We yu lɔs yu wok, dat kin mek yu nɔ gɛt bɛtɛ mɔni, yu kin vɛks, ɛn yu kin wɔri. Lɛ wi tɔk bɔt sɔm prinsipul dɛn frɔm di Baybul we go ɛp yu fɔ bia.

•   Tɔk to ɔda pipul dɛn bɔt aw yu de fil.

   Wetin di Baybul se: “Tru tru padi de sho lɔv ɔltɛm.”—Prɔvabs 17:​17.

   Afta yu lɔs yu wok, sɔntɛm yu go fil bad, vɛks, kɔnfyus, ɔ sɔntɛm yu kin fil se yu dɔn fel. We yu tɔk to yu famili ɛn tayt padi dɛn bɔt aw yu de fil, dɛn go ɛp yu fɔ fil fayn. Sɔntɛm dɛn go gi yu advays we go ɛp yu fɔ gɛt nyu wok.

•   Nɔ wɔri pasmak.

   Wetin di Baybul se: “Una nɔ ɛva wɔri bɔt tumara, bikɔs ɔda tin dɛn go de fɔ wɔri bɔt tumara.”—Matyu 6:​34.

   Di Baybul ɛnkɔrej wi fɔ plan bifo tɛm fɔ sɔntin. (Prɔvabs 21:​5) Bɔt i advays wi bak se wi nɔ fɔ de wɔri pasmak bɔt tumara bambay. Bɔku tɛm, wi kin ɛnd-ɔp de wɔri bɔt tin dɛn we nɔ go ɛva apin. I bɛtɛ fɔ pe atɛnshɔn pan wetin yu ebul fɔ du fɔ wan patikyula de.

   Di Baybul gi ɔda fayn advays bɔt aw yu go bia wit tin dɛn we de mek yu strɛs. Fɔ lan mɔ, rid di atikul we gɛt di taytul “How to Deal With Stress.”

•   Ajɔst di we aw yu de spɛnd mɔni.

   Wetin di Baybul se: “A dɔn lan . . . aw fɔ liv we a . . . gɛt bɔku ɛn we a nɔ gɛt.”—Filipians 4:​12.

   Ajɔst to wetin de apin to yu. Dis min se yu go nid fɔ ajɔst aw yu de spɛnd mɔni so dat yu nɔ go spɛnd pas wetin yu gɛt. Tek tɛm lɛ yu nɔ tek dɛt we yu nɔ nid.—Prɔvabs 22:​7.

   Fɔ lan mɔ bɔt aw fɔ ajɔst aw yu de spɛnd akɔdin to wetin yu gɛt, rid di atikul we gɛt di taytul “How to Live on Less.”

•   Yuz yu tɛm di bɛst we.

   Wetin di Baybul se: “Una go de du tin wit sɛns . . . , ɛn una yuz una tɛm di bɛst we.”—Koloshians 4:​5.

   Pan ɔl we yu nɔ gɛt shɛdul fɔ go wok, kɔntinyu fɔ fala yu nɔmal shɛdul bɔt aw fɔ yuz yu tɛm. We yu de du dat, i go ɛp yu fɔ ɔganayz ɛn fil gud bɔt yusɛf.

•   Rɛdi fɔ ajɔst.

   Wetin di Baybul se: “Pɔsin we de wok tranga wan go bɛnifit.”—Prɔvabs 14:​23.

   Rɛdi fɔ du wok we difrɛn frɔm wetin yu bin de du. Sɔntɛm yu go nid fɔ tink bɔt wok dɛn we nɔ impɔtant ɔ we dɛn nɔ go pe yu rich wetin yu bin de gɛt.

•   Nɔ Giv-ɔp

   Wetin di Baybul se: “Plant yu sid na mɔnin ɛn nɔ mek yu an rɛst te ivintɛm; bikɔs yu nɔ no uswan go bɛtɛ.”—Ɛkliziastis 11:​6.

   Kɔntinyu fɔ luk fɔ wok. Tɛl pipul dɛn se yu de luk fɔ wok. Tɛl yu fambul dɛn, pipul dɛn we yu sabi, di wan dɛn we una ɔl bin de wok, ɛn yu neba dɛn. Chɛk na dɛn ɔfis dɛn we kin fɛn wok fɔ pipul dɛn, advatizmɛnt dɛn, ɛn chɛk na dɛn kɔmni dɛn wɛbsayt if dɛn nid pɔsin fɔ wok. Na fɔ pripia yu maynd fɔ go bɔku intavyu dɛn ɛn go lɛf bɔku aplikeshɔn dɛn bifo yu go ebul fɔ gɛt wok.