As Jiova Witnɛs dɛn, wi de tray tranga fɔ ɛp wi famili dɛn ɛn wi neba dɛnsɛf yon famili. Wi rɛspɛkt di we aw Gɔd want famili fɔ de. (Jɛnɛsis 2:​21-​24; Lɛta Fɔ Ɛfisɔs 3:​14, 15) Insay di Baybul, fayn advays dɛn de we dɔn ɛp pipul dɛn na difrɛn say dɛn na di wɔl fɔ gɛt gladi at na dɛn famili.

 Wi de tray tranga wan fɔ fala di Baybul in advays bikɔs na dat de ɛp wi fɔ bi gud maredman, gud wɛf ɛn gud mama ɔ papa. (Prɔvabs 31:10-​31; Lɛta Fɔ Ɛfisɔs 5:22–​6:4; Fɔs Lɛta To Timoti 5:8) Di sɛns we de insay di Baybul de mek famili dɛnsɛf we nɔ de na di sem rilijɔn de gɛt gladi at. (Pita In Fɔs Lɛta 3:​1, 2) Luk wetin sɔm pipul dɛn we nɔto Jiova Witnɛs tɔk we dɛn man ɔ wɛf bi Jiova Witnɛs:

•   “Insay di fɔs siks ia we wi mared, na soso plaba ɛn prɔblɛm wi bin de gɛt. Afta Ivɛt dɔn bi wan pan Jiova Witnɛs dɛn, i bigin sho se i lɛk mɔ ɛn i bin de peshɛnt. Di we aw i chenj dɔn rili ɛp fɔ sev wi mared.”​—Klɔrio, frɔm Brazil.

•   “A nɔ bin lɛk we mi man we nem Chansa bigin stɔdi di Baybul wit Jiova Witnɛs dɛn bikɔs a bin tink se dɛn de skata famili dɛn. Bɔt frɔm da tɛm de, a dɔn si se di Baybul dɔn rili ɛp wi mared.”​—Agnɛs, frɔm Zambia.

 We wi de prich, wi de ɛp wi neba dɛn fɔ no se if dɛn fala di Baybul in advays, dat go ɛp dɛn fɔ

•   Fɛn di rayt pɔsin fɔ mared

•   Ebul fɔ bia insay di fɔs ia we yu mared

•   No aw fɔ trit dɛn man ɔ wɛf in fambul dɛn

•   Manej mɔni

•   Lɛf fɔ agyu

•   Fɔgiv

•   Tren pikin dɛn

 Fɔ tru, sɔntɛnde dat kin mek prɔblɛm de. Fɔ ɛgzampul, insay 1998 we dɛn bin kɔnt, ripɔt sho se insay 20 mared os dɛn 1 pan dɛn kin gɛt siriɔs prɔblɛm if di man ɔ wɛf bi Jiova Witnɛs.

 Jizɔs bin dɔn tɔk se di wan dɛn we de fala wetin i de tich, tɛm go kam we dɛn famili go mek dɛn sɔfa. (Matyu 10:32-​36) Wil Durant we na pɔsin we de stɔdi istri bin tɔk se di tɛm we di Roman dɛn bin de rul, “dɛn bin de kɛr Kristian dɛn na kɔt fɔ se dɛn rilijɔn de mek famili dɛn skata,” * ɛn dɛn dɔn kɛr sɔm Jiova Witnɛs dɛn na kɔt fɔ dɛn kayn tin dɛn de. Dis min se na Jiova Witnɛs dɛn de kɔz di prɔblɛm?

 We di European Court of Human Rights bin de jɔj wan kes we dɛn se Jiova Witnɛs dɛn de mek famili dɛn skata, dɛn bin tɔk se di wan dɛn we nɔto Jiova Witnɛs na dɛn kin kɔz di prɔblɛm bikɔs dɛn nɔ wan “gri fɔ rɛspɛkt dɛn fambul in rayt fɔ pik us rilijɔn dɛn want fɔ fala.” Di kɔt tɔk bak se: “Dis na prɔblɛm we kɔmɔn insay famili dɛn we ɔlman nɔ de insay di sem rilijɔn ɛn Jiova Witnɛs dɛnsɛf kin gɛt da kayn prɔblɛm de.” * Pan ɔl we Jiova Witnɛs dɛn fambul dɛn nɔ kin gri fɔ rɛspɛkt dɛn rayt fɔ pik di rilijɔn we dɛn want, dɛn kin stil fala di Baybul in advays we se: “If pɔsin du una bad, una nɔ fɔ tɔn di bad gi am bak. . . . Una fɔ du ɔl wetin una ebul fɔ du so dat una kin de kwayɛt wan wit ɔlman.”​—Lɛta Fɔ Rom 12:17, 18.

 Jiova Witnɛs dɛn de fala di Baybul in advays fɔ mared pɔsin “we biliv di Masta,” we min se yu ɛn di pɔsin we yu de mared fɔ biliv di sem tin. (Fɔs Lɛta Fɔ Kɔrint 7:​39, NW) Di kɔmand gɛt sɔntin fɔ du wit di Baybul ɛn di we aw wi de du tin. Fɔ ɛgzampul, insay wan atikul we nem Journal of Marriage and Family we dɛn mek insay 2010 dɛn bin rayt de se, “rileshɔnship dɛn we di man ɛn di uman de na di sem rilijɔn, de du tin togɛda, ɛn dɛn biliv di sem tin,” kin bɛtɛ pas rileshɔnship we di tu pipul dɛn de du difrɛn tin. *

 Bɔt Jiova Witnɛs dɛn nɔ de ɛkɔrej dɛn mɛmba dɛn fɔ lɛf dɛn man ɔ wɛf bikɔs dɛn nɔto Jiova Witnɛs. Di Baybul se: “If man we na Kristiɛn gɛt wɛf we nɔto Kristiɛn ɛn di wɛf gri fɔ de wit am, di man nɔ fɔ kɛr di wɛf go kot fɔ pat wit am.” (Fɔs Lɛta Fɔ Kɔrint 7:​12, 13) Jiova Witnɛs dɛn de fala dis advays.