Insay 2024, mɔ ilɛkshɔn dɛn go apin ɔlsay na di wɔl pas aw i dɔn ɛva apin insay wangren ia. Bɔt bɔku pipul dɛn nɔ abop pan pɔlitishian dɛn bɛtɛ igen.

•   We dɛn aks bɔku pipul dɛn na Amɛrika, dɛn se bifo di pɔlitishian dɛn du tin dɛn we de bɛnifit pipul dɛn, “bɔku pan dɛn jɔs de du wetin de bɛnifit dɛnsɛf nɔmɔ.” a—Pew Research Center, Sɛptɛmba 19, 2023.

 Ivin bɔku pan di yɔŋ wan dɛn nɔ biliv pɔlitishian dɛn bɛtɛ igen. 

•   “Tide, tineja dɛn bisin mɔ bɔt aw fɔ sɔlv impɔtant prɔblɛm dɛn, bɔt we dɛn aks dɛn, dɛn se pɔlitishian dɛn nɔ de fɛn we fɔ sɔlv dɛn prɔblɛm dɛn ya we dɛn gɛt.”—The New York Times, Janwari 29, 2024.

•   “We dɛn aks yɔŋ pipul dɛn, dɛn kam fɔ no se dɛn biliv wetin pipul dɛn kin tɔk na YouTube pas wetin pɔlitishian dɛn de tɔk.”—The Korea Times, Janwari 22, 2024. 

 Wi fɔ biliv pɔlitishian dɛn fɔ wi bɛtɛ wan tumara bambay? Udat wi go abop pan naw? 

 Pipul dɛn gɛt rayt fɔ tek tɛm wit udat dɛn de abop pan. Di Baybul se “di wan we nɔ gɛt ɛkspiriɛns de biliv ɛnitin we dɛn tɛl am, bɔt di wan we gɛt sɛns de tink bifo i mas.”—Prɔvabs 14:15.

•   Fɔ si advays dɛn we go ɛp yu fɔ no aw fɔ chɛk di infɔmeshɔn dɛn we yu de gɛt, rid di atikul we gɛt di taytul “Protect Yourself From Misinformation.”

 Pantap dat, ivin di pɔlitishian dɛn we ɔnɛs ɛn we gɛt gudat nɔ ebul fɔ du ɔl wetin dɛn want fɔ du. Na dat mek di Baybul wɔn wi se: 

•   “Nɔ abop pan mɔtalman lida dɛn; no mɔtalman nɔ go ebul sev yu.”—Sam 146:3, Gud Nyuz Transleshɔn. 

 Di Baybul ɛksplen se Gɔd dɔn pik wan lida we rili sabi du in wok ɛn we pipul dɛn kin abop pan; da lida de na Jizɔs Krays. (Lyuk 1:32, 33) Jizɔs na di Kiŋ fɔ Gɔd in Kiŋdɔm, we na gɔvmɛnt we de rul frɔm ɛvin.—Matyu 6:10.

•   Lan wetin mek yu go ebul abop pan Jizɔs ɛn wetin i go du fɔ sɔlv di prɔblɛm dɛn we de mit wi. Rid di atikul dɛn we gɛt di taytul “Who Is the King of God’s Kingdom?” ɛn “What Will God’s Kingdom Accomplish?”