Insay Ɔktoba 9, 2024, di World Wildlife Fund bin pul wan bad ripɔt bɔt aw di tin dɛn we mɔtalman dɛn de du dɔn de afɛkt animal dɛn. I sho se “insay di 50 ia we dɔn pas (frɔm 1970 to 2020), we dɛn kɔnt ɔmɔs animal dɛn de, dɛn si se dɛn dɔn ridyus bay 73 pasɛnt.” Di ripɔt tɔk se: “Wan dawt nɔ de se wetin go apin insay di nɛks fayv ia go sho aw layf go tan lɛk na di wɔl tumara bambay.”

 Bɔku pipul dɛn kin shɔk we dɛn yɛri dɛn kayn ripɔt dɛn ya. Wi lɛk dis wi fayn fayn wɔl ɛn wi nɔ kin gladi fɔ si we animal dɛn de sɔfa. Wi de fil dis kayn we bikɔs Gɔd bin mek wi fɔ kia fɔ di animal dɛn.—Jɛnɛsis 1:​27, 28; Prɔvabs 12:​10.

 Sɔntɛm, yu go de wɔnda, ‘Fɔ se wi go ebul fɔ protɛkt di animal dɛn na dis wɔl? Wetin di Baybul se?’

 Ilɛksɛf wi tray tranga wan fɔ sev di animal dɛn, na Gɔd nɔmɔ go ebul fɔ protɛkt dɛn. Akɔdin to Rɛvɛleshɔn 11:​18, di Baybul bin dɔn tɔk se Gɔd go “pwɛl di wan dɛn we de pwɛl di wɔl.” Da vas de de tich wi tu tin dɛn:

1.  1. Gɔd go stɔp pipul dɛn fɔ mek dɛn nɔ pwɛl di wɔl kpatakpata.

2.  2. Gɔd go du sɔntin jisnɔ. Aw wi no dat? Bikɔs, di tin dɛn we mɔtalman dɛn de du tide ebul fɔ dɔnawe wit animal dɛn pas trade.

 Wetin Gɔd go du fɔ sɔlv dis prɔblɛm? I go yuz in gɔvmɛnt we de na ɛvin, ɔ in Kiŋdɔm fɔ rul oba di wan ol wɔl. (Matyu 6:​10) Da gɔvmɛnt de go tich ɛn tren di wan dɛn we de obe Gɔd fɔ no aw fɔ kia fɔ di animal dɛn ɛn protɛkt dɛn.—Ayzaya 11:​9.