Di ɔlide gɛt sɔntin fɔ du wit wetin di Baybul nɔ tich?

 Baybul prinsipul: “Jiova se, ‘So una kɔmɔt midul dɛn, una nɔ gɛt ɛnitin fɔ du wit dɛn, ɛn una lɛf fɔ tɔch di tin we dɔti.’”​—2 Kɔrintians 6:​15-​17.

 Fɔ mek Jiova Witnɛs rili pul an pan ɛni tichin we nɔ klin na Gɔd in yay, dat na, ɛnitin we di Baybul nɔ gri wit, dɛn nɔ de sɛlibret ɔlide dɛn we gɛt dɛn kayn tin dɛn ya we wi de kam tɔk bɔt.

 Ɔlide dɛn we gɛt fɔ du wit fɔ biliv ɔ wɔship ɔda gɔd dɛn. Jizɔs bin se: “Na Jiova yu Gɔd yu fɔ wɔship, ɛn na in nɔmɔ yu fɔ sav.” (Matyu 4:​10) Jiova Witnɛs dɛn de fala dis advays bay we dɛn nɔ de sɛlibret Krismas, Ista, ɔ Nyu Ia, bikɔs dɛn ɔlide dɛn ya gɛt fɔ du wit fɔ wɔship ɔda gɔd dɛn we i bi se na Jiova wangren dɛn fɔ wɔship. Apat frɔm dat, dɛn nɔ de sɛlibret dis ɔlide.

•  Tanksgivin. Dis ɔlide gɛt sɔntin fɔ du wit avɛst sɛlibreshɔn dɛn we dɛn bin de du trade trade fɔ ɔnɔ difrɛn gɔd dɛn. As tɛm de go, “Kristian dɛn bigin fɔ tek pat pan dis tradishɔn we bin dɔn de trade trade.”​—A Great and Godly Adventure​—The Pilgrims and the Myth of the First Thanksgiving.

•  Di ɔlide gɛt fɔ du wit lay lay tichin ɔ fɔ biliv pan lɔk. Di Baybul se “di wan dɛn we de set “tebul fɔ di gɔd we na Gudlɔk” de pat ɔf di wan dɛn we “dɔn lɛf Jiova.” (Ayzaya 65:​11, NWT) So Jiova Witnɛs dɛn nɔ de sɛlibret dis ɔlide:

•  Nyu Ia (Chayniz Nyu Ia ɔ Korian Nyu Ia). “Insay dis tɛm, di men tin we famili dɛn, padi dɛn, ɛn fambul dɛn kin bisin bɔt, na fɔ mek dɛn gɛt gud lɔk, fɔ sho rɛspɛkt to di gɔd ɛn spirit dɛn, ɛn fɔ wish fɔ gud tin insay di ia we de kam.” (Mooncakes and Hungry Ghosts​—Festivals of China) Insay di Korian Nyu Ia, “dɛn kin wɔship di wan we bin dɔn day, dɛn kin du sɔm sɛrimɔni dɛn fɔ drɛb ivul spirit dɛn ɛn fɔ mek dɛn gɛt gud lɔk fɔ di nyu ia we de kam. Ɛn dɛn kin put an pan juju biznɛs bak fɔ no wetin go apin insay di nyu ia.”​—Encyclopedia of New Year’s Holidays Worldwide.

•  Ɔlide dɛn we gɛt fɔ du wit di biliv fɔ se pɔsin in sol nɔ de day. Di Baybul tɔk klia wan se di sol de day. (Izikɛl 18:​4) So Jiova Witnɛs dɛn nɔ de sɛlibret dis ɔlide we de tich se pɔsin in sol nɔ de day:

•  Ɔl Sols De (De fɔ Mɛmba di Wan dɛn We Dɔn Day). Akɔdin to di New Catholic Encyclopedia, “dis na de fɔ mɛmba ɔl di fetful wan dɛn we dɔn day. Frɔm arawnd di ia 500 to 1500 afta Krays, bɔku pipul dɛn bin biliv se di sol dɛn we de na pɔgatri kin apia dis de as gost dɛn, wichman dɛn, frɔg dɛn, ɛn ɔda tin dɛn to pipul dɛn we bin dɔn du dɛn bad di tɛm we dɛn de alayv.”

 Ɔlide dɛn we gɛt fɔ du wit juju biznɛs. Di Baybul se: “Lɛ nɔn pan dɛn nɔ go miks fɔ sakrifays dɛn pikin dɛn na faya, ɔ go miks pan luk grɔn biznɛs, ɔ dɛn majik biznɛs ɔ juju biznɛs, fɔ wek dayman tɔk to am ɛn dɛn wich biznɛs. PAPA GƆD [“Jiova,” NWT] et pipul dɛn we de du dɛn kayn tin dɛn de.” (Ditarɔnɔmi 18:​10-​12) Bikɔs Jiova Witnɛs dɛn nɔ want fɔ gɛt ɛnitin fɔ du wit juju biznɛs, dɛn nɔ de sɛlibret ɛni ɔlide we gɛt fɔ du wit juju biznɛs.

•  Di ɔlide de sɔpɔt difrɛn rilijɔn dɛn we de kam togɛda fɔ wɔship?

•  Baybul prinsipul: “Us biznɛs pɔsin we biliv di Masta gɛt wit pɔsin we nɔ biliv di Masta? Us agrimɛnt Gɔd in tɛmpul gɛt wit aydɔl dɛn?”​—2 Kɔrintians 6:​15-​17.

 Jiova Witnɛs dɛn kin tray tranga wan fɔ gɛt pis wit dɛn neba dɛn ɛn fɔ rɛspɛkt di rayt we ɔlman gɛt fɔ disayd wetin dɛn want fɔ biliv, so dɛn de avɔyd sɛlibreshɔn dɛn we de sɔpɔt difrɛn rilijɔn dɛn we de kam togɛda fɔ wɔship. Dɛn kin du dat dɛn difrɛn we dɛn ya.

•  Sɛlibreshɔn dɛn fɔ pɔsin we de bifo pan Gɔd biznɛs ɔ program dɛn we de mek pipul dɛn we de na difrɛn rilijɔn ɛn we biliv difrɛn tin kam togɛda fɔ wɔship. We Gɔd bin kam wit in pipul dɛn na wan nyu land usay di pipul dɛn we bin de de bin gɛt dɛn yon rilijɔn, i bin tɛl in pipul dɛn se: “Una nɔ tay nɔn bagin wit dɛn, ɔ wit dɛn gɔd dɛn. . . . If una wɔship dɛn gɔd dɛn, nainsay big big trap una go fɔdɔm.” (Ɛksodɔs 23:​32, 33) So Jiova Witnɛs dɛn nɔ de tek pat pan dis kayn ɔlide.

•  Nashɔnal Ripɛntans De. Wan gɔvɛmɛnt wokman tɔk na di Nashɔnal Papwa Nyu Gini nyuzpepa se, “di wan dɛn we de tek pat pan dis program de gri wit di men tin dɛn bɔt Kristian fet.” I tɔk bak se we dɛn de sɛlibret Nashɔnal Ripɛntans De, “i de ɛp fɔ mek pipul dɛn no Kristian prinsipul dɛn na di kɔntri.”

•  Sɛlibreshɔn dɛn we gɛt fɔ du wit tradishɔn dɛn na rilijɔn we di Baybul nɔ gri wit. Jizɔs bin tɛl di bigman dɛn pan Gɔd biznɛs se: “Una dɔn mek Gɔd in wɔd nɔ gɛt wan valyu bikɔs una de fala una tradishɔn dɛn.” I bin tɛl dɛn bak se dɛn wɔship na fɔ natin bikɔs “na wetin mɔtalman tɔk na in dɛn de tich.” (Matyu 15:​6, 9) Bikɔs Jiova Witnɛs dɛn want fɔ fala dis advays, na dat mek dɛn nɔ de put an pan bɔku program dɛn we gɛt fɔ du wit rilijɔn.

 Lɛnt. Dis na tɛm we pipul dɛn kin ripɛnt ɛn fast. Akɔdin to di New Catholic Encyclopedia, dɛn bin stat fɔ du dis “arawnd di ia 301 to di ia 400;” dat na pas 200 we dɛn dɔn fɔ rayt di Baybul. We di Encyclopedia de tɔk bɔt di fɔs de na lɛnt i se, “di de we na Ash Wɛnsde, di prist kin yuz ashis fɔ drɔ krɔs na di parishɔna dɛn fɔɛd. Dis de mɛmba dɛn se dɛn fɔ ripɛnt. Dis na sɔntin we di Katolik chɔch bin stat fɔ du insay di ia 1091.”

•   Di ɔlide de gi prez to mɔtalman, ɔganayzeshɔn, ɔ nashɔnal simbɔl?

•  Baybul prinsipul: “Na dis PAPA GƆD [“Jiova,” NWT] se: ‘Swɛ go mit, di pɔsin we abop pan mɔtalman, we pul in at kɔmɔt to PAPA GƆD [“Jiova,” NWT] ɛn put in at to mɔtalman.’”​—Jɛrimaya 17:​5.

Pan ɔl we Jiova Witnɛs dɛn kin gladi fɔ dɛn kɔmpin mɔtalman ɛn ivin pre fɔ dɛn, dɛn nɔ de tek pat pan dɛn kayn program ɔ sɛlibreshɔn dɛn ya:

•  Ɔlide dɛn we de ɔnɔ wan rula ɔ ɔda impɔtant pɔsin. Di Baybul se: “Pul at pan mɔtalman we nain nos i de blo, aftawɔd, wetin na mɔtalman?” (Ayzaya 2:​22) So fɔ ɛgzampul, Jiova Witnɛs dɛn nɔ de sɛlibret kiŋ, kwin, ɔ prɛsidɛnt in batde.

•  Sɛlibreshɔn fɔ di kɔntri in flag. Jiova Witnɛs dɛn nɔ de sɛlibret Flag De. Wetin mek? Bikɔs di Baybul se: “Una nɔ gɛt ɛnitin fɔ du wit aydɔl dɛn.” (1 Jɔn 5:​21) Tide, bɔku pipul dɛn nɔ de si di flag as aydɔl ɔ sɔntin fɔ wɔship. Bɔt wan man we nem Carlton J. H. Hayes we stɔdi istri bin rayt se: “Di flag na tin we pipul dɛn bin de wɔship.”

 Ɔlide ɔ sɛlibreshɔn dɛn we de prez wan sent. Wetin bin apin we wan man we de fred Gɔd bin butu to di apɔsul Pita? Di Baybul se: “Pita es am ɔp ɛn tɔk se: ‘Grap, misɛf na mɔtalman.’” (Akt 10:​25, 26) If Pita ɔ ɛni ɔda apɔsul nɔ bin gri fɔ mek dɛn gi dɛn spɛshal ɔnɔ ɔ fɔ mek dɛn wɔship dɛn, Jiova Witnɛs dɛn sɛf nɔ de tek pat pan ɛni program we de ɔnɔ pipul dɛn we dɛn tink se na sent. Na dat mek dɛn nɔ de sɛlibret dis ɔlide:

 Ɔl Sents De. “Na big program fɔ ɔnɔ ɔl di sent dɛn . . . Pipul dɛn nɔ no ustɛm dɛn stat dis sɛlibreshɔn.”​—New Catholic Encyclopedia.

 Sɛlibreshɔn we gɛt fɔ du wit pɔlitiks ɔ tin dɛn we pipul dɛn kin du fɔ mek dɛn kɔntri go bifo. Di Baybul se: “I bɛtɛ fɔ abop pan PAPA GƆD [“Jiova,” NWT] . . . pas fɔ abop pan mɔtalman.” (Sam 118:​8, 9) Jiova Witnɛs dɛn nɔ de sɛlibret Youth Day ɔ Women’s Day bikɔs dɛn want fɔ sho se na Gɔd dɛn abop pan fɔ sɔlv di prɔblɛm dɛn na di wɔl nɔto mɔtalman. Na da sem rizin de mek dɛn nɔ de jɔyn Emancipation Day [dat na de we gɔvmɛnt dɛn na sɔm kɔntri dɛn bin disayd fɔ stɔp slev wok]. Bifo dat, dɛn de luk to Gɔd in Kiŋdɔm fɔ sɔlv prɔblɛm dɛn lɛk fɔ trit pipul dɛn fia wan ɛn fɔ lɛf fɔ tek wan kɔlɔ bɛtɛ pas ɔda kɔlɔ.​—Romans 2:​11; 8:​21.

  Di ɔlide de mek i tan lɛk wan kɔntri ɔ wan trayb bɛtɛ pas ɔda wan?

•  Baybul prinsipul: “Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.”​—Akt 10:​34, 35.

•  Pan ɔl we Jiova Witnɛs dɛn lɛk dɛn kɔntri, dɛn de avɔyd sɛlibreshɔn dɛn we de mek i tan lɛk wan kɔntri ɔ trayb bɛtɛ pas ɔda wan dɛn. Na dat mek dɛn nɔ de put an pan dɛn kayn sɛlibreshɔn dɛn ya.

•  Program dɛn we de ɔnɔ sojaman dɛn. Jizɔs nɔ bin de sɔpɔt wɔ, bifo dat i bin tɛl i disaypul dɛn se: “Una fɔ kɔntinyu fɔ lɛk una ɛnimi dɛn ɛn pre fɔ di wan dɛn we de mek una sɔfa.” (Matyu 5:​44) So Jiova Witnɛs dɛn nɔ de put an pan sɛlibreshɔn dɛn we de ɔnɔ sojaman dɛn ɛn dɛn nɔ de sɛlibret dis ɔda ɔlide:

 Veterans Day (Remembrance Day, Remembrance Sunday, or Memorial Day). Dɛn ɔlide dɛn ya de ɔnɔ “ɛkspat sojaman dɛn ɛn sojaman dɛn we dɛn kil we dɛn go fɛt fɔ dɛn kɔntri.”​—Encyclopædia Britannica.

•  Sɛlibreshɔn we gɛt fɔ du wit wan kɔntri in istri ɔ indipɛndɛns. Jizɔs bin tɔk bɔt in disaypul dɛn se: “Dɛn nɔ tan lɛk di pipul dɛn na di wɔl, jɔs lɛk aw a nɔ tan lɛk di pipul dɛn na di wɔl.” (Jɔn 17:​16) Pan ɔl we Jiova Witnɛs dɛn lɛk fɔ lan bɔt dɛn kɔntri in istri, dɛn nɔ de put an pan dis kayn sɛlibreshɔn:

•  Indipɛndɛns De. Na bɔku kɔntri dɛn, dis na pɔblik ɔlide we di kɔntri dɛn kin sɛlibret di tɛm we dɛn gɛt dɛn indipɛndɛns frɔm ɔda kɔntri.”​—Merriam-Webster’s Unabridged Dictionary.

•   Di ɔlide de mek pipul dɛn nɔ kɔntrol dɛnsɛf ɔ biev bad we?

•  Baybul prinsipul: “Di tɛm we dɔn pas dɔn du fɔ una fɔ de du wetin pipul dɛn na ɔda neshɔn dɛn want, we una bin de du dɛn tin we de sho se una nɔ gɛt wan shem ɛn rɛspɛkt, we una nɔ bin ebul fɔ kɔntrol unasɛf pan sɔntin, we una bin de drink pasmak, we una bin de miks pan dɛn wayl pati, pan dɛn pati dɛn fɔ drink pasmak, ɛn pan dɛn dɔti dɔti aydɔl wɔship.”​—1 Pita 4:​3.

•  Jiova Witnɛs dɛn de fala da advays de na dat mek dɛn nɔ de put an pan sɛlibreshɔn we de mek dɛn drink te dɛn chak ɛn we de mek dɛn put an pan wayl pati. Jiova Witnɛs dɛn kin ɛnjɔy fɔ spɛn tɛm wit dɛn padi dɛn, ɛn if dɛn want, dɛn kin disayd fɔ drink smɔl rɔm. Dɛn kin tray tranga wan fɔ fala di Baybul in advays we se: “Ilɛksɛf una de it ɔ drink ɔ una de du ɛni ɔda tin, una du ɔltin fɔ briŋ prez to Gɔd.”​—1 Kɔrintians 10:​31.