PANAYOTA bin mɛn na wan ayland we de na di Mɛditarenian Si. We i bin de bitwin 12 to 19 ia, i bin rili lɛk pɔlitiks. Leta, i bi sɛktri fɔ wan pati we de na di vilej usay i bin de. I bin de ivin go na pipul dɛn os dɛn fɔ fɛn mɔni fɔ di pati. As tɛm de go, Panayota bin gens wit di tin dɛn we bin de apin na di pati; di wan dɛn we bin de na di pati bin de sho se dɛn lɛk wan pɔsin pas ɔda pɔsin bikɔs na dɛn fambul, dɛn bin de fɛt fɔ pawa, dɛn bin de agyu, ɛn dɛn bin de jɛlɔs dɛnsɛf pan ɔl we dɛn bin de kɔl dɛnsɛf padi.

Daniɛl bin mɛn na wan famili we de na Ayriland, ɛn dɛn bin rili lɛk Gɔd biznɛs. I sɔri fɔ no se i bin mɛmba di kayn we aw di prist dɛn bin de mek ipokrit. Dɛn bin de drink pasmak, dɛn bin de ple gambul, ɛn dɛn bin de tif mɔni na di kɔlɛkshɔn plet pan ɔl we dɛn bin de prich se di wan dɛn we de du bad go bɔn na ɛl faya.

Jɛfri bin spɛn bɔku tɛm fɔ de advatayz ɛn sɛl fɔ wan intanashɔnal kɔmni we gɛt ɔfis dɛn na Ingland ɛn Amɛrika. Dis kɔmni bin de du biznɛs wit pipul dɛn we gɛt ship. I mɛmba bɔku tɛm we kɔstɔma dɛn ɛn di wan dɛn we de du biznɛs wit dɛn de tɔk bɔt kruk we dɛn we dɛn de tɔk prayz wit di gɔvmɛnt wokman dɛn. Dɛn bin so ipokrit dat dɛn kin gri fɔ tɔk ɛnitin jɔs fɔ mek dɛn gɛt kɔntrakt.

I sɔri fɔ no se nɔto dɛn pipul dɛn ya nɔmɔ dɔn mek ipokrit. Pipul dɛn we ipokrit de ɔlsay na di wɔl; dɛn de na pɔlitiks, rilijɔn, ɛn ivin insay biznɛs. Insay Inglish, di wɔd “ipokrit” kɔmɔt frɔm wan Grik wɔd we min pɔsin we wɛr maks we de tɔk ɔ akt na stej. Afta sɔm tɛm, di wɔd kam fɔ min ɛnibɔdi we de mek di we aw i nɔ bi, jɔs fɔ mek i go go bifo pan wetin i de du ɔ we de du sɔntin fɔ ful ɔda pipul dɛn.

Pɔsin we ipokrit kin mek ɔda pipul dɛn fil bad, i kin mek dɛn vɛks, ɛn i kin ivin mek dɛn kip grɔj na dɛn at. We tin kin dɔn rili mɔna di wan dɛn we dis kin apin to, dɛn kin aks se: “Ipokrit go ɛva dɔn?” Wi gladi fɔ no se Gɔd in Wɔd gi wi gud rizin fɔ biliv se ipokrit go dɔn.

Frɔm wetin di Baybul se nɔto mɔtalman fɔs bigin mek ipokrit bɔt na wan spirit pɔsin we wi nɔ de si na in fɔs bigin mek ipokrit. Afta Gɔd mek Adam ɛn Iv, Setan yuz snek fɔ mek lɛk se in na gud pɔsin so dat i go ful Iv. (Jɛnɛsis 3:1-5) Frɔm da tɛm de, bɔku pipul dɛn dɔn de mek dɛnsɛf lɛk pɔsin we dɛn nɔ rili bi ɛn dɛn de du dis fɔ ful ɔda pipul dɛn so dat dɛn go gɛt wetin dɛn want.

We di Izrɛlayt dɛn bigin fɔ wɔship lay lay gɔd dɛn ɛn nɔ de wɔship Gɔd di rayt we, Gɔd bin de wɔn dɛn  ɔltɛm bɔt wetin go apin to dɛn we dɛn de du dat. Jiova bin mek di prɔfɛt Ayzaya tɔk se: “Dɛn pipul ya kam nia mi wit dɛn mɔt ɛn ɔna mi wit dɛn lip, we dɛn at nɔ de to mi.” (Ayzaya 29:13) We di Izrɛlayt dɛn nɔ bin lɛf fɔ du di bad tin dɛn we dɛn bin de du, Gɔd bin mek ɔda neshɔn dɛn kam pwɛl Jerusɛlɛm ɛn di tɛmpul. Insay di ia 607 bifo Krays, di Babilonian dɛn bin kam pwɛl di siti ɛn insay di ia 70 afta Krays di Roman sojaman dɛn bin kam pwɛl de bak. Fɔ tru, dis de sho se Gɔd nɔ de gri wit pipul dɛn we ipokrit.

Bɔt Gɔd ɛn in Pikin, Jizɔs, rili valyu pipul dɛn we ɔnɛs ɛn we de du wetin rayt. Fɔ ɛgzampul, we Jizɔs bin bigin fɔ prich, wan man we nem Natanyɛl bin go mit am. We Jizɔs si am, i bin tɔk se: “Luk man we kɔmɔt Izrɛl fɔ tru, i nɔ gɛt nɔ bɛnbɛn, i nɔ de mek pɔsin ful.” (Jɔn 1:47) Natanyɛl in ɔda nem na Batalomyu ɛn in na bin wan pan Jizɔs in 12 apɔsul dɛn.—Lyuk 6:13-16.

Jizɔs bin de spɛn tɛm wit in disaypul dɛn, ɛn i bin de tich dɛn fɔ tink di we aw Gɔd de tink. In disaypul dɛn nɔ fɔ mek ipokrit. We Jizɔs bin de kɔndɛm di ipokrit we aw di bigman dɛn pan Gɔd biznɛs bin de du tin da tɛm de, dat na bin wɔnin fɔ in disaypul dɛn. Lɛ wi tɔk smɔl bɔt sɔm pan di tin dɛn we dɛn bin de du.

Dɛn bin de du wetin rayt jɔs fɔ mek pipul dɛn si dɛn. Jizɔs bin tɛl di wan dɛn we de lisin to am se: “Wɛn una de du dɛn tin we una rilijɔn tɛl una fɔ du, una nɔ fɔ du am, so dat ɔlman go si wetin una de du . . . lɛkɛ aw dɛn ipokrit pipul de du.” I tɛl dɛn bak se we dɛn de du gud to pipul dɛn we nɔ gɛt natin, dɛn fɔ du am “sikrit wan.” Dɛn nɔ fɔ pre jɔs fɔ mek ɔda pipul dɛn si dɛn. Da tɛm de di we aw dɛn de wɔship Gɔd go klin ɛn Gɔd go gladi fɔ dɛn.—Matyu 6:1-6.

Dɛn bin kwik fɔ kɔndɛm ɔda pipul dɛn. Jizɔs bin se: “Yu ipokrit! Yu pul da big tik we de insay yu yon yay fɔs, da tɛm de yu go si klia wan fɔ pul di smɔl tik we de insay yu brɔda in yay.” (Matyu 7:5) If ɔltɛm wi de fɛn fɔlt pan ɔda pipul dɛn we i bi se wi gɛt mɔ fɔlt pas dɛn, wi dɔn mek wisɛf pɔsin we wi nɔ rili bi. Bɔt fɔ tru, “ɔlman dɔn sin, dɛn nɔ bi igen lɛkɛ aw dɛn bin fɔ bi, if dɛn bin stil de klos [nia] Gɔd.”—Lɛta Fɔ Rom 3:23.

Dɛn bin de mɛmba bad fɔ ɔda pipul dɛn. Wan tɛm, sɔm pan di Faresi dɛn disaypul dɛn ɛn sɔm Ju pipul dɛn we jɔyn Ɛrɔd in pati bin kam mit Jizɔs fɔ aks am kwɛstyɔn bɔt taks. Dɛn mek lɛk se dɛn de prez Jizɔs, bay we dɛn tɛl am se: “Ticha, wi no se yu de tɔk tru ɛn yu de lan pipul wetin Gɔd want mɔtalman fɔ du.” Dɔn dɛn sɛt trap fɔ am ɛn aks am se: “Wetin yu tink, i rayt fɔ lɛ wi pe taks to di kiŋ na Rom ɔ i nɔ rayt?” Jizɔs ansa dɛn se: “Una na ipokrit, wetin mek una de tray fɔ tek wetin a tɔk kech mi?” Jizɔs bin kɔl dɛn ipokrit ɛn i bin fit dɛn gbɛt bikɔs nɔto ansa dɛn bin want fɔ dɛn kwɛstyɔn, bɔt dɛn bin jɔs de fɛn we fɔ ‘tek wetin i de tɔk kech am.’—Matyu 22:15-22.

Insay Pɛntikɔst 33, we dɛn mek di fɔs Kristian kɔngrigeshɔn, di brɔda ɛn sista dɛn bin de tɔk tru to dɛnsɛf ɛn dɛn bin ɔnɛs. Tru Kristian dɛn bin de tray tranga wan fɔ lɛf fɔ de mek ipokrit. Fɔ ɛgzampul, Pita we na bin wan pan di 12 apɔsul dɛn, bin ɛnkɔrej in kɔmpin Kristian dɛn se “una lɛk una kɔmpin Kristiɛn dɛn fɔ tru.” (Pita In Fɔs Lɛta 1:22) Di apɔsul Pɔl bin ɛnkɔrej Kristian dɛn fɔ lɛk dɛn kɔmpin dɛn wit “klin at,” ɛn dɛn fɔ “de tray fɔ du ɔl wetin rayt, . . . ɛn . . . biliv Gɔd fɔ tru.”—Fɔs Lɛta To Timoti 1:5.

Di tin dɛn we Jizɔs ɛn di apɔsul dɛn bin de tich go bɛnifit wi, jɔs lɛk aw i bin de bɛnifit dɛn fɔstɛm Kristian dɛn. Na dat mek di apɔsul Pɔl bin rayt se: “Wi no se Gɔd in wɔd gɛt layf ɛn i gɛt pawa. In wɔd shap pas sɔd we gɛt tu ɛj. I de go insay insay pɔsin sote i rich di say we in at ɛn in spirit dɛn mit togɛda, lɛkɛ aw sɔd de kɔt bon midul. Na so Gɔd in wɔd dɛn de go insay insay pɔsin in at ɛn sho ɔl  wetin” de de. (Di Ibru Pipul Dɛn 4:12) We bɔku pipul dɛn dɔn kam fɔ no wetin di Baybul de tich ɛn we dɛn de tray fɔ du wetin dɛn de lan, dat dɔn ɛp dɛn fɔ lɛf fɔ mek ipokrit ɛn naw dɛn de du tin di rayt we ɛn dɛn ɔnɛs. Lɛ wi tɔk smɔl bɔt aw dat dɔn ɛp di tri pipul dɛn we wi bigin tɔk bɔt fɔs na dis atikul.

Tin bin chenj fɔ Panayota we i bin gri fɔ atɛnd Jiova Witnɛs dɛn mitin na Kiŋdɔm Ɔl. I nɔ bin si ɛnitin we de sho se dɛn de du wetin rayt fɔ mek ɔda pipul dɛn si dɛn. I bin tɔk se: “A bin si se dɛn rili lɛk dɛnsɛf ɛn dɛn bin rili bisin bɔt dɛn kɔmpin dɛn, ɛn dis na tin we a nɔ bin dɔn si ɔl di tɛm dɛn we a bin de insay pɔlitiks.”

Panayota bin stɔdi di Baybul ɛn leta i baptayz. I dɔn pas 30 ia frɔm we i baptayz. I tɔk se: “Mi layf nɔ bin gɛt minin we a bin de go frɔm os to os de tɔk bɔt pɔlitiks, bɔt frɔm we a bigin prich bɔt Gɔd in Kiŋdɔm we na in nɔmɔ go mek ɔlman we de na di wɔl du tin di rayt we, mi layf dɔn gɛt tru tru minin naw.”

Daniɛl bin de du wɛl ɛn dɛn bin gi am sɔm wok dɛn fɔ du na di kɔngrigeshɔn. Afta sɔm tɛm, i bin mek mistek ɛn in kɔnshɛns bigin fɔ ambɔg am. I bin tɔk se: “We a mɛmba aw pipul dɛn bin de mek ipokrit na di chɔch we a bin de go, a bin no se natin nɔ de fɔ du pas fɔ mek a lɛf fɔ du di wok dɛn we a bin de du na di kɔngrigeshɔn. A nɔ bin ebul fɔ de na di kɔngrigeshɔn wit mi kɔmpin Kristian dɛn ɛn mek dɛn biliv se mi na pɔsin we a nɔ rili bi.”

Wi gladi fɔ no se afta sɔm tɛm we Daniɛl dɔn kɔrɛkt in mistek, i bin si am se i go ebul fɔ bigin du di wok dɛn we i bin de du na di kɔngrigeshɔn bikɔs i bin dɔn gɛt klin kɔnshɛns ɛn i bin gladi fɔ bigin du dɛn bak. Pipul dɛn kin fil fayn we dɛn nɔ de sav Gɔd ipokrit we. Dɛn de lan fɔ pul di “big tik” we de na dɛn yon yay bifo dɛn tray fɔ pul di “smɔl tik” we de na dɛn brɔda in yay.

Jɛfri we na biznɛsman bin tɔk se: “As a de go bifo pan mi Baybul stɔdi, a kam fɔ si se a nɔ go ebul fɔ kɔntinyu fɔ bi di kayn biznɛsman we go rɛdi fɔ tɔk ɛnitin jɔs fɔ mek a gɛt kɔntrakt. A dɔn gɛt klin kɔnshɛns bay we a rid Baybul vas dɛn lɛk Prɔvabs 11:1 we tɔk se: ‘PAPA GƆD et udat de rog pan mɛzhɔmɛnt.’” Jɛfri nɔ bin tan lɛk di wan dɛn we bin aks Jizɔs kwɛstyɔn bɔt taks, bifo dat, i bin kam fɔ lan se i nɔ fɔ de du tin we go sho se i nɔ de trit in kɔmpin Kristian dɛn ɛn di wan dɛn we nɔto Kristian dɛn, fayn.

Bɔku bɔku Jiova Witnɛs dɛn we de difrɛn say dɛn na di wɔl de tray fɔ fala wetin dɛn dɔn lan na di Baybul. Dɛn de tray tranga wan “fɔ liv di nyu layf we Gɔd dɔn gi . . . lɛkɛ aw i want. Pɔsin we liv dis kayn layf go du wetin rayt na Gɔd yay ɛn ɔl wetin Gɔd tɛl am fɔ du.” (Lɛta Fɔ Ɛfisɔs 4:24) I go fayn fɔ mek yu lan mɔ bɔt udat Jiova Witnɛs dɛn bi, wetin dɛn biliv, ɛn aw dɛn go ɛp yu fɔ lan bɔt di nyu wɔl we Gɔd dɔn prɔmis mɔtalman. Insay da nyu wɔl de, “ɔlman go de du wetin rayt” ɛn ipokrit nɔ go de igen.—Pita In Sɛkɛn Lɛta 3:13.