DI TƆPIK NA DI FRƆNT PEJ | I PƆSIBUL
Wetin Kin Apin we Pɔsin Day?
“A bin tink se na tri ples de we pɔsin kin go afta i day: ɛvin, ɛl, ɔ wan ɔda ples usay pipul dɛn we dɔn day kin go sɔfa te dɛn klin fɔ go na ɛvin. A no se a nɔ dat gud fɔ go na ɛvin ɛn a nɔ dat bad fɔ go na ɛl. A nɔ bin no wetin rili bin de apin na di ples usay pipul dɛn we dɔn day kin go sɔfa te dɛn klin fɔ go na ɛvin. A nɔ bin ɛva si ɛnitin lɛk dat na di Baybul. Na jɔs wetin pipul dɛn bin de se.”—Layonɛl.
“Dɛn bin tich mi se ɔlman de go na ɛvin afta dɛn day, bɔt a nɔ bin biliv. A bin tink se we pɔsin day, ɔltin dɔn dɔn, we min se i nɔ gɛt no op fɔ tumara bambay.”—Fanando.
Yu dɔn ɛva wɔnda: ‘Wetin rili kin apin to pɔsin we i day? Fɔ se di wan dɛn we wi lɛk we dɔn day de sɔfa sɔnsay? Wi go ɛva si dɛn igen? Wetin go mek wi biliv se wi go si dɛn igen?’ Duya i go fayn lɛ yu no wetin di Baybul rili se bɔt dis. Fɔs, lɛ wi tɔk bɔt wetin di Baybul se day tan lɛk. Dɔn wi go tɔk bɔt di op we Gɔd in Wɔd, di Baybul se de fɔ di wan dɛn we dɔn day.
Wetin kin apin to di wan dɛn we dɔn day?
DI BAYBUL IN ANSA: “Wi we gɛt layf no se wande wande wi go day, bɔt di wan dɛn we dɔn day, nɔ no natin igen, dɛn nɔ de pe dɛn igen bikɔs dɛn dɔn fɔgɛt ɔltin bɔt dɛn. Ɛnitin we yu ebul fɔ du, du am wit ɔl yu trɛnk, bikɔs yu nɔ go ebul fɔ wok, fɔ plan sɔntin, fɔ no bɔt sɔntin ɔ gɛt sɛns na di Grev, di ples usay yu de go.” *—Ɛkliziastis 9:
Di Grev na di say we mɔtalman dɛn de go we dɛn day. Na say usay pɔsin nɔ de no natin ɛn nɔ ebul fɔ du ɛnitin igen. Aw Job bin si di Grev? Job bin lɔs ɔl in prɔpati ɛn pikin dɛn insay wan de, ɛn i kam gɛt bwɛl dɛn ɔlsay na in bɔdi we bin de mɔna am bad bad wan. I beg Gɔd se: “Ayd mi na di Grev [“na ɛl,” Katolik Douay Version] ɛn kip mi.” (Job 1:
Ɔda we de fɔ lan bɔt wetin kin apin to pɔsin we dɔn day. Wi kin lan bɔt et pipul dɛn na di Baybul we bin gɛt layf bak.—Rid di bɔks we gɛt di taytul “ Di Baybul Tɔk bɔt Et Pipul dɛn We Bin Gɛt Layf bak.”
Pan ɔl di et pipul dɛn we di Baybul tɔk bɔt we bin gɛt layf bak, di Baybul nɔ tɔk se ɛni wan pan dɛn et pipul ya bin go na ples usay dɛn bin de sɔfa ɔ usay dɛn bin de ɛnjɔy. If dɛn pipul ya we bin gɛt layf bak bin go na ples usay dɛn bin de sɔfa ɔ usay dɛn bin de ɛnjɔy, yu nɔ tink se dɛn fɔ dɔn tɛl pipul dɛn bɔt dat? Ɛn yu nɔ tink se dɛn fɔ dɔn rayt am na di Baybul so dat ɔlman go no bɔt dat? Bɔt di Baybul nɔ tɔk natin bɔt dat. Dɛn et pipul ya we bin gɛt layf bak nɔ bin gɛt natin fɔ se bɔt dis. Wetin mek dɛn nɔ bin gɛt natin fɔ se? Na bikɔs dɛn nɔ bin no natin we dɛn day, i bin jɔs tan lɛk se dɛn de pan dip dip slip. Infakt, na sɔm say dɛn we di Baybul kin tɔk bɔt day, i kin kɔmpia am to slip. Fɔ ɛgzampul, na so di Baybul bin se di tɛm we Devid ɛn Stivin bin day.”—Di Apɔsul Dɛn Wok [Akt] 7:
Us op de fɔ di wan dɛn we dɔn day? Yu tink se dɛn go wek pan dis slip?
^ par. 7 Insay di New World Translation of the Holy Scriptures, dɛn yuz di wɔd “Grev” fɔ gi di minin fɔ di Ibru wɔd “Shiol” ɛn di Grik wɔd “Edis.” Sɔm Baybul dɛn yuz di wɔd “ɛl,” bɔt di Baybul nɔ tich se Gɔd go bɔn pipul dɛn we dɔn day na ɛl faya.
You May Also Like
DI WACHTAWA
Jizɔs Bin Rili Gi Layf Bak to Pipul dɛn We Dɔn Day?
We Jizɔs gi layf bak to pipul dɛn we bin dɔn day wetin dat sho bɔt di tin dɛn we I dɔn prɔmis fɔ di bambay?
