Gɔd bin dɔn tɔk to mɔtalman. I bin yuz in oli spirit fɔ tɛl di man dɛn we rayt di Baybul wetin dɛn fɔ rayt. (Pita In Sɛkɛn Lɛta 1:20, 21) Wi go kam fɔ no di tru tin bɔt Gɔd we wi rid di Baybul.—Rid Jɔn 17:17; Sɛkɛn Lɛta To Timoti 3:16.

Insay di Baybul, Gɔd tɛl wi bɔku tin dɛn bɔt insɛf. I tɛl wi wetin mek i mek mɔtalman, wetin i go du fɔ wi, ɛn aw i want wi fɔ liv wi layf. (Di Apɔsul Dɛn Wok [Akt] 17:24-27) Jiova Gɔd want mek wi no di tru tin bɔt am.—Rid Fɔs Lɛta To Timoti 2:3, 4.

Jiova na Gɔd we lɛk wetin tru, na dat mek i sɛn in Pikin, Jizɔs, fɔ kam tich mɔtalman di tru. So, di wan dɛn we bin lɛk wetin tru bin de lisin to Jizɔs. (Jɔn 18:37) Gɔd want lɛ dɛn kayn pipul ya wɔship am.—Rid Jɔn 4:23, 24, NW.

Setan dɔn mek bɔku pipul dɛn nɔ no Gɔd bay we i de mek ɔda pipul dɛn tich lay lay tin dɛn bɔt Gɔd. (Sɛkɛn Lɛta Fɔ Kɔrint 4:3, 4) Pipul dɛn we nɔ lɛk wetin gud kin lɛk fɔ yɛri dɛn lay lay tichin dɛn ya. (Lɛta Fɔ Rom 1:25) Bɔt bɔku bɔku pipul dɛn we rili want fɔ du wetin rayt de fɛn di tru tin bɔt Gɔd bay we dɛn de stɔdi di Baybul.—Rid Di Apɔsul Dɛn Wok [Akt] 17:11.