Lay lay: Jiova Witnɛs dɛn nɔ de drink mɛrɛsin ɛn dɛn nɔ de go ɔspitul.

 Di tru: Wi de tray tranga wan fɔ kia fɔ wi wɛlbɔdi biznɛs so dat wi ɛn wi famili dɛn nɔ go sik. Ɛnitɛm we wi gɛt siriɔs wɛlbɔdi prɔblɛm, wi kin go to dɔktɔ dɛn we sabi du dɛn wok, fɔ mek dɛn yuz ɔda mɛrɛsin we nɔ gɛt natin fɔ du wit blɔd, fɔ mɛn wi. Wi gladi fɔ ɔl di wɔndaful tritmɛnt dɛn we dɛn de mek. Infakt, dɔktɔ dɛn de yuz naw sɔm tritmɛnt dɛn we nɔ gɛt natin fɔ du wit blɔd, fɔ trit sɔm peshɛnt dɛn. Insay bɔku kɔntri dɛn, peshɛnt dɛn go ebul fɔ avɔyd di prɔblɛm we sɔm pipul dɛn kin gɛt afta dɛn gi dɛn blɔd. Dɛn kin ebul fɔ pik uskayn tritmɛnt fɔ tek we go mek dɛn nɔ gɛt dɛn prɔblɛm ya.

 Lay lay: Jiova Witnɛs dɛn biliv se pɔsin in sik go mɛn if i gɛt fet.

 Di tru: Wi nɔ biliv se pɔsin in fet go ebul mɛn in sik.

 Lay lay: Pɔsin go spɛn plɛnti plɛnti mɔni if i want fɔ avɔyd tritmɛnt dɛn we nɔ gɛt blɔd.

 Di tru: Tritmɛnt dɛn de we nɔ gɛt blɔd ɛn we nɔ dia pasmak. *

 Lay lay: Bɔku bɔku Jiova Witnɛs dɛn, ivin smɔl pikin dɛn, de day ɛvri ia bikɔs dɛn nɔ gri fɔ tek blɔd.

 Di tru: Dat nɔto tru. Dɔktɔ dɛn we de du ɔpreshɔn, kin ebul fɔ du sɔm siriɔs ɔpreshɔn dɛn ɛn nɔ yuz blɔd. Sɔm pan dɛn ɔpreshɔn ya na at ɔpreshɔn, bon ɔpreshɔn, ɔ dɛn kin ivin pul wan pat insay wan pɔsin in bɔdi ɛn put am insay ɔda pɔsin in bɔdi. * Sɔm peshɛnt dɛn, ivin smɔl pikin dɛn, we nɔ gri fɔ tek blɔd kin du wɛl pas di wan dɛn we gri fɔ tek blɔd. * Bɔt rili, nɔbɔdi nɔ de we go tɔk tru tru wan se peshɛnt go day jɔs bikɔs i nɔ gri fɔ tek blɔd ɔ fɔ se i go liv bikɔs i gri fɔ tek blɔd.

 Dis na sɔntin we gɛt fɔ du wit wi padi biznɛs wit Gɔd, nɔto jɔs ɔspitul biznɛs. Insay di Ol ɛn Nyu Tɛstamɛnt, di Baybul tɛl wi klia wan se wi nɔ fɔ tek blɔd. (Jɛnɛsis 9:4; Lɛvitikɔs 17:10; Ditarɔnɔmi 12:23; Akt 15:28, 29) Apat frɔm dat, Gɔd de si blɔd as layf. (Lɛvitikɔs 17:14) So wi nɔ de tek blɔd bikɔs wi want fɔ obe Gɔd ɛn wi want fɔ sho se wi rɛspɛkt am fɔ di layf we i gi wi.

 Trade trade, dɔktɔ dɛn ɛn ɔda pipul dɛn we sabi bɔt ɔspitul biznɛs, bin de tink se na bad tin fɔ mek pɔsin nɔ gri fɔ tek blɔd. Dɛn bin ivin tink se ɛnibɔdi we nɔ gri fɔ tek blɔd, na pɔsin we want fɔ kil insɛf. Bɔt dɛn biɛn tɛm ya, dat dɔn chenj. Fɔ ɛgzampul, insay 2004, wan pat insay wan buk we de tɔk bɔt ɔspitul biznɛs, bin se “i nɔ go te igen, bɔku dɔktɔ dɛn go bigin yuz sɔm pan di we dɛn we dɔktɔ dɛn de yuz fɔ trit Jiova Witnɛs peshɛnt dɛn.” * Insay 2010, wan pat insay wan buk we dɛn kɔl Heart, Lung and Circulation bin tɔk se “dɔktɔ dɛn nɔ go de jɔs du ‘ɔpreshɔn we dɛn nɔ de yuz blɔd’ fɔ J[iova] W[itnɛs dɛn] bɔt dɛn go de yuz am fɔ du bɔku ɔda ɔpreshɔn dɛn.”

 Bɔku dɔktɔ dɛn ɔlsay na di wɔl dɔn de yuz difrɛn we dɛn naw fɔ mek pɔsin nɔ west bɔku blɔd we dɛn de du siriɔs ɔpreshɔn pan am, so dat dɛn nɔ go nid fɔ gi di peshɛnt blɔd. Dɛn de yuz dɛn difrɛn we ya fɔ trit pipul dɛn we de na po kɔntri dɛn ɛn peshɛnt dɛn we nɔto Jiova Witnɛs dɛnsɛf kin aks fɔ mek dɛn yuz am pan dɛn.