Insay di 2024 Sɔma Olimpik gem dɛn, na lɛk fayv bilyɔn pipul dɛn go gɛt fɔ wach pipul dɛn we kɔmɔt na 206 kɔntri dɛn we de tek pat pan di gem dɛn. Tɔmɔs Bak, we na di prɛsidɛnt fɔ di Intanashɔnal Olimpik Kɔmiti bin tɔk se: “Di tin dɛn we de apin insay dis Olimpik gem dɛn de mek pis ɛn wanwɔd de ɔlsay na di wɔl.” I kɔntinyu fɔ tɔk se: “Lɛ wi gladi fɔ dis Olimpik gem dɛn we de mek wi ɔl kam togɛda as wan ɛn liv wit pis ɛn wanwɔd panɔl we wi difrɛn.”

 Fɔ se di Olimpik gem dɛn go ebul mek dis apin? Fɔ se wi go ɛva gɛt tru tru pis ɛn wanwɔd?

 Dis ia Olimpik gem dɛn de mek pipul dɛn tink se i nɔ jɔs de bɔt spɔt. Di gem dɛn dɔn sho di prɔblɛm dɛn mɔ we kin apin we wi de miks wit wi kɔmpin dɛn ɛn aw pɔlitiks de mek wanwɔd nɔ de. Sɔm pan dɛn prɔblɛm dɛn de na we pipul dɛn de fɛt fɔ dɛn rayt, we pipul dɛn we de fil se dɛn kɔlɔ bɛtɛ pas ɔda wan dɛn kɔlɔ, we pipul dɛn de fil se dɛn rilijɔn bɛtɛ pas ɔda wan dɛn rilijɔn, ɛn we pipul dɛn nɔ de trit dɛn kɔmpin fayn.

 Dɛn kayn intanashɔnal gem dɛn ya lɛk di Olimpik, kin mek pipul dɛn ɛnjɔy dɛnsɛf. Bɔt, dɛn gem ya de sho bak di we aw pipul dɛn de tink ɛn du tin we de mek wanwɔd nɔ de, ɛn bifo i mek tru tru pis ɛn wanwɔd de, i de ɛnkɔrej pipul dɛn fɔ kɔntinyu fɔ mek wanwɔd nɔ de.

 Di Baybul bin dɔn tɔk bɔt di we aw pipul dɛn go biev we go mek i nɔ rili izi fɔ lɛ wanwɔd de na di wɔl tide. (2 Timoti 3:​1-5) Fɔ lan mɔ bɔt dis Baybul prɔfɛsi, rid di atikul we gɛt di taytul “Did the Bible Predict the Way People Think and Act Today?”

 Di Baybul gɛt tru tru op fɔ se pis ɛn wanwɔd go de ɔlsay na di wɔl. I prɔmis wi fɔ se ɔlman na di wɔl go gɛt wanwɔd ɔnda wan gɔvmɛnt we de na ɛvin we na “Gɔd in Kiŋdɔm.”—Lyuk 4:​43; Matyu 6:​10.

 Di Kiŋ fɔ da Kiŋdɔm de we na Jizɔs Krays, go mek pis de ɔlsay na di wɔl. Di Baybul tɔk se:

•   “Di wan dɛn we de du wetin rayt go tan lɛk plant we frɛsh, ɛn bɔku bɔku pis go de.”—Sam 72:​7.

•   “I go sev pɔsin we po we de kray fɔ lɛ dɛn ɛp am . . . I go sev dɛn frɔm di wan dɛn we de sɔprɛs dɛn ɛn di wan dɛn we de mek dɛn sɔfa.”—Sam 72:​12, 14.

 Ivin tide, di tin dɛn we Jizɔs bin tich dɔn mek bɔku bɔku pipul dɛn we de na 239 kɔntri dɛn gɛt wanwɔd. As pipul dɛn we na Kristian, Jiova Witnɛs dɛn ɔlsay na di wɔl dɔn lan fɔ bi pipul dɛn we de liv pisful wan. Fɔ no aw dat pɔsibul, rid di atikul na di Wachtawa we gɛt di taytul “Breaking the Cycle of Hatred.”