UNA GO DE WACH!
Fɛt-fɛt we Gɛt fɔ Du wit Pɔlitiks—Wetin di Baybul Se?
Fɛt-fɛt we gɛt fɔ du wit pɔlitiks dɔn bɔku ɛn dat de mek pipul dɛn wɔri ɔlsay na di wɔl.
Insay Mɛksiko, dɛn dɔn kil 39 pipul dɛn we bin stand fɔ ilɛkshɔn, ɛn dis dɔn de apin pas aw i bin de apin. Ɛn ɔda fɛt-fɛt we gɛt fɔ du wit pɔlitiks dɔn mek pipul dɛn shɔk ɛn pul dɛn atɛnshɔn frɔm di 2023 to 2024 Ilɛkshɔn.
Dɛn biɛn tɛm ya, di fɛt-fɛt pan pɔlitiks dɔn bɔku insay Yurop, ɛn dɛn ivin mis fɔ kil di praym minista we de na Slovakia insay Me 15, 2024.
Insay Julay 13, 2024, di mis we dɛn mis fɔ kil Dɔnald Trɔmp we na bin di prɛsidɛnt na Amɛrika, bin shek di pipul dɛn na da kɔntri de.
Wetin mek fɛt-fɛt pan pɔlitiks dɔn bɔku tide? Fɔ se i go ɛva dɔn? Wetin di Baybul se?
Di Baybul bin dɔn tɔk bɔt aw pipul dɛn nɔ go gɛt wanwɔd pan pɔlitiks
Di Baybul bin dɔn tɔk se insay wi yon tɛm we na “di las dez,” plɛnti pipul dɛn go gɛt abit dɛn we go mek fɛt-fɛt bɔku ɛn wanwɔd nɔ de.
“Insay di las dez, tin go tranga ɛn bad. Pipul dɛn . . . nɔ go gɛt wan tɛnki, dɛn go de kɔmɔt biɛn dɛn kɔmpin, . . . dɛn nɔ go de agri wit ɔda pipul dɛn, . . . dɛn go wayl, . . . dɛn go bi ɛnimi to dɛn padi dɛn, dɛn go trangayes, dɛn go prawd.”—2 Timoti 3:1-4.
Di Baybul tɔk bak se kɔnfyushɔn lɛk we pipul dɛn de tɔn agens di gɔvmɛnt, fɛt-fɛt ɛn rɔn-rɔn we gɛt fɔ du wit pɔlitiks go de insay wi tɛm. (Lyuk 21:9, futnot) Bɔt, dis fɛt-fɛt ɛn wanwɔd we nɔ de pan pɔlitiks nɔ go de sote go.
Di tɛm we fɛt-fɛt we gɛt fɔ du wit pɔlitiks go dɔn
Di Baybul tɛl wi se Gɔd go dɔnawe wit mɔtalman gɔvmɛnt ɛn put in yon gɔvmɛnt na ɛvin.
“Di Gɔd na ɛvin go mek wan kiŋdɔm we . . . go nyamanyama ɛn dɔnawe wit ɔl dɛn kiŋdɔm ya, ɛn na in wangren go de sote go.”—Daniɛl 2:44.
Gɔd in Kiŋdɔm go mek pipul dɛn gɛt wanwɔd ɛn pis go de ɔlsay na di wɔl.
Dɛn kɔl di kiŋ fɔ da kiŋdɔm de, we na Jizɔs Krays, “Prins ɔf Pis,” ɛn i go mek shɔ se “pis go de na ɔl di say dɛn we i de rul.”—Ayzaya 9:6, 7.
Ivin naw, di wan dɛn we de ɔnda da kiŋdɔm de de lan aw fɔ liv pisful wan. Na dat mek di Baybul se: “Dɛn go nak nak dɛn sɔd dɛn fɔ mek dɛn tɔn to plawshia dɛn, Ɛn dɛn go nak nak dɛn spia dɛn fɔ mek dɛn tɔn to gadin nɛf dɛn. Neshɔn dɛn nɔ go fɛt wɔ wit ɔda neshɔn dɛn, Ɛn dɛn nɔ go lan fɔ fɛt wɔ igen.”—Ayzaya 2:3, 4.
Fɔ lan mɔ, rid di atikul we gɛt di taytul “What Will God’s Kingdom Accomplish?” ɛn wach di vidio we gɛt di taytul Wetin na Gɔd in Kiŋdɔm?