Jiova Witnɛs dɛn nɔ de sɛlibret batde bikɔs wi biliv se da kayn sɛlibreshɔn nɔ de mek Gɔd gladi. Pan ɔl we di Baybul nɔ tɛl wi klia wan se wi nɔ fɔ sɛlibret batde, i ɛp wi fɔ tink bɔt sɔm men tin dɛn we gɛt fɔ du wit batde ɛn mek wi ɔndastand aw Gɔd de si dɛn tin dɛn de. Lɛ wi tɔk bɔt 4 pan dɛn tin dɛn de ɛn Baybul prinsipul dɛn we gɛt sɔntin fɔ du wit dat.

1.   Na pegan dɛn fɔs stat fɔ sɛlibret batde. Akɔdin to Funk & Wagnalls Standard Dictionary of Folklore, Mythology, and Legend, dɛn rayt se, dɛn bin stat dɛn sɛlibreshɔn dɛn ya bikɔs dɛn biliv se di tɛm fɔ pɔsin in batde, “ivul spirit dɛn ɛn ɔda tin dɛn kin yuz da chans de fɔ atak di pɔsin we dɛn de sɛlibret in batde; bɔt if in padi dɛn de arawnd ɛn dɛn wish gud tin dɛn fɔ am, dat go ɛp fɔ protɛkt di pɔsin we de sɛlibret in batde.” Wan buk we dɛn kɔl The Lore of Birthdays bin tɔk se trade trade, pɔsin in batde bin “impɔtant fɔ mek dɛn yuz sayɛns fɔ luk di sta dɛn fɔ mek dɛn no wetin go apin na dɛn layf tumara bambay.” Di buk tɔk bak se, “dɛn bin biliv se batde kandul dɛn gɛt spɛshal majik we de mek pɔsin in wish kam tru.”

    Bɔt di Baybul se wi nɔ fɔ yuz majik, wi nɔ fɔ lukin-grɔn, put an pan juju biznɛs, ɔ ɛni pan “dɛn tin ya.” (Ditarɔnɔmi 18:​14; Galeshians 5:​19-​21) Infakt, wan rizin we mek Gɔd bin kɔndɛm wan siti we nem Babiliɔn, na bikɔs di pipul dɛn we bin de de bin de luk di sta dɛn fɔ no wetin go apin tumara bambay, ɛn dat na wan we fɔ lukin-grɔn. (Ayzaya 47:​11-​15) Jiova Witnɛs dɛn nɔ de fɛn fɛn usay ɔl kɔstɔm dɛn kɔmɔt; bɔt if di Skripchɔ dɛn tɛl wi klia wan wetin fɔ du, wi de du am.

2.   Di fɔstɛm Kristian dɛn nɔ bin de sɛlibret batde. The World Book Encyclopedia tɔk se, “di fɔstɛm Kristian dɛn bin fil se fɔ mek pɔsin in batde na tin we pegan dɛn de du.” Di Baybul sho se na di apɔsul dɛn ɛn ɔda wan dɛn we Jizɔs bin tich dayrɛkt wan na dɛn de sɛt di ɛgzampul we ɔl Kristian dɛn fɔ fala.​—2 Tɛsalonians 3:​6.

3.   Di wangren tin we Kristian dɛn fɔ put an pan nɔto batde, bɔt na Jizɔs in day. (Lyuk 22:​17-​20) Dis nɔ fɔ mek wi sɔprayz bikɔs di Baybul se “di de we pɔsin day bɛtɛ pas di de we i bɔn.” (Ɛkliziastis 7:​1) Bay di tɛm we Jizɔs day, i bin dɔn gɛt tayt padi biznɛs wit Gɔd, we mek di de we i day impɔtant mɔ pas di de we i bɔn.​—Ibruz 1:​4.

4.   Di Baybul nɔ ɛva tɔk se pɔsin we de sav Gɔd sɛlibret batde. Nɔto se dɛn fɔgɛt fɔ rayt am, bikɔs di Baybul tɔk bɔt tu pipul dɛn we nɔ de sav Gɔd we bin sɛlibret dɛn batde. Bɔt i nɔ bin tɔk fayn bɔt ɔltu dɛn program dɛn de.​—Jɛnɛsis 40:​20-​22; Mak 6:​21-​29.

 Lɛk ɛni gud mama ɔ papa, Jiova Witnɛs dɛn de sho se dɛn lɛk dɛn pikin dɛn ɛni tɛm insay di ia, bay we dɛn de gi dɛn gift ɛn du tin dɛn fɔ mek dɛn ɛnjɔy dɛnsɛf. Dɛn kin tray fɔ fala Gɔd in pafɛkt ɛgzampul, we i de gi gud tin dɛn to in pikin dɛn ɛnitɛm. (Matyu 7:​11) Di tin dɛn we sɔm Jiova Witnɛs dɛn pikin dɛn tɔk sho se dɛn nɔ fil lɛk dɛn de min ɛnitin:

•   “Yu de gladi mɔ we yu gɛt gift di tɛm we yu nɔ de ɛkspɛkt am.”​—Tami, ej 12.

•   “Pan ɔl we a nɔ kin gɛt prɛzɛnt dɛn di tɛm fɔ mi batde, mi mama ɛn papa kin stil bay gift dɛn fɔ mi ɔda tɛm. A lɛk am da we de bikɔs dɛn kin sɔprayz mi.”​—Grɛgɔri, ej 11.

•   “Yu tink se tɛn minit, af-af kek dɛn, ɛn siŋ na in na pati? Yu fɔ kam na mi os ɛn si wetin na rial pati!”​—Ɛrik, ej 6.