɔ go fɛt. Bɔt stil, Jeu bin tɛl am se: “Gɔd dɔn si di gud tin dɛn we yu de du.”—2 Krɔn. 18:4, 5, 18-22, 33, 34; 19:1-3.

⁹ We Jɛoshafat bin jɔs bigin rul, i tɛl di prins dɛn, di Livayt dɛn, ɛn di prist dɛn fɔ travul na ɔl di siti dɛn we de na Juda ɛn tich Jiova in Lɔ to di pipul dɛn. Dis tich we dɛn bin de go ɛn tich di pipul dɛn bin kɔmɔt fayn bikɔs i mek di ɔda neshɔn dɛn bigin fɔ fred Jiova. (2 Krɔn. 17:3-10) Na tru se Jɛoshafat nɔ bin du tin wit sɛns, bɔt Jiova bin de si di gud tin dɛn we i bin de du. Dis ɛgzampul na di Baybul ɛp wi fɔ no se pan ɔl we wi nɔ pafɛkt, Jiova go kɔntinyu fɔ lɛk wi if wi kɔntinyu fɔ du wetin i want wit ɔl wi at.

10, 11. (a) Wetin mek prea na spɛshal gift we Jiova dɔn gi wi? (b) Aw Gɔd kin ansa wi prea dɛn? (Luk di pikchɔ nia dis atikul in taytul.)

¹⁰ Papa we lɛk in pikin dɛn kin tek tɛm fɔ lisin to in pikin dɛn we dɛn want fɔ tɔk to am. I go want fɔ no wetin dɛn want ɛn wetin de wɔri dɛn bikɔs i bisin bɔt dɛn. Jiova, wi Papa we de na ɛvin de lisin to wi we wi go bifo am fɔ pre.

¹¹ Wi kin pre to Jiova ɛnitɛm. I nɔ put no tɛm we wi fɔ pre to am. Jiova na wi Padi we rɛdi fɔ lisin to wi ɔltɛm. Telin we wi bin dɔn tɔk bɔt bin tɔk se: “Yu kin tɛl am ɛnitin ɛn ɔltin.” We wi tɛl Gɔd bɔt di tin dɛn we de na wi at we wi de pre, i kin yuz di Baybul fɔ ansa wi. I kin yuz bak wan atikul insay wi magazin dɛn, ɔ i kin yuz wi brɔda ɛn sista dɛn fɔ ɛnkɔrej wi. Jiova kin yɛri wi prea ɛn ɔndastand wi ivin we nɔbɔdi nɔ ebul fɔ ɔndastand wi. Di ansa we i de ansa wi prea de sho se i rili lɛk wi.

12. Wetin mek wi fɔ lan bɔt di prea dɛn we de na di Baybul? Gi wan ɛgzampul.

¹² Wi kin lan bɔku tin frɔm di prea dɛn we dɛn rayt insay Gɔd in Wɔd, di Baybul. Sɔntɛnde, i go fayn fɔ lɛ wi stɔdi dɛn prea ya we wi de du wi Famili Wɔship. We wi de tink bɔt aw Jiova in savant dɛn we bin de trade bin de tɛl Jiova ɔl wetin de na dɛn at, dat go ɛp wi fɔ pre fayn fayn wan to Jiova. Fɔ ɛgzampul, tink bɔt di pre we Jona bin pre to Jiova insay wan big fish in bɛlɛ fɔ sho se i rili sɔri fɔ wetin i du. (Jona 1:17–2:10) Wi kin lan bak frɔm Sɔlɔmɔn in prea. Sɔlɔmɔn bin pre wit ɔl in at to Jiova di tɛm we dɛn dɔn fɔ bil di tɛmpul we di Izrɛlayt dɛn fɔ yuz fɔ wɔship Jiova. (1 Kiŋ 8:22-53) Lɛ wi tink gud wan bak bɔt di Awa Fada prea we Jizɔs bin sho wi. Dis prea go bɛnifit wi. (Mat. 6:9-13) Pantap dat, wi fɔ de “mek Gɔd no di tin dɛn we [wi] want.” We wi de du dis, ‘di pis we Gɔd de gi we pas di we aw wi ɔndastand go gayd wi at ɛn wi maynd.’ Ɛn dis go mek wi tɛl Jiova tɛnki mɔ ɛn mɔ fɔ di lɛk we i lɛk wi.—Fil. 4:6, 7.

13. Wetin Jizɔs in day dɔn mek pɔsibul fɔ mɔtalman?

¹³ Jiova mek Jizɔs day fɔ wi so dat “i go mek wi gɛt layf.” (1 Jɔn 4:9) We di apɔsul Pɔl bin de rayt bɔt di bɛst we aw  Gɔd dɔn sho se i lɛk wi, i bin se: “Krays day di rayt tɛm fɔ pipul dɛn we de sin. I nɔ izi fɔ lɛ ɛnibɔdi day fɔ pɔsin we de du wetin rayt; bɔt sɔntɛm sɔmbɔdi go gɛt maynd fɔ day fɔ pɔsin we gud. Bɔt Gɔd dɔn sho se i lɛk wi, bikɔs pan ɔl we wi na sina, Krays day fɔ wi.” (Rom 5:6-8) Dis fayn we aw Jiova dɔn sho se i lɛk wi, dɔn mek am pɔsibul fɔ lɛ wi gɛt tayt padi biznɛs wit am.

14, 15. Wetin Jizɔs Krays in day wan min fɔ (a) di anɔyntɛd Kristian dɛn? (b) di wan dɛn we gɛt di op fɔ de na dis wɔl?

¹⁴ Sɔm pipul dɛn de fil Jiova in lɔv wan spɛshal we. (Jɔn 1:12, 13; 3:5-7) Jiova dɔn anɔynt sɔm pipul dɛn wit in oli spirit ɛn dis dɔn mek dɛn bi “Gɔd in pikin dɛn.” (Rom 8:15, 16) We Pɔl de tɔk bɔt anɔyntɛd Kristian dɛn, i bin se ‘bikɔs dɛn de wit Krays, Gɔd dɔn es dɛn ɔp togɛda ɛn mek dɛn sidɔm togɛda na ɛvin wit Krays Jizɔs.’ (Ɛfi. 2:6) Dɛn gɛt dis op fɔ go na ɛvin bikɔs Jiova dɔn ‘stamp dɛn wit di oli spirit we i bin dɔn prɔmis, we na jɔs smɔl pan di tin dɛn we dɛn gɛt fɔ gɛt,’ dat na ‘di op we dɛn bin dɔn kip fɔ dɛn na ɛvin.’—Ɛfi. 1:13, 14; Kɔl. 1:5.

¹⁵ Ɔl di wan dɛn we nɔto anɔyntɛd go bi Jiova in padi if dɛn put fet pan Jizɔs in sakrifays. Dɛn gɛt di chans fɔ bi Jiova in pikin dɛn ɛn dɛn go de sote go na Paradays. Di day we Jizɔs day fɔ wi, dɔn sho klia wan se Jiova rili lɛk mɔtalman. (Jɔn 3:16) If wi gɛt di op fɔ liv na dis wɔl sote go ɛn wi kɔntinyu fɔ du wetin Jiova want, wi fɔ no se i go mek wi ɛnjɔy layf insay di nyu wɔl. So i go fayn lɛ wi si di day we Jiova mek in Pikin kam day fɔ wi as di bɛst we we i dɔn sho se i rili lɛk wi.

16. We wi tink gud wan bɔt di difrɛn we dɛn we Jiova dɔn sho se i lɛk wi, wetin dat go mek wi du?

¹⁶ Na tray nɔmɔ wi go tray fɔ kɔnt di difrɛn difrɛn we dɛn we Jiova dɔn sho se i lɛk wi. Na dis mek Devid bin siŋ se: “A rili valyu di sɛns we yu gɛt! Mi Gɔd yu gɛt sɛns pasmak! If a tray fɔ kɔnt dɛn, dɛn go bɔku pas di sansan.” (Sam 139:17, 18) Dis vas fɔ mek wi rili lɛk Jiova fɔ di sho we i de sho se i kia fɔ wi. So lɛ wi du ɔl wetin wi ebul fɔ du fɔ gi Jiova wi bɛst.

17, 18. Aw wi go sho se wi lɛk Gɔd?

¹⁷ Bɔku we dɛn de fɔ sho se wi lɛk Jiova. Fɔ ɛgzampul, wi go sho se wi lɛk Gɔd ɛn wi kɔmpin mɔtalman we wi de prich di gud nyus bɔt di Kiŋdɔm wit zil. (Mat. 24:14; 28:19, 20) Wi go sho se wi rili lɛk Jiova we wi tinap tranga wan fɔ du wetin rayt we sɔntin tɛmpt wi fɔ du bad. (Rid Sam 84:11; Jems 1:2-5.) If di prɔblɛm we de mit wi at fɔ bia, wi fɔ no se Gɔd no di sɔfa we wi de sɔfa ɛn i go ɛp wi bikɔs wi valyu na in yay.—Sam 56:8.

¹⁸ Di lɛk we wi lɛk Jiova go mek wi de tink gud wan bɔt di tin dɛn we i dɔn mek ɛn ɔda wɔndaful tin dɛn we i de du. Wi go sho se wi lɛk Gɔd ɛn sho se wi valyu in Wɔd, di Baybul we wi tek tɛm fɔ stɔdi di Baybul. Di lɛk we wi lɛk Jiova go mek wi go nia am we wi de pre to am. Ɛn wi go lɛk Gɔd mɔ we wi de tink bɔt di day we i mek Jizɔs kam day fɔ wi sin dɛn. (1 Jɔn 2:1, 2) Dis na jɔs sɔm rizin dɛn we wi gɛt fɔ lɛk Jiova fɔ we i de kɔntinyu fɔ sho se i lɛk wi.