Lay lay: Di rizin we mek Jiova Witnɛs dɛn nɔ de sɛlibret Ista na bikɔs dɛn nɔto Kristian.

 Di tru: Wi biliv se na Jizɔs Krays kam sev wi, ɛn wi de tray tranga wan fɔ “liv lɛkɛ aw Krays bin liv.”—Jɔn In Fɔs Lɛta 2:6; Lyuk 2:11.

 Lay lay: Una nɔ biliv se Jizɔs rayz frɔm di grev.

 Di tru: Wi biliv se Gɔd gi Jizɔs layf bak; wi no se na dat fɔ bi di men tin we ɛni Kristian fɔ biliv ɛn wi fɔ prich bɔt dat to pipul dɛn.—Fɔs Lɛta Fɔ Kɔrint 15:3, 4, 12-15.

 Lay lay: Una nɔ bisin if una pikin dɛn nɔ de ɛnjɔy Ista ɔlide.

 Di tru: Wi lɛk wi pikin dɛn—wi de tray tranga wan fɔ mɛn dɛn ɛn ɛp dɛn fɔ mek dɛn go gladi.—Taytɔs 2:4.

•   Ista ɔlide nɔto tin we de na di Baybul.

•   Jizɔs bin tɛl in disaypul dɛn fɔ mɛmba in day, nɔto we i gɛt layf bak. Wi kin du dat bay we wi de du di Mɛmorial fɔ mɛmba Jizɔs in day, akɔdin to di kalɛnda we di Ju pipul dɛn bin de yuz.—Lyuk 22:19, 20.

•   Wi biliv se di tin dɛn we dɛn de du insay Ista, kɔmɔt frɔm pipul dɛn we bin de du mami ɛn dadi biznɛs we dɛn de wɔship lay lay gɔd dɛn. Na dat mek Ista na tin we Gɔd nɔ lɛk. Gɔd se i “nɔ want wan rayval” we wi de wɔship am ɛn i de vɛks we wi de du tin dɛn we i nɔ lɛk, fɔ wɔship am.—Ɛksodɔs 20:5; Fɔs Kiŋ 18:21.

 Wi biliv se di Baybul gri wit di disayd we wi disayd nɔ fɔ sɛlibret Ista, bikɔs i se mek wi ‘gɛda sɛns ɛn tray fɔ si fa,’ i nɔ se mek wi jɔs de fala wetin wi bɔn mit pipul dɛn de du. (Prɔvabs 3:21; Matyu 15:3) Wi go ansa ɛnibɔdi we aks wi bɔt wetin wi biliv bɔt Ista ɛn wi de rɛspɛkt di rayt we ɔlman gɛt fɔ disayd wetin dɛn go du.—Pita In Fɔs Lɛta 3:15.