1. Wetin di apɔsul Jɔn bin tɛl Kristian dɛn fɔ tink bɔt? Wetin mek i tɛl dɛn fɔ du dat?

WI FƆ tink siriɔs wan bɔt di tin dɛn we di apɔsul Jɔn rayt na Jɔn In Fɔs Lɛta 3:1. Insay dis Skripchɔ Jɔn tɔk se “si di kayn we aw di Papa dɔn sho se i lɛk wi.” Jɔn bin de tɛl ɔl Kristian dɛn fɔ tink gud wan bɔt di kayn we aw Gɔd lɛk dɛn ɛn di we aw i dɔn sho se i lɛk dɛn. We wi tink gud wan bɔt di kayn we aw Gɔd lɛk wi ɛn aw i dɔn sho se i rili lɛk wi, dat kin mek wi kam nia am ɛn lɛk am mɔ ɛn mɔ.

2. Wetin mek i nɔ kin izi fɔ sɔm pipul dɛn fɔ ɔndastand se Gɔd lɛk dɛn?

² I sɔri fɔ no se sɔm pipul dɛn nɔ ɔndastand aw Gɔd go ebul fɔ lɛk dɛn. Wetin mek dɛn kin fil dis kayn we? Na bikɔs dɛn biliv se Gɔd na pɔsin we dɛn fɔ jɔs fred ɛn obe. Ɔ sɔntɛm dɛn dɔn tich dɛn lay lay tin dɛn we mek dɛn fil se Gɔd wikɛd ɛn i nɔ pɔsibul fɔ lɛk am. Bɔt yu gɛt ɔda pipul dɛn we biliv se Gɔd nɔ de taya fɔ lɛk pɔsin, ɛn dɛn biliv se Gɔd stil lɛk dɛn ilɛksɛf dɛn du gud ɔ dɛn du bad. As yu de stɔdi di Baybul, yu go dɔn kam fɔ lan se lɔv na Jiova in men kwaliti ɛn na dis lɔv bin mek i gi in Pikin fɔ day fɔ wi sin. (Jɔn 3:16; 1 Jɔn 4:8) Bɔt di we aw dɛn mɛn yu ɛn di say we yu kɔmɔt kin mek i nɔ izi fɔ biliv se Gɔd lɛk yu.

3. Wetin ɛp wi fɔ ɔndastand se Gɔd lɛk wi?

 ³ Us we dɛn we Jiova dɔn sho se i lɛk wi? Fɔ gɛt di ansa to dis kwɛstyɔn wi fɔ ɔndastand udat Jiova bi to wi ɛn udat wi bi to Jiova. Wi no se na Jiova mek ɔlman. (Rid Sam 100:3-5.) Na dat mek di Baybul kɔl Adam “Gɔd in pikin,” ɛn we Jizɔs bin de tich in disaypul dɛn aw fɔ pre i bin se dɛn fɔ kɔl Gɔd “wi Papa we de na ɛvin.” (Lyuk 3:38; Mat. 6:9) Jiova na wi Papa bikɔs na in gi wi layf. Di lɔv we de bitwin wi ɛn Jiova fiba di lɔv we de bitwin papa ɛn in pikin. Jiova lɛk wi jɔs lɛk aw papa we gud kin lɛk in pikin dɛn.

4. (a) Aw Jiova difrɛn frɔm mɔtalman papa? (b) Wetin wi go lan bɔt insay dis atikul ɛn di nɛks atikul?

⁴ Mɔtalman papa dɛn nɔ pafɛkt. Ilɛksɛf dɛn tray te dɛn nɔ kin ebul fɔ sho lɔv lɛk aw Jiova kin sho wi lɔv. Infakt, we sɔm pipul dɛn tink bɔt di kayn we aw dɛn papa bin de trit dɛn, i kin mek dɛn fil bad ɛn dis dɔn afɛkt di we aw dɛn kin fil ɛn tink. Ɛn dis we aw sɔm papa dɛn kin trit dɛn pikin dɛn rili bad ɛn sɔri. Bɔt Jiova nɔ tan so. (Sam 27:10) We wi no aw Jiova lɛk ɛn bisin bɔt wi, dat go mek wi kam nia am. (Jems 4:8) Insay dis atikul, wi go tɔk bɔt 4 we dɛn we Jiova de sho se i lɛk wi. Ɛn insay di ɔda atikul wi go tɔk bɔt 4 we dɛn we wi go sho se wi lɛk Jiova.

5. Wetin di apɔsul Pɔl bin tɛl di pipul dɛn na Atɛns bɔt Gɔd?

⁵ We di apɔsul Pɔl bin de na Atɛns, dat na insay Gris, i bin notis se di siti bin ful-ɔp wit lay lay gɔd dɛn ɛn di pipul dɛn biliv se na dɛn gɔd ya gi dɛn layf ɛn ɔl di tin dɛn we de mek dɛn ɛnjɔy layf. Na dis bin mek Pɔl tɔk se: “Di Gɔd we mek di wɔl ɛn ɔl wetin de insay de . . . nain gi ɔlman layf ɛn di briz we dɛn de blo ɛn ɔl ɔda tin dɛn. . . . Na in mek wi gɛt layf ɛn na in mek wi de waka ɛn kɔntinyu fɔ liv.” (Akt 17:24, 25, 28) Fɔ tru, na bikɔs Jiova lɛk wi na dat mek i de gi wi ɔl di “tin dɛn” we go mek wi kɔntinyu fɔ liv. Tink bɔt wetin dis min.

6. Aw di we aw Gɔd mek di wɔl de sho se i lɛk wi? (Luk di pikchɔ nia dis atikul in taytul.)

⁶ Lɛ wi tɔk bɔt dis wɔl we Jiova mek, ɛn we i dɔn gi “to mɔtalman.” (Sam 115:15, 16) Sayɛnsman dɛn dɔn spɛn bɔku bɔku mɔni fɔ go na di ɔda planɛt dɛn fɔ si if ɛni wan pan dɛn de we fiba dis wɔl. Pan ɔl we sayɛnsman dɛn dɔn si bɔku bɔku planɛt dɛn, nɔn pan dɛn planɛt ya nɔ gɛt di tin dɛn we go mek mɔtalman kɔntinyu fɔ liv lɛk aw dis wɔl gɛt dɛn. Pan ɔl di tin dɛn we Gɔd mek, di wɔl rili spɛshal. Jɔs imagin, pan ɔl di bɔku bɔku planɛt dɛn we de, na dis wɔl nɔmɔ Gɔd mek fɔ mɔtalman fɔ de. Jiova nɔ jɔs mek di wɔl fɔ mɔtalman fɔ liv bɔt i mek am fayn fayn wan. I put ɔltin de we mɔtalman nid, ɛn i mek am sef wan fɔ dɛn fɔ de de! (Ayz. 45:18) Dis de sho aw Jiova rili lɛk wi.—Rid Job 38:4, 7; Sam 8:3-5.

7. Aw di we aw Gɔd mek wi, de sho se i rili lɛk wi?

⁷ Pan ɔl we Jiova mek dis wɔndaful ples fɔ wi, i no se fɔ lɛ wi go gladi ɛn satisfay, nɔto tin fɔ it ɛn ɔda tin dɛn nɔmɔ wi nid. We pikin no se in mama ɛn papa lɛk am ɛn dɛn de pe atɛnshɔn to am, dat kin mek i fil sef. Jiova mek mɔtalman lɛk aw i tan, so dat wi go falamakata di we aw i de sho lɔv ɛn di we aw i de kia fɔ wi. (Jɛn. 1:27) Pantap dat Jizɔs tɔk se: “Di wan dɛn we  no se dɛn fɔ lan bɔt Gɔd go gladi.” (Mat. 5:3) Wi Papa we na Jiova rili lɛk wi, na dat mek i de “gi wi ɔl di tin dɛn we wi de ɛnjɔy.” I de gi wi di tin dɛn we wi nid ɛn i de ɛp wi fɔ gɛt tayt padi biznɛs wit am.—1 Tim. 6:17; Sam 145:16.

8. Wetin mek wi fɔ luk to “di Gɔd we de tɔk tru” fɔ sho wi lɔv?

⁸ Papa dɛn lɛk dɛn pikin dɛn ɛn dɛn want fɔ protɛkt dɛn so dat nɔbɔdi nɔ go ful dɛn ɔ lay to dɛn. Bɔt bɔku mama ɛn papa dɛn nɔ ebul fɔ gi dɛn pikin dɛn gud advays bikɔs dɛnsɛf nɔ de fala di advays dɛn we de na Gɔd in Wɔd. Dis dɔn briŋ kɔnfyushɔn ɛn pwɛl at na di famili. (Prɔv. 14:12) Bɔt Jiova in nɔ tan so, in na “di Gɔd we de tɔk tru.” (Sam 31:5) I lɛk in pikin dɛn ɛn i kin gladi fɔ mek di tru tin dɛn we de na in Wɔd, di Baybul gayd dɛn pan ɔl wetin dɛn de du na layf. I kin gladi mɔ we dɛn de wɔship am di rayt we. (Rid Sam 43:3.) Us tru we Jiova dɔn sho wi? Aw dis dɔn sho se i lɛk wi?

9, 10. (a) Aw Jiova dɔn sho se i lɛk wi, we i tɛl wi di tru tin dɛn bɔt insɛf?(b) Aw i dɔn sho se i lɛk wi, we i tɛl wi di tru tin bɔt wisɛf?

⁹ Di fɔs tin we Jiova du na dat i tɛl wi di tru tin dɛn bɔt insɛf. I sho wi in nem, ɛn dis nem de na bɔku say dɛn na di Baybul pas ɛni ɔda nem. We Jiova du dis, i mek wi ebul fɔ kam nia am ɛn i mek wi no am. (Jems 4:8) Jiova sho wi bak di kwaliti dɛn wi i gɛt ɛn di kayn Gɔd we i bi. Di wan ol wɔl de sho se Jiova gɛt pawa ɛn sɛns. I de yuz in Wɔd di Baybul fɔ sho wi bak se i de du tin tret ɛn i rili lɛk wi. (Rom 1:20) Jiova fiba lɛk papa we nɔ jɔs strɔng ɛn gɛt sɛns bɔt i de du tin tret ɛn i gɛt lɔv, ɛn dis dɔn mek am izi fɔ lɛ in pikin dɛn kam nia am mɔ ɛn mɔ.

¹⁰ Fɔ lɛ wi go bɛnifit bak, Jiova tɛl wi di tru tin bɔt wisɛf. I tɛl wi wetin wi fɔ du insay in wan big famili. We wi du wetin i tɛl wi, dat go mek pis ɛn wanwɔd de na in wan big famili. Frɔm wetin wi dɔn lan na di Baybul, wi dɔn kam fɔ no se Gɔd nɔ mek mɔtalman fɔ disayd fɔ dɛnsɛf wetin gud ɛn wetin bad, ɛn if wi nɔ alaw Gɔd fɔ sho wi aw fɔ waka na layf, bad bad tin dɛn go apin to wi. (Jɛr. 10:23) Dis rili impɔtant bikɔs Jiova no wetin gud fɔ wi. Na we wi no se na Gɔd nɔmɔ gɛt di rayt fɔ rul wi na dat go mek wi ɛnjɔy pis ɛn gɛt wanwɔd. Jiova dɔn sho se i rili lɛk wi, bikɔs i dɔn tɛl wi dis tru tin we rili impɔtant!

11. Us prɔmis we Jiova dɔn gi we sho se i rili lɛk wi ɛn i bisin bɔt wi?

¹¹ Papa we lɛk in pikin dɛn kin rili bisin bɔt in pikin dɛn tumara bambay. I kin want lɛ dɛn du bɛtɛ tin na layf. I sɔri fɔ no se bɔku pipul dɛn nɔ no natin bɔt di tumara bambay, dɛn de spɛn ɔl dɛn tɛm fɔ gɛt tin dɛn we nɔ go bɛnifit dɛn. (Sam 90:10) As Gɔd in pikin dɛn, wi no se Jiova rili lɛk wi bikɔs i dɔn prɔmis fɔ mek wi rili ɛnjɔy tumara bambay. Ɛn dis mek wi rili gladi ɛn satisfay wit wi layf.

12. Aw Jiova in advays to Ken ɛn Baruk sho se i lɛk dɛn ɛn i bisin bɔt dɛn?

¹² “Wetin mek yu vɛks so ɛn wetin mek yu at pwɛl? . . . yu nɔ tink se yu go ebul kɔntrol [sin]?” (Jɛn. 4:6, 7) Jiova bin gi dis advays di rayt tɛm ɛn wetin i bin tɔk na tru. So Jiova bin wɔn Ken bikɔs i bin no se Ken want fɔ du sɔntin we bad. I sɔri  fɔ no se, Ken nɔ bin lisin to di wɔnin we Jiova gi am, ɛn i sɔfa fɔ dat. (Jɛn. 4:11-13) We Jɛrimaya in sɛktri, we nem Baruk, bin taya ɛn in at bin pwɛl, Jiova bin gi am advays fɔ ɛp am so dat i go si di prɔblɛm we i gɛt. Baruk nɔ bin tan lɛk Ken bikɔs i bin lisin to Jiova in advays, ɛn i bin sev.—Jɛr. 45:2-5.

13. Wetin mek Jiova kin alaw bad tin fɔ apin to in savant dɛn?

¹³ Pɔl tɔk se: “Jiova de kɔrɛkt di wan dɛn we i lɛk, infakt, i kin pɔnish ɛnibɔdi we i tek as in pikin.” (Ibru 12:6) Bɔt Jiova nɔ jɔs de pɔnish pɔsin we in de kɔrɛkt am. I kin kɔrɛkt pɔsin difrɛn difrɛn we dɛn. Bɔku ɛgzampul dɛn de na di Baybul we sho se Gɔd in savant dɛn bin de gɛt siriɔs prɔblɛm dɛn. Ɛn dɛn prɔblɛm ya we bin de mit dɛn bin de ɛp fɔ kɔrɛkt di mistek dɛn we dɛn bin de mek ɛn ɛp dɛn fɔ tink di rayt we. Fɔ ɛgzampul, di Baybul tɔk se bad bad tin dɛn bin apin to Josɛf, Mozis, ɛn Devid. Bɔt stil Jiova bin ɛp dɛn. We wi rid bɔt aw Jiova bin ɛp dɛn ɛn aw Jiova bin kam fɔ yuz dɛn, i kin mek wi no se Jiova rili lɛk wi ɛn i bisin bɔt wi.—Rid Prɔvabs 3:11, 12.

14. Aw wi go no se Jiova lɛk wi we i de kɔrɛkt wi?

¹⁴ We Jiova de kɔrɛkt wi, i de ɛp wi fɔ si wan ɔda we, we i dɔn sho se lɛk wi. We Jiova kɔrɛkt pɔsin we dɔn du bad ɛn i chenj, “i go fɔgiv am fɔ ɔl wetin i dɔn du.” (Ayz. 55:7) Wetin dis min? Devid bin ɛksplen aw Jiova de fɔgiv. I tɔk se: “I de fɔgiv ɔl yu sin dɛn ɛn mɛn ɔl yu sik dɛn; i de sev yu frɔm di grev ɛn krawn yu  wit in sɔri-at ɛn lɔv we de sote go. Ɛn jɔs lɛk aw di say we di san de kɔmɔt de fa frɔm di say we di san de go dɔŋ, na so i dɔn pul wi sin dɛn fa frɔm wi.” (Sam 103:3, 4, 12) Wi fɔ de lisin to Jiova in advays ɔltɛm, ivin we i de kɔrɛkt wi, ɛn wi fɔ chenj kwik kwik wan. Wi fɔ mɛmba se na bikɔs Jiova lɛk wi na in mek i de kɔrɛkt wi.—Sam 30:5.

15. Wetin sho se Jiova rili valyu in pipul dɛn?

¹⁵ Wan pan di men tin dɛn we ɛni papa we lɛk in pikin dɛn go du na fɔ protɛkt in famili so dat bad tin nɔ go apin to dɛn. Jiova, wi Papa we de na ɛvin de du dis sem tin. Wan pan di man dɛn we rayt di Sam buk bin tɔk bɔt Jiova se: “I de gayd di wan dɛn we nɔ de kɔmɔt biɛn am; I de sev dɛn frɔm di wikɛd wan dɛn an.” (Sam 97:10) Lɛ wi tɔk bɔt dis ɛgzampul. Yu rili valyu yu yay nɔto so? Wɛl, na da sem we de Jiova valyu in pipul dɛn. (Rid Zakaraya 2:8.) Fɔ tru, Jiova rili valyu in pipul dɛn!

16, 17. Tɔk bɔt sɔm we dɛn we Jiova dɔn protɛkt in pipul dɛn trade ɛn na wi yon tɛm.

¹⁶ Wan we aw Jiova de protɛkt in pipul dɛn na we i de yuz in enjɛl dɛn. (Sam 91:11) Trade, wan enjɛl bin kil 185,000 Asirian sojaman dɛn fɔ sev di pipul dɛn we bin de na Jerusɛlɛm. Dis tin bin apin insay wangren nɛt. (2 Kiŋ 19:35) Wan ɔda tɛm, enjɛl dɛn bin dɔn sev di apɔsul Pita, Pɔl, ɛn ɔda Kristian dɛn we bin de na prizin. (Akt 5:18-20; 12:6-11) Insay wi yon tɛm bak, Jiova de du di sem tin. Wan brɔda we di ɛdkwata bin sɛn fɔ go na difrɛn branch ɔfis dɛn, bin go na wan branch ɔfis na Afrika. Dis brɔda bin tɔk se pɔlitiks ɛn rilijɔn dɔn ambɔg di kɔntri. Pipul dɛn bin de fɛt, tif, rep, ɛn kil dɛnsɛf. Ɛn dis bin mek di kɔntri bad-ɔf. Bɔt stil, nɔn pan wi brɔda ɛn sista dɛn nɔ bin day, pan ɔl we bɔku pan dɛn bin lɔs ɔl wetin dɛn gɛt. We dɛn aks dɛn aw dɛn de du, dɛn ɔl smayl ɛn ansa se: “Ɔltin fayn ɛn wi tɛl Jiova tɛnki!” Dɛn si se Gɔd lɛk dɛn.

¹⁷ Sɔntɛm dɛn de, Jiova kin alaw in ɛnimi dɛn fɔ kil in savant dɛn we fetful. Wan ɛgzampul na Stivin. Bɔt stil, Gɔd kin protɛkt ɔl in pipul dɛn. Aw i kin du dat? Na bay we i kin gi dɛn advays di rayt tɛm so dat dɛn go no di kɔni kɔni we dɛn we Setan de yuz. (Ɛfi. 6:10-12) Jiova kin yuz di Baybul, di buk ɛn magazin dɛn we in ɔganayzeshɔn de mek fɔ ɛp wi fɔ no wetin kin apin we wi lɛk mɔni pasmak, we wi de wach dɛn fɛt-fɛt fim ɔ dɛn rud rud fim dɛn, we wi de yuz di Intanɛt di rɔng we ɛn we wi de du ɔda tin dɛn we bad. Wi dɔn si klia wan se, jɔs lɛk ɛni papa we lɛk in pikin dɛn, Jiova de protɛkt in pipul dɛn ɛn i de gi dɛn ɔl wetin dɛn nid.

18. Aw yu fil bɔt di lɛk we Jiova lɛk yu?

¹⁸ Afta we wi dɔn tɔk bɔt sɔm fayn fayn we dɛn we Jiova dɔn sho se i lɛk wi, wi go mɔs dɔn fil lɛk Mozis. We Mozis tink bɔt di lɔng tɛm we i dɔn de sav Jiova, i bin kam fɔ biliv se Jiova lɛk am. Ɛn dis bin mek i tɔk se: “Satisfay wi na mɔnin wit yu lɔv we de sote go, so dat wi go prez yu ɛn gladi ɔl di tɛm we wi de alayf.” (Sam 90:14) Fɔ ɔndastand ɛn si di we aw Jiova lɛk wi, na big big ɔnɔ ɛn blɛsin we wi go gɛt tide. Jɔs lɛk di apɔsul Jɔn, wisɛf go tɔk se: “Si di kayn we aw di Papa dɔn sho se i lɛk wi!”—1 Jɔn 3:1.